Kapetulu 6
Kwashenu Mwanenu waMukwenzi Yakuli Chiwahi
1, 2. Kukalanyi nimuzañalu wenzaña nayaaka yawukwenzi?
KUHEMBA mukwenzi* mwitala chambuka chikupu nakuhemba mwana wudi nayaaka yitanu hela ikumi. Yaaka yawukwenzi yaletaña kukala, cheñi yaaka yeniyi yaletaña muzañalu ninkisu. Chakutalilahu chaYosefu, Davidi, Yosiya niTimotewu chinakumwekesha nawu akwenzi anateli kuzata chachiwahi nakwikala nawulunda wawuwahi naYehova. (Kutachika 37:2-11; 1 Samweli 16:11-13; 2 Anyanta 22:3-7; Yililu 16:1, 2) Akwenzi amavulu makonu niwena anakwila momumu. Hekwawu, mwelukahu elaña mwenimu.
2 Ilaña, kudi amakwawu yaaka yeniyi yaletaña kukala kweneni. Mpinji yikwawu akwenzi azañalalaña nikuhilashana. Akwenzi niayañadima akeñaña kudimena, dichi anateli kutiya kutama neyi anvwali ayileja mwakukumina hakwila yuma. Ilaña, akwenzi wenawa kanda eluki yuma yayivulu nawa akeñekaña kuyikeña, nikuyikwasha mukuwunda kudi anvwali jawu. Mwalala, yaaka yawukwenzi yinateli kuleta muzañalu, cheñi yinateli kwikala yakala, kudi anvwali nikudi akwenzi. Akwenzi anateli kuyikwasha ñahi muniyi yaaka?
* Mukanu kapetulu izu damukwenzi dinakuzatika kudi kansi weyala niwamumbanda wudi nayaaka 13 nakushika ku 19.
3. Anvwali anateli kukwasha ñahi anyanawu achidi akwenzi kukula chachiwahi muchihandilu?
3 Anvwali alondeleña nshimbi yamuBayibolu akwashaña anyanawu achidi akwenzi kushinda iku kukala kulonda kukula chachiwahi. Anvwali niakwenzi azatishaña nshimbi yamuBayibolu, mumatuña ejima nawa mpinji yejima, akooleka chikupu.—Masamu 119:1.
KUHOSHA MWALALA NIKUKASUNUKA HAKUHANJEKA
4. Muloñadi chichalemena kushakama hampuña henohu anyana achidi muyaaka yawukwenzi?
4 Bayibolu yahosha nawu: “Habula mpuña yuma yiwafuukwili kwila hiyamwekanañaku; ilaña havula akwakushakama hampuña yakolaña.” (Yishimu 15:22) Neyi anvwali ashakamineña hampuña nawanyana hadiñawu anyanya, ichi dinu chinakukeñeka chikupu chiyanashiki dehi muyaaka yawukwenzi, mpinji yabulañawu kuvula kushakama hetala ilaña amanishilaña mpinji yeneni nawamabwambu jawu kushikola hela nawakwawu. Neyi kwosi kushakama hampuña, dikwila nawu kuhosha mwalala nikukasunuka hakuhanjeka hakachi kawanyana nawanvwali, anyana akwikala neyi enyi mwitala. Dichi munateli kwikala ñahi akasunuka hakuhanjeka?
5. Indi akwenzi anayikwashi ñahi kutalisha hansañu yakuhanjeka nawanvwali jawu?
5 Akwenzi nianvwali wejima wawu atela kwikala akasunuka. Mwalala, akwenzi chinateli kuyikalila kuhosha nawanvwali jawu kubadika mpinji yadiñawu atwansi. Hela chochu, ilukenu nenu “kwabulaña wulomboli wamaana kwadimbokaña antu; ilaña kwavula akwakushakama hampuña kwekala kuhanda.” (Yishimu 11:14) Awa mazu azatikaña kudi ejima, anyiki niakulumpi. Atwansi eluka awa mazu, eluka nawu achidi kukeña wulomboli wamaana, muloña anakumona kukala kweneni chikupu. Dichi atela kwiluka nawu anvwali jawu etiya eluka kufumba chikupu muloña eluka yuma yayivulu muchihandilu nawa hadi yaaka yayivulu anamwekeshi nawu akweti kukeña chikupu. Dichi, haniyi yaaka yinashikuwu, akwenzi amaana hiyanateli kudiwula anvwali jawuku.
6. Yililwinyi yatela kwikala nawanvwali akashinshi nawa amawahi kulonda ahanjekeña nawanyanawu?
6 Kwikala wakasunuka hakuhanjeka chalumbulula nawu nvwali watela kwikala nampinji yakuhanjeka namwana neyi chakwila nakukeña kuhosha nindi. Neyi wudi nvwali, chikuwaha neyi mukwikalaña akasunuka chikupu hakuhanjeka. Chumichi chinateli kwikala chakala. Bayibolu yahosha nawu kwekala “mpinji yakumwena, nimpinji yakuhosha.” (Mukwakutaŋisha 3:7) Neyi mwanenu nakukeña kuhosha, hadaha kudenu yinateli kwikala mpinji yakumwena. Hekwawu diyi mpinji yimwadizaña kudiza kwahalwenu, yimwanookaña, hela kuzata nyidimu yahetala. Hela chochu, neyi mwanenu nakukeña kuhosha nenu, mwatela kuleka jimunakwila nikumutiyilila. Neyi nehi, hakahosha cheñi nenuku. Anukenu chakutalilahu chaYesu. Hampinji yimu, wakeñeleña kunooka. Ilaña antu chapompeluwu nakutiya yuma yahosheleñayi, hayili nakunookaku nawa watachikili kuyitañisha. (Maku 6:30-34) Akwenzi amavulu eluka nawu anvwali jawu akweti nyidimu yayivulu, ilaña akeñaña kwiluka chikupu nawu neyi anakukeña kuhosha nawanvwali jawu anateli kuyitiyilila. Dichi, hanjekenuña nawu nikwiluka yuma yinakukeñawu.
7. Yumanyi yatela kutondolwelawu anvwali?
7 Esekenu kwanuka mpinji yimwadiña akwenzi, nawa bayi muleka kwikala asehaku! Anvwali atela kudiluñishaña nawanyanawu. Hampinji yinakubulawu kuzata nyidimu, indi anvwali azatishaña ñahi mpinji yawu? Neyi anvwali azatishaña mpinji yawu yakunooka nakwila yuma nkawawu, anyana anyakalaña kwiluka. Neyi akwenzi eluka chikupu nawu amabwambu jawu kushikola ayilemesha chikupu kubadika chayilemeshawu anvwali jawu, ekalaña nakukala kweneni.
YUMA YIMWATELA KUHANJEKAHU
8. Indi anyana anateli kuyileja ñahi kulema kwakuhosha walala, kuzata nañovu, nikwikala nayililu yayiwahi?
8 Neyi anvwali kanda aleji anyanawu kulema kwakuhosha walala nikuzata nañovu, atela kuyileja hampinji yachiduwu muyaaka yawukwenzi. (1 Atesalonika 4:11; 2 Atesalonika 3:10) Nawa chalema kuleja anyanawu kulonda eluki nawu kwikala nayililu yayiwahi nawa yakadi majilu chekala chalema. (Yishimu 20:11) Nvwali walejaña anyana yuma yejimiyi kuhitila mukumwekesha chakutalilahu chachiwahi. Neyi amayala abula kwitiya chinateliwu ‘kuyikokawu chakadi mazu, nanochu chakushakamawu añodi jawu,’ dichi anyikwenzi anateli kudiza nshimbi yayiwahi kuhitila muyililu yawanvwali jawu. (1 Petulu 3:1) Hela chochu, bayi neyi atela kumwekesha hohu chakutalilahuku, muloña anyana amonaña yakutalilahu yayivulu yatama ninsañu jakutwamba nawa jakokolaña kwacheñi. Dichi, anvwali akamenaña, atela kwiluka chatoñojokaña anyanawu hayuma yamonañawu, yatiyañawu nawa hakwila mwenimu chakeñekaña kuhanjeka chachiwahi.—Yishimu 20:5.
9, 10. Muloñadi anvwali chiyatela kuyilejawu chikupu anyanawu hansañu yakuhumañana kweyala namumbanda, nawa anateli kwila ñahi mwenimu?
9 Chumichi chalala kutalisha hansañu yakuhumañana kweyala namumbanda. Anvwali, komana mwatiyaña nsonyi kuhanjika nawanyanenu hansañu yakuhumañana kweyala namumbanda? Neyi mwatiyaña nsonyi, mwatela kuzata nañovu kulonda muyileji, muloña anyanenu akadiza iyi nsañu kudi muntu wacheñi. Neyi himukuyileja, kwosi wunateli kwiluka nsañu yakutwamba yakayilejawu kudi muntu wacheñi. MuBayibolu, Yehova hajinda nsañu yakuhumañana kweyala namumbandaku, dichi nanvwali hiyatela kutiya nsonyuku.—Yishimu 4:1-4; 5:1-21.
10 Twasakililaña, muloña muBayibolu mwekala nshimbi yatiyakana hansañu yakuhumañana kweyala namumbanda, nawa Watchtower Society yasoneka nsañu yayivulu yamwekeshaña nawu iyi nshimbi yichidi kuzatika nimakonu. Komana kwila muzatisha iyi nsañu nehi? Chakutalilahu, munateli kuhituluka namwanenu weyala hela wamumbanda hansañu yinakuhosha nawu “Sex and Morals” mumukanda waQuestions Young People Ask—Answers That Work? Munateli kuhayama chikupu hayuma yakafumamu.
11. Njilanyi yayiwahi chikupu yatela kuzatisha anvwali yakudizishilamu anyanawu chakumukalakela Yehova?
11 Nsañwinyi yalema chikupu yatela kuhanjekawu anvwali nawanyanawu? Kapostolu Pawulu wahosheli haniyi nsañu hampinji yasonekeliyi nindi: “Yilelenuña [anyanenu] nakuyibabesha nikuyikonkomwena mudi Mwanta.” (Aefwesesa 6:4) Anyana atela kutwalekahu kudiza hadi Yehova. Sweje-e, atela kudiza kumukeña Nzambi, nikukeña kumukalakela. Cheñi, anateli kuyidizisha yuma yayivulu kuhitila muchakutalilahu chawanvwali. Neyi anyikwenzi eluka nawu anvwali jawu amukeña Nzambi ‘namuchima wawu wejima, nawumi wawu wejima, namaana awu ejima’ nawa eluka nawu chumichi chaleñelaña anvwali jawu kusoña nyikabu yayiwahi, niwena anateli kusoña nyikabu yamuchidiwu. (Matewu 22:37) Chochimu, neyi atwansi eluka nawu anvwali jawu hiyasweja kukeña yuma yakumujimbaku, ilaña atwamijaku Wanta waNzambi, niwena akwikala nayitoñojoka yoyimu.—Mukwakutaŋisha 7:12; Matewu 6:31-33.
12, 13. Hakwila nawu kudiza kwachisaka kutwalekuhu chachiwahi yumanyi yimwatela kwiluka?
12 Kudiza kwaBayibolu kwachisaka mulungu nimulungu hinjila yayiwahi chikupu yakuhanjekelamu yuma yalema yakuspiritu nawatwansi. (Masamu 119:33, 34; Yishimu 4:20-23) Kudiza kwamuchidiwu mpinji yejima kwekala kwalema chikupu. (Masamu 1:1-3) Anvwali nianyanawu atela kwiluka nawu kudiza kwachisaka kwalema kubadika nyidimu yikwawu muchisaka, bayi kujihimpaku. Cheñi, hakwila nawu kudiza kwachisaka kusoñeña nyikabu, chiña mwikala nayililu yayiwahi. Tata yawantu wumu wahosheli nindi: “Chuma chabadika kulema chatela kwilayi wunakulombola hikumwekesha kalemesha nikuwundisha mumesu hampinji yakudiza kwachisaka, nikwikala wakasunuka hakuhosha bayi kuzuwaku. Mpinji jikwawu kwesekeja yuma kwakalaña, nawa atwansi akeñaña nawu muhimpi yililu yenu. Neyi yuma hiyinendi chiwahi hakusambila hela kamuchiyeduku, twalekenuhu, mpinji yikwawu yakenda chiwahi.” Tata yawantu yeniwu wahosheli nindi henohu kanda atachiki kudiza, walombeleña wukwashu kudi Yehova kulonda yamwinki yitoñojoka yayiwahi yakwiluka ejima muchisaka.—Masamu 119:66.
13 Anvwali etiya akweti mudimu wakulombola kudiza kwachisaka. Eña, anvwali amakwawu hiyakweti chawana chakutañishaku, dichi chinateli kuyikalila kuwana jinjila jikuleñela kudiza kwachisaka kuwaha. Dichi, neyi mwayikeña anyanenu ‘muchalala nikwila mumwahoshaña’ mukufwila kuyikwasha munjila yakuwunda nawa yalala kulonda akuliluku kuspiritu. (1 Yowanu 3:18) Mpinji jikwawu anateli kudiladila, ilaña akumona nawu munakukeña akekali nachihandilu chachiwahi.
14. Neyi munakuhanjeka yuma yakuspiritu nawanyikwenzi munateli kuzatisha ñahi Kuhituluka 11:18, 19?
14 Mpinji yakudiza kwachisaka bayi neyi diyi mpinji yakuhanjeka hohu hayuma yalema yakuspirituku. Munakwanuka nshimbi yayilejeluwu anvwali kudi Yehova? Wahosheli nindi: “Dichi dinu mwakaswekaña mazu ami munyichima yenu nimuyitoñojoka yenu; mwakayikasilaña kumakasenu ekalaña chinjikijilu, mwakayivwalaña haneli disu iku, disu iku. Mwakalejañamu nianyanenu, akekalaña mpanji yenu, nichiwakashakamaña mwitala deyi, nichiwakendaña munjila, nihakukama nihakuhinduka.” (Kuhituluka 11:18, 19; talenu cheñi Kuhituluka 6:6, 7.) Ichi hichinayi mukwila nawu anvwali atela kushimwinaña anyanawu mpinji yejimaku. Ilaña mutu wachisaka wukweti kukeña watela kuwana njila yakukoleshelamu chisaka chindi kuspiritu.
KUFUMBA NIKALEMESHA
15, 16. (a) Indi kufumba hichumanyi? (b) Anyi akweti mudimu wakufumba, nawa anyi atela kutiyilila?
15 Kufumba hikudizisha kwololaña muntu, nawa mwekala kuhanjeka. Kudi yuma yayivulu yekala mukufumba muntu yinabadiki hakubabesha, hela chakwila kubabesha dikwasambilaña kwinza muyitoñojoka. Chineli mwadiñi nakuyifumba anyanenu kuwansi, ilaña ichi hiyanyikwenzi, mwatela kuyifumba, hekwawu nikubadikishahu. Anyikwenzi amaana eluka nawu atela kuyifumba.
16 Bayibolu yahosha nawu: “Chisupi wadiwulaña mwamufumbañayi tata yindi; ilaña muntu welaña chakumuhosholawu hakushaku muchima wakwatilañamu kashinshi.” (Yishimu 15:5) Twadizaña yuma yayivulu muniyi nsona. Yinakulumbulula nawu kufumba kwakeñekaña. Kansi hanateli ‘kushaku muchima kukubabesha’ neyi hiyanamufumbuku. Yehova wayinka anvwali mudimu wakufumba anyana, sweje tata yawantu. Dichi, mukwenzi diyi watela kutiyilila iku kufumba. Neyi yatiyililaña kufumba kwakuwahi kwatata yindi nimama yindi, wukudiza yuma yayivulu nawa wukukoña yiluwa yantesha. (Yishimu 1:8) Bayibolu yahoshaña nawu: “Niwuzweñi ninsonyi yakawana muntu walekaña kumufumba; ilaña muntu waakamaña mwakumuhosholawu akamulemesha.”—Yishimu 13:18.
17. Anvwali atela kwesekeja ñahi neyi anakufumba mwana?
17 Anvwali neyi anakufumba anyikwenzi, atela kuyifumba nakwesekeja. Bayi muswejaña kukalisha chakwila muvuloka nianyanenuku, akenda kutachika kutoñojoka nawu amukunkulwayi. (Akolose 3:21) Nawa anvwali bayi ahembaña anyanawu wutotuku chakwila muleka nikuyifumba hayuma yalema. Nhembelu yamuchidiwu yafwana. Yishimu 29:17 yahoshaña nawu: “Babesha mwaneyi, wamba kakunookesha; mwalala, wamba katiyishaña muchima weyi kuwaha.” Hela chochu vasi 21 yahosha nawu: “Muntu walelaña nduñu yindi chachiwahi kufumisha kuwansi windi nakumwinka twatuwahi, kukukuminina wakabalumuka himwanindi chikupu [hela wabulaña kusakilila].” Hela chakwila iyi vasi yinakuhosha hadi nduñu, chochimu yinakuhosha nihadi anyikwenzi ejima amuchisaka.
18. Kufumba kwamwekeshaña chumanyi, nawa yumanyi yafumañamu neyi anvwali afumbaña mwanawu mpinji yejima?
18 Mwalala, kufumba kwakuwahi, hichinjikijilu chakumwekesha nawu nvwali wamukeña mwanindi. (Aheberu 12:6, 11) Neyi wudi nvwali, weluka neyi chekala chakala kutwalekahu kufumba mukwesekeja. Hamuloña wakukeña kushakama kumatelu kwawunda, chinateli kwikala chaswayi kumuleka kansi wudi nawinyi kwila yuma yinakukeñayi. Nkumininaku, nvwali welaña mwenimu wakakañanya kuyuula amwitala dindi.—Yishimu 29:15; Aŋalija 6:9.
NYIDIMU NIKUHEMA
19, 20. Indi anvwali anateli kufuukula ñahi chiwahi hansañu yakuhema kwawanyanawu?
19 Kuyaaka yakunyima anyana adiña nakuzataku nyidimu yahetala hela kumaha. Makonu anyikwenzi amavulu amanishilaña mpinji yeneni nakuhema. Kaayi kamakonu kanenzali namaheta kaletaña yuma yayivulu yinakuleñela anyikwenzi aswejeña kuhema. Chaleñelaña cheñi, kaayi hikalemesha chikupu nshimbi jamuBayibolu jahosha hayililu yayiwahuku, nawa chumichi chinakuleta wubanji weneni.
20 Dichi, anvwali akweti maana diwu ekalaña nawuswa wakufuukulahu hansañu yakuhema. Hela chochu, mwatela kwiluka nenu mwanenu nakukula. Chaaka nichaaka, wukukeñaña kumulemesha chikupu neyi mukulumpi. Dichi, chikuwaha neyi anvwali amwiteja mwanawu kufuukulahu yomweni kutalisha hakuhema chineli nakukula, chakala kufuukula kwindi kunakumwekesha nawu nakukula kuspiritu. Mpinji jikwawu, mukwenzi nateli kufuukula mwaluwa hansañu yatumina, amabwambu, niyuma yikwawu. Neyi yakoña mwenimu, mwatela kuhanjeka namukwenzi kulonda mpinji yakumbidi yakatweshi kufuukula mwamuwahi.
21. Kuzatisha chiwahi mpinji yakuhema kunateli kumukwasha ñahi mukwenzi?
21 Mpinji yishika hadihi yatela kumanishila muntu kukuhema? Mumatuña amakwawu anyikwenzi eluka nawu ayiteja kutwalekahu kuhema. Dichi, mukwenzi nateli kufuukulahu kuhemaña hohu. Ilaña, chikushindamena hadi anvwali kudizisha mwanawu yeluki nindi watela kuzatisha mpinji kuyuma yikwawu, chidi neyi kuchisaka, kudiza kwahalwindi, kudikunda nawantu apama kuspiritu, kupompa kwawakwaKristu, nikunyidimu yahetala. Kwila mwenimu kukuleñela ‘kutiya kuwaha nayuma yawumi wunu’ kubuli kukañesha Izu daNzambi.—Luka 8:11-15.
22. Mukwenzi watela kwesekejaña kuhema nachumanyi muchihandilu chindi?
22 Mwanta Solomoni wahosheli nindi: “Neluki dehi kwami nami, hikudi chuma chacheñi chikuyiwahilaku, chiña yowu kuzañalala nakwila yayiwahi hiyachiduwu amomi. Mwalala, antu ejima adyi, anwi, kunyidimu yejima yakukabakanawu amwenuku kuwaha; hichamukunkulu chakudi Nzambi.” (Mukwakutaŋisha 3:12, 13) Eñañi, muzañalu niwena waleñelaña kwikala nachihandilu chachiwahi. Kuzata nañovu nikwena kwaletaña muzañalu. Akwenzi amavulu makonu hiyeluka muzañalu wafumaña mukuzata nañovu nikalemesha kenzaña hamuloña wakumanisha kukala munjila yayiwahuku. Anyikwenzi atela kuyidizisha kuzata nañovu, chakutalilahu atela kwiluka kudima, kutuña matala, ninyidimu yikwawu. Anvwali akweti mudimu wakudizisha anyanawu kulonda eluki kuwaha kwafumaña mukuzata nañovu. Neyi kudizisha anyanawu nehi, anateli kwikala ankopi nawa akakañanya kudihemba. Neyi mudizisha mwanenu kulonda yeluki kulema kwakuzata nañovu, wukukula namaana nawa wakekala nachihandilu chachiwahi.
KUFUMA KUWUKWENZI NAKWIKALA MUKULUPI
23. Indi anvwali anateli kukolesha ñahi anyanawu?
23 Hela chakwila mudi nakukala namwanenu, nsona yahosha mwalala nawu: “Kukeña hikwakañanyañaku.” (1 Akorinda 13:8) Bayi muleka kumwekesha kukeña kudi mwanenuku. Dihulenu nenu, ‘Komana nayihamekaña anyanami ejima neyi chakwila ashinda kukala? Komana nawanaña njila yakumwekeshelamu kukeña nikuhameka anyanami henohu kanda muhiti mpinji?’ Hela chakwila mpinji jikwawu kwekala kubula kutiyashana, neyi anyana eluka nawu mwayikeña, niwena anateli kuyikeña.
24. Lushimbinyi lwalala lwamuNsona lwahosha hakukulisha anyana, nawa yumanyi yatela kwilukawu anvwali?
24 Dichi, anyana chakulawu nakwikala akulumpi, akutachika kudifuukwila awenawu yuma yamaneni. Mpinji jikwawu anvwali hiyanateli kukeña mukufuukulañawuku. Indi neyi chakwila mwanawu yafuukulahu kuleka kumukalakela Yehova Nzambi? Chumichi chinateli kumwekana. Nianyana kaYehova akuspiritu akaanini kufumba kwindi nawa adikañili. (Kutachika 6:2; Yuda 6) Anyana hiyekala neyi makompyuta, azataña kwesekeja nachitunakukeñaku. Niwena ayileña nawuswa wakufuukula nawa akaakula kudi Yehova kwesekeja nayuma yafuukulañawu. Chochimu, Yishimu 22:6 yalumbulula lunshimbi lwalala lwakwila nawu: “Mufumbi mwana endi munjila yatela kuyayi, chakakulayi hakafuma mwoku.”
25. Njilanyi yayiwahi anvwali yatela kumuhamekelamu Yehova hakuyinka kukooleka kwakwikala anvwali?
25 Dichi, mwekeshenu chikupu nenu mwayikeña anyanenu. Zatenu nañovu kulonda mulondeleña nshimbi yamuBayibolu hakukulisha anyana. Imikenu chakutalilahu chachiwahi chakumwakama Nzambi. Neyi mwila mwenimu, anyanenu akakula nakwikala antu alumbuluka, nawa akamutiyaña Nzambi woma. Iyi diyi njila yayiwahi anvwali yatela kumuhamekelamu Yehova hakuyinka kukooleka kwakwikala anvwali.
INDI IJI NSHIMBI JAMUBAYIBOLU JINATELI KUKWASHA ÑAHI . . . ANVWALI KUKULISHA ANYANAWU?
Kuhanjekaña kwakeñekaña.—Yishimu 15:22.
Twatela kutañaña Izu daNzambi mpinji yejima.—Masamu 1:1, 2.
Muntu mukwamaana watiyililaña mwamufumbañawu.—Yishimu 15:5.
Nyidimu nikuhema yikweti mpinji yayu.—Mukwakutaŋisha 3:12, 13.
[Mwevulu wudi hefu 67]
Ikalenu nampinji yakuhanjeka namwana neyi nakukeña nindi yahoshi nenu
[Mwevulu wudi hefu 69]
Chekala chalema Kudiza Bayibolu nachisaka mpinji yejima
[Mwevulu wudi hefu 70]
Mwatela kukeña anyanenu nikuyihameka