Ikalenu Nkwashi Wamuwahi haMpinji yaKushimwina
1. Nkiswinyi yafumaña mukuzata ayedi mumudimu wakushimwina?
1 Ifuku dimu, Yesu watemesheli atumbanji 70 mumudimu wakushimwina nawa ‘wayitemesheleñahu dehi ayedi ayedi.’ (Luka 10:1) Chakadi kujina iyi ntanjikilu yaletesheli atumbanji twindi kukwashañana nikudikolesha wumu namukwawu hampinji yakushimwina. Tunateli kumukwasha ñahi mukwetu mukwakushimwina neyi tunakuzatila hamu mumudimu wakushimwina?
2. Neyi mukwetu mutunakuzatila nakuhosha, tunateli kutiyilila ñahi nawa muloñadi?
2 Kuhitila Mukutiyilila: Tiyililenu nakashinshi chikuhoshañayi mukwenu. (Yak. 1:19) Neyi nakutaña nsona, bakulenu Bayibolu yenu mulondeleña. Talenuña muntu wunakuhosha hela mukwenu wumunakuzata nindi hela mwiniitala. Neyi mushaku muchima kunsañu yinakuhoshewa, chikuleñela mwiniitala kutiyilila.
3. Chumanyi chikuletesha mukwetu mutunakuzatila kutuleja nindi tuhoshuhu?
3 Kuhitila Mukwiluka Mpinji Yimwatela Kuhoshahu: Neyi tunakuzata namukwetu, tunateli kumulemesha kuhitila mukumwiteja yena yahosheña. (Rom. 12:10) Bayi tumuketwisha hakuhoshaku. Neyi yavulamena nsañu yakeñañayi kuhosha hela neyi mwiniitala hakuleta ntaadi indi kwiji yehula lwihu chakwila mukwetu yalomba nindi tumukwashuku, tukufwila kunuña hamazu anahoshiyi kubadika kuleta nsañu yacheñi. (Yish. 16:23; Mukwa. 3:1, 7) Neyi tunakuhoshahu, twatela kunuña hawunsahu wunakuhanewa.—1 Kor. 14:8.
4. Chumanyi chikutuzañalesha nikuhetelamu mumudimu wakushimwina?
4 Chelili atumbanji 70 azatileña ayedi ayedi anafumi dehi mumudimu wakushimwina, ‘afuntili namuzañalu.’ (Luka 10:17) Anetu tunateli kuzañalala nikuhetelamu neyi tutiyilila nikwiluka mpinji yakuhoshahu hakukwasha mukwetu mutunakuzatila mumudimu wakushimwina.