KUDIZA 4
Ochiwatela Kudiza Hadi Nzambi
Watela kudiza hadi Yehova kuhitila mukutaña Bayibolu. Hanyaka Nzambi wasakwilihu antu amu akumusonekelaku yitoñozhoka yindi. Mazu wenawa ayitenaña nawu Bayibolu. Makonu twadizaña hadi Nzambi kuhitila mukutaña Bayibolu. Muloña Bayibolu yikweti nsañu hela mazu aYehova, ayitenaña cheñi nawu Izu daNzambi. Tunatweshi kukuhwelela chahoshaña Bayibolu muloña Yehova hatwambañaku. “Nzambi hanatweshi kutwambaku.” (Aheberu 6:18) Izu daNzambi dikweti walala.—Yowanu 17:17.
Bayibolu hichawana chabadika wuseya chatwinkayi Nzambi. Yidi neyi mukanda wunafumi kudi invwali wakeña anyanindi. Yatulezhaña chikaninu chaNzambi chakubalumuna iseki kwikala ituña dadiwahi kushakamamu—paradisa. Yatulezhaña yuma yakoñeliyi kunyuma, ni yuma yinakukoñayi katataka ni yuma yamba kakoñelayi anyanindi amukuhwelela kumbidi. Yatukwashaña cheñi mwakumanishila kukala ni mwakuwanina muzañalu.—2 Timotewu 3:16, 17.
Ayinsahu zhaYehova hiyamabwambu zhaNzambi; akukwasha kutiyishisha ntañishilu yaBayibolu. Yilezhi hohu neyi wunakukeña kudiza Bayibolu. Hiyafweteshaña maliku. (Matewu 10:8) Cheñi nawa, wunateli kuwanikewa kukupompa kwaweni Krisitu. Ayinsahu apompelaña mumaluña iyatenañawu nawu Matala aWanta. Neyi wukuwanikaña kukupompa kwaweni Kristu, wukunyakashana kumwiluka Nzambi.
Wunateli kumwiluka Nzambi kuhitila muyuma yaleñayi. Chakutalilahu, Bayibolu yahoshaña nawu: “Nzambi waleñeli nimawulu nimaseki.” (Kutachika 1:1) Yehova chaleñeliyi “mawulu,” waleñeli niitañwa. Indi ichi chatulezhañadi hadi Nzambi? Chinakutulezha nawu Yehova wukweti ñovu yabadika. Yena hohu diyi watela kuleña chuma chidi nañovu chafwana neyi itañwa. Bayibolu yatulezhaña cheñi nawu Yehova wukweti maana. Maana akeñekeli hakwila nawu yaleñi itañwa datwinkaña iyena nichezhezhi, ilaña hidochanañaku.
Yileñaleña yaYehova yamwekeshaña nawu watukeña. Toñozhokaku hanyikabu yezhima yashiyañana yekala hanu heseki. Yehova wadi kutwinka hohu muchidi wumu wamukabu—hela kutumina. Ilaña, Yehova watwinkeli nyichidi yayivulu yanyikabu yashiyañana mumwekenu, mukutoha, wuloombu nikutowala. Ichi chamwekeshaña nawu Yehova hiNzambi wakukeña hohuku, ilaña wekala cheñi mukwakuhana, watwakamenaña nawa hisaluwi.—Masamu 104:24.