Kubalumuna Kupompa Kweluña kwamu 2020 Kunakwila Nawu ‘Zañalalenuña Mpinji Yejima’!

MuJuly nimuAugust 2020 amanakwetu mukaayi kejima akatalaña kupompa kweluña hampinji yoyimu, hela chakwila chuma chamuchidiwu kanda chimwekaneñahu dehi. Hakwila nawu chumichi chizatiki iku kupompa kwakeñekeleña kukwibalumuna nikukwilekoda mumadimi akubadika ha 500. Kakavulu iwu mudimu wakubalumuna nikulekoda jimpanji nimavidiyo wakeñekaña chaaka nikubadikahu hakwila nawu wumani. Hamuloña wakukala kunaleti musoñu wacoronavirus amanakwetu abalumwineña kupompa kweluña kwamu 2020 kunakuhosha nawu ‘Zañalalenuña Mpinji Yejima’! adiña hohu natukweji tuwaana hela kufunta mwishina hakwila nawu amanishi iwu mudimu wejima.

Amanakwetu atalaña mudimu wakubalumuna nialandaña yuma mukaayi kejima azatilaña hakasanji keneni kamukaayi kejima kawaYinsahu jaYahova akwashiliku iwu mudimu weneni. Amanakwetu atalaña mudimu wakubalumuna amweni nawu akwakubalumuna akeñekeleña yozelu yayivulu hakwila nawu amanishi kuzata iwu mudimu, sweje-e yihoshelu yayiwahi. Amanakwetu alandaña yuma mukaayi kejima afuukwilihu kulanda yihoshelu 1,000 nikuyitemesha kumaluña akushika kwakwihi na 200.

Hakwila abuli kuzatisha mali amavulu nankashi, alandili yihoshelu yayivulu hampinji yimu nikuyitwala kwiluña dimu kulonda ayitemeshi kudi akwakubalumuna mukaayi kejima. Chineli alandili yihoshelu yayivulu mumpinji yimu wuseya wadiña chiwahi kubadika chiwadi kwikala neyi alandileña yimu-yimu dichi alandileña chihoshelu hawuseya wa $170 U.S, munabombeli niwuseya wakuchitemesha

Amanakwetu alandaña yuma mukaayi kejima ateleli kulanda iyi yuma nikuyitemesha muApril nakushika muMay 2020 nawa haniyi mpinji akwakulandisha hiyalandishileña neyi chalandishileñawu kunyimaku muloña waniwu musoñu. Hela chochu, kukumana kwaMay, amanakwetu amavulu mutusanji twakubalumwina, mutusanji twanyitayi nimumaluña amakwawu akubalumwina atambwilili iyi yuma.

Manakwetu Jay Swinney watalaña mudimu wakulanda mukaayi kejima wahosheli nindi: “madipatimenti ahaBeteli atiyañeneña chiwahi nawakwakulandisha muniwu mudimu wejima. Spiritu yaYehova hohu diyi yinateli kutukwasha kuzata iwu mudimu mukunyakashana nikuzatisha chiwahi mali kulonda tuzati nyidimu yamukuloñesha.”

Manakwetu Nicholas Ahladis wazatilaña hamu nawamanakwetu atalaña mudimu wakubalumuna, wahosheli nindi: “Akwakubalumuna abulileña kwenda haniyi mpinji azañaleli chikupu hakutambwila iyi yozelu, Hela chakwila akwakubalumuna adiña iluña dimu wanyi azatilili hamu hakubalumuna jimpanji, yimwenu nitumina mumadimi akubadika ha 500.”

Iyi yihoshelu yalandiliwu yidi hakachi kayuma yayivulu yinaleteshi kupompa kweluña kwamu 2020 kunalwila nawu “Zañalalenuña Mpinji Yejima” kwikaliku nawa amanakwetu niahela mukaayi kejima adiluñishi. Yawaana yimwahanaña kuzatisha jw.org ninjila jikwawu jakuhaninamu diyi yazatishiliwu hakulanda iyi yuma.