Zatishenuña maTilakiti Hakushimwina Nsañu Yayiwahi
1. Indi antu jaNzambi azatisha ñahi matilakiti?
1 Matilakiti ashindamena haBayibolu anayizatishi hampinji yayilehi kudi antu jaYehova hakushimwina nsañu yayiwahi. Mu 1880, C. T. Russell nialunda nindi atachikili kusoneka Bible Students’ Tracts (Matilakiti awaTudizi aBayibolu), nawa matilakiti wenawa ayinkeleña antañi jaKaposhi Kakutalila kulonda ayihaneña kudi antu. Matilakiti ayilemesheli chakwila mu 1884 hampinji yasonekesheleñayi C. T. Russell mutayi wetejawu munshimbi wazataña mudimu wakubula kuwaninamu mali watwalaña mudimu waWanta hambidi, izu “tilakiti” adibombeleli hejina dakwila nawu, Zion’s Watch Tower Tract Society, chayinu mpinji ayitenaña nawu Watch Tower Bible and Tract Society of Pennsylvania. Mu 1918, Atudizi aBayibolu ahanini matilakiti akubadika 300 miliyoni. Nimakonu matilakiti hiyozelu yazatikaña chiwahi hakushimwina.
2. Muloñadi matilakiti chiyazatikilañawu chiwahi?
2 Chazatikilañawu Chiwahi: Matilakiti aletaña ikoku. Nsañu yantesha yekalamu yaletaña ikoku nawa yashikaña hamuchima. Aletaña ikoku kudi enimatala atiyaña woma kutaña magazini hela mukanda. Matilakiti apela kuhana hela tuhu kudi akwakushimwina amaha nianyana. Kubombelahu, matilakiti ekala anyanya nawa aswayi kusenda.
3. Shimunenu chuma chimwamweni hela chasonekawu chamwekeshaña kulema kwamatilakiti.
3 Antu amavulu asambilaña kudiza chalala kuhitila mukutaña tilakiti. Chakutalilahu, mumbanda wumu kuHaiti wamweni tilakiti yetu mumukwakwa. Wayinoneli nakuyitaña nawa wahosheli nindi “Nawani chalala!” Nkumininaku wayili Kwitala daWanta, watachikili kudiza Bayibolu nawa wapapatisheweli, muloña wañovu Yezu daNzambi yadiña mutilakiti.
4. Chikonkwanyinyi chitukweti neyi tunakuhana matilakiti mukakweji?
4 Kwitala niKwitala: Chineli matilakiti hiyozelu yazatikaña chiwahi hakushimwina wunsahu, akwikalaña hanyikanda yakuhana mukakweji mumpinji mumpinji kutachika muNovember. Bayi neyi chikonkwanyi chetu chidi chakuhana matilakiti hohuku, ilaña chakuzatisha matilakiti hakutachika kuhanjeka nawantu. Neyi muntu namwekeshi mpwila halwendu lwatachi hela hakufuntilaku, twatela kumuleja chitwadizaña Bayibolu kuzatisha mukanda waChatañishaña Bayibolu hela mukanda wukwawu wakudizamu. Tunateli kuhana ñahi matilakiti kwitala nikwitala? Matilakiti ejima ambukaku, dichi twatela kwiluka nsañu yidi mumatilakiti tunakuhana.
5. Tunateli kuhana ñahi matilakiti kwitala nikwitala?
5 Nsañu yitukuhosha yatela kwesekana neluña detu nitilakiti yitunakuzatisha. Twatela kutachika kuhanjeka kuhitila mukumwinka mwiniitala tilakiti. Chipapilu chahewulu chinakuleta ikoku chinateli kumusañumuna mpwila. Hela tunateli kumuleja mwiniitala matilakiti amavulu itukweti kulonda yatonduhu yinakeñiyi. Neyi tunakuzatila mwiluña mwashitanjalañawu antu kushinkula kuyenzelu, twatela kukwata tilakiti chiwahi kulonda mwiniitala yamoni chipapilu chahewulu, indi kwiji tunateli kumwihula kulonda tumushili chuma kwishina dachenzelu chitunakukeña yatuleji chikutoñojokayi haniyi nsañu. Neyi mutu watilakiti hilwihu, tunateli kumwihula kulonda yashimuni yuma yinakutoñojokayi. Hela tunateli kumwihula lwihu ludi lwejima lunateli kumusañumuna mpwila kulonda tutachiki kuhanjeka. Tunateli kutañila hamu nsañu yidi mutilakiti namwiniitala, nakuhudikila hitukuwana malwihu nikumwila mwiniitala kulonda yahoshuhu. Tunateli kutaña muBayibolu nsona yinakukonkomwena hayikuma. Hanyima yakuhanjeka nsañu yikwawu, tunateli kukunkulula mpanji nikutiyañana chiwahi kulonda tukafuntiluku. Neyi chipompelu chashiyaña nyikanda hamatala habulaña antu, tunateli kushiya tilakiti heluña hakubula kuyimona kudi antu amakwawu neyi mwiniitala hosi.
6. Tunateli kuzatisha ñahi matilakiti hakushimwina mumukwakwa?
6 Kushimwina muMukwakwa: Mwazatishahu dehi matilakiti hakushimwina wunsahu mumukwakwa? Antu amakwawu ahitaña hiyekalaña nampinji yakwimana kulonda tuhanjeki nawuku. Chatela kutukalila kwiluka neyi akweti mpwila. Chatela tuyinki magazini yayiha chakubula kwiluka neyi akuyitaña hela nehi, kwila tuyinka tilakiti nehi? Chineli chipapilu chahewulu chaletaña ikoku nawa nsañu yekalamu yantesha, antu anateli kutaña tilakiti neyi akweti kapinji kantesha muloña wakukeña kwiluka nsañu. Hela chochu, neyi akweti mpinji, tunateli kuhanjeka nawu nsañu yidi mutilakiti.
7. Shimunenu yuma yamwekeni yamwekeshaña chakuzatisha matilakiti hakushimwina wunsahu wakukoolekela.
7 Wunsahu Wakukoolekela: Chaswayi kushimwina wunsahu wakukoolekela kuzatisha matilakiti. Mana kwetu wumu wasendelaña matilakiti antesha mwitumba dindi neyi nakufuma hetala mpinji yejima. Neyi yawana muntu chidi neyi walandishaña musitolu, wukumwila hohu nindi yamwinkuhu mukanda wakutaña, nawa wukumwinka tilakiti. Eyala namumbanda adisumbula chayiluwu muMusumba wumu nakutala maluña amawahi, elukili nawu akuwana antu akumatuña acheñi. Dichi asendeli kamukanda kaNations nimatilakiti amavulu mumadimi ashiyashana. Dichi elileña neyi atiya muntu wunakuhosha idimi dacheñi nakulandisha yuma kunsa yamukwakwa hela nashakami kwakwihi nawena mupaaki hela mulesitilanti, akumwinka tilakiti yamwidimi dindi.
8. Indi matilakiti adi neyi mbutu munjilanyi?
8 “Tumbaña Mbutu Jeyi”: Matilakiti adi neyi mbutu. Ndimi wakuminaña dakukuwa mbutu yindi muloña helukaña yikatutuka nakumenaku. HaMukwakutaŋisha 11:6 hahosha nawu: “Habudidi tumbaña mbutu jeyi nihamelela bayi wulekesha chikasa cheyuku, muloña hiwuneluki jakalumbulukaku, hela iji, hela iji, indi kwiji jejima jakawahila hamu.” Dichi, tutwalekenuhu ‘kukuwa kwiluka’ kuhitila mukuzatisha ichi chozelu chazatikaña chiwahi hakushimwina.—Yish. 15:7.
[Mazu ekoku adi hefu 3]
Chineli matilakiti hiyozelu yazatikaña chiwahi hakushimwina wunsahu, akwikalaña hanyikanda yakuhana mukakweji mumpinji mumpinji kutachika muNovember