Malwihu Kufuma Kudi Antañi
Satana chamulejeliyi Eva nindi wukufwa wanyi neyi yada kumutondu wakwiluka nachu yayiwahi niyatama, komana wamulejeleña yitoñojoka yidiku makonu yakwila nawu wumi hiwafwañaku?
Diyabolu hamulejeli Eva nindi neyi yada kumukabu wamukaanishiliwu kudi Nzambi, wadi kufwa ilaña chuma chimu chabulaña kumwekana mudi yena (chatenañawu antu makonu nawu wumi wabulaña kufwa) chadi kutwalekahu kuhanda kwiluña dimuku. Satana wahosheli kuhitila mudi kapela nindi neyi Eva yada kumukabu wanona mutondu ‘chalala, hadi kufwaku.’ Watalishili mukwila nindi wadi kutwalekahu kuhanda nakudiluñisha wumi wawuwahi hamaseki, wumi wakadi kushindamena hadi Nzambi.—Kutach. 2:17; 3:3-5.
Neyi ntañishilu yakutwamba yakwila nawu wumi hiwafwañaku yafumini mwitempa daEdeni wanyi, hanu dinu yatachikili mpinjinyi? Tuneluki wanyi. Ilaña tweluka netu kudifukula kwakutwamba kwejima kwajiyili haDibaji dadiñaku mumafuku aNowa. Chineli Nowa nichisaka chindi diwu apulukili haDibaji nawa adiña akwakudifukula alala, hikwadiña muntu watañishileña nsañu yakutwambaku.
Dichi ntañishilu yamakonu yakwila nawu wumi wafwaña wanyi yatela yatachikili hanyima yaDibaji. Hampinji yelili Nzambi yaluwañeshi madimi haBabeli nawa antu apalañeni “mwejima mwahita iseki,” chakadi nikujina ayili nayitoñojoka yakwila nawu wumi wamuntu hiwafwañaku. (Kutach. 11:8, 9) Hichidi namuloña nakwatachikilili ntañishilu yakutwambaku, hela chochu, twatela kwiluka netu “tata yakutwamba” Satana Diyabolu diyi waletesheli yuma yejimiyi nawa wazañaleli chikupu chatandishiliyi kutwamba kwindi mwahita iseki.—Yow. 8:44