Kapetulu 8
Kiñenu Chisaka Chenu Kuyuma Yaluwañeshaña
1-3. (a) Kudihi kwafumaña yuma yaluwañeshaña yaletaña wubanji muchisaka? (b) Yumanyi yatela kwesekejawu anvwali hakwila akiñi chisaka chawu?
NEYI himukukeña kuleja mwanenu wanyanya nenu yayi kushikola, iku nvula yinakunooka chikupu. Chumanyi chimwatela kwila? Komana mukumuleka nenu yayeña nakuzowa chakadi ikochi? Indi kwiji mukumulunjeka yakuvwala yayivulu kulonda yabuli kuzowa chakwila hakukañanya nikwenda? Himunateli kwila muniyi njilaku. Mukumwinka hohu chuma chatela kumukwasha kulonda yabuli kuzowa.
2 Munjila yoyimu, anvwali atela kuwana njila yayiwahi yakukiñilamu chisaka chawu kuyuma yaluwañeshaña yayimwekenaña yafumaña kuyuma yayivulu, yidi neyi mazanvu ahemaña yisela, yikuzulemba, akwawu, mpinji jikwawu nikushikola. Anvwali amakwawu esekaña kukiña anyanawu, ilaña amakwawu akañanyaña. Amakwawu niwena, hamuloña wakumona yuma yejima yidi mukaayi nawu yatama, akalishaña chikupu chakwila anyana atiyaña neyi anayishinkili muwina. Komana mwatela kwila yuma mukwesekeja?
3 Eña. Kusweja kukañesha kwakuwahi wanyi nawa kwaletaña kukala. (Mukwakutaŋisha 7:16, 17) Indi anvwali akwaKristu anateli kuwana ñahi njila yayiwahi yakukiñilamu chisaka chawu? Shinshikenu hanjila jisatu: shikola, kudikunda, nikuhema.
HINYI WATELA KUDIZISHA ANYANENU?
4. Indi anvwali akwaKristu amonaña ñahi shikola?
4 Anvwali akwaKristu alemesha chikupu shikola. Eluka nawu shikola yakwashaña anyana kwiluka kutaña, kusoneka, nikutiyañana, nikwiluka chakumanisha kukala. Shikola yatela kuyikwasha cheñi kwiluka chakudiza. Yuma yadizañawu anyana kushikola yinateli kuyikwasha
kutwesha hela chakwila anakumona kukala mukaayi kamakonu. Kubombelahu, shikola yinateli kuyikwasha kuzata nyidimu yayiwahi.—Yishimu 22:29.
5, 6. Indi anyana hashikola anateli kudanyika ñahi hatooka hansañu yaheña yakuhumañana kweyala namumbanda?
5 Hela chochu, shikola yakuñululaña nyana yashiyashana, nawa amavulu akweti maana atama. Chakutalilahu, talenu chatoñojokañawu hansañu jawuvumbi nihayililu yayiwahi. Hashikola yimu yahewulu mwituña daNigeria, chañadima wumu cheleka walejeleña akwawu akashikola nsañu jawuvumbi. Akwawu amutiyilileña chikupu, hela chakwila wahosheleña yuma yamukunkulwayi yatañileñayi mumukanda wanyevulu yanzekesi. Atunkaña amakwawu atachikili kwila mwayilejeleñayi. Chafuminumu, kankaña wumu amwinkeli ivumu nawa wafwili hamuloña wakukeña kufumisha ivumu.
6 Chawushona, ntañishilu yaheña kutalisha hakuhumañana kweyala namumbanda hashikola hiyafumaña kudi atwansi hohuku ilaña nikudi antañishi. Anvwali amavulu ahayamaña hakumona chayitañishañawu anyana kumashikola hansañu jakuhumañana kweyala namumbanda chatela ayitañisheña yililu yayiwahi nimwakudihembela. Mama yawantu wukweti mwana wamumbanda wayaaka 12 wahosheli nindi: “Twashakamaña mwiluña mudi akwansakililu nankashi, niyisemwa, ilaña kumashikola ahewulu amwiluña detu, atudizi ayinkaña makondomu.” Yena ninfumwindi akameneni chikupu chatiyiluwu nawu mwanawu adiña nakumukobola kudi amayala mwesekenañawu. Indi anvwali anateli kukiña ñahi chisaka chawu kuyililu yamuchidiwu?
7. Munateli kwolola ñahi ntañishilu yaheña kutalisha hakuhumañana kweyala namumbanda?
7 Komana chachiwahi kusweka anyana nsañu yahosha hawuvumbi? Inehi. Chachiwahi kuyidizisha anyanenu yuma yahosha hakuhumañana kweyala namumbanda. (Yishimu 5:1) Chalala, mumatuña amavulu, anvwali amavulu atiyaña nsonyi kuhosha haniyi nsañu. Tata yawantu wumu muAfrica wahosheli nindi, “Kuhosha nsañu yamuchidiwu muAfrica hichishimashima.” Anvwali amakwawu atoñojokaña nawu kudizisha anyana hansañu jakuhumañana kweyala namumbanda wunakuyileja maana akuyileñela eli wuvumbi. Indi Nzambi wayimonaña ñahi iyi nsañu?
NZAMBI CHAMONAÑAYI KUHUMAÑANA KWEYALA NAMUMBANDA
8, 9. Nsañwinyi yayiwahi yahosha hakuhumañana kweyala namumbanda yekala muBayibolu?
8 Bayibolu yashimuna jiika nawu bayi mutiyaña nsonyi kuhosha hakuhumañana kweyala namumbanda kwesekeja nansañu yimunakuhoshahuku. MuIsarela, antu jaNzambi ayilejeli kupompa hamu, kushilahu “niatwansi,” nakutiya chatañileñawu nañovu Nshimbi jamwinkeluwu Mosi. (Kuhituluka 31:10-12; Yoshuwa 8:35) Nshimbi yashimwini jiika nsañu yahosha hakuhumañana kweyala namumbanda, kubombelahu yuma yidi neyi, kuya kwitala dikwawu, mbutu yalusemu yeyala, wuvumbi, wutumwa, nikukama nantaña yeyi, nikwila wuvumbi nawatunyama. (Alevi 15:16, 19; 18:6, 22, 23; Kuhituluka 22:22) Hanyima yakutiyilila kunshimbi, chakadi nikujina anvwali adiñi namudimu wakulumbulwila anyanawu ayipopeleña malwihu.
9 Mutupetulu 5, 6 ni 7 twamukanda waYishimu mwekala kufumba kwakuwahi kwawanvwali kutalisha hawubanji wekala mukwila wuvumbi. Awa mavasi amwekeshaña nawu mpinji jikwawu antu anateli kwikala mukweseka kwakwila wuvumbi. (Yishimu 5:3; 6:24, 25; 7:14-21) Ilaña adizishaña nawu wuvumbi watama nawa mwafumaña yuma yatama, cheñi yahana nshimbi yatela kukwasha atwansi kutondolwela wuvumbi. (Yishimu 5:1-14, 21-23; 6:27-35; 7:22-27) Kubombelahu, wuvumbi wambukaku nakudiluñisha kwatelela kweyala namumbanda kwamumaluwi. (Yishimu 5:15-20) Eñañi, ichi hichakutalilahu chachiwahi chatela kwimbujolawu anvwali.
10. Indi kuleja anyana kumwiluka Nzambi kutalisha hakuhumañana kweyala namumbanda kukuyileñela ñahi kubula kwila wuvumbi?
10 Komana ntañishilu yamuchidiwu yikuleñela anyana kwila wuvumbi? Kwambukaku, Bayibolu yatañishaña nawu: “Akwakuloña akapulukila kwiluka.” (Yishimu 11:9) Komana himunakukeña kupulwisha anyanenu kuyuma yaluwañeshaña yamukanu kaayuku? Tata yawantu wumu wahosheli nindi: “Kufuma tuhu hadiñuwu anyanetu atwansi, twesekaña kuhosha nawu chakadi kusweka neyi hitukuhosha hansañu yakuhumañana kweyala namumbanda. Muniyi njila, neyi atiya akwawu anakuhosha hansañu yawuvumbi, hiyakukeñaña kwihujolaku. Hiyekalaña nakukala kwenenuku.”
11. Indi anyana anateli kuyidizisha ñahi chovu chovu kutalisha hansañu yakuhumañana kweyala namumbanda?
11 Neyi chitwamona mutupetulu tunafumuhu, mwatela kudizisha anyana hakuhumañana kweyala namumbanda kufumisha kuwansi. Neyi himukudizisha anyana kutena yiidi yamujimba, bayi mushiyahu yiidi yawu yamujimba wakusweka neyi kwiji yansonyi chikupuku. Yilejenu majina aniyi yiidi. Bayi mukumina dakuleja mwana nenu kuhemaña nawamayala hela ambanda nehi, nhoshelu yamuchidiwu hakuyilukaku nawa yikumuluwañesha. Cheñi anvwali atela kudizisha anyanawu nawu iyi yiidi yalema nankashi, nawa hiyakukwatakwata hela kumwekesha kudi antuku, nawa bayi ayitenatenaña munjila yatamaku. Chiyakukulañawu, mwatela kuyileja chahumañanañawu eyala namumbanda kulonda kubaaba mwana. Neyi nyijimba yawu hiyikushika hawukwenzi hela hawuchañadima, atela kwilukañahu dehi nawu mujimba wawu wukuhimpika. Neyi chalumbululawu muKapetulu 5, kuyidizisha muniyi njila kukuyikiña cheñi anyana kuyikanjikija kulonda akaami nawu.—Yishimu 2:10-14.
MUDIMU WUKWETUWU ANVWALI
12. Yiluwanyi yavula kutañishawu kumashikola?
12 Anvwali atela kwikala asoñama kulonda akañesheña nsañu yakutwamba yatañishañawu kushikola, yidi neyi maana awantu akwila nawu yuma yadileñeli yayeni, chaambu chanyuza, niyitoñojoka yakwila nawu hikwekala nsañu yalalaku. (1 Akorinda 3:19; esekejenu Kutachika 1:27; Alevi 26:1; Yowanu 4:24; 17:17.) Akulumpi jamashikola amavulu ashinshika asweja kulemesha kutwalekahu kutaña shikola. Hela chakwila muntu watela kudifuukwila hansañu yakuwejelahu kutaña, antañishi amakwawu ahoshaña nawu diyi njila yikuleñela muntu kuheta.a—Masamu 146:3-6.
13. Indi anyana ayaña kushikola anateli kuyikiña ñahi kuyitoñojoka yaheña?
13 Hakwila nawu anvwali akañeshi yitoñojoka yaluwa hela ntañishilu yaheña, atela kwiluka yuma yayilejañawu anyanawu kushikola. Dichi anvwali ilukenu nenu mukweti mudimu. Fwilenu kwiluka yuma yadizañawu anyanenu kushikola kwayañawu. Chiyafumawu kushikola hoshenuña nawu. Yihulenu yuma yinakudizawu, yuma yakeñeshawu, niyuma yayikalilaña chikupu. Talenu nyidimu yinayinkuwu yakuzatila kwitala, nsañu yasonekañawu, niyuma yinawanuwu mukweseka. Fwilenu kwiluka antañishi jawu. Yilejenu antañishi nenu mwahamekaña hanyidimu yinakukoñawu nawa munakukeña kuyikwasha muyuma yikwawu.
ILUKENU AMABWAMBU JAWANYANENU
14. Muloñadi chichawahila anyana amwakamaña Nzambi kutonda amabwambu amawahi?
14 “Eyi mwana tata, indi wakuleja hinyi?” Anvwali añahi ehulaña ilu lwihu, ahayamaña hakutiya yuma yinahoshiyi mwanawu hela yinakoñiyi yakadi kutiyañahu dehi? Nawa mapampa kañahi kimwelukaña nenu amabwambu jindi amaha kushikola hela muchituñilu diwu amuleja? Eñañi, amabwambu jetu atuluwañeshaña chikupu, chili tudi atwansi hela akulumpi. Kapostolu Pawulu wasoñamishili nindi: “Bayi ayidimbaku; kudikunda nawantu atama kwatamishaña maana amawahi.” (1 Akorinda 15:33; Yishimu 13:20) Sweje-e anyana aluwankanaña nekakeja dawakwawu. Akañanyaña kwiluka mwakwilila, nawa mpinji jikwawu afwilaña kuzañalesha akwawu chikupu. Dichi, chikuwaha neyi akutonda amabwambu amawahi.
15. Indi anvwali anateli kukwasha ñahi anyanawu hakutonda amabwambu?
15 Neyi chiyelukawu anvwali ejima, anyana hiyavula kutonda chiwahuku, akeñekaña kuyikwasha. Bayi mukuminaña dakuyitondela amabwambu jawuku. Ilaña chikukulañawu, yilejenu ekali nakashinshi nawa yikwashenu eluki yililu yatela kukeñawu mudi amabwambu jawu. Chililu chabadika hikumukeña Yehova nikwila yuma yamutiyishaña kuwaha. (Maku 12:28-30) Yidizishenu kukeña nikulemesha antu akweti kashinshi, awunda, ahanaña, nawa adikita. Hampinji yakudiza kwachisaka, kwashenu anyana kumona yililu yadiñi nawantu ashimunawu muBayibolu nikwiluka antu akweti iyi yililu muchipompelu. Yimikilenu chakutalilahu kuhitila mukuzatisha iyi nshimbi hakutonda amabwambu jenu.
16. Indi anvwali anateli kwiluka ñahi chinakutondawu anyanawu amabwambu jawu?
16 Komana mwayiluka amabwambu jawanyanenu? Kwila muleja anyanenu kuleta amabwambu jawu kwitala kulonda muyiluki nehi? Mwatela kwihula anyanenu ehuli anyana amakwawu ayileji chekalawu amabwambu jawu. Komana ayiluka nawu akweti kashinshi tahindi akweti yililu yatama? Neyi akweti yililu yatama, kwashenu anyanenu kulonda eluki wubanji wekala mukudikunda nawantu amuchidiwu. (Masamu 26:4, 5, 9-12) Neyi mumona mwanenu natachiki kumwekesha yililu yatama, munvwalilu, hela munhoshelu, mwatela kuhosha nindi kutalisha hadi amabwambu jindi. Hadaha mwanenu nakudikunda nebwambu dindi wukweti yililu yatama.—Esekejenu Kutachika 34:1, 2.
17, 18. Kubombela hakusoñamisha kwakudikunda kwatama, chumanyi chachiwahi anvwali chatela kulejawu anyana?
17 Hela chochu, bayi mukumina hohu hakuleja anyanenu kutondolwela kudikunda kwatamaku. Yikwashenu kulonda awani amabwambu amawahi. Tata yawantu wumu wahosheli nindi: “Mpinji yejima twesekeleña kuhiñishahu chuma chacheñi. Hampinji yamukeñeleñawu mwanetu weyala kushikola nawu yayi kungunja, ami nimwinikwami twashakamini heseki nakumuleja muloña wuchikutamina kuya kungunja, muloña wawakwawu amaha akekalaku. Ilaña twafuukwiluhu kusenda anyana amakwawu muchipompelu nakuya kwiluña dimu nakutuma ngunja. Nawa chumichi chamanishili kukala.”
18 Anvwali akweti maana akwashaña anyanawu kukwata amabwambu amawahi nikuhema nawu yisela yayiwahi. Hela chochu, anvwali amavulu, kuhema yisela kwayikalilaña chikupu.
YISELA YAMUCHIDINYI YIMWATELA KUHEMAÑA?
19. Yakutalilahwinyi yamuBayibolu yamwekeshaña nawu kuhema yisela muyisaka hinshiduku?
19 Komana Bayibolu yahisha kuhema? Inehi! Bayibolu yahoshaña nawu kwekala “mpinji yakuseha . . . nimpinji yakuhañana.”b (Mukwakutaŋisha 3:4) Antu jaNzambi muIsarela wakushankulu embileña tumina, kuhañana, kuhema yisela nikuhosha nsañu yakusehesha. Yesu Kristu wayili kuchidika cheneni chakusumbwisha nawa chadiñi “chawija cheneni” chamuloñesheleluwu kudi Matewu Levi. (Luka 5:29; Yowanu 2:1, 2) Eñañi, Yesu hayikañesheli antu kulonda abuli kudizañaleshaku. Dichi kuseha niyiseki bayi muyimona neyi hinshidi muchisaka chenuku!
20. Chumanyi chatela kwilukawu anvwali kutalisha hakuhema yisela?
20 Yehova ‘hiNzambi wamuzañalu.’ (1 Timotewu 1:11) Dichi kudifukula kudi Yehova kwatela kuleta muzañalu, bayi neyi kwayineñeshaña antu muwumuku. (Esekejenu Kuhituluka 16:15.) Neyi chichekala anyana azañajalaña nawa akweti wuswa wakuhema yisela. Kutonda yisela yayiwahi kwaletaña wuloku weneni. Diyi mpinji yadizañayi mwana kulonda yapami. Mutu wachisaka wukweti mudimu wakuloñeshela akwetala dindi yuma yejima, kushilahu niyisela. Hela chochu, chakeñekaña kwesekeja yuma.
21. Yililwinyi yatama yinakumwekana muyisela makonu?
21 Munanu “mafuku akukuminina,” kaayi kanenzali nawantu “akeñaña yakuditiyisha aweni kuwaha, kukeña Nzambi nehi,” neyi chaprofweteluwu muBayibolu. (2 Timotewu 3:1-5) Antu amavulu, atwamijaku yisela muchihandilu chawu. Kudi yisela yayivulu nankashi yinateli kuluwañesha yuma yabadika kulema. Kubombelahu, muyisela yayivulu yinakumwekeshawu makonu mudi wuvumbi, madombu, kuzatisha yitumbu chatama, niyililu yikwawu yatama chikupu. (Yishimu 3:31) Chumanyi chimwatela kwila kulonda mukiñi anyana kuyisela yatama?
22. Indi anvwali atela kudizisha ñahi anyanawu kufuukula chiwahi kutalisha hayisela?
22 Anvwali atela kuleja anyana eluki mwakukumina. Sweje dinu, atela kudizisha anyanawu kulonda eluka yisela yatama nawa eluki neyi aneñijumu mutu chikupu. Kudizisha kwamuchidiwu kwakeñekaña mpinji yeneni nikushaku ñovu. Talenu ichi chakutalilahu. Tata yawantu wukweti anyana ayedi awamayala welukili nindi mwanindi wamukulumpi wavulileña kutiyilila kuprogiramu yayiha yahachisanji. Ifuku dimu chayileñayi kumudimu mumotoka yindi yamutoña, wenzulwili kuniyi progiramu yatiyililañayi mwanindi. Kakavulu wadiña nakwimana nakusoneka mazu amutumina tukwawu. Nkumininaku, washakamini nawanyanindi nakuhanjeka hayuma yatiyiliyi mutuna tumina. Wenhwileña malwihu ayileñeleleña kushimuna yitoñojoka yawu, watachikili kuyihula nindi, “Munakutoñojokahu nenudi?” nawa watiyilileña chikupu neyi hiyakwakula. Hanyima yakuhanjeka nawu kuzatisha Bayibolu, anyana etejeli nawu hiyakatiyilila cheñi kutuminaku.
23. Indi anvwali anateli kukiña ñahi anyanawu kuyisela yatama?
23 Anvwali akwaKristu akweti maana atalaña tumina, maprogiramu ahaTV, matepu avidiyo nijiDVD jazañaleshaña anyanawu. Atalaña nyevulu yidi hewulu nikutiya mazu adimu. Neyi añimbi emba mwidimi dacheñi, anvwali atela kwihula anyanawu ayilumbulwili munatalishi tumina tunembuwu. Anvwali amavulu adihayaminaña hakumona “yisela” yinakundami kudi anyana makonu. Antu akeñaña kukiña anyanawu kuyuma yatama ashakamaña hamu nachisaka chawu nakuhanjeka hawubanji, kuzatisha Bayibolu ninyikanda yashindamena haBayibolu chidi neyi mukanda wa Questions Young People Ask—Answers That Work niyibaaba yamuKaposhi Kakutalila nimumagazini yaAwake!c Neyi anvwali atwalekahu kuleja anyanawu mwakukumina munjila yayiwahi, kakavulu mwafumaña yuma yayiwahi.—Matewu 5:37; Afwilipi 4:5.
24, 25. Yisela yamuchidinyi yayiwahi yatela kuhema yisaka hamu?
24 Hela chochu, chuma chinateli kuyikwashaku anvwali, hikukañesha yisela yejima yatama. Yuma yayiwahi yatela kushinda yatama, neyi nehi anyana anateli kusenuka nakuya munjila yatama. Yisaka yayivulu yawakwaKristu yanukaaña yuma yayiwahi yadiluñishiluwu hampinji yapompeluwu hamu, nakuhema, nikuya nakuhempula antaña niamabwambu. Amakwawu, kutañila hamu nañovu hampinji yakunooka kwayizañaleshaña chikupu. Amakwawu niwena atiyaña kuwaha kushimuna jimpanji jakuzañalesha. Amakwawu niwena azatilaña yuma hamu, chidi neyi, kusoñasoña niwuchiji, nikwimba yisanji, kupenta, hela kudiza hayileñaleña yaNzambi. Anyana adiluñishaña nayuma yamuchidiwu akiñewaña kuyisela yatama, nawa elukaña nawu muyisela mudi yuma yayivulu yinabadiki hakushakama hohu nakutiya kuwaha. Kuhema muyisela kwazañaleshaña kubadika kutala hohu.
25 Kubulakana nawa kwetu nikwena kunateli kutuzañalesha hama. Neyi muyilombola chiwahi nawa kwikala antu antesha hohu nikubula kumanisha mpinji yeneni, anyanenu akuhetelamu chikupu. Anateli kukeña chikupu antu muchipompelu.—Esekejenu Luka 14:13, 14; Yuda 12.
CHISAKA CHENU CHINATELI KUSHINDA KAAYI
26. Chililwinyi chabadika chatela kwikala nawanvwali hakwila nawu akiñi chisaka chawu kuyuma yaluwañeshaña?
26 Chakadi nikujina, mwatela kuzata nañovu hakwila nawu mukiñi chisaka chenu kuyuma yamukaayi yaluwañeshaña. Ilaña kudi chuma chimu chabadika yuma yejima chikuyikwashaku kushinda. Kukeña. Neyi mukukeñañana muchisaka chenu, itala denu dikwikala neyi chiswamu nawa mukutiyañanaña, chisaka chenu chikukiñewa kuyuma yatama. Kubombelahu, twatela kumwekesha muchidi wukwawu wakukeña kwabadika, kumukeña Yehova. Neyi kukeña kwamuchidiwu kwikala muchisaka, anyana akukula nayitoñojoka yakuhela yuma yamuhilishaña Nzambi kuhitila mukutondolwela yuma yaluwañeshaña yamukaayi. Nawa anvwali amukeña Yehova chikupu afwilaña kwimbujola yililu yindi yakukeña, yamaana nawa yatelela. (Aefwesesa 5:1; Yakoba 3:17) Neyi anvwali akoña mwenimu, anyanawu hiyakumonaña kudifukula kudi Yehova neyi hichuma chidi hayuma yakaanishawu hela neyi muntu wudi mukaleya, munakukeña kutemukawu chakadi kulabaku. Ilaña akwiluka nawu kudifukula kudi Nzambi dichuma chachiwahi nankashi chatela kwilawu muchihandilu.
27. Indi chisaka chinateli kushinda ñahi kaayi?
27 Yisaka yanuñañana nawa yamukalakelaña Nzambi munjila yatelela, yafwilaña namuchima wawu wejima kutwalekahu kwikala ‘akadi ihuji nakubula hakuyinkela muloña’ kuyuma yamukaayi yaluwañeshaña, yamuzañaleshaña Yehova chikupu. (2 Petulu 3:14; Yishimu 27:11) Yisaka yamuchidiwu yalondelaña mumahanji aYesu Kristu, wakaanini yuma yejima yamwituña daSatana kumuluwañesha. Kwakwihi nakufwa kwindi, Yesu wahosheli nindi: “Ami nemiki mpata yamunu mwishina mushindu.” (Yowanu 16:33) Chisaka chenu nichena chishindi kanu kaayi kulonda mwakadiluñishi wumi wahaya nyaka.
[Tumazu twaheshina]
a Neyi munakukeña nsañu yikwawu yahosha hakuwejelahu shikola, talenu buloshuwa yinakwila nawu Jehovah’s Witnesses and Education, yasonekawu kudi Watchtower Bible and Tract Society of New York, Inc., mafu 4-7.
b Izu dachiHeberu dakwila nawu “kuseha,” munjila yikwawu, anateli kuditena nawu “kuhema,” “kusehesha,” “kuzañajala” hela “yiseki.”
c Wasonekawu kudi Watchtower Bible and Tract Society of New York, Inc.
INDI IJI NSHIMBI JAMUBAYIBOLU JINATELI KUYIKWASHA . . . ÑAHI KUKIÑA CHISAKA CHENU?
Kwiluka kwaleñelaña muntu kwikala namaana, nawa kunateli kuhemba wumi wamuntu.—Mukwakutaŋisha 7:12.
“Nzambi wamonaña maana amakonu nindi hiwusupi.”—1 Akorinda 3:19.
Twatela kutondolwela kudikunda kwatama.—1 Akorinda 15:33.
Hela chakwila kwekala mpinji yakuhema, bayi kuswejaku.—Mukwakutaŋisha 3:4.
[Chikasha chidi hefu 97]
ENU ATATA JAWANTU, HEMENUÑA NAWANYANENU
Iyala wumu muAfrica wahosheli nindi: “Hiwakawana mwana anamweleki kumafwiji amuntu weyala walemeshawuku.” Eñañi, amayala amavulu atiyaña nsonyi neyi ayimona anakuhema nawanyanawu. Amakwawu anateli nikutoñojoka nawu anyanawu akuleka kuyilemesha neyi ahemaña nawu. Mpinji yimu, anvwali aleteli nyanawu yanyanya kudi Yesu, ilaña antu amakwawu ayikaanishili anyana. Ilaña, Yesu wayilejeli nindi: “Itejenu anyana anyanya kwinza kudami, bayi muyilekeshaku.” (Maku 10:13-16) Yesu hatiyili nsonyi yakushakama hamu nawanyanaku.
Eñañi, Yesu hichakutalilahu chachiwahi chatela kwimbujolawu atata jawantu makonu! Bayi atata jawantu atoñojokaña nawu asweja kulema chakukañanya nikwilila yuma hamu nawanyanawuku. Anyana akeñaña anvwali ashakamaña nawanyana mpinji yeneni. Kuhemaña nawanyanenu kwakoleshaña mpanda yakukeña hakachi kenu, nawa chikuyipelela anyanenu kuhosha yuma yavuchikawu munyichima yawu. Neyi mubula kwila mwenimu, anyana akuhilashanaña hohu nikudimwenena, sweje neyi munakuyitamokela.
[Mwevulu wudi hefu 99]
Kutonda yisela chiwahi, neyi chinakwila ichi chisaka chinakutañila hamu, kwakwashaña anyana kwiluka nikukula kuspiritu