Kapetulu 16

Dikañenu naDiyabolu niTufuta Twindi

‘Dikañenu naDiyabolu, niyena wukuyitemuka.’—YAKOBA 4:7.

1, 2. Anyi azañalalaña hampinji yachipapatishu?

NEYI munamukalakeli Yehova hayaaka yayivulu, chakubula nikujina mwatiyilila mpanji jajivulu jachipapatishu hakupompa kwanyanya nikwamaneni. Hela munatiyilili iji mpanji kakavulu, chakubula nikujinooka mwatiyaña kuwaha hakumona antu anashakami kumbidi hiyakwimana kulonda adihani nakupapatishewa. Haniyi mpinji, mwizaza mwatiyakanaña chuñumina, kufumahu hiyakusakilila namuzañalu chikupu. Munateli kuholola madilu hakumona izanvu dikwawu dawantu alema anatonduhu kumukalakela Yehova. Wenowu muzañalu wutwatiyaña haniyi mpinji!

² Hela twamonaña apapatishewaña mwiluña detu mapampa antesha muchaaka, añelu ekala nakukooleka kwakuyimona kakavulu. Toñojokenu ‘hamuzañalu wekalaña mwiwulu’ hakumona makombakaji awantu mukaayi kejima anakwinza mukuloñesha kwaYehova kwamwekanaña mulungu nimulungu! (Luka 15:7, 10) Chakadi nikujina, añelu azañalalaña hakuvulilaku kweniku.—Hagayi 2:7.

DIYABOLU ‘NAKUTAMBATAMBA NEYI MUTUPA WABULUMAÑA’

3. Muloñadi Satana chinakutambatambilayi “neyi mutupa wabulumaña,” nawa chumanyi chakeñañayi kwila?

³ Hela chochu, kwekala yileñaleña yakuspiritu yahilaña hakumona antu anakupapatishewa. Satana niandemoni ahilaña hakumona antu amavulu anakukaana kanu kaayi katama. Kafwampi Satana wadisamini nindi kwosi antu amukalakelaña Yehova nakukeña kwakwenuku nawa nindi kwosi wunateli kwikala wakashinshi neyi amweseka chikupu. (Yoba 2:4, 5) Mpinji yejima Satana wekalaña sakutwamba neyi muntu nafuukuluhu kudihana kudi Yehova. Chidi neyi Satana wahilaña chikupu mulungu wudi wejima muchaaka. Dimuloña ‘watambatambilañayi nakukeñakeña akudyayi, neyi mutupa wabulumaña.’ (1 Petulu 5:8) Iwu “mutupa” wafwilaña kutwikisañana chikupu kuspiritu, kumanisha wubwambu wetu naNzambi.—Masamu 7:1, 2; 2 Timotewu 3:12.

4, 5. (a) Indi Yehova wamukañeshaña Satana kutuluwañesha munjilanyi jiyedi jalema? (b) Chumanyi chatela kukuhwelelayi mukwaKristu walala?

⁴ Hela twatalañanaña nachilumbu wawukatu, hitwatela kusweja kuchiinaku. Muloñadi? Muloña Yehova wakañeshaña ñovu janiwu “mutupa wabulumaña” munjila jiyedi jalema. Hinjilanyi? Yatachi, Yehova washimwineñahu dehi nindi “izaza deneni” dawakwaKristu alala dikapuluka ‘yihuñu oyu yeneni’ yinakwinza. (Chimwekeshu 7:9, 14) Wuprofwetu waNzambi hiwakañanyañaku. Dichi, Satana watela kwiluka nindi hakatwesha kukwata antu jaNzambi ejimaku.

⁵ Njila yamuchiyedi yamukañeshawu yamwekena munsañu yalala yahosheluwu ambuña aNzambi ashinshika akunyaka. Kaprofwetu Azariya wamulejeli Mwanta Asa nindi: “Mwonsu mumukwikala naYehova, yena wukwikala nanenu.” (2 Kushindulula 15:2; 1 Akorinda 10:13) Yakutalilahu yayivulu yasonekawu yamwekesha nawu, kunyaka Satana wakañenyeña kuhuñumuna antu jaNzambi atwalekeluhu kwikala kwakwihi naNzambi. (Aheberu 11:4-40) Makonu, mukwaKristu wukwikala kwakwihi naNzambi wukutwesha kudikaña nikumushinda Diyabolu. Izu daNzambi datukonkomwena nawu: ‘Dikañenu naDiyabolu, niyena wukuyitemuka.’—Yakoba 4:7.

“TWALWISHAÑA . . . NAWASPIRITU ATAMA”

6. Indi Satana walwishaña ñahi mukwaKristu wudi wejima?

⁶ Satana hanateli kushinda njita yachifwikijaku, ilaña nateli kutushinda halwetu neyi tubula kubabala. Satana weluka nindi nateli kutushinda neyi yazeyesha wubwambu wetu naYehova. Indi Satana wesekaña ñahi kutushinda? Kuhitila mukutulukuka chikupu halwetu nawa mukubabala. Tushinshikenu tufuta twatweni twaSatana.

7. Muloñadi Satana chinaswejeliyi kulukuka ambuña aYehova?

⁷ Kulukuka kwasweja. Kapostolu Yowanu wahosheli nindi: “Mpata yamunu mwishina yashakamaña mudi owu watama.” (1 Yowanu 5:19) Awa mazu asoñamishaña akwaKristu alala ejima. Chineli Satana waluwañesha dehi kaayi kawantu atama kejima, ichi nashi maana nikuswejesha kulukuka antu amutemuka, ambuña aYehova. (Mika 4:1; Yowanu 15:19; Chimwekeshu 12:12, 17) Wudi nandombu yeneni muloña neluki nindi mpinji yindi yantesha. Dichi naswejeshi kuluwañesha. Makonu twatalañanaña nawukatu windi wasweja nikukisañana wubwambu wetu naNzambi. Sweje-e munanu mafuku twatela ‘kushinshika chachiwahi kulonda twiluki mwakwilila.’—1 Kushindulula 12:32.

8. Indi kapostolu Pawulu watalishili mudihi hakuhosha nindi “twalwishaña” nawaspiritu atama?

⁸ Kulwisha halwetu. Kapostolu Pawulu wasoñamishili akwawu akwaKristu nindi: “Twalwishaña . . . nawaspiritu atama amumawulu.” (Aefwesesa 6:12) Muloñadi Pawulu chazatishiliyi izu dakwila nawu ‘kulwisha’? Muloña dalumbulula kudinyika makasa namakasa nikuzuñila mukamwihi chikupu. Dichi hakuzatisha izu denidi, Pawulu walumbulwili nindi muntu wejima walwishaña nawaspiritu atama. Hela chakwila twashakamaña mwituña mwasweja kukuhwelelawu mudi aspiritu atama hela nehi, twatela kwiluka netu chitwadihana kudi Yehova, dikwila nawu tunatachiki kulwisha nawaspiritu atama muchifwikija. Kufuma tuhu hakupapatishewa, mukwaKristu wejima walwishaña naniyi ndombu yachifwikija. Dimuloña wayisoñamishililiyi Pawulu akwaKristu amuEfwesesa kubadika hakapampa kamu nindi ‘imanenu chakola.’—Aefwesesa 6:11, 13, 14.

9. (a) Muloñadi Satana niandemoni chiyazatishilañawu ‘maana akudimbana’ ashiyashana? (b) Muloñadi Satana chafwilañayi kuluwañesha yitoñojoka yetu, nawa tunateli kudikaña ñahi nindi? (Talenu chikasha hamafu 192-3.) (c) Tukuhanjeka hakafutanyi?

⁹ Tufuta. Pawulu wakonkomweni akwaKristu kwimana chakola ‘namaana akudimbana’ aSatana. (Aefwesesa 6:11) Ilukenu nenu Pawulu wahosheli hatufuta twatuvulu. Aspiritu atama azatishaña tufuta twatuvulu nawa kudi chelilañawu mwenimu. Mukuhita kwampinji, akwakwitiya amakwawu emeni chakola kumuchidi wumu wakweseka azeyaña neyi amona kukwawu. Dichi, Diyabolu niandemoni atalaña chikupu yililu yamuntu nimuntu kulonda eluki hitwazeyela chikupu. Kufumahu akoolekelaña hitwazeyela kuspiritu kulonda amanishi wubwambu wetu naNzambi. Tukweti kukooleka hakwiluka tufuta twatuvulu twaDiyabolu, muloña atushimuna muBayibolu. (2 Akorinda 2:11) Muwunu mukanda, twadizamu tufuta twenitu tudi neyi kufwila yuma yakumujimba, kudikunda kwatama, niwuvumbi. Ichi dinu tushinshikenu kafuta kakwawu kaSatana—kupesha.

KUPESHA HIKUFUKEJA

10. (a) Indi kupesha hichumanyi? (b) Yehova wamonaña ñahi kupesha, indi enu mwakwimonaña ñahi?

¹⁰ Neyi muntu nakupesha, hela nakulombelela andemoni, dikwila nawu nakutiyañana nawaspiritu atama. Kuhoña, kupanda, kukaya, kuhanjeka nawafu hinjila jakupeshelamu. Neyi chitweluka Yehova wamonaña kupesha nindi ‘hichishimashima.’ (Kuhituluka 18:10-12; Chimwekeshu 21:8) Chineli ninetu twatela ‘kutiya kutama nayuma yatama,’ hiwusupi neyi tudikunda nawaspiritu atama. (Aroma 12:9) Kwila mwenimu, hikumufukeja chatama Tata yetu wamwiwulu, Yehova!

11. Muloñadi Satana chikushindilayi chikupu neyi tutachika kupesha? Lumbululenu.

¹¹ Hela chochu, chineli kudiñija mukupesha hikumufukejela chikupu Yehova, Satana wafwilaña kuhuñumuna amakwawu kulonda apesheña. Neyi yokokola mukwaKristu kulombelela andemoni, Satana washindaña chikupu. Muloñadi? Shinshikenu hanichi chakutalilahu: Neyi mushidika amushinjila kushiya nikufukeja amashidika indi nakudibomba nawamashidika ayilumbu, mukulumpi wawamashidika ayilumbu wukutiya kuwaha. Nateli kumumwekesha nfukeji neyi walema chikupu kulonda kusawula wadiña mukulumpi wanona mushidika. Munjila yoyimu, neyi mukwaKristu yatachika kupesha nateli kudikeñela kumuleka Yehova mumushikila nikutachika kulondela nshimbi jaSatana. Toñojokenu chikuzañalalayi Satana hakumumwekesha ona wunamushiyi Yehova neyi muntu wunashindi njita! Hinyi wukukeña kumumwekesha Diyabolu neyi mukwakushinda? Kwosi! Hitudi anfukejuku.

WEHULAÑA MALWIHU KULONDA KUTULEÑELA KUJINOOKA

12. Satana wazatishaña njilanyi kulonda kutuluwañesha chitwamonaña kupesha?

¹² Neyi chakwila tuhela kupesha, Satana hakatwesha kutushinda nakupeshaku. Dichi weluka nindi nateli kuhimpa yitoñojoka yetu. Munjilanyi? Wakeñaña jinjila jakuluwañeshelamu akwaKristu nikuyileñela amakwawu atoñojokeña nawu “yatama nawu yayiwahi, yayiwahi nawu yatama.” (Isaya 5:20) Hakwila nawu yakoñi mwenimu, kakavulu Satana wazatishaña njila yindi yazatishiliyi kunyima—wehulaña malwihu kulonda kutuleñela kujinooka.

13. Indi Satana wazatishili ñahi njila yakwihula malwihu kulonda kuleñela kujinooka?

¹³ Talenu chazatishiliyi Satana iyi njila kunyima. Wamwihwili Evu muEdeni nindi: ‘Chalala Nzambi nahoshi nindi, nyitondu yejima yamwitempa bayi mwakayidyaku, tahindi?’ Mumafuku aYoba, hampinji yapompeluwu añelu mwiwulu, Satana wehwili lwihu nindi: ‘Ochu Yoba wamwakama Nzambi chamukunkulu, tahindi?’ Nawa hampinji yatachikiliyi Yesu mudimu windi waheseki, Satana wamutadikishili Kristu hakuhosha nindi: ‘Neyi eyi wuMwana kaNzambi, hoshaku neyi malolawa abalumuki mankendi.’ Kutalisha hadi Yesu, Satana wadiwili kuhitila mukuzatisha mazu ahosheliyi Yehova nyilungu yitanu nawumu yahitilumu nindi: ‘Diyi Mwanami nakeña, natiyaña kuwaha nankashi mudi yena.’—Kutachika 3:1; Yoba 1:9; Matewu 3:17; 4:3.

14. (a) Indi Satana wazatishaña ñahi kafuta kindi kulonda yatuleñeli kujinooka hakupesha? (b) Yumanyi yitukuhanjekahu?

¹⁴ Makonu, Diyabolu wazatishaña kafuta kadifwanaku kulonda kutuleñela kujinooka hakutama kwekala mukupesha. Chawushona, Satana watwesha kuleñela akwakwitiya amakwawu kutachika kujinooka. Anatachiki kujinooka neyi chalala njila jikwawu jakupesha jatama chikupu. Munjila yikwawu anakutoñojoka nawu, ‘Chalala?’ (2 Akorinda 11:3) Tunateli kukwasha ñahi antu amuchidiwu kuhimpa yitoñojoka yawu? Chumanyi chitwatela kwila hakwila nawu tufuta twaSatana tubuli kutuluwañesha? Hakwila nawu tuwani ñakwilu, tushinshikenu hajinjila jiyedi jamuchihandilu jinatamishiyi Satana nakupesha. Njila jeniji hiyisela nikwakamena mujimba.

WAKOOLEKELAÑA YUMA YITWAKEÑAÑA NIYITWAFWILAÑA

15. (a) Indi antu amavulu aKuputu amonaña ñahi kupesha? (b) Indi akwaKristu amakwawu anayiluwañeshi ñahi nammwenu yamukaayi yakupesha?

¹⁵ Sweje-e Kuputu, kuhoña, kupanda, ninjila jikwawu jakupesha ajimonaña neyi jamukunkulwayi. Mafilimu, nyikanda, maprogiramu ahaTV, niyisela yahakopyuta yamwekeshaña andemoni ayimonaña neyi hiyuma yakuhemesha, yaleñelaña kwikala wababala nawa hiyafwanaku. Mafilimu ninyikanda yikwawu yikweti nsañu yakupesha yinawanini kwejima chakwila antu akeña yumiyi aloñesha matala akuhemenamu. Chalala, andemoni ashinda hakuleñela antu kumona wubanji wekala mukupesha neyi hiwafwanaku. Komana ichi chaaku chakumona kupesha neyi hikwafwanaku chinaluwañeshi akwaKristu? AkwaKristu amakwawu anekali nayitoñojoka yamuchidiwu. Munjilanyi? Chakutalilahu, mukwaKristu wumu chataliliyi filimu yamwekesheleña nsañu yakupesha, wahosheli nindi, “Natalili filimu, ilaña hinapesheluku.” Muloñadi yitoñojoka yamuchidiwu chiyatamina?

16. Muloñadi chichatamina kutonda yisela yahoshaña hakupesha?

¹⁶ Hela hekala chambu hakachi kakupesha kwakweni nakutala nsañu yakupesha, kutala nsañu yakupesha kwafwana. Muloñadi? Toñojokenu chumiche: Izu daNzambi datulejaña nawu Satana hela andemoni hiyakweti ñovu yakwiluka yitoñojoka yetuku.a Neyi chashimunawu hakusambila, hakwila nawu eluki yuma yitunakutoñojoka nikwiluka yuma yinateli kuzeyesha wubwambu wetu naNzambi, aspiritu atama ashinshikaña chikupu yililu yetu niyisela yitwakeñaña. Neyi mukwaKristu yamwekesha nindi wadiluñishaña jifilimu hela nyikanda yakundama hadi azakukaña akishi, nyikayi, nyidimu yawandemoni, hela yuma yadifwanaku yahosha hadi andemoni, dikwila nawu nakutiyañana nawandemoni. Nakuyileja hazeyelayi. Dichi andemoni akusweja kumulwisha ona mukwaKristu kulonda eluki kuzeya kunamwekeshiyi sampu anamushindi. Antu aswejeli kusha maana mujakupesha kuhitila muyisela yasañumunaña chikupu kupesha nkumininaku atachikili kupesha.—Aŋalija 6:7.

17. Tufutanyi twazatishañayi Satana hakuzeyesha antu akata?

¹⁷ Satana hakeñaña kwiluka hohu yisela yitwafwilañaku ilaña niyuma yitwakeñaña hakwakamena mujimba. Munjilanyi? MukwaKristu wunakuyekela nayikatu hela chakwila nazati nañovu kulonda amuuki nateli kuneña chikupu. (Maku 5:25, 26) Satana niandemoni akumukoolekela kulonda awani njila yakumuzeyeshelamu. Eluka chikupu nawu Izu daNzambi dakaanisha kukeña “wukwashi wawakwakukoña yakuluwa.” (Isaya 31:2) Hakwila nawu mukwaKristu adiwuli iku kusoñamisha, andemoni anateli kweseka muntu wunakati kulonda yasweji kudakamena chikupu nikutonda kuukewa kunabombelumu ‘ñovu yakuhoña’ hela kupesha, chuma chatama chikupu. Neyi kafuta kawandemoni kazatika, kanateli kuzeyesha wubwambu wamuyeji naNzambi. Munjilanyi?

18. Njilanyi jakuukilamu jatela kukaanayi mukwaKristu nawa muloñadi?

¹⁸ Yehova wasoñamishili aIsarela adiñijili ‘muñovu yakuhoña’ wayilejeli nindi: “Chimukuñolwela makasenu nukuyibutila mesu ami. Mwalala, hela mukuvulisha kulomba hinukutiyaku.” (Isaya 1:13, 15) Hela chochu, mpinji yejima twakeñaña kutondolwela yuma yejima yinateli kukañesha kulomba kwetu nikubula kutambwila chikupu wukwashu waYehova, sweje-e hampinji yayikatu. (Masamu 41:3) Dichi neyi chinamwekani nawu njila yimu yakuukilamu muyeji yinabombelumu kupesha, mukwaKristu walala watela kuyikaana.b (Matewu 6:13) Neyi yakaana, watela kwiluka nindi Yehova wukumukwasha.—Talenu chikasha hefu 194 “Komana Chalala hiKupesha?”

NEYI NSAÑU JAWANDEMONI JINASWEJI

19. (a) Diyabolu nadimbi antu amavulu kukuhwelela chumanyi kutalisha hañovu jindi? (b) Nsañu yamuchidinyi yatela kutondolwelawu akwaKristu alala?

¹⁹ Antu amavulu aKuputu amonaña neyi ñovu jaSatana hijafwanaku, kumatuña amakwawu amwenaña mwacheñi. Munawa matuña, Diyabolu nadimbi antu amavulu kukuhwelela nawu wukweti ñovu jasweja chikupu kubadika jikwetiyi. Antu amakwawu ahandaña nawoma wawaspiritu atama. Nsañu jawandemoni añovu jinasweji. Nsañu jamuchidiwu kakavulu ajishimunaña namuzañalu; antu asweja kujikeña. Komana ninetu twatela kutandisha nsañu jamuchidiwu? Nehi, ambuña aNzambi walala atondolwelaña kutandisha nsañu jamuchidiwu hanyiloña yiyedi yalema.

20. Indi muntu nateli kutandisha ñahi nsañu yaSatana yakutwamba, hekwawu chakadi kwiluka?

²⁰ Chatachi, neyi muntu yashimunaña nsañu yinakuhosha hanyidimu yawandemoni, dikwila nawu nakutwala hambidi mudimu waSatana. Munjilanyi? Izu daNzambi dahoshaña nawu Satana wukweti ñovu jakukoña nyidimu yañovu, ilaña dasoñamishaña cheñi nawu wazatishaña ‘yinjikijilu yakutwamba’ “nikudimbana.” (2 Atesalonika 2:9, 10) Chineli Satana diyi mukwakudimbana muneni, weluka chakuluwañesha yitoñojoka yawantu asha maana kukupesha nichakuyileñela kukuhwelela yuma yakutwamba. Antu wenawa anateli kukuhwelela nawu amweni nikutiya yuma yikwawu, anateli nikushimuna yuma yamwenuwu neyi yalala. Mukuhita kwamafuku, nsañu yawu anateli kuyilebumuna kuhitila mukushimuna mwacheñi mpinji yejima. Neyi mukwaKristu yatandisha nsañu yamuchidiwu, dikwila nawu nakwila nkeñelu yaDiyabolu, ‘tata yantwambi.’ Wukutandishaña nsañu yaSatana yakutwamba.—Yowanu 8:44; 2 Timotewu 2:16.

21. Indi mpanji jetu jatela kushindamena hachumanyi?

²¹ Chamuchiyedi, hela chakwila mukwaKristu wadimweneña nawaspiritu atama kumafuku akunyima, hatela kumanishaña akwawu akwakwitiya wuudi hakuyileja nsañu jamuchidiwuku. Muloñadi? Atukonkomwena nawu: ‘Talishenu mesu kudi Yesu, diyi mukwakubuza, diyi mukwakumanisha kwitiya kwakukuhwelela.’ (Aheberu 12:2) Eña, twatela kusha kashinshi kudi Kristu, bayi Satanaku. Chamuzañalu hakwiluka nawu hampinji yadiñayi Yesu hamaseki, hayimanisheleña atumbanji twindi wuudi nansañu yawaspiritu atamaku, hela chakwila wadi kuhosha hayuma yayivulu yinateli kukoñayi Satana nikubula kukoñayi. Ilaña, Yesu wahosheleña hansañu yaWanta. Hakwimbujola Yesu niapostolu, tunakukeña mpanji yetu yishindameneña ‘hanyidimu yaNzambi yañovu.’—Yililu 2:11; Luka 8:1; Aroma 1:11, 12.

22. Chumanyi chitwatela kwila hakwila nawu tusañumuni ‘muzañalu mwiwulu’?

²² Mwalala, Satana wazatishaña tufuta twashiyashana, kushilahu nikupesha kulonda kweseka kukisañana wubwambu wetu naYehova. Hela chochu, kuhitila mukuhela yuma yatama nakukakela yayiwahi, Diyabolu hakuwana hakuzeyeshela kufuukula kwetu kwakukaana njila jejima jakupeshelamuku. (Aefwesesa 4:27) Toñojokenu hamuzañalu wukwikala mwiwulu neyi tutwalekahu ‘kudikaña natufuta twaDiyabolu’ nakushika nimpinji yakamukisañanawu!—Aefwesesa 6:11.

[Tumazu twaheshina]

[Chikasha chidi hefu 192, 193]

BABALENU NATUFUTA TWASATANA!

Satana, mwanta wamakasu, “naputishi mesu ayitoñojoka yawanta abula kwitiya” hayaaka yayivulu. (2 Akorinda 4:4) Nawa hazeyaña hakufwila kuluwañesha yitoñojoka yawakwakudifukula aNzambuku. Muloñadi? Satana weluka nindi yuma yitwatoñojokaña diyi yitwakoñaña. Weluka nindi neyi yaluwañesha yitoñojoka yetu, nateli kutuleñela tukoñeña yuma yatama.—Yakoba 1:14, 15.

Anukenu kafuta kazatishiliyi Satana hakumudimba Evu. Kapostolu Pawulu wasonekeli nindi: “Natiyi woma, nami hamwaha yitoñojoka yenu yakayiluwañesha, yifumi . . . mudi Kristu neyi chamudimbiluwu Evu kudi kapela namaanindi.” (2 Akorinda 11:3) Hakuzatisha kapela, Satana wamudimbili Evu kulonda yalondeli njila yatama. Wakeñeli kutamisha yitoñojoka yindi, nikuluwañesha yililu yindi. Kafuta kindi kazatikili. Muloña Evu wamutiyililili, yitoñojoka yindi yahimpikili, nawa yuma yakanishiluwu yekalili yayiwahi. Chelili yitoñojoka yindi yiluwankani, anyakeli kumukokola kulonda yavulumuni.—Kutachika 3:1-6; Chimwekeshu 12:9.

Satana hahimpaku. Nshimbi yindi yayeni hiyahimpaku: Yitoñojoka chiyaluwankana, chikufumamu hikuvulumuna. Satana wazatishaña mapolitiki amukanu kaayi, nsakililu, yisela, nyidimu yakulanda nakulandulula, kulonda kutandisha nsañu yakutwamba. (Yowanu 14:30) Watwesha kuluwañesha yitoñojoka yawantu amavulu, nikuhimpa yililu yawu nichamonañawu yuma. Yililu yamweneñawu hakusambila nawu yanshidi, chidi neyi wutumwa, kushakama hamu namuntu wabula kwikala mwinikweyi, nikuvwala anyana muwujila, antu anakumona iyi yililu neyi yetejewa, nawa yayiwahi. Indi Satana watweshaña ñahi kudimba antu? Bayibolu yahosha nawu: “Mpata yamunu mwishina yashakamaña mudi owu watama.”—1 Yowanu 5:19.

Etu akwaKristu twafwaña mutufuta twaSatana. (1 Akorinda 10:12) Chinelukiyi nindi mpinji yindi yinakehi dehi, Satana wudi “nandombu yayeni” sweje-e nakufwila kudimba antu jaNzambi. (Chimwekeshu 12:12) Neyi kubabala nehi, nsañu yakutwamba yakafuta kaSatana ‘niakwakudimbana’ amavulu azatishañayi anateli kuluwañesha yitoñojoka yetu nikutuleñela kwila nshidi.—Titusa 1:10.

Chakutalilahu, toñojokenu hammwenu yakwituña yamaluwi. Bayibolu yatañishaña nawu maluwi ajila, abombelamu chitiyañenu chahaya nyaka. (Matewu 19:5, 6, 9) Mafilimu nimaprogiramu ahaTV amukanu kaayi avula kumwekesha maluwi neyi hichitiyañenu chakapinji kantesha nawa anateli kumana kala mpinji. Etu akwaKristu, twatela kubabala kulonda nsañu yakutwamba yaSatana yibuli kutuluwañesha. Neyi tubula kushaku kashinshi, yinateli kuluwañesha yitoñojoka yetu, nikuzeyesha chitiyañenu chetu namwinikwetu. Neyi tumona kukala mumaluwi, tunateli kwikala mukweseka kwakukeña wukwashu kudi antu abula kwikala mumaluwi. Muntu mukwawu, hadaha mukwetu mukwamudimu hela mukwakwitiya, nateli kumwekana neyi nakututiyilila. Neyi tusweja kumwekesha kukeña kwekala hakachi keyala namumbanda, tunateli kuvulumuna.

Chakutalilahu chikwawu, toñojokenu hayililu yakudimena yatanda mukaayi kaSatana. Amavulu ‘hiyakwakuchinchika, akwakuditohesha.’ (2 Timotewu 3:4) Neyi yililu yamuchidiwu yiluwañesha yitoñojoka yetu, mmwenu yetu yakwikala atiyililaña nawa ovwahila yinateli kuluwankana. Mana kwetu wunaluwankani nayililu yeniyi, nateli kuhila neyi aeluda amufumba. (Aheberu 12:5) Muhela nateli kutachika kujinooka nshimbi yemikayi Nzambi yawumutu.—1 Akorinda 11:3.

Twatela kumusakilila Yehova hakutusoñamisha hatufuta twaSatana. (2 Akorinda 2:11) Dichi tufwilenu kukaana nsañu yakutwamba yaSatana yibuli kuluwañesha yitoñojoka yetu. Hakwila tushakami mukukeña kwaNzambi, twatela ‘kutoñojokaña hayuma yamwiwulu.’—Akolose 3:2.

[Chikasha chidi hefu 194]

KOMANA CHALALA HIKUPESHA?

Lushimbi: “Nyidimu yachisemwa chaheseki hiyakuyambaku. Diyeniyi . . . kupanda, . . . kudambola, kwitiya nsañu yaheña . . . Antu akwila mwenimu hiyamba kaswana wanta waNzambuku.”—Aŋalija 5:19-21.

Malwihu yimwatela kudihula

▪ Komana tushidikilu twejima tunakoñaña twendelaña hamu nayaaku yansakililu yakutwamba?—2 Akorinda 6:16, 17.

▪ Kudihu yozelu yinazatishaña yakundama kukupesha?—Yililu 19:19.

▪ Komana kuuka kwejima kunakeñaña mwekalaña kupesha?—Alevi 19:26.

[Mwevulu wudi hefu 184]

Mpinji yejima Satana wekalaña sakutwamba neyi muntu yadihana kudi Yehova nikupapatishewa

[Mwevulu wudi hefu 191]

Hetelenu muwukwashu waYehova mumpinji yayikatu