Kuwahisha Njila Jetu Jakushimwinamu—Kwikala Nkwashi Wamuwahi

Kwalemenadi: Yesu welukili nindi kushimwina hamu nawakwetu kwalema. Dichi, hampinji yatemesheleñayi atumbanji twindi 70 kulonda ayeñahu dehi nakushimwina, wayitemesheli ayedi ayedi. (Luka 10:1) Nkwashi nateli kukwasha mukwawu mukwakushimwina neyi kumwekana kukala hela neyi yakañanya kwakula mwiniitala. (Mukwa. 4:9, 10) Nateli kumuleja yuma yamukwashaña hela njila yinateli kukwasha mukwawu wunakuzatayi nindi kulonda yekali mukwakushimwina wakuluka yitembi. (Yish. 27:17) Nateli cheñi kumukolesha mukwawu kuhitila mukuhanjeka hayuma yakukolesha hampinji yinakufumawu hetala dimu nakuya hadikwawu.—Fwi. 4:8.