APENDIKISI

Chitunateli Kumona Muntu Wahañawu muChipompelu

Neyi ntaña yetu hela ibwambu detu wahamuchima anamuhañi muchipompelu hamuloña wachiluwa chakoñayi chatwikataña kumuchima nankashi. Chitweteja wunlomboli waBayibolu haniyi nsañu chikumwekesha chitwasweja kumukeña Nzambi yetu nichitwovwahilaña ntanjikilu yindi.a Talenu malwihu ehulañawu haniyi nsañu.

Tunateli kumona ñahi muntu wahañawu muchipompelu? Bayibolu yahoshaña nawu: “Neyi muntu anatenuwu nawu himana kwenu wukwikala chivumbi, hela mukwalwisu, hela mukwakupesha, hela mukwakutukana, hela mukwakusheta walwa, hela mukwanyilami, nami muntu wudi ochu, bayi mudibomba ninduku, hela kudya nindi chinjila.” (1 Akorinda 5:11) Kutalisha hadi muntu ‘wabulaña kushakama mwatulejañayi Kristu,’ twatañaña nawu: ‘Bayi mumutambula mwitala, hela kumwimushaku. Muntu wukumwimusha natiyañani dehi munyidimu yindi yatama.’ (2 Yowanu 9-11) Dichi hitwahanjekaña nawantu ahañawu hansañu jakuspiritu hela mpanji jikwawuku. Kaposhi Kakutalila kawundeli kaSeptember 15, 1981, ifu 25, kahosheli nawu: “Hela kumwila muntu nawu ‘Ñahi’ kunateli kwenzununa njila yakutachika kuhanjeka hekwawu nikudikunda. Komana tunakukeña kwenzulula njila yakutachikilahu kuhanjeka namuntu wahañawu muchipompelu?”

Komana chachiwahi kuleka chikupu kudikunda namuntu wahañawu muchipompelu? Eña, hanyiloña yayivulu. Chatachi, tukumwekesha nawu twamwovwahila Nzambi Niizu dindi. Hitwamwovwahilaña Yehova neyi chakwila yuma yapela hohuku, ilaña hela chinatukalili twamwovwahilaña. Kumukeña Nzambi kwatuleñelaña kwovwahila nshimbi jindi jejima, nakwanuka netu waloña nawa wukweti kukeña nawa netu nshimbi jindi jatukwashaña chikupu. (Isaya 48:17; 1 Yowanu 5:3) Chamuchiyedi, kuleka kudikunda namukwakuvulumuna kwatukiñaña nichipompelu chejima kubula kutamisha ñimenu yawu naNzambi niyililu yawu nakuhakwilaku ijina dadiwahi dachipompelu. (1 Akorinda 5:6, 7) Chamuchisatu, kukolela kunshimbi jaBayibolu chikumukwashaku muntu wahañawu. Chitwalondela kufuukula kwakomiti yawunsompeshi, tunateli kushika hamuchima wamukwakuvulumuna wunakañanyi kulondela kufumba kwawaeluda kwakumukwasha. Hakubula kudikunda nawantu akeñayi, chikumukwashaku ‘kuwundisha mumesu,’ nakutoñojoka hayiluwa yindi, nikufwila kufunta kudi Yehova.—Luka 15:17.

Indi neyi wahañawu muchipompelu hintaña yetu? Neyi chidi mwenimu, wulunda wawuwahi nantaña yetu wukwikala mukweseka kweneni kwakwovwahila nshimbi jaYehova. Twatela kumumona ñahi ntaña yetu wahañawu muchipompelu? Muwunu mukanda hitukutwesha kushimuna yakutalilahu yejimaku, ilaña tutalenu hayakutalilahu yiyedi yalema.

Mpinji yikwawu, muntu wamuchisaka wahañawu muchipompelu watela kutwalekahu kushakama mwitala dodimu. Chineli kuhañewa kwindi hikwamanisha mpanda yachisakaku, nyidimu yamuchisaka yamafuku onsu niwulunda yatela kutwalekahu. Ilaña, hamuloña wachiluwa chindi, muntu yeniwu natonduhu kuketwisha wubwambu windi wakuspiritu nachisaka chindi chetiya. Antu amuchisaka ashinshika hiyatela kudikunda namuntu wahañawu muchipompelu munsañu jakuspirituku. Chakutalilahu, neyi wahañawu muchipompelu wudi hohu, wukuhoshahu wanyi hampinji yinakudiza chisaka Bayibolu. Ilaña, neyi wahañawu muchipompelu hikansi wanyanya, anvwali akweti mudimu wakumudizisha nikumufumba. Dichi, anvwali akweti kukeña atela kwikala nampinji yakumudizisha mwanawu Bayibolu.b—Yishimu 6:20-22; 29:17.

Mpinji yikwawu, ntaña wahañawu muchipompelu hadaha wadishakaminaña kwacheñi. Hela chakwila mpinji jikwawu chikukeñekaña kuhanjeka nindi hakapinji kantesha hansañu yamuchisaka, mwatela kukeheshaku kuhanjeka kwamuchidiwu. Antu amuchisaka chawakwaKristu ashinshika hiyakeñaña mwakuleyela kulonda ahanjekeña nantaña yawu wahañawu wabulaña kushakama hetalaku. Ilaña, hamuloña wakumwovwahila Yehova nikuloñesha kwindi afwilaña kuhakwilaku ntanjikilu yamuNsona yakuhaña muntu muchipompelu. Ñimenu yawu yakola yashindamena hakumukeña Yehova yikumukwasha mukwakuvulumuna nawa yinateli kumukwasha kuhetelamu mukubabesha kunamubabeshuwu.c—Aheberu 12:11.

[Tumazu twaheshina]