Katataka ichi, Yehova wukuzatisha Wanta windi kufumishahu kukala kwejima kutunakumona. Iyi hinsañu yayiwahi yatela kwilukawu antu ejima. Yesu wakeñeleña nindi akakumulondela alejeñaku antu ejima iyi nsañu! (Matewu 28:19, 20) AYinsahu jaYehova azataña ñahi mudimu wayinkeliyi Yesu?

1. Matewu 24:14 yinakushikijewa ñahi makonu?

Yesu washimwineñahu dehi nindi: “Nsañu yayiwahi yaWanta akayishimwina mwahita iseki dejima mwashakamawu antu.” (Matewu 24:14) AYinsahu jaYehova atiyaña kuwaha kuzata iwu mudimu. Twashimwinaña nsañu yayiwahi mukaayi kejima mumadimi kubadika ha 1,000. Iwu mudimu weneni wakeñekaña kuzata nañovu nikuzatila hamu. Iwu mudimu hitunateli kuwuzata chakadi wukwashu waYehovaku.

2. Twazataña ñahi nañovu kulonda tushimwineña antu?

Twashimwinaña kwejima kutwawanaña antu. Neyi chelileña akaKristu akusambila, twashimwinaña “kwitala niitala.” (Yilwilu 5:42) Iyi njila yayiwahi yatukwashaña kushimwina antu amavulu nankashi hachaaka-hachaaka. Chineli antu avula kuwanika hamatala wanyi, twashimwinaña nikumaluña kwawanikaña antu amavulu. Mpinji yejima twafwilaña kulejaku antu kulonda amwiluki Yehova ninkeñelu yindi.

3. Anyi akweti mudimu wakushimwina nsañu yayiwahi?

AkaKristu alala ejima diwu adi namudimu wakulejaku antu nsañu yayiwahi. Twalemesha iwu mudimu wetu. Twazataña kwesekeja nahanakumini ñovu jetu muloña tweluka netu iwu mudimu wunateli kupulwisha mawumi awantu. (Tañenu 1 Timotewu 4:16.) Hiyatufwetaña hakuzata iwu mudimuku, muloña Bayibolu yahosha nawu: “Mwatambwilili chamukunkulu, hanenu chamukunkulu.” (Matewu 10:7, 8) Bayi neyi antu ejima etejaña nsañu yetuku. Ilaña twatwalekañahu muloña tuneluki netu kushimwina himbadi yakudifukula nawa kwamuzañaleshaña Yehova.

SANDUJOLENU CHIKUPU

4. Twazataña nañovu kulonda tushimwini antu ejima

VIDIYO: Kushimwina “Kwakumina Iseki Dejima” (7:33)

• Chumanyi chinayitiyishi kuwaha hachazatañawu aYinsahu jaYehova nañovu hakwila ashimwini antu?

Tañenu Matewu 22:39 niARoma 10:13-15, kuhiñahu hanjekenu hanawa malwihu:

• Mudimu wakushimwina wutwazataña wamwekeshaña ñahi nawu twakeña akwetu?

• Yehova wayimonaña ñahi antu ashimwinaña nsañu yayiwahi?—Talenu vasi 15.

5. Tudi akakukalakala hamu naNzambi

Kudi yuma yayivulu yamwekeshaña nawu Yehova nakulombola mudimu wetu. Chakutalilahu, manakwetu Paul wakuNew Zealand, wawanini mumbanda wumu hashimwinineñayi kwitala nikwitala namwaana. Hadodina ifuku nantetemena, iwu mumbanda walombeli kudi Nzambi, kuzatisha ijina daNzambi, Yehova, nindi atemeshi muntu enzi. Manakwetu Paul wahosheli nindi: “Chimwahitili maora asatu nashikili kwitala dindi.”

Tañenu 1 AKorinda 3:9, kuhiñahu hanjekenu hanilu lwihu:

• Yuma yamwekanaña, chidi neyi yamumwekeneni manakwetu wakuNew Zealand, yamwekeshaña ñahi nawu Yehova nakulombola mudimu wakushimwina?

Tañenu Yilwilu 1:8, kuhiñahu hanjekenu hanilu lwihu:

• Muloñadi chitwakeñelaña netu Yehova atukwashi hakwila tuzati chiwahi mudimu wakushimwina?

Komana mweluka?

Mulungu-himulungu hakupompa kwetu kwamukachi kamulungu, atudizishaña chakushimwina. Neyi mwayahu dehi kuniku kupompa, iyi yuma yimwadizili yayikwashili ñahi?

6. Twovwahilaña lushimbi lwaNzambi lwakushimwina

Mumafuku awapostolu, akakudimbulula afwilileña kuyikañesha akakumulondela Yesu kulonda aleki kushimwina. AkaKristu akusambila ahakwililiku wuswa wawu wakushimwina kuhitila “mukutambula wuswa wakushimwina nsañu yayiwahi kwesekeja nanshimbi.” (AFwilipi 1:7) Dichelañawu niaYinsahu jaYehova makonu.a

VIDIYO: Kuhakwilaku Nsañu Yayiwahi Kwesekeja naNshimbi (2:28)

Tañenu Yilwilu 5:27-42, kuhiñahu hanjekenu hanilu lwihu:

• Muloñadi chitwakabulila kuleka kushimwina?—Talenu mavasi 29, 38, ni 39.

YUMA YIMUNADIZI

Yesu wayilejeli akakumulondela kushimwina nsañu yayiwahi kunyuza yejima. Yehova nakukwasha antu jindi kuzata iwu mudimu.

Kuhitulukamu

• Nsañu yayiwahi anakuyishimwina ñahi mukaayi kejima?

• Mudimu wetu wakushimwina wamwekeshaña ñahi nawu twakeña akwetu?

• Munakutoñojoka nenu mudimu wakushimwina wunateli kutuletela muzañalu? Muloñadi?

ILUKILENUHU NSAÑU YIKWAWU

Talenu aYinsahu jaYehova chashimwinañawu antu munyisumba yamaneni.

Mudimu Wadimena Wakushimwina naJingolofwana muParis (5:11)

Yumanyi yineliwu aYinsahu jaYehova hakwila akwashi amatunduka?

Kukwasha Amatunduka Amwiluki Nzambi (5:59)

Tiyenu chikulumbululawu muzañalu wekala mukuzata mudimu wampinji yejima.

Nidi naMuzañalu Muloña Nafuukwilihu Kuzata Iwu Mudimu (6:29)

Talenu kufuukula kwafuukwiliwu akachota kunaleteshi chiikali chaswayi kushimwina nsañu yayiwahi.

“Akwakushimwina Nsañu yaWanta Anatwali Muloña Wawu kuChota” (Wanta waNzambi Wunakuyuula!, kapetulu 13)

Yesu wahosheli nindi akaKristu ejima atela kupapatishewa. (Tañenu Matewu 28:19, 20.) Hanu chipapatishu hichumanyi? Nawa yumanyi yatela kwilayi muntu hakwila ashiki kuchipapatishu?

1. Chipapatishu hichumanyi?

Izu dakwila nawu “kupapatisha” dafuma kwizu dachiGiriki datalisha mukwila nawu “kutumpika” mumenji. Chamupapatishileñawu Yesu, amujimikili muKaloña Yodani, kuhiñahu ‘wafumini mumenji.’ (Maku 1:9, 10) Munjila yoyimu, akaKristu alala niwena ayipapatishaña kuhitila mukuyitumpika hela kuyijimika mumenji.

2. Chipapatishu chamwekeshañadi?

Neyi muntu apapatishewa, wamwekeshaña nindi nadihani yomweni kudi Yehova Nzambi. Muntu wadihanaña ñahi? Henohu kanda apapatishewi, wamulejaña Yehova mukulomba kwakankawindi nindi inakukeña kumukalakela haya nyaaka. Wakanaña kudifukula kudi Yehova hohu nikulemesha kwila nkeñelu yaNzambi muchihandilu chindi. Wafuukulañahu ‘kudibonda yomweni . . . nakutwalekahu kulondela’ ntañishilu yaYesu niyuma yelileñayi. (Matewu 16:24) Kudihana kwindi nikupapatishewa kwamukwashaña kwikala nawubwambu wakola naYehova ninawakwawu akakudifukula.

3. Yumanyi yatela kwilayi muntu henohu kanda apapatishewi?

Henohu kanda mupapatishewi, chalema nankashi kumwiluka Yehova nikumukuhwelela chikupu. (Tañenu AHeberu 11:6.) Chimukumwilukaña nikusweja kumukuhwelela, mukumukeña chikupu. Chakadi nikujina, mukufwilaña kushimwina hadi yena nikulondela nshimbi jindi. (2 Timotewu 4:2; 1 Yowanu 5:3) Neyi muntu natachiki kwila yuma “kwesekeja nanochu chakeñañayi Yehova nakumutiyisha kuwaha chikupu,” nateli kutondahu kudihana yomweni kudi Nzambi nakupapatishewa.—AKolosi 1:9, 10.a

SANDUJOLENU CHIKUPU

4. Tunateli kudizila kuchipapatishu chaYesu

Tañenu Matewu 3:13-17 kulonda mwiluki nsañu yayivulu yahosha hachipapatishu chaYesu. Kuhiñahu hanjekenu hanawa malwihu:

• Komana Yesu wadiña mukeki hampinji yamupapatishiliwu?

• Amupapatishili ñahi? Komana amusansili hohu menji?

Yesu watachikili kuzata mudimu windi wadimena heseki wamwinkeliwu kudi Nzambi hampinji yapapatisheweliyi. Tañenu Luka 3:21-23 niYowanu 6:38, kuhiñahu hanjekenu hanilu lwihu:

• Chelili Yesu napapatishewi dehi, mudimwinyi walemesheliyi muchihandilu chindi?

5. Chipapatishu hichuma chimwatela kwila

Hakutachika munateli kutiya woma wakudihana nikupapatishewa. Hela chochu, munateli kushika hachipimu chakwila mukutiya kuwaha kufuukulahu kudihana nikupapatishewa. Hakwila mumoni antu amakwawu elili mwenimu, vumishenu VIDIYO.

VIDIYO: Kukwata Wubwambu naYehova (1:11)

Tañenu Yowanu 17:3 niYakoba 1:5, kuhiñahu hanjekenu hanilu lwihu:

• Chumanyi chinateli kumukwasha muntu kudiloñesha kupapatishewa?

1. Twadihanaña kuhitila mukumuleja Yehova netu tunakukeña kumukalakela haya nyaaka

2. Hampinji yitunakupapatishewa, twamwekeshaña kudi antu anakutalaku netu tunadihani kudi Nzambi

6. Neyi tupapatishewa twekalaña amuchisaka chaYehova

Neyi tupapatishewa twekalaña amuchisaka chamukaayi kejima chanuñañana. Hela chakwila twafuma kumaluña ashiyashana nawa tukweti nkulilu yaambuka, wejima wetu twakuhwelela yuma yoyimu nawa twalondelaña nshimbi jojimu. Tañenu Isamu 25:14 ni 1 Petulu 2:17, kuhiñahu hanjekenu hanilu lwihu:

• Chipapatishu chamukwashaña muntu kwikala nawubwambu wamuchidinyi naYehova ninawantu adifukulaña kudi Yena?

YUMA YIMUNADIZI

Yesu wahosheli nindi akaKristu atela kupapatishewa. Hakwila muntu ashikihu kupapatishewa, watela kukolesha chikuhwelelu chindi mudi Yehova, kulondela nshimbi jindi nikudihana yomweni kudi Yena.

Kuhitulukamu

• Chipapatishu hichumanyi, nawa chalemenadi?

• Chambwinyi chidi hakudihana nakupapatishewa?

• Yumanyi yatela kwilayi muntu hakwila adihani nikupapatishewa?

ILUKILENUHU NSAÑU YIKWAWU

Ilukenu mwatalisha chipapatishu nimuchabula kutalisha.

“Chipapatishu hiChumanyi?” (Chibaaba chahaIntaneti)

Hitulukenu muyuma yinateli kukwasha muntu kushika kuchipapatishu.

“Kumukeña niKumusakilila Yehova Kukuyisañumuna Kupapatishewa” (Kaposhi Kakutalila, March 2020)

Tañenu kulonda mwiluki chuma chamuletesheli iyala wumu kufuukulahu kupapatishewa.

“Akeñeleña Nawu Niluki Ami Aweni Chuma Chacheni Chahosha Bayibolu” (Kaposhi Kakutalila, February 1, 2013)

Talenu chipapatishu chichinekalili chuma chalema chimwatela kwila nichimunateli kudiloñesha kulonda mushikihu.

“Komana Natela Kupapatishewa?” (Malwihu Ehulañawu Atwansi niÑakwilu Jinateli Kuyikwasha, Volumu 2, kapetulu 37)