Yuma Yatuñiliwu Henohu Musoñu waCorona Kanda

Chineli antu amavulu anakupapatishewa chaaka nichaaka, kunakukeñeka matala akudifukwila amavulu nitusanji. Hakwila iwu mudimu wuzatiki, maDipatimenti atalaña mudimu wakutuña mukaayi kejima afuukwilihu kutuña nikuwahisha maluña akundama kukudifukula kwetu akushika ku 2,700 muchaaka chamudimu cha 2020.a

Ilaña iwu musoñu waCOVID-19 wunaleteshi iwu mudimu kubula kwenda chiwahi. Kometi Yatalaña haMudimu waKupulinta Yezanvu Dalombolaña yemikili nyidimu yayivulu yakutuña mukaayi kejima kulonda akiñi amanakwetu niahela nikwovwahila nshimbi jashiliku nfulumendi. Hela chochu, muchaaka chamudimu cha 2020 atuñili nikuwahisha matala akundama kukudifukula kwetu akushika ku 1,700 henohu iwu musoñu kanda. Kubombelahu twamanishili kuzatila hatusanji twamaneni kubadika ha 100. Talenu tusanji tuyedi tuyamanishiliwu kutuña chitunakwashi amanakwetu.

Kasanji kamutayi kamuCameroon. Kasanji kakakulu kadiña muDouala kadiña kanyanya nawa kakeñekeleña kukitohesha chikupu. Kometi Yatalaña haMudimu waKupulinta yafuukwili nawu akituñululi, ilaña kukituñulula hadi kwiñila mali amavulu kubadika iyazatishiliwu hakukituña. Atoñojokeli cheñi kulanda iluña dacheñi hiyatela kutuñilawu hela kulanda itala kulonda adiwahishi, ilaña yitoñojoka yejimiyi yazatikili wanyi.

Haniyi mpinji, amanakwetu atiyili nawu kukabeta kakuchimunswa kaDouala, kwekalila Itala detu dakupompelamu Kupompa Kweneni nfulumendi yafuukwilihu kupulaku mukwakwa. Mukwakwa wukapeleshaku ñendelu nikuleta yuma yidi neyi menji malayiti niyuma yikwawu yakeñekaña. Iyi diyi yuma yakeñekeleña chikupu hakasanji. Dichi Izanvu Dalombolaña detejeli kutuña kasanji kakaha hachikunku cheluña hekala Itala Deneni daKupompela.

Ayinsahu niantu iyeñijiliwu kuzata iwu mudimu azatilili hamu kutuña aka kasanji, chumichi chaletesheli kuzata mukunyakashana nikuzatisha mali atelela. Hela chochu, aka kasanji keñijili mali akushika ku 2 miliyoni dollars (U.S.) hela chakwila twakuhweleleña kuzatisha mali amavulu kubadika awa. Chisaka chaBeteli chabuukilili hanaka kasanji kakaha henohu musoñu waCOVID-19 kanda.

Amanakwetu azatilaña haBeteli yamuCameroon anazañalali hakushakama nikuzatila mumaluña amawahi nawa anakumona aka kasanji kakaha nawu hichawaana chinayinkiyi Yehova. Adisumbula amu ahosheli nawu, “Tunakukeña kuzata nañovu nikuzatisha chiwahi ichi chawaana.”

Kasanji Kakubalumwina kaTojolabal muMexico (RTO). Hadi yaaka yayivulu, amanakwetu abalumunaña mwidimi daTojolabal azatilileña hakasanji kamutayi kamuCentral America kekala kukamwihi naMbaka yaMexico. Hela chochu, idimi daTojolabal adihoshaña kakavulu kudi antu ashakamaña muAltamirano nimuLas Margaritas hakwenda makilomita kwakwihi na 1,000 kufuma hakasanji (hela mamayilu 620). Dichi chayikalilileña akwakubalumuna kubalumuna neyi chinakuhoshawu antu idi idimi chayinu mpinji. Nawa chakalilileña kasanji kamutayi kuwana amanakwetu niahela ashikahu atela kuzataku mudimu wakubalumuna idi idimi niatela kukwatawu mazu.

Muloña waniku kukala, Kometi Yasonekaña Yezanvu Dalombolaña yakeñeleña kubuukisha idi izanvu dawakwakubalumuna nakuditwala kwiluña kuyahoshañawu idimi daTojolabal. Hakwila eli mwenimu, kasanji kamutayi kafuukwilihu kulanda itala nikudiwahisha. Kulanda nikuwahisha kwadi kwiñija mali amavulu kubadika iyadi kuzatishawu kukutuña hela kusonkela tusanji.

Mukwakubalumuna wumu walumbulwili iyi ntanjikilu chiyinamukwashi, wahosheli nindi: “Hadi yaaka 10 yinazati neyi mukwakubalumuna hakasanji, hinawaninihu hela chisaka chimu chahoshaña idi idimiku. Chayinu mpinji kasanji ketu kakubalumwina kadi mwiluña muyahoshañawu idimi daTojolabal. Nahanjekaña nawantu ahoshaña idimi daTojolabal mafuku ejima. Chumichi chinankwashi kwilukisha idi idimi nawa ninzatilu yami yinawahiliku.”

Nyidimu Yakuzata muChaaka chaMudimu cha 2021

Muchaaka chamudimu cha 2021, tunakufwila kutuña tusanji twakubalumwina 75 nimatala mwakudizishila Bayibolu neyi yuma yikala chiwahi. Tukutwalekahu namudimu wakutuña tusanji twamaneni 8 kushilahu nikasanji kakaha kamukaayi kejima kuRamapo muNew York, nikubuukisha kasanji kamuArgentina nikamuItaly. Kubombelahu, Matala aWanta akushika ku 1,000 anakukeñeka, maluña akudifukwilamu akushika ku 6,000 itunakuzatisha chayinu mpinji adi chiwahi wanyi dichi kunakukeñeka kutuña acheñi nawa Matala aWanta 4,000 anakukeñeka kuyituñulula hela kuyiwahisha.

Mali itwazatishaña muniyi nyidimu yakutuña nikutuñulula afumaña kudihi? Manakwetu Lázaro González, membala wamuKometi yaKasanji kaMutayi kamuCentral America wakwili ilu lwihu hiyahanjekeleñawu hamudimu wakutuña Kasanji kaKubalumwina kaTojolabal. Wahosheli nindi, “Mwiluña detu hitukweti mali amavulu akuzata nachu iwu mudimuku. Hitwadi kutwesha kuyituñila amanakwetu ahoshaña madimi amboka-mboka mudinu ituña detu tusanji twakubalumwina chakadi wukwashu wawamanakwetu mukaayi kejimaku. Mali ahanañawu amanakwetu mukaayi kejima anatukwashi kulonda tutuñi tusanji twawakwakubalumuna mumaluña mwahoshañawu idimi dawu. Tunakuyisakilila chikupu amanakwetu mukaayi kejima hayawaana yahanañawu chakudikeñela.” Tunakutwesha kuzata iyi nyidimu yejima yakutuña muloña wayawaana yimwahanaña yakukwasha mudimu wamukaayi kejima, iyi yawaana yayivulu ayihaninaña hanasonekiwu nawu donate.jw.org.