“ [Hembenu] Kunuñañana Kwenu Kumwekalaña Naku naSpiritu”
KAPOSTOLU Pawulu wayikonkomweneni akaKristu muEfwesesa nindi atwalekihu “nakudiwunjika nikuditiyilila wumu namukwawu mukukeña, nakufwila chikupu kuhemba kunuñañana [kwawu kwekalañawu] naku naspiritu.”—Efwe. 4:2, 3.
“Kunuñañana” kutwekalaña naku, twekalaña naku “naspiritu.” Ichi chinayi mukwila nawu twekalaña anuñañana muloña wañovu yaNzambi yazatikaña. Hela chochu, kwesekeja nachahosheliyi Pawulu, kunuñañana kwetu kwakeñekaña kukuhemba. Anyi atela kukuhemba? MukaKristu wejima wukweti mudimu ‘wakuhemba kunuñañana kutwekalaña naku naspiritu.’
Chakutalilahu, twili netu mukwenu nayinki motoka yayiha. Hinyi wukwikala namudimu wakuhemba chiwahi iwu motoka? Chakadi nikujina, iyenu. Himunateli kwinkamu nyiloña muntu wayinkeli owu motoka neyi kudi chikuñu chinafwi muloña wakwila munakañanyi kuwuhemba chiwahiku.
Munjila yoyimu, hela chakwila kunuñañana kwetu kwawakaKristu hichawaana chatwinkayi Nzambi, wejima wetu hamuntu-hamuntu twatela kuchihemba chiwahi. Neyi tunakutiyañana wanyi namanakwetu hela muhela, tunateli kudihula netu, ‘Komana inakuzata hakumina ñovu jami kuhemba kunuñañana kwetu kuhitila mukumanisha kukala kunamwekani?’
‘FWILENUÑA CHIKUPU’ KUHEMBA KUNUÑAÑANA
Neyi chahosheliyi Pawulu, mpinji jikwawu twatela kuzata nañovu hakwila tuhembi kunuñañana kutwekalaña naku naspiritu. Twatela kwila mwenimu sweje-e neyi kudi manakwetu hela muhela wunatuneñeshi. Komana kuhemba kunuñañana kwatalisha mukwila nawu mpinji yejima twatela kuya nakumuwana muntu kulonda tuhanjeki nindi hakukala kunamwekani? Inehi. Dihulenu nenu, ‘Komana kuhanjeka haniku kukala kukuleta kuwunda tahindi kukuletesha hohu kukala kuswejeliku?’ Mpinji jikwawu, chuma chachiwahi chitwatela kwila hikudiwulaku hohu, hela kumwanakena muntu.—Yish. 19:11; Maku 11:25.
Dihulenu nenu, ‘Komana kuhanjeka haniku kukala kukuleta kuwunda tahindi kukuletesha hohu kukala kuswejeliku?’
Neyi chasonekeliyi kapostolu Pawulu, tutwalekeñahu “[kuditiyilila] wumu namukwawu mukukeña.” (Efwe. 4:2) Mukanda wumu wahosha haniwu mukuku wamazu nawu anateli cheñi kuwubalumuna nawu “kuyitambwila chochenochu chidiwu.” Ichi chatalisha mukwila nawu twakuhwelela netu akwetu akakwitiya hiyakanshidi, neyi chitwekala. Hela chochu, tunakweseka kuzata nañovu kuvwala “wuntu wawuha.” (Efwe. 4:23, 24) Ilaña, kwosi muntu hela wumu wunateli kwila mwenimu munjila yawaninaku. (Rom. 3:23) Neyi twiteja netu dichitwekala, chikutupelelaña kuditiyilila wumu namukwawu, kudanakena, kushilahu ‘nikuhemba kunuñañana kwetu kutwekalaña naku naspiritu.’
Neyi tumanishaña kukala kutukweti nawakwetu, hela tukumanisha hohu mumuchima wetu, tukutwalekahu kudiluñisha ‘kunuñañana kwetu kutwekalaña naku.’ Izu dachiGiriki kwabalumunawu izu dakwila nawu “kunuñañana” haAEfwesesa 4:3, adibalumuna nawu ‘nyisisa’ haAkolosi 2:19. Nyisisa diyanuñañeshaña ifwaha nefwaha dikwawu. Munjila yoyimu, kuwunda kushilahu nikukeña kutwayikeña amanakwetu, dikwatukwashaña kutwalekahu kudikunda nawena hela chakwila anatuneñeshi chamuchidinyi.
Neyi mukwenu mukakwitiya nayineñeshi, nayihilishi hela nayili chuma chatama, fwilenu kumutiyila wushona chatela mushi hohu muchima hayuma yatama yinakoñiyi. (Kol. 3:12) Chineli wejima wetu twawanina wanyi, chakadi nikujina ninenu mwaneñeshahu dehi muntu. Neyi twanukaña chumichi, chikutukwasha wejima wetu ‘kuhemba kunuñañana kwetu kutwekalaña naku naspiritu.’