Malwihu Kufuma Kudi Antañi
‘Nkeñelwinyi’ yikushayi Yehova katataka munyichima yanyuza?
Kutalisha hakutachika kwalukadi lwasweja, Chimwekeshu 17:16, 17 yahosha nawu: “Nseñu 10 nikanyama wazuwa jiwamona, jakamuhela chivumbi, jakamukisañana, jakamuvuula, jakada nyisunyi yindi nawa jakamwocha wejima chikupu nakesi. Muloña Nzambi nachishi munyichima yawu kulonda akoñi mwaya nkeñelu yindi, eña, kulonda ekali nayitoñojoka yoyimu yakuhana wanta wawu kudi owu kanyama wazuwa.” Kunyima, nyikanda yetu yahoshaña nawu “nkeñelu” yikushayi Yehova munyichima yanyuza yidi yakukisañana kudifukula kwakutwamba.
Ilaña, ichi hadi kuhimpika kwantiyishishilu yanichi chalala. “Nkeñelu” yikushayi Yehova munyichima yanyuza yidi yakwila nawu ahani “wanta wawu kudi owu kanyama wazuwa.” Hakwila tutiyishishi chumichi chichakashikijewa, tutalenu malwihu analondelihu.
Anyi anakwimenaku yuma yinashimuniwu muniwu wuprofwetu? “Chivumbi” amutenaña cheñi nawu “Babiloni Muneni”; wemenañaku wanta wamukaayi kejima wakudifukula kwakutwamba. “[Kanyama] wazuwa wuchinana nge-e” wemenañaku mutayi wakuwunda waLeague of Nations watachikili kuzatika mu 1919 nawa wunakutenawu chayinu mpinji nawu United Nations. (Chim. 17:3-5) “Nseñu 10” jemenañaku nfulumendi jejima jañovu jakwashaña iwu kanyama wazuwa.
Wubwambwinyi wekala hakachi kachivumbi nakanyama wazuwa wuchinana nge-e? Chivumbi ‘washakama’ hakanyama wazuwa, nakumukiswila iwu kanyama nikumuluwañesha, kushilahu nikwikala nawanta hadi yena.
Yumanyi yakamumwekena chivumbi? Kanyama wazuwa, hamu nanseñu 10 jamukwashaña, “jakamuhela chivumbi.” Muloña wakumuhela, akapuupa maheta indi nikumushiya nzekesi. Nawa akamwimenaku Yehova kuhitila mukusompesha iwu mumbanda chivumbi, dikwila nawu, akamujilumuna chikupu. (Chim. 17:1; 18:8) Dihakamanina kudifukula kwakutwamba kwejima. Hela chochu, henohu chumichi kanda chimwekani, Yehova wakakojeja nyuza kwila chuma chabulahu dehi kumwekana muchiyuulu chawantu chejima.
Yehova wakakojeja nyuza kwila chumanyi? Wakasha “nkeñelu yindi” munyichima yanseñu 10, kulonda ‘jakamwinki kanyama wazuwa wuchinana nge-e ñovu niwuswa wawu,’ dikwila nawu, United Nations. (Chim. 17:13) Toñojokenu munatalishi chumichi. Komana nfulumendi jawantu jakadifuukwilahu jajeni kumwinka kanyama wazuwa ñovu niwuswa wawu? Inehi! Wuprofwetu wamwekeshaña nawu Nzambi yomweni diyi wakakojeja nyuza kwila mwenimu. (Yish. 21:1; esekejenu Isaya 44:28.) Komana iyi ñovu akayihanaña chovu-chovu? Inehi! Hichuma chakamwekana hohu mukunyakashana. Kuhiñahu iwu kanyama wazuwa akenkawu ñovu haniyi mpinji, wakamwimenaku Yehova kuhitila mukusompesha nyitayi yakudifukula kwakutwamba nawa akayifumishahu yejima.
Hanu dinu, chumanyi chitwatela kukuhwelela kumwekana? Twatela kukuhwelela wanyi kutiya nyuzi yinakuhosha nawu nfulumendi jinatachiki dehi chovu-chovu kukwasha mutayi waUnited Nations. Chuma chitwatela kukuhwelela dichenichi: Neyi mukulabula kwadisu, Yehova wakakojeja nyuza yejima kulonda yikamwinki kanyama wazuwa ñovu jawu. Neyi chumichi chimwekana, dihitwakeluka netu lukadi lwasweja keña lutachiki. Chayinu mpinji, “tutoneña nikuhemba yitoñojoka yetu” muloña yuma yayivulu yikutachika kuhimpika katataka!—1 Tes. 5:6.