Maku
8 Mumafuku wenowu, kwadiña cheñi izaza deneni dawantu nawa yakuda yayimanini. Dichi Yesu watambikili atumbanji twindi kwinza kudi yena nakuyileja nindi: 2 “Ami natiyili wushona izaza dawantu, muloña anashakami nanami mafuku asatu nawa yakuda yinayimani. 3 Neyi niyili nami ayi kumatala awu nanzala,* akufwa chinzeya munjila nawa amu ashakamaña kwakulehi.” 4 Ilaña atumbanji twindi amwakwili nawu: “Kudihi kwatela kuwanayi muntu mankendi amavulu akudiisha awa antu kudinu iluña kwabula antu?” 5 Chatiyiliyi chumichi, wayihwili nindi: “Mukweti mankendi añahi?” Amwakwili nawu: “Tukweti mankendi 7.” 6 Dichi walejeli izaza dawantu nindi ashakami heseki. Kuhiñahu wanoneli owu mankendi 7, chalombeliyi nakusakilila, wahumwini owu mankendi nakwinka atumbanji twindi, niwena enkeli izaza dawantu. 7 Adiña cheñi nanshi janyanya jantesha, chalombeliyi, wayilejeli nindi nijena enki izaza dawantu. 8 Dichi adiili nawa ekutili chakwila anoneli yakuda yashalilihu nakuyisha muyimpaya 7 nawa yenzeli* to-o. 9 Adiña amayala kwakwihi na 4,000. Kuhiñahu wayilejeli nindi ayi kwawu.
10 Hohenohu wakandamini muwatu nawatumbanji twindi nakuya kwiluña damuDalamanuta. 11 Kwenoku, aFwarisi enjili nawa atachikili kuditaadikisha nindi nawu yayimwekesheli chinjikijilu chakufuma mwiwulu kulonda amweseki. 12 Dichi wadishishimwini chikupu nakuhosha nindi: “Muloñadi idi ikiñu chidinakukeñela chinjikijilu? Inakuhosha chalala nami, kwosi chinjikijilu chakadimwekeshelawuku.” 13 Chamanishiliyi kuhosha mwenimu, wayishiyili, wakandamini cheñi muwatu nakuya kuchikumu chakwishinadi.
14 Ilaña atumbanji avulameneniku kusenda mankendi, asendeli hohu dinkendi dimu muwatu. 15 Kuhiñahu, wayisoñamishili chakadi kuyihita mumbadi nindi: “Tonenuña nawa babalenu neluñi dawaFwarisi niiluñi daHerodi.” 16 Hohenohu atachikili kuditaadikisha mulwawu hamuloña wabula kusendelawu mankendi. 17 Chayimweniyi anakuditaadikisha, wayihwili nindi: “Muloñadi chimunakuditaadikishila hamuloña wakwila himwasenda mankendiku? Komana nihanu kanda mwiluki nikutiyisha muchatalisha? Komana nyichima yenu nihanu kanda yiluki? 18 ‘Mesu mukweti, komana himwamonañaku? Matu mukweti, komana himwatiyañaku?’ Komana munakwanuka wanyi 19 mankendi 5 inahumwini adiiliwu kudi amayala 5,000? Nawa yimpaya yiñahi yayakuda yashalilihu yimwasendeli?”* Wena amwakwili nawu; “Yimpaya 12.” 20 “Chinahumwini mankendi 7 adiiliwu kudi amayala 4,000, yimpaya yiñahi yimwasendeli yenzeli* to-o nayakuda yashalilihu?” Wena amwakwili nawu: “Yimpaya 7.” 21 Hohenohu wayihwili nindi: “Komana nihanu kanda mwiluki muchatalisha?”
22 Kuhiñahu ayili kuBetesayida. Kwenoku antu amuleteleli Yesu iyala mputamesu nawa amulembeleli nawu yamukwati. 23 Dichi, wamukwatili iyala mputamesu kuchikasa nakumwidisha hanji yamukala. Chamufwijililiyi iwu iyala mazeñi mumesu, wamunañikili makasa nakumwihula nindi: “Yumanyi yiwunakumona?” 24 Iwu iyala wenukili nakuhosha nindi: “Inakumona antu, ilaña anakumwekana neyi nyitondu yinakwenda.” 25 Kuhiñahu, wakwatili cheñi hamesu aniwu iyala, iwu iyala wakoleli, watachikili kumona yuma yejima chachiwahi. 26 Dichi wamulejeli kuya kwitala nawa wamulejeli nindi: “Bayi wiñila mumukalaku.”
27 Yesu niatumbanji twindi ayili munyikala yamuKesareya Fwilipi, chayileñawu watachikili kuyihula atumbanji twindi nindi: “Indi antu ahoshaña nawu yaminyi?” 28 Wena amwakwili nawu: “Yowanu Mupapatishi, amakwawu ahoshaña nawu Elija, amakwawu niwena nawu wumu wahadi atuprofwetu.” 29 Wayihwili cheñi atumbanji nindi: “Indi enu mwahoshaña nenu yaminyi?” Petulu wamwakwili nindi: “Yeyi Kristu.” 30 Muloña wachumichi, wayikonkomweneni nindi bayi alejaku muntuku. 31 Watachikili cheñi kuyileja nindi Mwana kamuntu watela kuhita mumakabi amavulu nakumukaana kudi akulumpi niakulumpi jawatupristu niansoneki nikumujaha nawa hefuku damuchisatu akamusañula. 32 Chalala, wahosheli awa mazu chakadi kuhita mumbadi. Ilaña Petulu wamutwalili hambadi nawa watachikili kumuhosha. 33 Dichi wabalumukili nakutala atumbanji twindi, wamuzuwilili Petulu nindi: “Eyi Satana, hitaku kunyima yami! muloña eyi watoñojokaña yitoñojoka yawantu bayi yitoñojoka yaNzambiku.”
34 Kuhiñahu, watambikili izaza dawantu niatumbanji twindi kwinza kwadiñayi nakuyileja nindi: “Neyi muntu nakukeña kunlondela, yadibondi yomweni nakusenda mutondu windi wakuyandishila* nawa yatwalekihu kunlondela. 35 Muloña muntu wejima wunakukeña kwamwina wumi windi, wakawujimbesha, hakwila muntu wejima wukujimbesha wumi windi kukoola ami nihamuloña wansañu yayiwahi, wakawamwina. 36 Kuhosha hohu chalala, chumanyi chikuwaninamu muntu neyi yaheta kaayi kejima ilaña yajimbesha wumi windi? 37 Chumanyi chinateli kuhimpayi muntu nawumi windi? 38 Muloña muntu wejima watiyaña nsonyi kwikala kambanji kami nawa wabulaña kukuhwelela mazu ami mudinu ikiñu dabula kushinshika nawa datama, Mwana kamuntu niyena hampinji yakenzayi mukulema kwaTata yindi hamu nawañelu ajila, wakamutiyila nsonyi owu muntu.”