Komana Nashikuhu Kushimwina?
1. Muloñadi wutukubulila kutoñojoka netu hitwashikahu kushimwinaku?
1 Neyi mwadihulahu dehi lwihu lwamuchidiwu bayi mwakamaku. Bayi neyi shikola yahewulu hela wuswa wakusemuka nawu diwatuleñelaña kushikahu kwikala ankalakaluku. Atumbanji amakwawu akusambila ayiteneneña nawu “hiyantu akadi kwiluka nyikanda, hela kwiñila mumashikola amaana.” Hela chochu, adiña akwakushimwina ansañu yayiwahi ashikahu muloña adiña nakufwila kulondela chakutalilahu chaYesu.—Yil. 4:13; 1 Pet. 2:21.
2. Indi Yesu watañishileña ñahi?
2 Chatañishileñayi Yesu: Ntañishilu yindi yadiña yaswayi kuyiluka nikudi antu abula kutaña. Malwihu, yakutalilahu, nichatachikileñayi kuhosha chaletesheli antiyilili jindi kushaku muchima. (Mat. 6:26) Washili muchima hadi antu. (Mat. 14:14) Kubombelahu, Yesu wadiña wahamuka hakuhosha muloña welukili nindi Yehova wamwinkeli mudimu niñovu yakukalakala mudimu windi.—Luka 4:18.
3. Indi Yehova watukwashaña ñahi kuzata mudimu wetu?
3 Yehova Watukwashaña: Nleji yetu Muneni, watufumbaña kulonda tushimwineña nsañu yayiwahi munjila yayiwahi kuhitila Mwiizu nikuloñesha kwindi. (Isa. 54:13) Muloña wakwila Yehova wahembeli nsañu yahosha hanjila yatañishilileñamu Yesu, twatañañamu nikulondeja njila jeniji. Yehova watwinkaña spiritu yindi yajila nawa watudizishaña kuhitila muchipompelu. (Yow. 14:26) Cheñi nawa, watwinkaña akwakushimwina akuluka yitembi anateli kutukwasha kwikala ashikahu chikupu.
4. Muloñadi wutwatela kukuhwelela netu twashikahu kushimwina nsañu yayiwahi kudi antu?
4 Twatela kukuhwelela netu twashikahu kushimwina, muloña “ñovu jetu jafumaña kudi Nzambi hohu.” (2 Kor. 3:5) Neyi tushindamena hadi Yehova nikuzatisha nakashinshi yuma yatwinkañayi, tukwikala ‘awanina chikupu, awahila nyidimu yayiwahi yejima.’—2 Tim. 3:17.