Wejima Wetu Tukweti Chuma Chitwatela Kumwinka Yehova
1 Komana mweluka nenu antu akweti yuma yinateli kumwinkawu Nzambi? Abeli, wamulambwili Yehova yimuna yindi yayiwahi, nawa Nowa niYoba niwena amulambwili yimuna yawu yayiwahi. (Kutach. 4:4; 8:20; Yoba 1:5) Hela chochu, nyilambu yeniyi hiyamuhetesheli Nleñuku, muloña waheta yuma yejima. Ilaña nyilambu yamwekesheli nawu ana amayala ashinshika amukeñeli Nzambi chikupu. Makonu, tunateli kuzatisha mpinji, niñovu nimaheta etu hakumulambula Yehova “mulambu wakumuhameka.”—Heb. 13:15.
2 Mpinji: Chachiwahi ‘kukwatila mpinji maana’ kuyuma yakadi kulema kulonda tukalakaleña chikupu mumudimu wakushimwina. (Efwes. 5:15, 16) Hadaha tunateli kuhimpaku ndandanda yetu kulonda kuzataku wupayiniya wakukwasha hadi kakweji kamu hela twatuvulu muchaaka. Hekwawu tunateli kuswijaku mpinji yitwakalakalaña mumudimu wamwiha. Neyi tukukalakalaña jiminiti jikwawu 30 mulungu nimulungu tukubombelahu maora ayedi hakakweji.
3 Ñovu: Hakwila nawu twikali nañovu yakushimwina, twatela kutondolwela kuhema yisela ninyidimu yatwileñelaña kuzeya chakwila hitunatweshi kumuzatila Yehova namuchima wetu wejimaku. Bayi tusweja kwakamena yuma yinateli “kuzembesha” nyichima yetuku, muloña yikutumanishila ñovu yitunateli kuzatisha hakumukalakela Nzambi. (Yishi. 12:25) Hela chakwila tunakwakamena chikupu, chachiwahi ‘kuumbila chiteli chetu hadi Yehova.’—Mas. 55:22; Afwi. 4:6, 7.
4 Maheta: Tunateli cheñi kuhana maheta etu kulonda kukwasha nachu mudimu wakushimwina. Pawulu wakolesheli akwawu akwaKristu ‘kutenteka hambadi mali’ mpinji yejima kulonda kwikala nayuma yakwinka antu akankila. (1 Kor. 16:1, 2) Munjila yoyimu, tunateli kutenteka hambadi mali akuhanaña kulonda kuzatisha kuyuma yinakukeñeka muchipompelu chetu nimali akuhana kumudimu wamukaayi kejima. Yehova wahamekaña neyi tuhana kufuma hamuchima, hela chakwila hikachuma kanyanya.—Luka 21:1-4.
5 Yehova watwinka yuma yayivulu. (Yak. 1:17) Twamwekeshaña kuhameka kuhitila mukuhana mpinji, ñovu nimaheta namuchima wetu wejima kulonda kumukalakela Yehova. Neyi tukwila mwenimu tukumuzañalesha Yehova, “muloña Nzambi wakeña muntu wahanaña nakuseha.”—2 Kor. 9:7.