Komana Nzambi Wekala Kwejima?
Ñakwilu yamuBayibolu
Nzambi wamonaña yuma yejima nawa nateli kwila chuma chidi chejima kwejima kunakeñiyi. (Yishimu 15:3; Aheberu 4:13) Hela chochu, Bayibolu hiyatañishaña nawu Nzambi wekala kwejima, hela muyuma yejimaku. Ilaña, yamwekesha nawu himuntu nawa wekala nakwashakamañayi.
Chekalayi Nzambi: Nzambi hispiritu. (Yowanu 4:24) Antu kwila amumona nehi. (Yowanu 1:18) Muyimwenu yaNzambi yekala muBayibolu amumwekeshaña nawu wudi neluña kwashakamañayi. Hiyamumwekeshaña nawu wekala kwejimaku.—Isaya 6:1, 2; Chimwekeshu 4:2, 3, 8.
Kwashakamañayi Nzambi: Nzambi washakamaña mwiwulu, mwabula kwikala yileñaleña yakumujimba. Mwomwenimu mwiwulu, Nzambi wukweti ‘iluña kwashakamañayi mumawulu.’ (1 Anyanta 8:30) Bayibolu yashimuna mpinji yimu helili yileñaleña yakuspiritu yinzi “nakwimana kumesu aYehova,”a chinakumwekesha nawu, Nzambi wukweti iluña dindi mwashakamañayi.—Yoba 1:6.
Neyi chakwila Nzambi wekala kwejima wanyi, komana nateli kuñakamena?
Eña. Nzambi wayakamenaña chikupu hamuntu-hamuntu. Hela chakwila washakamaña mumawulu, Nzambi wamonaña antu ejima adi hamaseki anakukeña chikupu kumuzañalesha nawa wayikwashaña. (1 Anyanta 8:39; 2 Kushindulula 16:9) Talenu Yehova chamwekeshañayi nindi wayakamenaña antu adifukulaña kudi yena namuchima wejima:
Neyi mulomba: Yehova wukushikena kutiya kulomba kwenu hampinji yimunakulomba.—2 Kushindulula 18:31.
Neyi munaneñi: “Yehova wudi kwakwihi nawantu abaluka nyichima; wamwinaña antu achikeka muspiritu.”—Masamu 34:18.
Neyi munakukeña wunlomboli: Yehova ‘wakayinka kashinshi nikuyilombola’ kuhitila Mwizu dindi, Bayibolu.—Masamu 32:8.
Nsañu yakutwamba yakwila nawu Nzambi wekala kwejima
Nsañu yakutwamba: Nzambi wekala muyileñaleña yejima.
Nsañu yalala: Nzambi hashakamaña hamaseki hela muyileñaleña yitwamonañaku. (1 Anyanta 8:27) Tweluka netu tutumbwa niyuma yikwawu yaleñayi ‘yashimunaña kulema kwaNzambi.’ (Masamu 19:1) Hela chochu, neyi chabulaña kushakama mukakuleña muchuma chinaleñiyi, Nzambi niyena hashakamaña muchuma chaleñeliyiku. Ilaña, chuma chinaleñiwu chinateli kutukwasha kwiluka chekalayi muntu wunachileñi. Munjila yoyimu, yileñaleña yitwamonaña yatukwashaña kwiluka yilwilu yaNleñi “yabulaña kumwekana,” yidi neyi ñovu jindi, maana nikukeña.—Aroma 1:20.
Nsañu yakutwamba: Nzambi watela wekala kwejima kulonda eluki yuma yejima nawa asweji kwikala nañovu.
Nsañu yalala: Spiritu yajila yaNzambi hela ñovu yazatikaña, hiñovu yaNzambi yazatishañayi. Nzambi nateli kuzatisha spiritu yindi yajila kumona nikwila chuma chidi chejima, kudi kwejima, hampinji yidi yejima, chakadi yena kuyaku.—Masamu 139:7.
Nsañu yakutwamba: Masamu 139:8 yatulejaña nawu Nzambi wekala kwejima chiyahosha nawu: “Neyi nukukandama mwiwulu, eyi wukwikalamu, nawa neyi naala kadidi kami Mwijamu, talaña! eyi wukwikalamu.”
Nsañu yalala: Iyi nsona yinakutena iluña kwashakamañayi Nzambi wanyi. Ilaña yatudizishaña nawu kwosi iluña didi dejima kutunateli kwikala kukukañanyayi Nzambi kutukwashaku.
a Yehova didu ijina daNzambi neyi chadishimunawu muBayibolu.