Kapetulu 17
“Dituñenu Mukukuhwelela Kwenu Kwabadika Kujila”
“Dituñenu mukukuhwelela kwenu kwabadika kujila, . . . mushakami mukukeña kwaNzambi.”—YUDA 20, 21.
1, 2. Mudimwinyi wakutuña wumukweti, nawa mudimu wenu walemenadi chili wawuwahi chili watama?
TWILI netu munakuzata nañovu hamudimu wakutuña. Mudimu wakutuña watachikili dehi nawa wuchidi kutwalekahu. Hela chochu, mudimu wakola ilaña wunakwenda chiwahi. Hela yuma yikukala ñahi, himukuzeya hela kulekaku, chili mudimu wenu wawuwahi chili watama wukuhimpa chihandilu chenu, niyuma yakumbidi. Muloñadi? Muloña iyenu itala dinakutuñewa!
2 Kambanji Yuda wakonkomweneni nindi twatela kudituña etu aweni. Chelili nakonkomweni dehi akwaKristu ‘kushakama mukukeña kwaNzambi,’ washimwini cheñi chuma chalema chatela kutukwasha kwila mwenimu muchibaba chochimu nindi: “Dituñenu mukukuhwelela kwenu kwabadika kujila.” (Yuda 20, 21) Jinjilanyi jikwawu mumwatela kudituñila, nakukolesha chikuhwelelu chenu kulonda mwakashakami mukukeña kwaNzambi? Twayenu tutali hayuma yisatu yakeñekaña mumudimu wakuspiritu wakutuña wutukweti.
TUÑENUÑA CHIKUHWELELU MUNSHIMBI JAYEHOVA JALOÑA
3-5. (a) Indi Satana nakukeña nindi mwikali nayitoñojokanyi yaluwa kutalisha hanshimbi jaYehova? (b) Indi nshimbi jaNzambi twatela kujimona ñahi, nawa chikutuletesha kutoñojoka ñahi? Hanenu chakutalilahu.
3 Chatachi, twatela kukolesha chikuhwelelu chetu munshimbi yaNzambi. Hakudiza wunu mukanda, munadizi nshimbi jajivulu jaYehova jaloña kutalisha hayililu. Munatoñojokuhu hodi hanshimbi jaYehova jaloña? Satana nakukeña kuyidimba kulonda mumoneña nshimbi jaYehova niyishina yindi nenu yinakuyileñela kushalahu yuma yayiwahi nawa nenu jakalisha. Wazatishaña aka kafuta kufuma tuhu hampinji yikazatikili chachiwahi muEdeni. (Kutachika 3:1-6) Komana kafuta kindi kanateli kuyilawula? Yuma yayivulu yikushindamena hayililu yenu.
4 Twili netu: Munakwenda mwitempa dadiwahi, muwana niikoli dakola dadilehi dinakukañesha antu kubula kuya kabadi kekwawu ketempa. Dichi iluña didi mwiikoli dinakuleta ikoku. Hakusambila, ikoli mukudimona neyi hichuma chamukunkulwayi chinakuyikañesha. Hela chochu, iku muchidi kutala mwiikoli, himukumona mutupa wazuwa nakweba kukabadi kekwawu. Aha dinu mwiluka nikwiluka nenu ikoli hichuma chinakuyikiña. Komana kudi chisumi wazuwa wunakuyeba chakatataka? Izu daNzambi datwibabeshaña nawu: ‘Babalenu, tonenu; mukwankunyi nenu Diyabolu wudi nakuya nakutambatamba nakukeñakeña akudyayi, neyi mutupa wabulumaña.’—1 Petulu 5:8.
5 Satana hichisumi wazuwa. Hamuloña wakwila Yehova hanakukeña nindi Satana yotukwatuku, Watuña nshimbi jatwikiñaña ‘kumaana amavulu akudimbana’ amuntu watama. (Aefwesesa 6:11) Dichi mpinji yejima yitukutoñojokaña hanshimbi jaNzambi, twatela kujimona netu hinjila yamwekeshelañamu Tata yetu wamwiwulu kukeña. Neyi tujimwenaña muniyi njila, nshimbi jaNzambi jikutwikiña nikutuletela muzañalu. Kambanji Yakoba wasonekeli nindi: “Muntu wukutala mulushimbi lwawaana walala chikupu hakukakelamu . . . yenowu muntu wakakooleka mwakwililayi.”—Yakoba 1:25.
6. Njilanyi yasweja kuwaha yakukoleshelamu chikuhwelelu munshimbi niyishina yaNzambi yaloña? Hanenu chakutalilahu.
6 Kulondela nshimbi jaNzambi diyi njila yasweja kuwaha yakukoleshelamu chikuhwelelu chetu mudi Mukwakuhana nshimbi nimumaana anshimbi jindi. Chakutalilahu, “lushimbi lwaKristu,” mwekala lushimbi lwaYesu lwakutañisha antu ‘yuma yejima yashimwiniyi.’ (Aŋalija 6:2; Matewu 28:19, 20) AkwaKristu alemesha cheñi lushimbi lwakupompaña hamu nakudifukula nikudikunda kwakudikolesha. (Aheberu 10:24, 25) Munshimbi jaNzambi mwekala cheñi kukonkomwena kwakumulombaña Yehova mpinji yejima nawa chakufuma hamuchima. (Matewu 6:5-8; 1 Atesalonika 5:17) Neyi tukulondelaña iji nshimbi, tukumona chikupu netu mwalala hinshimbi jajiwahi. Kujovwahila kwatuletelaña muzañalu wutunateli kubula kuwana mukanu kaayi kamakabi. Hampinji yimwatoñojokaña chikupu hankisu jimunahetelumu mukwovwahila nshimbi jaNzambi, komana chikuhwelelu chenu hichakolañaku?
7, 8. Indi Izu daNzambi dakundejaña ñahi antu akamenaña nawu hiyakutwesha kwovwahila nshimbi jaloña mukuhita kwayaakaku?
7 Mpinji yikwawu antu amakwawu akamenaña nawu chikakala kwovwahila nshimbi jaYehova mukuhita kwayaaka. Achinaña nawu mpinji yikwawu akakañanya kwovwahila. Neyi mwatoñojokahu dehi muniyi njila, anukenu awa mazu akwila nawu: “Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi. Yowe! Neyi watiyilili munakulejeli! Mutenowu kuwunda kweyi kwadi kwinzala neyi kaloña, nikuloña kweyi kwadi kwikala neyi mankanda akukaluñalwiji.” (Isaya 48:17, 18) Komana mwatoñojokahu dehi chiyasañumunañawu awa mazu?
8 Yehova nakutwanukisha nindi tumwenumu kuwaha kuhitila mukumwovwahila. Natwikani nkisu jiyedi neyi tumwovwahila. Chatachi, kuwunda kwetu kukekala neyi kaloña—kwamwena, kwakuvulu nawa kukatwalekañahu. Chamuchiyedi, kuloña kwetu kukekala neyi mankanda amukaluñalwiji. Neyi mwimana kuchikumu chakaluñalwiji nakutala mankanda chinakwendawu, chakubula kujina mukutoñojoka nenu himwakafwaku. Muloña muneluki nenu mankanda akwinzaña hohu kuchikumu chakaluñalwiji haya nyaka. Yehova nindi kuloña kwenu kukekala kwahaya nyaka. Chakala mutwalekahu kwikala akashinshi kudi Yehova, hakakañanya kuyikwashaku. (Masamu 55:22) Komana yikaninu yakuzañalesha yamuchidiwu hiyakoleshaña chikuhwelelu chenu mudi Yehova ninshimbi jindi jaloñaku?
‘TWALEKENUHU NAKUPAMA’
9, 10. (a) Muloñadi kupama chikwekalila chikonkwanyi chachiwahi kudi akwaKristu? (b) Indi kumwena yuma kuspiritu kwatukwashaña ñahi kwikala namuzañalu?
9 Chuma chamuchiyedi chakeñekaña hakutuña anachimwekeshi munawa mazu onenewa akwila nawu: “Tukulenu tupami.” (Aheberu 6:1) Kupama hichikonkwanyi chachiwahi chakeñekaña kudi mukwaKristu. Kwambukaku nakuloña, kwabulañawu antu kutwesha, kupama hichikonkwanyi chinateli kutweshawu antu. Cheñi, akwaKristu ekalaña namuzañalu weneni hakumukalakela Yehova neyi hiyakupama. Muloñadi?
10 MukwaKristu wapama himuntu wawuspiritu. Wamonaña yuma neyi chayimonañayi Yehova. (Yowanu 4:23) Pawulu wasonekeli nindi: ‘Muloña antu endaña mwaya chisemwa chaheseki atoñojokaña yuma yachisemwa chaheseki. Antu endaña mwaya spiritu atoñojokaña yuma yaspiritu.’ (Aroma 8:5) Kumwena yuma muwuntu kwaletaña muzañalu wantesha, muloña kwashindamena hakudikeña, kumwena yuma mukamwihi nikushindamena hayuma yakumujimba. Kumwena yuma kuspiritu kwaletaña muzañalu, muloña kwashindamena hadi Yehova, ‘Nzambi wamuzañalu.’ (1 Timotewu 1:11) Muntu wawuspiritu wafwilaña kumuzañalesha Yehova nawa wekalaña namuzañalu chili wudi mukweseka. Muloñadi? Kweseka kwatwinkaña kukooleka kwakumwekesha nawu Satana hisakutwamba nikutuña chikuhwelelu, nakuzañalesha Tata yetu wamwiwulu.—Yishimu 27:11; Yakoba 1:2, 3.
11, 12. (a) Indi Pawulu wahosheli nindidi kutalisha ‘hayitoñojoka’ yamukwaKristu, nawa izu dabalumunawu nawu ‘kufumba’ datalisha mudihi? (b) Indi mujimba watela kufumbewa ñahi hakwila wupami nawa winjilili?
11 Kwikala muntu wawuspiritu nawa wapama kwenzaña kuhitila mukufumbewa. Shinshikenu chiyahosha iyi vasi: “Kudya kwakola kwambala kwawantu apama dehi; wowu afumba dehi yitoñojoka yawu, enjilila dehi kwambula yayiwahi nayatama.” (Aheberu 5:14) Chahosheliyi Pawulu ‘hakufumba’ yitoñojoka yetu, wazatishili izu dachiGriki daswejeluwu kuzatisha mumatala akuhemena amuyaaka nkulakaji yakusambila muGreece, muloña anateli kudibalumana nawu ‘kufumbewa neyi mukwakuhema.’ Hanu dinu toñojokenu hayuma yakeñekaña muniku kudifumba.
12 Hampinji yitwasemukili nyijimba yetu hiyadiñi yafumbewaku. Chakutalilahu, mukeki heluka chakuzatisha makasa ninyendu yinduku. Dichi mukeki wakuminaña dakuzuyañesha makasa indi, hekwawu nikudeta hamesu, chakwila wukudihayamisha nikudihilisha. Kuhitila mukuzatisha yiidi yamujimba chovu-chovu, mujimba wafumbewaña. Mukeki wukatachika kukayila, kwenda, nikutemuka lufuchi.a Ndochu mukwakuhema welaña ñahi? Neyi mumona mukwakuhema nakukiloka mwiwulu nakubalumoka chachiwahi, mukwiluka nenu mujimba windi wawinjilisha kuwifutujola. Kukuluka yitembi kwamukwakuhema hikwenjili chakuluwukilaku, wombililuhu mpinji yeneni hakufumba mujimba windi. Bayibolu yahosha nawu kufumba mujimba muniyi njila “kwawahishaña mpinji yantesha.” Komana kufumba yitoñojoka yetu yawuspiritu hichuma chalema nankashi.—1 Timotewu 4:8.
13. Tunateli kufumba ñahi yitoñojoka yetu?
13 Muwunu mukanda, tunahoshi hayuma yayivulu yikuyikwasha kufumba yitoñojoka yenu kulonda mwikali akashinshi kudi Yehova neyi muntu wawuspiritu. Toñojokenu chikupu hanshimbi jaNzambi niyishina nakulombelahu hampinji yimunakufuukula hayuma muchihandilu chenu. Neyi himukufuukula hachuma, dihulenu nenu: ‘Nshimbinyi jamuBayibolu hela yishina yahosha haniyi nsañu? Natela kujizatisha ñahi? Chumanyi chikumuzañalesha Tata yami wamwiwulu?’ (Yishimu 3:5, 6; Yakoba 1:5) Chuma chejima chimukufuukulahu kuhitila mukushinshika hanshimbi jamuBayibolu chikufumba yitoñojoka yenu nankashi. Kufumba kwamuchidiwu kukuyikwasha kwikala muntu wawuspiritu chikupu.
14. Nzala yamuchidinyi yitwatela kutiya kulonda tukuli kuspiritu, nawa kubabeshanyi kutwatela kwanuka?
14 Hela chakwila muntu nateli kupama, kukula kwakuspiritu kwatwalekañahu. Kukula kwashindamena hayakudya. Pawulu wasonekeli nindi: “Kudya kwakola kwambala kwawantu apama dehi.” Kajindilu kakutuña chikuhwelelu chenu kashindamena hakudya yakudya yakola yakuspiritu. Neyi muzatisha chiwahi yuma yimwadizaña, mukwikala namaana. Bayibolu yahosha nawu: “Chuma chalema yowu maana.” Dichi twatela kufwa nzala yayeni yansañu yalala yatwinkañayi Tata yetu. (Yishimu 4:5-7; 1 Petulu 2:2) Hela chochu, kwiluka yuma yayivulu hikwatela kutuleñala kudisamba netu twabadika akwetu muloña tweluka yuma yayivuluku. Twatela kudishinshika mpinji yejima kulonda tubuleña kudisamba hela kwiteja yuma yikwawu yatama kutanda mumuchima. Pawulu wasonekeli nindi: “Desekenu ntahi, mutali neyi mudi mukwitiya kwakukuhwelela; dishinshikenu.”—2 Akorinda 13:5.
15. Muloñadi kukeña chikwalemena hakukula kuspiritu?
15 Mudimu wakutuña itala wunateli kumana, ilaña mudimu wakudiwahisha watwalekañahu. Itala dakeñekaña kudiwahisha, nawa neyi kudi kukankila munateli kunuñilaku kapeka. Chumanyi chakeñekaña hakwila nawu tupami nikuhemba wuspiritu wetu? Kukeña dichuma chinakukeñeka nankashi. Twatela kutwalekahu nakumukeña Yehova niakwetu akwakwitiya. Neyi hitukweti kukeñaku, maana etu ejima ninyidimu yikwikala yamukunkulwayi, neyi chivumina. (1 Akorinda 13:1-3) Tunateli kushika kukupama kwawakwaKristu hamuloña wakukeña nakutwalekahu kukula kuspiritu.
TOÑOJOKENUÑA HAKUCHIÑEJA KWAHANAÑAYI YEHOVA
16. Yitoñojoka yamuchidinyi yashañayi Satana mudi antu, nawa Yehova watwinka chumanyi chakutukiña?
16 Tutalenu chuma chikwawu chakeñekaña hamudimu wenu wakudituña. Hakwila mudituñi nakwikala kambanji kakeni kaKristu, mwatela kuhemba yitoñojoka yenu. Satana, nyuli wampata yamunu mwishina, weluka nankashi chakuleñela antu kudijinooka, nikudimona neyi amukunkulwayi. (Aefwesesa 2:2) Yitoñojoka yamuchidiwu yafwana kudi mukwaKristu neyi chochafukulaña tububu isoku detala. Okuwaha, Yehova watwinka chuma chalema chatela kutwikiña, kuchiñeja.
17. Indi Izu daNzambi damwekesha ñahi kulema kwakuchiñeja?
17 Bayibolu yatanjika yitwa yashiyashana yakuspiritu yitwatela kuzatisha hakulwa naSatana nikanu kaayi. Chitwa chasweja kulema hiitepa dachikuñu, “dakuchiñeja wamwinu.” (1 Atesalonika 5:8) Kumashiita, ishidika welukileña nindi hakwila nindi yopuluki kunjita chiña yekala netepa dachikuñu. Kakavulu ayituñileña nayikuñu hela chitembi, itepa dakiñileña mutu kuyitwa yenjileña kumutu. Kufwana itepa dachikuña dakiñaña mutu, kuchiñeja kunateli kukiña yitoñojoka yenu.
18, 19. Chakutalilahwinyi chemikayi Yesu chakwikala nakuchiñeja, nawa tunateli kumwimbujola ñahi?
18 Yesu wemikili chakutalilahu chachiwahi hakwikala nakuchiñeja. Anukenu chakabakeniyi hawufuku wakukumisha wumi windi wahamaseki. Ibwambu dindi wadikundiliyi nindi wamufukejeli muloña wakukeña mali. Mukwawu niyena wamukaanini nindi hamwilukaku. Amakwawu amutemukili. Antu amwituña dindi amukaanini nakubilela nawu Aroma amujahi kuhitila mukumukabisha. Chakubula nikujina Yesu wamweni kweseka kweneni kubadika kutwakamona. Chumanyi chamukwashili? Aheberu 12:2 yakulaña nawu: ‘Yena hansañu yamuzañalu wamushililuwu kumesu indi hakuumikila hamutondu wakuyandishila, hakudiwula nsonyi, nashakami kuchikasa chachidiilu chetanda daNzambi dawanta tenta-a.’ Yesu watwelekeluhu ‘namuzañalu wamushililuwu kumesu indi.’
19 Muzañalwinyi wamushililuwu Yesu kumesu? Welukili nindi neyi yomika wukujilika ijina daYehova dajila. Wadi kuhana cheñi wunsahu weneni nawu Satana hisakutwamba. Kwosi kuchiñeja kukwawu kwadi kumuletela Yesu muzañalu wenenuku. Welukili cheñi nindi Yehova wakamukiswila chikupu hamuloña wakashinshi kindi, nawa welukili nindi mukapinji kantesha hohu wukudinuña cheñi naTata yindi. Yesu watoñojokeleña hakuchiñeja kweniku kwakuwahi mumpinji yejima yamakabi. Anetu dichitwatela kwila. Anetu nawa tukweti muzañalu wunatushiluwu hambidi. Yehova watulemesha wejima wetu nakukooleka kwakukwasha kujilika ijina dindi. Tunateli kumwekesha netu Satana hisakutwamba neyi tumutonda Yehova kwikala Mwanta wetu nikudisweka mukukeña kwaTata yetu hichikweti muloña nakweseka hela makabi akutumwekenaku.
20. Chumanyi chatela kuyikwasha kutoñojoka chachiwahi nikuchiñeja?
20 Yehova hakeñaña hohu kuyinka antu jindi akashinshi wulokuku, ilaña nakufwila kwila mwenimu. (Isaya 30:18; Malaki 3:10) Watiyaña kuwaha kuyinka ambuñindi yuma yayiwahi yakeñaña muchima wawu. (Masamu 37:4) Dichi twalekenuhu chikupu kutoñojoka hakuchiñeja kwakumona kushikijewa kwayikaninu yaNzambi. Bayi mwikala nayitoñojoka yatama, yamudinu ituña dadikulu daSatanaku. Neyi mumona nenu spiritu yetuña yinatachiki kwiñila chovu-chovu mumuchima wenu hela muyitoñojoka, lombenu kudi Yehova “kuwunda kwaNzambi kwabadika maana ejima” chakubula kuleka. Iku kuwunda kwahanañayi Nzambi kukahemba nyichima niyitoñojoka yenu.—Afwilipi 4:6, 7.
21, 22. (a) Kuchiñejanyi kwakuwahi kwalemeshawu ‘ezaza deneni’? (b) Yumanyi yakundama kukuchiñeja kwawakwaKristu yimwatalilaña, nawa munafuukuluhu kwiladi?
21 Mukweti kuchiñeja kwakuwahi kumwatela kutoñojokahu. Neyi mudi hamukanka ‘wezaza deneni,’ ‘dikafuma kuyihuñu oyu yeneni,’ toñojokenu hawumi wumukwikala nawu katataka. (Chimwekeshu 7:9, 14) Chikela Satana niandemoni jindi anayifumishuhu dehi, mwakatiya kuwaha kumunakubula kutiya chayinu mpinji. Hinyi hakachi ketu washakamahu dehi chakubula kumona makabi aletañayi Satana? Neyi awa makabi anamani dehi, twakazañalala hakubalumuna iseki kwikala paradisa muchiyulu chaYesu niakwawu 144,000 akayulañayi nawu hamu mwiwulu. Twakazañalala hakumona chikaninu chakumanisha yikatu yejima niwufwayi, chakusambilila ayetu yitwakeña kufuma kumajamu, nichakushakama kwesekeja nankeñelu yaNzambi. Neyi hitukushika kukuwanina, dihakashikijewa chikaninu chashimunawu haAroma 8:21 nawu, ‘kusubuka kwasweja kwalubanji lwakulema kwawanyana kaNzambi.’
22 Yehova nakukeña nindi mwakekali asubuka chikupu. Njila yaya kukusubuka yashindamena hakwovwahila. Komana hichinakukeñaka nawu muzati nañovu yejima chakatataka kulonda mumwovwahileña Yehova mafuku ejimaku? Dichi dinu, fwilenu kudituña mukukuhwelela kwenu kwabadika kujila kulonda mushakami mukukeña kwaNzambi haya nyaka.
[Tumazu twaheshina]
a Asayantisiti ahoshaña nawu twekalaña nawuswa wadimena munyijimba yetu wakwiluka chakuzatisha makasa ninyendu. Chakutalilahu, iwu wuswa wayikwashañaku kutwa nkoshi iku munajibalali. Muyeji wumu wamukulumpi wajimbesheli iwu wuswa, wakañenyeña kwimana, kwenda, hela kushakama nakwoloka.
[Mwevulu wudi hefu 201]
Mujimba wamukwakuhema wafumbewaña kuhitila mukuwinjilisha