KUDIZA 59
Munateli Kuumika Makabisha
Katataka, akaKristu ejima atachiki kuyidimbulula nikuyikabisha. Komana chumichi chatela kutwakamisha?
1. Chumanyi chikuletesha tukuhweleli netu akatukabisha?
Bayibolu yahoshaña nawu: “Ejima afwilaña kuhanda kwesekeja nakumwakama Nzambi muloña wakudikunda naKristu Yesu, niwena akayikabisha.” (2 Timotewu 3:12) Yesu amukabishili muloña hadiña kabadi kakaayi kaSatanaku. Ninetu hitudi kabadi kakaayiku, dichi hitwahayamaña neyi atukabisha kudi jinfulumendi jakaayi ninyitayi yakudifukulaku.—Yowanu 15:18, 19.
2. Tunateli kudiloñeshela ñahi chadimu namakabisha itwakamona?
Twatela kumukuhwelela Yehova chikupu. Ikalenuña nampinji yakulomba kudi yena nikutaña Izu dindi mpinji yejima. Pompenuña mpinji yejima. Kwila iyi yuma kwakayikwasha kwikala ahamuka neyi anakuyikabisha hela kudi antaña jenu. Kapostolu Pawulu, akabishiliwu kakavulu, wasonekeli nindi: “Yehova hinkwashi yami; hinukutiya womaku.”—AHeberu 13:6.
Tunateli cheñi kwikala ahamuka neyi tushimwinaña mpinji yejima. Kushimwina kwatukwashaña kumukuhwelela Yehova nikuleka kuchiina antu. (Yishimu 29:25) Neyi mwikala ahamuka kushimwina yinu mpinji, mukudiloñesha kutwalekahu kushimwina nimpinji yakakañeshawu mudimu wetu kudi akanfulumendi.—1 ATesalonika 2:2.
3. Yumanyi yayiwahi yafumañamu neyi tuumika makabisha?
Hitwatiyaña kuwaha kutukabishaku, ilaña neyi tuumika makabisha chikuhwelelu chetu chakolelañaku. Twaswinaña kwakwihi naYehova muloña watukwashaña chitwamona netu tukutwesha wanyi kutwalekahu kuumika. (Tañenu Yakoba 1:2-4.) Yehova watiyaña kutama neyi amona tunakukabakana, ilaña watiyaña kuwaha neyi tunakuumika. Bayibolu yahosha nawu: “Neyi muumika makabi muloña wakukoña yuma yayiwahi, chumichi chamutiyishaña Nzambi kuwaha.” (1 Petulu 2:20) Yehova wakana kuyinka antu omikaña nakashinshi wumi wahaya nyaaka mwituña mwakabula antu adimbululaña kudifukula kwalala.—Matewu 24:13.
SANDUJOLENU CHIKUPU
Talenu chitukuhoshela netu tukutwesha kutwalekahu kwikala ashinshika kudi Yehova hela chakwila anakutukabisha.
4. Munateli kuumika ikañesha dafumaña muchisaka
Yesu welukili nindi antu amakwawu muchisaka hiyanateli kutwiteja kudifukula kudi Yehovaku. Tañenu Matewu 10:34-36, kuhiñahu hanjekenu hanilu lwihu:
Chumanyi chinateli kumwekana neyi muntu wamuchisaka afuukulahu kumukalakela Yehova?
Hakwila mwiluki chinateli kumwekana, vumishenu VIDIYO, kuhiñahu hanjekenu halwihu lunalondelihu.
Munateli kwila ñahi neyi ntaña hela ibwambu denu nakuyikañesha kumukalakela Yehova?
Tañenu Masamu 27:10 niMaku 10:29, 30. Chimwamanisha kutaña nsona-hinsona, muhanjeki hanilu lwihu:
Ichi chikaninu chinateli kuyikwasha ñahi neyi anakuyikañesha kudi antaña hela amabwambu?
5. Twalekenuhu kudifukula kudi Yehova hela anakuyikabisha
Chakeñekaña kwikala ahamuka hakwila tumukalakeleña Yehova neyi kudi anakutukañesha. Vumishenu VIDIYO, kuhiñahu hanjekenu halwihu lunalondelihu.
Yakutalilahu yidi muvidiyo yinayikoleshi ñahi?
Tañenu Yilwilu 5:27-29 niAHeberu 10:24, 25. Chimwamanisha kutaña nsona-hinsona, muhanjeki hanilu lwihu:
Chalemenadi kutwalekahu kudifukula kudi Yehova hela chakwila anakutukañesha kushimwina hela kupompa?
6. Yehova wukuyikwasha kutwalekahu kuumika
AYinsahu jaYehova akweti yaaka ninkulilu yashiyashana, anatwalekihu kumukalakela Yehova nakashinshi hela chakwila anakuyikabisha. Hakwila mwiluki chayikwashili, vumishenu VIDIYO. Kuhiñahu hanjekenu halwihu lunalondelihu.
Muniyi vidiyo, chumanyi chayikwashili awa aYinsahu kuumika?
Tañenu ARoma 8:35, 37-39 niAFwilipi 4:13. Chimwamanisha kutaña nsona-hinsona, muhanjeki hanilu lwihu:
Iyi nsona yinakuyikolesha ñahi nawu ninenu munateli kuumika?
Tañenu Matewu 5:10-12, kuhiñahu hanjekenu hanilu lwihu:
Muloñadi chimwatela kwikalila namuzañalu hela chakwila anakuyikabisha?
Akakudifukula aYehova amavulu omikahu dehi ikañesha. Ninenu mukutwesha!
AMAKWAWU AHOSHAÑA NAWU: “Kwila nitwesha kuumika makabisha nehi.”
Nsonanyi yikuyikwasha kwiluka nawu anateli kuumika?
YUMA YIMUNADIZI
Yehova watiyaña kuwaha neyi tunakumukalakela hela chakwila anakutukabisha. Nawukwashu windi, tunateli kuumika!
Kuhitulukamu
Muloñadi akaKristu chatela kukuhwelelawu nawu anateli kuyikabisha?
Yumanyi yimwatela kwila kulonda mudiloñesheli chadimu henohu kanda mumoni ikabisha?
Yumanyi yinateli kuyikwasha kukuhwelela chikupu nenu munateli kutwalekahu kumukalakela Yehova hela chakwila munakumona kukala?
ILUKILENUHU NSAÑU YIKWAWU
Talenu manakwetu wakansi chalumbulwiliyi chamukwashiliwu kudi Yehova kuumika hampinji yamukasiliwu muloña wakubula kudiñija munsañu jamatuña nachiyuulu.
Talenu chuma chakwashili adisumbula kumukalakela Yehova nakashinshi hadi yaaka yayivulu hela chakwila ayikabishileña.
Ilukenu chimunateli kwikala ahamuka neyi anakuyikabisha.
“Diloñeshenu Kumona Makabisha” (Kaposhi Kakutalila, July 2019)
Tunateli kwila ñahi nekañesha dafumaña muchisaka, nawa tunateli kushinda ñahi kukala kwafumañamu?
“Chalala Chaletaña, ‘Mpoku Yakabali, Bayi Kuwundaku’” (Kaposhi Kakutalila, October 2017)