Mukanda Kufuma Kwizaza Dalombolaña
Kudi Akwetu aYinsahu jaYehova:
Kapostolu Pawulu wadiña nakukooleka kwakumwekesha kukeña nikusakilila kwindi kudi akwawu akakwitiya. Wayisonekeleli akwaKristu amuRoma nindi: ‘Nukuyileja chinayisakililaña wejima wenu kudi Nzambi yami mudi Yesu Kristu, nanochu chikunatiyakani kukuhwelela kwenu mumatuña ampata yamunu mwishina ejima.’ (Rom. 1:8) Mwalala akwaKristu amuyaaka nkulakaji yakusambila ayilukili muWanta wejima wawaRoma hamuloña wachikuhwelelu chawu chakola, nikukalakala nañovu mumudimu wakushimwina. (1 Tesa. 1:8) Dimuloña Pawulu chayikeñeleliyi amana kwindi chikupu!
Kufwana Pawulu, twamuhamekaña Yehova mpinji yejima yitunakutoñojoka hadenu. Twayikeña chikupu wejima wenu! Nawa kuhwelelenu nenu Yehova wayikeña hamuntu hamuntu. Hakachi kenu amakwawu munakumona ikañesha dasweja hama, ilaña munakutwalekahu kushimwina. Mwamutiyishaña Yehova kuwaha hakubula woma.—Yish. 27:11.
Hampinji yimukutañaña nakanañachima nikutoñojoka chikupu hansañu yakuzañalesha nawa yakukolesha chikuhwelelu yinasonekuwu muYearbook kutalisha “Hanyidimu yawaYinsahu jaYehova yaMakonu,” mukumona wunsahu wawuvulu wunakumwekesha nawu Mwanta Yesu Kristu nakutwalekahu “kwimika mushindu nawa wakemikaña mushindu ho-o” nawa chitwa chejima chikachililawu atumbanji twaKristu hichikatweshaku.—Chim. 6:2; Isa. 54:17.
Pawulu wasonekeleli akwaKristu akuFwilipi, nindi: “Nasakililaña Nzambi yami . . . nanochu chimwankwashaña kutwala nsañu yayiwahi kumbidi.” (Fwi. 1:3-5) Etu aMwizaza Dalombolaña twatiyaña neyi chatiyiliyi Pawulu. Muchaaka chamudimu cha 2007 akwakushimwina 6,691,790 ashimwinini maora akushika ku 1,431,761,554 mumudimu wakushimwina nsañu yayiwahi mumatuña 236 kunyeñumuka iseki dejima. Munakuzata nañovu chikupu hakutwalekahu kushimwina nsañu yayiwahi. Toñojokenu hadi antu amavulu anakwashewi hamuloña wakuzatila hamu nawa yuma yejimiyi yinakuleta kalemesha hadi Yehova!
Hampinji yikwawu, Pawulu watiyilili amana kwindi wushona chikupu. Wayisonekeleli akuTesalonika nindi: “Twenda twanuka mudimu wenu wakukuhwelela kumesu aNzambi . . . nikutatakena kwenu kwenzaña kukuchiñeja kwekala mudi Mwanta wetu Yesu Kristu.” (1 Tesa. 1:2, 3) Chalala, muchihandilu mwekala kukala kwakuvulu. Kukala kwamwekanaña, ilaña chachiwahi kuumika. Kukalanyi kumunakumona halwenu? Komana mudi nachikela hamuloña wayikatu yasweja yinakuyikañesha kukalakala yuma yimunateli kuzata mumudimu waYehova? Komana mwafwishahu dehi mukwenu wamumaluwi kudi chilumbu muneni? (Yish. 30:15, 16) Komana munakañanyi kuwana mukwenu wamumaluwi wamukeña Yehova neyi chimwamukeña hampinji yimunakakeli kukufumba kwamuNsona kwakusumbwila hela kusumbukila mudi Mwanta hohu? (1 Kor. 7:39) Kamona munakufwila kukulisha anyanenu iku munakumona kukala kwakuwana mali? Hela chakwila munakumona kukala kudi kwejima, neyi mutwamijaku Wanta muchihandilu chenu, ilukenu nenu Yehova “hakavulamena mudimu wenu hela kukeña kumwakeñeli ijina dinduku.” Dichi amana kwetu nahela, ‘bayi tuzeya nakwila mwamuwahuku.’—Heb. 6:10; Ŋal. 6:9.
Chumanyi chikuyikwasha kuumika? Neyi chichadiña kudi aTesalonika, anetu nawa twatela ‘kuchiñeja mudi Mwanta wetu Yesu Kristu.’ Haniwu muloña, Pawulu wesekejeli “kuchiñeja wamwinu” netepa dachikuñu dinateli kukiña mukwaKristu kubula kwikala nayitoñojoka yaluwa nikubula kutwalekahu kujinooka.—1 Tesa. 5:8.
Chalala, kuhitila mukuumika namuzañalu, mwakulaña kusawula kwaSatana kutalisha kunsañu yawanta wakuleña kwejima. Satana wahoshaña nindi ambuña aNzambi ekala nalwisu nawa adihana kumukalakela Nzambi kampinji kantesha, anateli kuzeya mukudifukula kwawu neyi amona kukala kweneni hela neyi kanu kaayi katwalekahu. Mukweti kukooleka kwakumufwisha Diyabolu namuloña nenu hisakutwamba. Ifuku dejima dikuhita dayiswijaña kwakwihi nakutambwila nkisu jimwachiñejaña.
Neyi chadiñayi Pawulu nakukooleka kwakuhameka amana kwindi hakwikala nachikuhwelelu chakola, hakudihana mumudimu wakushimwina, nikuumika, tukweti muzañalu wakuyihameka nikuyileja netu twayikeña. Twalekenuhu kukalakala nyidimu yayiwahi!
Tunakulomba netu Nzambi yayikiswili chikupu chaaka chinakwinza. Tunayimushi chikupu
Yetu ana kwenu,
Izaza Dalombolaña dawaYinsahu jaYehova