Chumanyi Chayileñelaña ‘Kudisamba’?
1. Chumanyi chatuleñelaña kudisamba hakumana kwakakweji kadi kejima?
1 Chamana kakweji wudi wejima nawa wejima wetu atuleja kuhana chileji chetu chamumudimu wamwiha, chumanyi chayileñelaña ‘kudisamba’? (Ŋal. 6:4) Chili twekala apayiniya adimena ahanaña maora 130 hela twekala akwakushimwina etejawu kuhana jiminiti 15 nakuya hewulu, wejima wetu twatela kuzañalala netu twamukalakelaña Yehova namuchima wetu wejima.—Mas. 100:2.
2. Muloñadi wutwatelela kuzata nañovu mumudimu waYehova?
2 Chineli Yehova diyi Mwanta Wakuleña kwejima, twatela kumukalakela hakumina ñovu jetu jejima. (Mal. 1:6) Twadihana kulonda twileña mwaya muchima windi muloña twamukeña. Dichi hakumana kwefuku hela kwakakweji neyi twiluka chikupu netu tunahani ‘nyikabu yatachi’ yampinji yetu, kuzatisha yawaana niñovu jetu mumudimu waYehova, chumichi chikutuleñela kudisamba. (Yish. 3:9) Ilaña neyi chinleji chetu chinakutuleja nawu tunateli kuzata nakubadikisha, twatela kushinshika yuma yitwatela kwila kulonda tuhimpi.—Rom. 2:15.
3. Muloñadi chichatamina kudesekeja nawantu acheñi?
3 ‘Bayi Kudesekeja naMuntu Wacheñuku’: Chatama kudesekeja nawantu acheñi hela kudesekeja chitwazatileña hampinji yitwadiña nañovu. Yuma yahimpaña. Twekala nawuswa washiyashana. Kakavulu kudesekeja namuntu wacheñi kwaleñelaña kudibecha hela kudimona netu tudi amukunkulwayi. (Ŋal. 5:26; 6:4) Yesu hesekejeleña muntu wumu namuntu wacheñuku. Ilaña wahamekeleña antu ejima kwesekeja nanyidimu yakoñeleñawu.—Maku 14:6-9.
4. Yumanyi yalema yitwadizilaña kuchishimu chaYesu chajintalenta?
4 Muchishimu chaYesu chajintalenta, mukwamudimu wejima amwinkeli jintalenta ‘mwomwesekela ñovu jindi.’ (Mat. 25:15) Chafuntiliyi nkanka yawu nakwihula nyidimu yazatileñawu, ana azatili nañovu kwesekeja nawuswa wawu nichadiñi chihandilu chawu ayihamekeli nawa eñilili mumuzañalu wankanka yawu. (Mat. 25:21, 23) Chochimu neyi tudikitaña mumudimu wakushimwina Wanta, tukwiluka chikupu netu tukweti wuselewa waNzambi nawa chumichi chikutuleñela kudisamba.