Dikoleshenu Wumu naMukwawu Hampinji Yimunakushimwina
1 Wejima wetu twatiyaña kuwaha neyi atwikolesha ‘nezu dakuhoshela hidinateleli.’ (Yishi. 25:11) Neyi tunakuzata nawakwetu mumudimu wakushimwina, tunateli kwiluka ñahi netu mpanji yetu yinakukolesha amakwawu?
2 Mpanji Yakudikolesha: Hampinji yitunakushimwina, chachiwahi kuhanjeka nawamana kwetu niahela hayuma yinateli kukolesha wulunda wetu naNzambi. (Mas. 37:30) Tunateli kuhosha hanjila yitwazatishili hakushimwina hela kushimuna yakuhumañana yayiwahi yitwamona mumudimu wamwiha katataka. (Yil. 15:3) Komana, twadizahu chikuma chachiwahi mukutaña Bayibolu kwahalwetu, mumagazini amaha, hela hakupompa kwachipompelu? Tunateli kuhanjeka hayikuma yitwatiya mumpanji yawantu amavulu Hetala daWanta.
3 Tunateli kutiya kutama neyi chakwila mwiniitala yehula lwihu lutukukañanya kwakula. Chikusweja kuwaha neyi tuhanjekahu namukwetu yitunakuzata nindi chitwakakula lwihu lwamuchidiwu neyi tunafumi dehi hetala, hekwawu nikusandujola mumukanda waUkupelulula. Cheñi neyi tutiya kuwaha njila yinazatishiyi mukwetu yitunakuzata nindi twatela kumukolesha kuhitila mukumuhameka chikupu.
4 Tachikilenuhu: Komana kudihu antu amakwawu amwizanvu detu dakudiza kwamukanda yitunabuli kuzata nawu katataka? Neyi tukumuleja muntu netu tunakukeña kuzata nindi mumudimu wakushimwina, chikuletesha ‘kudikolesha wumu namukwawu.’ (Rom. 1:12) Apayiniya ampinji yejima niapayiniya akukwasha atiyaña kuwaha kuzata nawamakwawu, sweje-e nantetemena hela namelela, hashimwinañawu akwakushimwina antesha. Tunateli kukwashaku apayiniya kuhitila mukudihana kuzata nawu mumudimu wakushimwina. Komana mukweti mukwakushimwina wakata wabulaña kuzata chikupu mumudimu wakushimwina? Neyi tumuleja mukwakushimwina wamuchidiwu kuya nindi hakudiza kwaBayibolu chikuwaha hama.—Yish. 27:17.
5 Kumuhameka muntu hela tuhu mutuyuma twanyanya kunateli kumukolesha mpinji yejima. Twatela kwanukaña chumichi hampinji yitunakuzata nawantu amakwawu mumudimu wamwiha, chineli twakeñaña ‘kudikolesha wumu namukwawu.’—1 Tesa. 5:11.