Kukeña—Diyi Nsapi yaMudimu Wakushimwina Wasoñaña Nyikabu
1 “Inzenu kudami, . . . ami nukuyinookesha.” (Mat. 11:28) Mazu amuchidawa akuzañalesha amwekesheli chaswejeliyi Yesu kukeña antu. Hamu neyi atuñanda aweniKristu, twafwilaña kwimbujola Yesu hakumwekesha kukeña kwetu kudi antu anazeyeshuwu kudi kaayi kanenzali nakuhelañana. Twatela kumwekesha ñahi kukeña kudi antu mumudimu wetu wakushimwina?
2 Kuhitila Mukuhosha naWantu: Kukeña antu kwamuleñesheli Yesu kuzatisha mpinji yejima kulonda kushimwina nsañu yayiwahi. (Yow. 4:7-14) Kukeña kukatwikwasha kushinda kujinoka kwakushimwina wunsahu wamumpanji. Kansi wamumbanda wayaaka yakuvwalika yitanu nakamu washimwini wunsahu wawuwahi kudi mumbanda washakaminiyi nindi mukapeka kakuchiñilila kamuchipatela. Chumanyi chamuleñesheli kwila mwenimu? Wahosheli nindi, “Ona mumbanda wamwekeni neyi wakeñekeleña kumwiluka Yehova.”
3 Twatela kumwekesha netu twayikeña antu kuhitila mukutumba chimwemweta chamuzañalu, nintiyakenu yezu dawubwambu. Kutiyilila nakashinshi chinakuhoshawu amakwawu, kwiluka yuma yinakwakamawu, nikuyimwekeshela muzañalu walala wahalwetu nikwena kwamwekeshaña kukeña. (Yish. 15:23) Hakumwimbujola Yesu, twatela kukonkomwena hansañu yaWanta nihaluwi lwaYehova lwamwekeshelañayi antu.—Mat. 24:14; Luka 4:18.
4 Munzatilu: Yesu wanyakeleña kwakamena yuma yadiña nakukankilawu amakwawu lwakumujimba. (Mat. 15:32) Ninetu nawa tunateli kwikalaku nampinji yakuzataku nyidimu yaluwi hampinji yitudi mumudimu wakushimwina. Muhela wumu wamweni wamumbanda nakulwisha kutiyishisha nsañu yalema yatemesheliwu hanshiña. Muheletu wadiheni kuhitila mukumukwashaku kubalumuna mazu adiña nakuhosha watemesheli nshiña. Iyi nzatilu yakukeña yenzulwili njila yakutachika kuhanjeka nsañu yamuNsona yakwashili ona mumbanda kwiteja kudiza Bayibolu. Chakutalilahu chikwawu, mana kwetu wadiña nakufuntila wawanini mwiniitala nahilashani, muloña wakukikila nachitwamu chalema muchisu. Hanyima yakumukwasha mwiniitala kuswija chitwamu, mana kwetu washakamini hohana hachitwamu chamukwashiliyi kuswija nakutachika kudiza Bayibolu namuntu yeniwu watiyili kuwaha nankashi.
5 Chitunakuzata mumudimu wakushimwina, twamwekeshaña kukukeña kwetu kudi Nzambi nikudi atuñi netu. (Mat. 22:36-40) Kumwekesha kukeña kwamuchidiwu munhoshelu nimunzatilu kwakwashaña antu ashinshika kwiluka nawu tukweti chalala.