Dikwashenu Wumu Namukwawu Hampinji Yimunakushimwina
1. Tunateli kumwimbujola ñahi Pawulu hampinji yitunakuzata nawakwetu mumudimu wakushimwina?
1 Kapostolu Pawulu wamweneña mpinji yadiñayi hamu nawakwawu akwakwitiya neyi himpinji ‘yakudikolesha wumu namukwawu.’ (Rom. 1:12) Neyi munakuzatila hamu namukwenu mukwakushimwina, mwamonaña nenu diyi mpinji yayiwahi yakumukolesha nikumukwasha? Chatela mumweni hohu, kwila mumulejaku yuma yayikwashaña enu kuzata chiwahi mumudimu wakushimwina nehi?
2. Chumanyi chitwatela kwila kulonda tumukoleshi mukwetu itunakuzata nindi mumudimu wakushimwina nawa chalemenadi?
2 Dikwashenu Kulonda Mwikali Nawulobu: Akwakushimwina amakwawu hiyekala nawulobuku, mpolu hela izu dawu damwekeshaña nawu adana wulobu. Neyi tuyihameka chikupu anateli kwikala nawulobu. Njilanyi jikwawu jitwatela kuzatisha hakwila tudikwashi kulonda twikali nawulobu? Nkoñi wumu wendaña wamulejaña mukwawu wunakuzatayi nindi chatiyañayi woma nichalombañayi mapampa kakavulu kulonda yekali nawulobu. Mana kwetu mukwawu washimwini chuma chamukwashaña kumwekesha wulobu nindi: “Nasambilaña kutumba chimwemweta hakanwa. Mpinji yikwawu nalombaña wukwashu hakwila tutumbi chimwemweta hakanwa.” Kuduhu chuma chayikwasha enu hakwila mumwekesheña wulobu mumudimu wakushimwina? Mulejenuku mukwenu imunakuzata nindi.
3. Yumanyi yitunateli kumulejaku mukwetu itunakuzata nindi yinateli kumukwasha kuzata chiwahi mumudimu wamwiha?
3 Mulejenuku Mukwenu Njila Jakushimwinamu: Komana mwawana mazu aswayi hela lwihu hadaha lwakundama kuyuma yamwekanaña mwiluña denu lwayikwashaña kutachika kuhanjeka namuntu? Komana mwamonaña yuma yayiwahi yafumaña munjila yimwazatishaña yayikwashaña kushimwina chiwahi? Mulejenuku mukwenu imunakuzata nindi. (Yish. 27:17) Hampinji yimunakufuntilaku, munateli kumuleja mukwenu nsañu yimunakuya nakuhanjekahu nichimukuhanjeka. Hanyima yakudiza namuntu, munateli kulumbulula muloña wumwatondela ochu chikuma, nsona hela njila yimwamudizishilamu kadizi hakwila mumushiki hamuchima.
4. Muloñadi wutwafwilaña kukwashila akwetu akwakushimwina?
4 Akwakushimwina amuyaaka nkulakaji yakusambila hiyashili muchima hakukwasha hohu antu abulili kwitiyaku. Elukili cheñi kulema kwakudikolesha wumu namukwawu. (Yil. 11:23; 15:32) Kapostolu Pawulu wamudizishili kansi Timotewu nawa wamukolesheli kulejaku akwawu yuma yadiziliyi. (2 Tim. 2:2) Neyi tubula kuvulamena kwilila akwetu akwaKristu yuma yayiwahi hampinji yitudi mumudimu wakushimwina, tukuyikwasha kwikala namuzañalu nawa akushimwinaña chiwahi, cheñi nawa tukumuzañalesha Tata yetu wamwiwulu.—Heb. 13:15, 16.