Maku

9 Kuhiñahu, wayilejeli nindi: “Inakuyileja chalala nami, hakachi kanawa antu anemani hanu, hadi amu akabula kufwa sampu asambila kumona Wanta waNzambi wunatachiki dehi kuyuula.” 2 Chimwahitili mafuku 6, Yesu wasendeli Petulu, Yakoba niYowanu nakuyitwala hampidi yayilehi kwakankawawu. Kwenoku mmwekenu yindi yahimpikili iku anakumonaku; 3 yakuvwala yindi yahewulu yatachikili kutoñeka, yatookeli nankashi chakwila kwosi mukwakukosa yakuvwala hanu hamaseki wunateli kuyitookesha neyi chiyatookeliku. 4 Cheñi, amweni Elija niMosi anakuhanjeka naYesu. 5 Kuhiñahu, Petulu wamulejeli Yesu nindi: “Rabi, kunu kwakuwahi etu kushakama. Dichi tulemenu matenti asatu, dimu deyi, dikwawu daMosi nawa dikwawu daElija.” 6 Kafwampi, Petulu helukili mazu akuhoshaku, muloña atiyili woma nankashi. 7 Dichi kwenjili ivu, dayibutili nawa atiyili izu dafumini munodu ivu nadu: “Iwu diyi Mwanami, inakeña. Mutiyililenu.” 8 Hohenohu atachikili kutalatala ilaña hiyamwenihu muntu mukwawu wadiña nawena cheñiku, chiña Yesu hohu.

9 Chakunkumukileñawu kufuma hampidi, wayikonkomweneni nindi bayi alejaku muntu chuma chamweniwuku, sampu Mwana kamuntu anamusañuli kufuma mudi afu. 10 Dichi ahembeli mazu ayilejeliyi kumuchima,* ilaña ahanjekeleña mulwawu mwatalishili kusañuka kufuma mudi afu. 11 Atachikili kumwihula nawu: “Muloñadi ansoneki chahoshelañawu nawu Elija watela kwinzañahu dehi?” 12 Yena wayilili nindi: “Elija watela kwinzañahu dehi kulonda yafuntishi yuma yejima; hanu dinu muloñadi chasonekelawu nawu Mwana kamuntu watela kumona makabi nikumukaana? 13 Ilaña inakuyileja nami Elija wenza dehi nawa amukoñeli mwejima mwakeñeliwu kumukoña neyi chochasonekawu hadi yena.”

14 Chafuntiliwu kwadiña atumbanji amakwawu, amweni izaza deneni dawantu dinayinyeñumuki, hadiña niansoneki aditaadikishileña nawu. 15 Ilaña izaza dawantu dejima chidamumweni, dahayamini nankashi nawa datemukilili kwadiñayi nakumwimusha. 16 Dichi wayihwili nindi: “Munakuditaadikishiladi nawu?” 17 Wumu wadiña hanidi izaza wamwakwili nindi: “Ntañishi, naleta mwanami kudi eyi muloña wudi nandemoni wawumama. 18 Neyi yamukwata, wamudimbwishaña iwu mwana heseki chakwila watupulaña kafulolu nikudisumona kumazewu nawa ñovu yamumanaña. Nayileja atumbanji tweyi nami amufumishi, ilaña amukañanya.” 19 Yena wayakwili nindi: “Eyi ikiñu dabula chikuhwelelu, nakatwalekahu kushakama naneyi kushika mpinjinyi? Nakadiwula yilwilu yeyi kushika mpinjinyi? Muletenu kudi ami.” 20 Dichi iwu mwana amuleteli kudi Yesu, chamumweniyi, ndemoni wamudimbwishili iwu mwana nawa watachikili kukonya. Hanyima yakwila nadimbuki dehi heseki, watachikili kwalañana nakutupula kafulolu kukanwa. 21 Kuhiñahu, Yesu wehwili tata yaniwu mwana nindi: “Chumichi chamutachikili mpinjinyi?” Yena wamwakwili nindi: “Kufuma tuhu kuwansi, 22 nawa kakavulu wamudimbwishilaña mukesi nimumenji kulonda yamukisañani. Ilaña neyi wukutwesha kumuuka, tutiyili wushona nawa tukwashi.” 23 Yesu wamwilili nindi: “Muloñadi chiwunahosheli neyi, ‘Neyi wukutwesha kumuuka’? Muloña kudi muntu wukweti chikuhwelelu yuma yejima yikutwesheka.” 24 Hohenohu tata yaniwu mwana wabidikili nindi: “Nikweti chikuhwelelu! Nkwashi niikali nachikuhwelelu chakola!”

25 Yesu chamweniyi izaza dawantu dinakwinza lufuchi kwadiñawu, wamuzuwilili iwu ndemoni nindi: “Eyi ndemoni wawumama nawa wawunjika matu, nakuleji nami fumaku mudi iwu mwana nawa bayi wiñilamu cheñiku!” 26 Iwu mwana chabidikiliyi nikusweja kukonya, iwu ndemoni wamufumini iwu mwana nawa wamwekeni neyi nafwi chakwila antu amavulu ahosheleña nawu: “Nafwi!” 27 Ilaña Yesu wamukwatili iwu mwana kuchikasa nakumunyamuna nawa wanyamukili. 28 Chelili neñili dehi mwitala, atumbanji twindi amwihwili kwakankawawu nawu: “Muloñadi chitwakañenya kufumisha ona ndemoni?” 29 Yena wayakwili nindi: “Ndemoni wamuchidiwu watela kufuma hohu chiña nakulomba.”

30 Dichi afumini kwenoku nakuhita muÑaliliya nawa hakeñeleña antu eluki chumichiku. 31 Muloña wadiña nakudizisha atumbanji twindi nikuyileja nindi: “Mwana kamuntu akumuhana mumakasa awantu nawa wena akumujaha, hela chakwila akumujaha, ilaña neyi munahiti dehi mafuku asatu, akamusañula.” 32 Ilaña wena hiyelukili mwatalishili mazu ahosheliyiku, nawa atiyili woma wakumwihula.

33 Kuhiñahu, enjili muKaperinamu. Ilaña, hadiñayi mwitala, wayihwili nindi: “Mwaditaadikishilañadi munjila?” 34 Wena amweneni kwanzo-o, muloña munjila adiña nakuditaadikisha mulwawu watela kwikala muneni hakachi kawu. 35 Dichi washakamini hamaseki, watambikili apostolu 12 nakuyileja nindi: “Neyi muntu nakukeña kwikala watachi, watela kwikala wakukumishaku hadi ejima niwakuyikalakela akwawu ejima.” 36 Kuhiñahu, wanoneli mwana wanyanya nakumwimika mukachi kawu; chamukwatiliyi hamafwiji, wayilejeli nindi: 37 “Muntu wejima wukutambwila anyana anyanya adi neyi iwu muloña wejina dami, dikwila nawu nantambwili ninami nawa; nimuntu wejima wukuntambwila ami, hanantambwili ami hohuku, ilaña natambwili niWantemesheli.”

38 Yowanu wamulejeli nindi: “Ntañishi, twamona muntu wafumishaña andemoni mwijina deyi, tweseka kumukaanisha muloña hatulondelañaku.” 39 Ilaña Yesu wayilili nindi: “Bayi mweseka kumukaanishaku, muloña hikudi muntu wukuzata mudimu wakuhayamisha mwijina dami wukushikena kuhosha chuma chatama hadi amiku. 40 Muloña muntu wejima wabulaña kutwimakena wudi kukabadi ketu. 41 Nawa muntu wejima wukuyinka kaapu kamenji* muloña wakwila mudi antu jaKristu, inakuyileja chalala nami, wakatambwila wufwetu windi. 42 Ilaña muntu wejima wukuhukesha wumu wahadi awa akehelamu akweti chikuhwelelu, chikuwaha neyi owu muntu akumukasila ilola dakuhalilaku munshiñu danyeñumunañayi chimbulu nakumunatila mukaluñalwiji.

43 “Neyi chikasa cheyi chakuhukeshaña, chiketuli. Chikusweja kuwaha eyi kupuluka iku wudi chifwayi kubadika kuya namakasa ayedi muGehena,* mukesi kabulaña kujimawu. 44 —— 45 Cheñi, neyi mwendu weyi wakuhukeshaña, wuketuli. Chikusweja kuwaha eyi kupuluka iku wudi chifwayi kubadika kukunatila muGehena* nanyendu yiyedi. 46 —— 47 Neyi disu deyi dakuhukeshaña, dinatili kwakulehi. Chikusweja kuwaha eyi kupuluka nadisu dimu muWanta waNzambi kubadika kukunatila muGehena* namesu ayedi, 48 mudi mavunyi abulaña kufwa nikesi kabulaña kujimawu.

49 “Muloña muntu-himuntu atela kumukwita muñwa wakesi. 50 Muñwa wawuwahi, ilaña neyi muñwa wusamunuka, mukuwutowesha nanka? Ikalenuña namuñwa mudi enu aweni nawa shakamenuña mukuwunda wumu namukwawu.”