Tondenuña Amabwambu Chiwahi

Twazañalelaña hamu nawamabwambu mumpinji yayiwahi, nawa atukoleshaña mumpinji yakala. Ilaña Bayibolu yatusoñamishaña nawu bayi neyi muntu wejima nateli kwikala ibwambu wamuwahiku. Hanu munateli kutonda ñahi amabwambu amawahi? Toñojokenu hanawa malwihu.

1. Amabwambu imwatondaña akuyiletesha kwiladi?

Twatachikaña kwila yuma yelaña antu itwadikundaña nawu hadi mpinji yeneni. Anateli kutuhimpa munjila yayiwahi hela yatama, nawa ichi chamwekanaña chili tudi nawu hamu hela tunakuhanjeka nawu haIntaneti. Neyi chahosha Bayibolu nawu, “muntu wunakwenda nawakamaana wakekala namaana, ilaña muntu wadikundaña nawayisupi [ana abula kumukeña Yehova] wakamona kukala.” (Yishimu 13:20) Amabwambu amukeña Yehova nawa adifukulaña kudi yena anateli kuyikwasha kuswina kwakwihi nayena nikufuukula chiwahi. Ilaña amabwambu abula kwikala muchipompelu akuyiletesha kuleka kumukalakela Yehova. Dihafuma Bayibolu kutuleja nawu twatela kutonda amabwambu chiwahi! Neyi twikala nawamabwambu amukeña Nzambi, yuma yikutuwahilaña wejima wetu. Tunateli “[kudikolesha] wumu namukwawu nikudituña wumu namukwawu.”—1 ATesalonika 5:11.

2. Yehova watiyaña ñahi nawamabwambu imwatondaña?

Yehova watondaña chiwahi amabwambu jindi. “Yena wadikunda chikupu namuntu woloka.” (Yishimu 3:32) Yehova wukutiya ñahi neyi tutonda amabwambu abula kumukeña? Wukutiya kutama! (Tañenu Yakoba 4:4.) Ilaña neyi tutondolwela amabwambu atama nawa tuswina kwakwihi nayena niantu amukeña, Yehova wukutiya kuwaha nawa wukututonda kwikala amabwambu jindi.—Masamu 15:1-4.

SANDUJOLENU CHIKUPU

3. Babalenu nawamabwambu atama

Antu abula kumukeña Nzambi ninshimbi jindi hiyamabwambu atama. Vumishenu VIDIYO, kuhiñahu hanjekenu halwihu lunalondelihu.

VIDIYO: Lekenu Kudikunda naWantu Atama (6:17)

• Munateli kutachika ñahi kudikunda nawantu atama chakadi kwiluka?

Tañenu 1 AKorinda 15:33, kuhiñahu hanjekenu hanawa malwihu:

• Muntu wamuchidinyi imwatela kubula kudikunda nindi? Muloñadi?

Tañenu Isamu 119:63, kuhiñahu hanjekenu hanilu lwihu:

• Yilwilu yamuchidinyi yatela kwikala namuntu imunakukeña ekali ibwambu denu?

4. Antu ambukaku nanetu anateli kwikala amabwambu amawahi

Bayibolu yahosha hadi Davidi naYonatani, amayala ayedi amuIsarela. Yonatani wadiña mukulumpi chikupu hadi Davidi nawa wadiña mwana kamwanta, ilaña wubwambu wawu wadiña wezala kambuki namunu. Tañenu 1 Samweli 18:1, kuhiñahu hanjekenu hanilu lwihu:

• Muloñadi chitukubulila hohu kwikala nawamabwambu itwesekana nawu yaaka hela akweti chihandilu neyi chetu?

Tañenu ARoma 1:11, 12, kuhiñahu hanjekenu hanilu lwihu:

• Amabwambu amukeña Yehova anateli kudikolesha ñahi wumu namukwawu?

Muniyi vidiyo, talenu iwu manakwetu wakansi chawaniniyi amabwambu kwiluña dabulili kukuhwelelayi. Vumishenu VIDIYO, kuhiñahu hanjekenu hamalwihu analondelihu.

VIDIYO: Wanenu Amabwambu kuMaluña Amaha (5:06)

• Muniyi vidiyo, muloñadi anvwali jaAkil chakameneniwu hadi amabwambu jindi akushikola?

• Wayikeñelelidi amabwambu jindi?

• Chumanyi chamukwashili kuleka kutiya wudi?

5. Chakukwata amabwambu amawahi

VIDIYO: Ibwambu Walala hiMuntu Wamuchidinyi? (4:14)

Tañenu Yishimu 18:24 ni 27:17, kuhiñahu hanjekenu hanawa malwihu:

• Amabwambu alala adikwashaña ñahi?

• Komana mwekala nawamabwambu amuchidiwu? Neyi mudana, munateli kwikala ñahi nawu?

Tañenu AFwilipi 2:4, kuhiñahu hanjekenu hanilu lwihu:

• Hakwila mwiikali nawamabwambu amawahi, ninenu mwatela kwikala ibwambu wamuwahi. Munateli kwila ñahi mwenimu?

YUMA YIMUNADIZI

Neyi tutonda amabwambu chiwahi, tukumutiyisha Yehova kuwaha nawa mukufuma yuma yayiwahi.

Kuhitulukamu

• Muloñadi Yehova chakeñelañayi nindi tutondeña amabwambu chiwahi?

• Wubwambu wamuchidinyi wutwatela kutondolwela?

• Munateli kwikala ñahi nawubwambu wakola nawantu adi nayilwilu yayiwahi?

ILUKILENUHU NSAÑU YIKWAWU

Talenu amabwambu amawahi chinateli kutukwashawu mumpinji yakala.

“Koleshenu Wubwambu Wenu Henohu Kukuma Kanda” (Kaposhi Kakutalila, November 2019)

Talenu yuma yimwatela kwila hakwila mwiikali nawamabwambu amawahi.

“Nateli Kwikala Ñahi nawaMabwambu Amawahi?” (Malwihu Ehulañawu Atwansi niÑakwilu Jinateli Kuyikwasha, Volumu 1, kapetulu 8)

Yumanyi yimwatela kwiluka hadi amabwambu ahaIntaneti?

Zatishenuña Chiwahi Intaneti (4:12)

Talenu chibaaba chinakwila nawu “Nakeñeleña chikupu kwikala natata,” talenu iyala wumu chahimpiliyi amabwambu.

“Bayibolu Yahimpaña Yihandilu Yawantu” (Kaposhi Kakutalila, April 1, 2012)