Kushindulula Watachi
13 Davidi wehujoleli antwamina amakombakaji niajinkulakaji nianlomboli ejima.+ 2 Dichi Davidi walejeli chipompelu chawaIsarela chejima nindi: “Neyi munamoni nenu chinawahi kudi enu nawa chetejewa kudi Yehova Nzambi yetu, tutemeshenu mazu kudi amanakwetu anashali mumaluña ejima amuIsarela nikudi atupristu nikudi aLevi adi munyisumba yawu+ yidi namaluña akudiishilamu yimuna kulonda enzi nakudibomba nanetu. 3 Nawa tufuntishenu Chimbañu+ chaNzambi yetu.” Muloña mumafuku aSawulu achakameneni wanyi.+ 4 Chipompelu chejima chetejeli nawu chikukoñamu, muloña antu ejima amweni nawu chidi hohu chiwahi. 5 Dichi Davidi wapompesheli chipompelu chawaIsarela chejima, kufuma kukaloña* kaEjipitu ndo-o nikuLebo Hamati,*+ kulonda aleti Chimbañu chaNzambi walala kufuma kuKiriyati Yeyarimi.+
6 Davidi hamu nawaIsarela ejima akandukili nakuya kuBayala,+ kuKiriyati Yeyarimi musumba wekala muYuda kulonda akasendi Chimbañu chaNzambi walala kwenoku, Yehova, washakama hetanda hewulu* dawakerubi.+ Kunichi chimbañu dikwateneneneñawu antu ijina dindi. 7 Hela chochu, ashili Chimbañu chaNzambi walala hetemba dadiha,+ achisendeli kufuma kwitala daAbinadabi nawa Uza niAhiyo diwu alombweleña idi itemba.+ 8 Davidi niaIsarela ejima adiña nakuzañajala kumesu aNzambi walala nañovu jawu jejima, iku anakwimba tumina, tudada, yisanji yikwawu yanyonji, ñoma janyanya,*+ yifwoyu+ nijimpuña.+ 9 Ilaña chashikiliwu kuwuhulilu waKidoni, Uza wolweli chikasa chindi nakukwata Chimbañu, muloña añombi akeñeleña kuchihinuna. 10 Hohenohu, Yehova wamuzuwilili Uza, nawa wamubabesheli muloña wakwolola chikasa chindi nakukwata Chimbañu,+ dichi wafwilili hohenohu kumesu aNzambi.+ 11 Ilaña Davidi wahilili* nanochu chamuzuwililiwu Uza kudi Yehova; nawa adina iluña aditenaña nawu Perezi Uza* kushika nikulelu.
12 Dichi Davidi wamutiyili Nzambi walala woma hanodu ifuku nawa wahosheli nindi: “Indi Chimbañu chaNzambi walala nukuchileta ñahi?”+ 13 Davidi haleteli Chimbañu mwiluña mwashakamineñayi muMusumba waDavidiku, ilaña walejeli antu kulonda achitwali kwitala daObedi Edomi wakuGati. 14 Chimbañu chaNzambi walala chadiña nawantu amwitala daObedi Edomi, chashakamini hetala dindi hadi tukweji tusatu, nawa Yehova watwalekelihu kukiswila amwitala daObedi Edomi niyuma yejima yadiñayi nayu.+