“ Eyi Wudi Muntu Wasweja Kulema”!

1-2. Chumanyi chitunateli kwila chikutukwasha kwiluka netu twalema kumesu aYehova?

HAKACHI kawambuña aYehova alema, hekala adimonaña nawu alema wanyi. Hadaha kudi muntu wayileteshaña adimoneña nawu alema wanyi. Komana ninenu dichimwatiyaña? Neyi dichimwatiyaña, munateli kwiluka ñahi nenu mwalema kumesu aYehova?

² Chuma chimu chinateli kuyikwasha hikutaña nsañu yamuBayibolu yamwekeshaña Yehova chakeñañayi nindi tuyimoneña antu. Mwanindi, Yesu, walemesheleña antu nawa wayitiyilileña luwi. Muloña wachumichi, wamwekesheli nindi yena niTata yindi alemesha nankashi antu adizoza nawa adimonaña nawu alema wanyi. (Yow. 5:19; Heb. 1:3) Muchinu chibaaba, tukuhanjeka: (1) Yesu chayikwashiliyi antu kwiluka nawu alema nawa 2) chitunateli kukuhwelela chikupu netu twalema nankashi kumesu aNzambi.—Hag. 2:7.

YESU CHAYIKWASHILIYI ANTU KWILUKA NAWU ALEMA

3. Yesu wayikwashili ñahi antu amuÑaliliya enjileña kudi yena nawu yayikwashi?

³ Halwendu lwindi lwamuchisatu hayiliyi nakushimwina muÑaliliya, antu afumineña kumaluña ashiyashana ahwilileña kudi yena, nakumutiyilila nawa wayuukileña yikatu yashiyashana yadiñawu nayu. Yesu wamweni nindi awa antu “ayikabishileña nikuyuumba chisayikila neyi anyikoku akadi kabiña.” (Mat. 9:36) Ayimweneña kudi anlomboli jawu jakudifukula nawu hiyantu ashalilamu chikupu, nawa ayiteneneña nawu “hiyantu ashiñewa.” (Yow. 7:​47-49) Ilaña Yesu wayilemesheleña kuhitila mukwikala nampinji yakuyitañisha nikuuka nyisoñu yadiñawu nayu. (Mat. 9:35) Kubombelahu, hakwila yakwashi antu amavulu, wadizishili apostolu indi kulonda azateña mudimu wakushimwina nawa wayinkeli wuswa wakuuka nyisoñu niyikatu yashiyashana.—Mat. 10:​5-8.

4. Yumanyi yitunateli kudizila kudi Yesu chayilemesheliyi antiyilili jindi adizoza?

⁴ Muloña wakulemesha nikutoñojokelaku antiyilili jindi, Yesu wamwekesheli nindi yena niTata yindi alemesha antu avula kumonawu nawu alema wanyi kudi akwawu antu. Neyi munakumukalakela Yehova ilaña munakujinoka neyi chakwila mwalema, toñojokenu hanochu Yesu chalemesheliyi antu adizoza akeñeleña kudizila kudi yena. Neyi mwilaña mwenimu, chikuyikwasha kumona nenu mwalema nankashi kumesu aYehova.

5. Lumbululenu kukala kwahitileñamu mumbanda wakuÑaliliya wawaniniyi Yesu.

⁵ Yesu hadizishileña hohu mazaza awantuku, ilaña cheñi wayidizishileña antu nikuyikwasha hamuntu-hamuntu. Chakutalilahu, hampinji yayiliyi nakushimwina muÑaliliya, Yesu wawanini mumbanda wakabakeni nachikatu chakupweka mashi hadi yaaka 12. (Maku 5:25) Chineli ichi chikatu chamuletesheli kwikala wamajilu kwesekeja naNshimbi, muntu wejima wadi kumukwata niyena wadi kwikala wamajilu. Chumichi chatela chamukañesheleña nankashi kudikunda nawantu. Kubombelahu, watwesheleña wanyi kudifukwila hamu nawakwawu kusinagogi hela hampinji yayawija. (Lev. 15:​19, 25) Chakadi nikujina, iwu mumbanda wakabakeni kumujimba nimuyitoñojoka.—Maku 5:26.

6. Mumbanda wapwekeleña mashi amuukili ñahi?

⁶ Iwu mumbanda wakabakeni wakeñeleña nindi amuuki kudi Yesu. Ilaña hashikeneni kumusolomokaku. Muloñadi? Hadaha watiyileña nsonyi muloña wachikatu chadiñayi nachu. Indi kwiji watiyileña woma nindi akumukaana kudi Yesu muloña wadiña namajilu nawa hateleleli kwikala hezaza dawantuku. Dichi wakuminini dakukwata kuchakuvwala chaYesu chahewulu, nakukuhwelela nindi wukukola. (Maku 5:​27, 28) Chikuhwelelu chindi hichayili hohu mumenjiku—amuukili. Kuhiñahu Yesu wehwili kulonda yeluki muntu wunamukwati, nawa iwu mumbanda wetejeli nindi diyi wamukwatili. Yesu welili ñahi hanichi chuma chamwekeni?

7. Yesu wamukwashili ñahi iwu mumbanda wakabakeni nankashi? (Maku 5:34)

⁷ Yesu wamulemesheli iwu mumbanda nikumutiyila luwi. Wamweni nindi “watiyili woma nawa wazaalileña.” (Maku 5:33) Chineli welukili chatiyiliyi, wahosheli nindi munjila yayiwahi nawa yakukolesha. Yesu cheñi wamuteneni iwu mumbanda nindi “mwanami”—izu dinakumwekesha nawu hamulemesheli hohuku, ilaña wamutiyilili luwi nawa wamukeñeli. (Tañenu Maku 5:34.) Iyi diyi vasi hohu yamuBayibolu hatenayi Yesu muntu wamumbanda nindi “mwanami.” Hadaha wazatishili idi izu dadiwahi haniyi mpinji muloña wamweni nindi iwu mumbanda watiyili woma nankashi. Fwikijenu owu muzañalu watiyiliyi iwu mumbanda! Neyi Yesu wahosheli nindi munjila yakukolesha wanyi, iwu mumbanda chadi kufumayi hezaza dawantu nakuya, wadi kwiluka nindi anamuuki kumujimba ilaña wadi kutwalekahu kudinkamu nyiloña. Hela chochu, Yesu wamukwashili iwu mumbanda kudimona nindi himwana walema nankashi kudi Tata yindi wamwiwulu wukweti kukeña.

8. Kukalanyi kwalwishileñayi naku muhela wakuBrazil?

⁸ Nimakonu, ambuña aNzambi amakwawu anakumona kukala kumujimba kunakuyikabakesha muyitoñojoka. Maria,a hipayiniya wampinji yejima wakuBrazil. Hampinji yavwalikiliyi, wavwalikili chakadi nyendu nichikasa chachimunswa. Walumbulwili nindi: “Mpinji yejima anseheleña kushikola muloña wawufwayi wami. Antuumbili majina ankatishileña kumuchima. Nawa mpinji jikwawu niantaña jami elileña yuma yanletesheleña nidimoneña neyi nidi wamukunkulwayi.”

9. Maria amukwashili ñahi kutachika kudimona nindi walema kudi Yehova?

⁹ Chumanyi chamukwashili Maria? Chekaliliyi Chinsahu chaYehova, akwawu akaKristu amukundejeli nikumukwasha kulonda yatachiki kudimona neyi chamumonañawu kudi Yehova. Wahosheli nindi: “Nukutwesha wanyi nikuchinda mapampa anankwashiwu amanakwetu niahela! Namusakililaña Yehova namuchima wami wejima hakunyinka chisaka chakuspiritu chachiwahi ñana.” Maria amukwashili kudi amanakwindi niahela akuspiritu kwiluka nindi walema kumesu aNzambi.

10. Kukalanyi kwahitileñamu Mariya Mandaleni? (Talenu cheñi nyevulu.)

¹⁰ Talenu Yesu chakwashiliyi muntu mukwawu—Mariya Mandaleni. Wadiña nawandemoni 7. (Luka 8:2) Watela welileña yuma munjila yabula kulumbuluka muloña wakumuluwañesha kudi andemoni, nawa chafuminimu, amutondolweleña kudi antu. Haniyi mpinji yakabakeniyi chikupu muchihandilu chindi, watela watiyileña woma nankashi, nawa watoñojokeleña nindi kwosi wamukeña hela wukumukwasha. Chakadi nikujina, Yesu wamufumishili andemoni amukabishileña, nawa iwu mumbanda wekalili kambanji kindi wadihana. Munjilanyi yikwawu Yesu mwamukwashililiyi Mariya Mandaleni kwiluka nindi walema kudi Nzambi?

11. Yesu wamukwashili ñahi Mariya Mandaleni kwiluka nindi wadiña walema kudi Nzambi? (Talenu cheñi nyevulu.)

¹¹ Yesu wamulejeli Mariya Mandaleni nindi yatachiki kuzatila hamu nindi hampinji yayileñawu nakushimwina kumaluña ashiyashana.b Chafuminimu, yuma yatañishileñayi Yesu antu yamukwashileña iwu mumbanda. Yesu wamwekeni cheñi kudi iwu mumbanda hefuku damusañwiliwu. Wadiña hakachi kawatumbanji atachi ahanjekeliyi nawu hadina ifuku. Yesu wamwinkeli nimudimu wakuleja apostolu indi nawu anamusañuli. Yuma yejimiyi yinakumwekesha nawu iwu mumbanda wadiña walema nankashi kudi Yehova!—Yow. 20:​11-18.

12. Lumbululenu yuma yahitilimu Lidia muchihandilu chindi chiyamuletesheli adimoneña nindi kwosi amulemesha.

¹² Neyi chichadiña kudi Mariya Mandaleni, antu amavulu makonu alwishaña nayitoñojoka yakwila nawu ayilemesha wanyi. Lidia, muhela wakuSpain, wahosheli nindi henohu kanda yavwaliki, amama yindi atoñojokeleña jakufumisha ivumu damwimitiliwu. Nihachidiñayi kansi, Lidia wanukaña amama yindi chabulileñawu kumusha maana nichamuhosholeleñawu. Wahosheli nindi: “Chuma chinafwilileña muchihandilu hikummwekeshela kukeña kudi antu nikwikala amabwambu jami. Ilaña natoñojokeleña nami chikutwesheka wanyi kunkeña muniyi njila, muloña amama anlejeleña nawu nidi muntu watama.”

13. Yumanyi yamukwashili Lidia kutachika kudimona nindi walema kudi Yehova?

¹³ Lidia chadiziliyi chalala, kulomba nikudiza nkawindi, kushilahu mazu amawahi niyuma yelileñawu akwawu akaKristu, yamukwashili kwiluka nindi walema kumesu aYehova. Wahosheli nindi: “Nfumwami wanlejaña mpinji yejima nindi wankeña. Mpinji yejima, wanlejaña yilwilu yayiwahi yinekala nayu. Amabwambu jami amakwawu niwena dichanlejañawu.” Kudihu muntu imunakutoñojoka nenu mwatela kumukwasha kulonda eluki nindi walema kumesu aYehova?

CHAKUDIMONA ETU AWENI NEYI CHATUMONAÑAYI YEHOVA

14. Nsona ya 1 Samweli 16:7 yatukwashaña ñahi kwiluka Yehova chamonañayi antu? (Talenu chikasha chinakwila nawu “Muloñadi Yehova Chalemeshelañayi Antu Jindi?”)

¹⁴ Anukenu nenu Yehova hayimonaña neyi chayimonaña kaayiku. (Tañenu 1 Samweli 16:7.) Hayilemeshaña kushindamena hammwekenu yenu, maheta imukweti hela shikola yimwatañaku. (Isa. 55:​8, 9) Dichi dimonenuña kulema kwesekeja nachayimonañayi Yehova, bayi chayimonañawu kudi antu mukaayiku. Munateli kutaña nsañu yamuBayibolu yamwekeshaña Yehova chalemesheliyi antu adimweneña mpinji yikwawu nawu alema wanyi, chidi neyi Elija, Nawomi niHana. Munateli cheñi kusoneka yuma yayimwekenahu dehi muchihandilu chenu yamwekeshaña nawu Yehova wayikeña chikupu nawa wayilemesha. Kubombelahu, munateli kutaña munyikanda yetu nsañu yahosha hachalemena kudimona netu twalema.c

15. Muloñadi Yehova chamumweneniyi Danyeli nindi wadiña “muntu wasweja kulema”? (Danyeli 9:23)

¹⁵ Ilukenu nenu Yehova wayilemesha muloña wakwikala ashinshika. Mpinji yimu, hadaha hadiñayi muyaaka yindi yamuma 90, kaprofwetu Danyeli watiyili ‘kuzeya chikupu’ nawa waneñeli. (Dan. 9:​20, 21) Yehova wamukolesheli ñahi? Nzambi watemesheli kañelu Gabireli nakumwanukisha Danyeli nindi wadiña “muntu wasweja kulema” nawa nindi kulomba kwindi akutiyili. (Tañenu Danyeli 9:23.) Yumanyi yaletesheli Danyeli ekali walema nankashi kumesu aNzambi? Muloña wakeñeli kuloña nawa wadiña washinshika. (Ezek. 14:14) Yehova washili iyi nsañu Mwizu dindi kulonda yitukundejeña. (Rom. 15:4) Yehova watiyililaña cheñi kukulomba kwenu nawa wayilemesha, muloña mwakeña yuma yaloña nawa mwamukalakelaña nakashinshi.—Mika 6:​8, tth.; Heb. 6:10.

16. Yumanyi yinateli kuyikwasha kumumona Yehova nenu hiTata wukweti kukeña?

¹⁶ Mumonenuña Yehova nenu hiTata yenu wayikeña. Nakukeña kuyikwasha, bayi kuwana yiluwa mudi enuku. (Mas. 130:3; Mat. 7:11; Luka 12:​6, 7) Kutoñojoka chikupu hachumichi kunakwashi amavulu adimonaña nawu alema wanyi. Chakutalilahu, talenu chuma chamumwekeneni Michelle, muhela wakuSpain wadimweneña nindi amukeña wanyi nawa wamukunkulwayi muloña wakumuhosha kasawuntu kudi nfumwindi hadi yaaka yayivulu. Wahosheli nindi: “Neyi nitachika kudimona nami nidi wamukunkulwayi, nadifwikijaña Yehova nansendi mumakasa indi nawa nakummwekeshela kukeña nikunkiña.” (Mas. 28:9) Lauren, muhela wakuSouth Africa, wadanukishaña yomweni nindi, “Neyi Yehova wankokeleli kudi yena nanyonji yakukeña, natwalekihu kunswija kwakwihi nayena yaaka yejimiyi nawa wanzatishaña kudizisha antu, dikwila nawu wammonaña nindi nalema nankashi nawa nashikilamu kunzatisha.”—Hos. 11:4.

17. Yumanyi yinateli kuyikwasha kukuhwelela chikupu nenu mukweti wuselewa waYehova? (Isamu 5:12) (Talenu cheñi mwevulu.)

¹⁷ Kuhwelelenu chikupu nenu mukweti wuselewa waYehova. (Tañenu Isamu 5:12.) Davidi wesekejeli wuselewa waYehova “[nankebu] yeneni” yakiñaña antu aloña. Kwiluka nenu mukweti wuselewa waYehova nawa wayikwashaña, kunateli kuyikiña neyi mutachika kujinoka nenu mwalema wanyi. Munateli kwiluka ñahi nenu mukweti wuselewa waYehova? Neyi chitunamoni, Yehova wayikwashaña kwiluka chumichi kuhitila Mwizu dindi. Kubombelahu, wazatishaña akulumpi, amabwambu jenu imwadikunda nawu niantu amakwawu kulonda yayanukisheña nindi mwalema kumesu indi. Munateli kwila ñahi neyi anayikoleshi muniyi njila?

18. Muloñadi chimwatela kubulila kudiwula neyi anayihameki?

¹⁸ Bayi mudiwula neyi anayihameki chakufuma hamuchima kudi antu ayiluka nawa ayikeñaku. Anukenuña nenu Yehova watela diyi wunakuyizatisha hakwila ayikwashi mwiluki nenu wayitiyaña kuwaha. Michelle ashimunawu hakusambila, wahosheli nindi: “Natachiki dehi chovu-chovu kukuhwelela chikupu mazu amawahi alejañawu akwetu. Mpinji jikwawu chankalilaña, ilaña neluki nami ichi dichuma chinakukeñayi Yehova nindi nileña.” Akulumpi anamukwashi Michelle munjila yayiwahi kumona nindi Yehova wamukeña. Chayinu mpinji hipayiniya nawa wazatilaña kwitala mudimu wakudihana wahaBeteli.

19. Muloñadi chimwatela kukuhwelela chikupu nenu mwalema nankashi kumesu aNzambi?

¹⁹ Yesu watwanukishaña nindi twalema nankashi kudi Tata yetu wamwiwulu. (Luka 12:24) Dichi twatela kukuhwelela chikupu netu Yehova watumonaña nindi twalema. Mwani bayi tuvulamena chumichiku! Nawa tuzateña hakumina ñovu jetu kukwasha akwetu kwiluka nawu alema nankashi kumesu aNzambi!