Lemeshenu Chahosha Nsona haNsañu yaYipenji—Chibalu 1
1. Kukalanyi kwamonañawu akwaKristu neyi anafwishi muntu yakeñawu?
1 Mukuhanda kwawu kwejima antu amonaña kañalaña neyi anafwishi. Antu jaNzambi niwena amonaña kukala kokumu. AkwaKristu alala niwena aneñaña neyi chaneñeliyi Yesu chafwishawu ibwambu dawu akeñawu hela ntaña yawu. (Yow. 11:33, 35) Kufwisha muntu itwakeña hichuma chakala hama nawa twatela kukwasha nikukundeja chisaka chinafwishi. Chekala chakala chikupu mumaluña mwasweja kukuhwelelawu jakupandapanda nikutiya woma afu. Mumaluña amuchidiwu, mukwaKristu wunafwishi anateli kumukanjikija kudi antaña abula kwitiya niatuñi nindi kudiñija mutushidikilu twahachipenji twakanishawu munsona. Tunateli kuumika ñahi chineñi neyi tunafwishi muntu itwakeña chakubula kudiñija muyaaku nitushidikilu twahachipenji twamuneñeshaña Nzambi?
2. Indi nsona yahosha nsañwinyi yalala kutalisha hadi afu?
2 Kwiluka Nsañu Yalala Yahosha haKufwa: Bayibolu yahosha nawu: “Muloña amomi eluka dehi nawu, twakafwa; hakwila afu hiyeluka chumaku . . . Nimwakeñelañawu, nimwahelelañawu, nimwatiyilañawu ichima mwajiya dehi . . . Muloña mwijamu muwukuya mwosi mudimu, mwosi kufuukula, mwosi kwiluka, mwosi maana.” (Mukwa. 9:5, 6, 10; Mas. 146:4) Neyi muntu nafwi helukaña chumaku. Hanateli kuzañalala hela kuzuwa, kuhanjeka, kumona chili kutiya chinakuhoshawu hela chinakwila antu amomuku. Iyi hintañishilu yamuBayibolu yalema kudi akwaKristu alala yatulejaña chitwatela kwila neyi kumwekana kufwa.
3. Muloñadi wutwatela kufuukulahu kulemasha chalala chahosha hansañu yakufwa?
3 Babalenu naNtañishilu Yamudimbululaña Nzambi: Yehova wayilejeli hatooka aAdama niEvu mwitempa daEdeni nindi ‘chalala akafwa’ neyi afumpa nshimbi Yindi. (Kutach. 2:17) Hela chochu, Satana wayilejeli nindi chalala ‘hiyakafwaku’ neyi adikaña naNzambi. (Kutach. 3:4) Satana wahosheli cheñi nsañu yikwawu yakutwamba: Nindi afu hiyafwañaku ilaña ekala amomi muwanta wawaspiritu. Iyi nsañu yakutwamba yamudimbulwili Yehova nikusawula ijina dindi. Akwakudifukula aYehova eluka nawu nsañu yakuhwelelawu antu nawu afu ekala amomi nawa anateli kukwasha hela kukabisha amomi hintañishilu yakutwamba chikupu. Diyi njila yayeni yazatishañayi Satana kulonda kudimba antu nikuyijinda chalala chamuBayibolu. Hintañishilu yatela kuhelawu antu ejima amukeña Nzambi. (Rom. 12:9) Anenu nawa mwayihela?
4. Indi akwaKristu alala atondolwelaña chumanyi?
4 Yehova wayilejeli aIsarela kwambuka chikupu kutushidikilu hela yidika yakundamini kuyuma yakutwamba yakuhwelelawu antu. (Kuhit. 18:9-13) Chochimu, akwaKristu amuyaaka nkulakaji yakusambila ambukili kunitu tushidikilu twejima. (2 Kor. 6:15-17; Chim. 21:8) Makonu, aYinsahu jaYehova kwejima kwekalawu chili ashiyashana ikowa, idimi, hela chitachi, niwena atondolwelaña tushidikilu twejima twendelaña hamu nantañishilu yakwila nawu afu ekala amomi nawa anateli kukwasha hela kukabisha amomi.
5. Muloñadi kushinshika nshimbi jamuBayibolu jakundama kukudifukula, kufwa nitushidikilu twamwiluña detu chikwalemena kudi akwaKristu?
5 Kushinshika haTushidikilu: Nsona jashimunaña nawu bayi neyi tushidikilu twejima twahayipenji twakundama kuyuma yakutwamba yakuhwelelawu antuku. Chakutalilahu, mujimba waYesu ‘awujiñajiñili mumahina atooka hamu nanyitondu yamavumba amawahi, mwomuchaaku chajikañawu nachu aYudeya.’ (Yow. 19:40) Hela chochu, antu jaNzambi hiyetejeleña tushidikilu tukwawu twakundamini kuntañishilu yakwila nawu afu ekala amomuku. (Lev. 21:5; 19:27, 28; Kuhit. 14:1, 2;) Makonu mukaayi kwonsu, yidika yayivulu yachisemwa nitushidikilu twalondelañawu hansañu yakufwa twakundama chikupu kuniyi ntañishilu. Nimunu muZambia dichisemwa chalondelañawu. Chalema hama neyi tukufumba ‘yitoñojoka yetu kulonda twambuleña yayiwahi nayatama.’ (Heb. 5:14) Ichi chikutukwasha kwiluka tushidikilu twendelaña hamu nachalala chamuBayibolu nitwabula kwitejawu. Nshimbinyi jamuBayibolu jinateli kutulombola muniyi nsañu?
6, 7. Chumanyi chitwatela kushinshika chikupu henohu kanda tudiñiji mutushidikilu twahachipenji twavula kulondelawu?
6 Zatishenu Nshimbi jamuBayibolu: Antu akeñaña wuselewa waNzambi hiyatela kudibomba mumpanda yimu nawantu abula kwitiyaku. MuBayibolu atuleja nawu: “Yehova nahoshi nindi, fumenu mukachi kawu, ambukenumu, bayi mukunka kuchuma chatamaku.” (2 Kor. 6:14, 17) Chitukwanukaña ilu lushimbi, twatela kudihula netu, ‘Komana hekala kunuñañana hakachi kakashidikilu kahachipenji nayuma yakuhwelelawu nawu aspiritu awafu akwashaña hela kukabisha antu amomi?’ Kashidikilu kenaka bayi neyi hinjila yakudililamu hohuku. Ilaña hikudifukula kwakutwamba. Chumichi chikumuhilisha Yehova, chuma chabula kwitejayi Nzambi walala.—Esekejenu Ansompeshi 2:12.
7 Nshimbi yamuchiyedi yekala ha 1 Akorinda 10:32 hahosha nawu: “Bayi mwila chuma chakudimbwisha hela aYudeya, hela aHeleni, hela chipompelu chaNzambuku.” Indi iyi nshimbi anateli kuyizatisha munjilanyi? A Yinsahu jaYehova ayiluka chikupu nawu atañishaña nsañu yalala yamuBayibolu nawu afu hiyeluka chumaku nawa hiyanatweshi kukwasha hela kukatisha amomuku. Chumanyi chinateli kumwekana neyi chinsahu yadiñija mutushidikilu twahachipenji twakundama kunsañu yakuchiina afu? Neyi yela chumichi wukudimbwisha antu eluka yuma yakuhwelelawu nawa yatañishañawu aYinsahu jaYehova kutalisha hadi afu. Kudimbwisha antu kwamuneñeshaña Yehova nawa kwakañeshaña antu kwiteja nsañu yaWanta.—Mat. 18:6; Luka 11:52.
8. Chumanyi chikutuleñela kuleka yuma yakaanishawu munsona?
8 Helenu Yuma Yatama: Neyi antu abula kwitiya anakulondela tushidikilu twamuchidiwu, kakavulu elukaña wanyi nawu anakudiñija mukudifukula kwakutwamba. Nawa kakavulu elukaña wanyi chitwakaninaña kudiñija muyidika yatama. Hela chochu, kudikaña nayuma yamuchidiwu hichuma chakala, nawa kwovwahila kwetu nikukeña kutwamukeña Yehova kunateli kwikala mukweseka. Ilaña twafwilaña kwikala ‘akadi hakutwinkela muloña, . . . akadi hitwatamina.’ (Fwi. 2:15) Kukeña kutwamukeña Yehova kwatuleñelaña ‘kutiya kutama yuma yatama, nakukakela yuma yayiwahi.’ (Rom. 12:9) Tweluka chikupu netu chaluwa nawa hiwunfwikiji neyi tukudiñija mutushidikilu twakuhwelelawu nawu afu ekala amomi nawa anateli kukwasha hela kukabisha antu amomi. Chineli tuneluki dehi iji nshimbi, ichi dinu tushinshikenu tushidikilu twahachipenji twavula kulondelawu mwituña detu.
Tushidikilu Twalondelañawu Henohu Kanda Ajiiki
9, 10. Indi amakwawu awahishaña mujimba munjilanyi hakwila awujiiki, nawa akwaKristu atela kutondolweladi?
9 Kuwahisha Mujimba: Munyisumba nimujimbaka chisaka chinafwishi chinateli kulekela antu azatilaña kumochali kuwahisha mujimba hela kuwahishila kwitala kudi chipenji. Hela chochu, mumaluña amakwawu kakavulu amuchisaka, akulumpi amunyikala, hela asensi nawu ahoshaña idimi dacheñi munyikala diwu awahishaña mujimba. Hadaha mujimba awuweleshaña kuchiinisha majilu henohu kanda ajiiki. (Yil. 9:37) Hela chochu, chatama kulondela yidika yakaanishawu munsona yakuhwelelawu nawu mufu yakekali nawumi ‘mwituña dikwawu.’ Neyi antu achinaña afu anakuwahisha mujimba, anateli kusha nsompu mumenji kulonda kuwelesha nachu mujimba. Anateli kusweka mpelu niyuma yikwawu muyakuvwala yamufu hela mumbokoshi. Amakwawu akuhwelela nawu chalema kwila mwenimu hakwila nawu mufu akadiwani chiwahi nawaspiritu awankakulula.
10 Munyikala yikwawu antaña amakwawu amuchisaka diwu awahishaña mujimba kulonda ajiiki. Neyi wunafwi wadiña mukwakwitiya, mwatela kushaku kashinshi chikupu kulonda antaña abula kwitiya abuli kusenda mujimba nakuwuhemba hamuloña wakufwila kuzata yidika yawu yawusenji mukuswamujoka. Bayi neyi mana kwetu hela muhela wunafwi wadi kukeña kulondela tushindikilu twenituku. Neyi chakwila antaña abula kwitiya atambula mujimba hela chakwila tunazati nañovu kulonda kuyikanisha, hitukudibomba nawu muyidika yawu yawusenjuku. Kwiluka netu antu abula kwitiya hiyakutwesha kwila chuma chidi chejima chikukañesha wumi wakumbidi wamana kwetuku, kunateli kutukundeja. Chuma chalema chakwila nawu, mana kwetu hela muhela nafwi wakashinshi nawa Yehova nakumwanuka.
11, 12. Kukalanyi kwakundama hakutalisha mujimba kunateli kumona mukwaKristu?
11 Kutalisha Antu Mujimba: Mwatela kufuukulahu enu aweni kutalisha antu mujimba hela nehi. Neyi chisaka chawakwaKristu chikaana kulondela aka kashidikilu hayuma yinafuukuluwu, kwosi watela kuyinka muloñaku. Neyi afuukulahu kutalisha antu mujimba, atela kutoñojokahu chiwahi kulonda eli mwenimu munjila yayiwahi nawa yikumwekesha kalemesha hayuma yakuhwelelawu akwaKristu.
12 Kumaluña amakwawu, avula kutalisha antu mujimba hachipenji hakapinji kantesha. Kakavulu atalilaña mujimba heluña hanamonuwu nawu hatelela hela kumajamu henohu kanda ajiiki. Antu anenzi hachipenji atandamaña nakutala mufu wudi mumbokoshi anavwikuwu chiwahi munjila yakalemesha. Hela chochu, mumatuña amakwawu chumichi achilaña munjila yakuhayamisha. Mumbanda wunafwi anateli kumuvwika nkanji yitooka yahamawija niyingelingeli yayivulu, wusaña nikumukwitakwita wulombu kumesu. Amakwawu akweti chaaku chakuleñela mwevulu wamuntu wunafwi hanyilosa, hamalesu, kumaleñi akunsapi, hajimpasa, niyuma yikwawu. Yumiyi ayituñaña nikuyinka antu kulonda avwali hachipenji hela kuyisenda. Mwevulu wamufu awulamatishaña kuyakuvwala yawantu anenzi hachipenji. Komana chachiwahi kulondela yaaku yamuchidiwu yakwituña? Inehi. Kubombelahu, kwila mwenimu hikudifukula kudi muntu wunafwi.
13. Indi wuspiritu wetu wunatela kwikala ñahi mukweseka muyuma yabulayi Yehova kutwinka nshimbi?
13 Hela chikwila Bayibolu hiyahosha chikupu hansañu yejima kutalisha chimwatela kuloñesha chipenjuku, antu adiza Bayibolu eluka nawu kufwila kwachisemwa chaheseki, ‘hikwafuma kudi Nzambuku, ilaña kwampata yamunu mwishina.’ (1 Yow. 2:15, 16) Kulondela itu tushindikilu, kukuletesha antu abula kwitiya kwila yuma yabula kwitejewa, yidi neyi kudila namunzenzenzi, kumushila mufu mali niyawaana, kumukumbata nikuhosha nindi neyi kwiji wamumi. Neyi yumiyi yimwekana hachipenji chawakwaKristu, chikuleta kasawutu kakeni hejina daYehova niantu jindi. Chakadi nikujina, kutondolwela tushidikilu twavula kulondelawu antu adi mumwidima wakuspiritu diyi njila yayiwahi yakwila chipenji chendi mukuwunda munjila yakalemesha, yayiwahi nawa yatelela akwaKristu alala.—Efwes. 5:15-17.
14. Yidikanyi yavula kwikala hayipenji?
14 Kuchiisha Hachipenji naKukiña Mufu niAntaña: Kuchiisha hachipenji nakukiña mufu niantaña hichidika chekalaña hetala damuntu wunafwi hela kwiluña dikwawu, mpinji yeniyi antu achiishaña wufuku wejima nachisaka chinafwishi neyi kanda ajiiki hela ajiika dehi. Ichi chidika chatachikaña nampinji yamelela nawa antu achiishaña tubulu. Aka kashidikilu kambukaku nachaaku chakuhempula chisaka chinafwishi hampinji yatelela kulonda kuchikundeja nikuchinoñola. Kuchiisha hachipenji nakukiña mufu niantaña kwambukaku. Neyi muntu nafwi, antuñi nindi niantu amakwawu anateli kutachika kudiloñesha hohenohu, kuchaya nchawa nikubutula twesi. Afumishaña yitwamu mwitala. Akubamba itenti hela kutuña chisolu nawa antu achiishaña hachipenji mafuku amavulu nakwimba, kulomba nikuhameka mufu. Akuhwelela nawu kwila mwenimu hinjila yakukiñilamu mufu henohu kanda amujiiki nichisaka chinafwishi kudi aspiritu atama. Chineli aka kashidikilu kanuñañana nayitoñojoka yakwila nawu aspiritu awafu amomi, akwaKristu alala atondolwelaña yaaku yakaanishawu munsona yidi neyi yidika yakuchiisha hachipenji nakukiña mufu niantaña. Kuchiisha hachipenji nakukiña mufu niantaña, hela tuhu kuya nakukiña mufu niantaña hakapinji kantesha, hikwesekana nakufuukulahu kwetu ‘kwakutiya kutama nayuma yatamaku.’—Rom. 12:9.
15. Malwihwinyi itwatela kudihula kutalisha hayidika yahachipenji?
15 Neyi mana kwetu hela muhela nafwi, twatela kwikala ababala kulonda antu abuli kumona nawu ninetu twekala nachidika chakuchiisha hachipenji nakukiña mufu niantaña. Chakutalilahu, indi antu akutoñojoka nawudi neyi aYinsahu apompa nawufuku henohu kanda ajiiki nakwimba nikulomba hadi mpinji yeneni? Hela chakwila akweti nyiloña yayiwahi, ilaña atela kushinshika hayinleji yanyichima yawantu amakwawu. (1 Kor. 10:23) Komana kwikala nachidika chamuchidiwu mukachi kawufuku kukudimbwisha akwetu akwakwitiya eluka ntachikilu ninkeñelu yayidika yakuchiisha hachipenji nakukiña mufu niantaña? Komana antu abula kwitiya akutoñojoka nawu aYinsahu jaYehova niwena achiishaña hachipenji nakukiña mufu niantaña neyi akwansakililu yikwawu yayivulu? Kafwampi, tukweti kukooleka kwakuvulu kwakushimwina nikukundeja chisaka chinafwishi. Kutoñojoka haniji nshimbi kukutukwasha kubula kwila chuma chidi chejima chadifwana nachidika chakuchiisha hachipenji nakukiña mufu niantaña. Kwila mwenimu kukumwekesha nawu twambukaku netuña nawa tunakufwila kwambuka “kuchuma chatama.”—2 Kor. 6:17; Mal. 3:18.
16. Muloñadi wutukakeñela kwinza nakupompa hampinji yitukadizaña tushidikilu tukwawu twahosha hachipenji?
16 Mazu atusoñamishaña nawu: “Muntu wadihoñeshaña mumuchima wamonaña katama, hakubatama; ilaña abula maana ayaña tuhu kwawu, hiyakumwenamu jakala,” himazu amawahi. (Yish. 22:3) Nshimbi jamuBayibolu jahosha hakuchiisha hachipenji nakukiña mufu niantaña niyidika yikwawu yahachipenji yekala yalala. Tukadiza cheñi nsañu yalema yahosha hayidika yikwawu yahachipenji muMudimu Wetu waWanta mutukweji twakumbidi. Iyi nsañu yikukwasha ejima kwiluka chitwatela kwikala nachinleji chamuchima chachiwahi etu akwaKristu alala nikubula kudimbwisha amakwawu hampinji yitunakulemesha chahosha Nsona hansañu yayipenji.—1 Kor. 10:32.