Kapetulu 8

Nzambi Wakeña Antu Awunyonji

“Kudi muntu wutooka mumuchima eyi wukudimwekesha Wutooka mumuchima.”—MASAMU 18:26.

1-3. (a) Muloñadi mama yawantu chakeñelañayi mwanindi kwikala wawunyonji? (b) Muloñadi Yehova chakeñelañayi ambuñindi kwikala awunyonji, nawa chumanyi chatuleñelaña kwikala awunyonji?

MAMA yawantu wudi halwendu wasendaña mwanindi. Henohu kanda yayi, wukumuwelesha nakumuvwika yakuvwala yitooka nawa yawunyonji. Muloña neluki nindi wunyonji wukukiña mwanindi kunyisoñu. Neluki cheñi nindi mmwekenu yamwana yinateli kuleta kasawuntu hela kulemesha hadi anvwali jindi.

² Yehova, Tata yetu wamwiwulu, wakeñaña ambuñindi kwikala awunyonji. Izu dindi dahosha nawu: “Kudi muntu wutooka mumuchima eyi wukudimwekesha wutooka mumuchima.”a (Masamu 18:26) Yehova watukeña; weluka nindi neyi twikala awunyonji chikutukwasha nankashi. Cheñi Yehova nakukeña nindi tumwekaneña chiwahi hamu neyi aYinsahu jindi kulonda antu amuhamekeña. Mwamweni, mmwekenu yetu yawunyonji niyililu yetu yayiwahi yikuleta kalemesha hadi Yehova nijina dindi dajila, bayi kasawuntuku.—Ezekeli 36:22; 1 Petulu 2:12.

³ Hamuloña wakwiluka netu Nzambi wakeña antu awunyonji chatuleñelaña kwikala awunyonji. Tunakukeña chihandilu chetu chileteña mpuhu kudi yena muloña twamukeña. Cheñi tunakukeña kushakama mukukeña kwindi. Ichi dinu, tushinshikenu muloña wutwatela kwikalila awunyonji, yuma yekeñekaña hakwila nawu twikali awunyonji, nichitwatela kwikala awunyonji. Kushinshika hayumiyi chinateli kutukwashaku kwiluka mutwatela kuwahisha.

MULOÑADI CHITWATELA KWIKALILA AWUNYONJI?

4, 5. (a) Muloñanyi weneni wutwatela kwikalila awunyonji? (b) Indi yileñaleña yamwekeshaña ñahi wunyonji waYehova?

⁴ Njila yimu Yehova watulombolaña nachakutalilahu. Izu dindi datukonkomwenaña nawu, “Ikalenu akwakwimbujola Nzambi.” (Aefwesesa 5:1) Iwu dimuloña weneni waleteshaña twikali awunyonji: Yehova, Nzambi yitwalombaña, wawunyonji, wutooka, nawa wajila muyuma yejima.—Alevi 11:44, 45.

⁵ Kufwana yililu yindi yayivulu niyidika, wunyonji waYehova niwena wamwekenaña muyileñaleña yindi yitwamonaña. (Aroma 1:20) Iseki adileñeli kwikala mukala wawunyonji wakushakama antu. Yehova watuña yileñaleña yahamaseki yawahishaña mpepela nimenji. Tububu tukwawu twavumbikaña majilu kulonda abuleña kuleta yikatu. Asayantisiti anazatishi tububu twenitu twafwa hakudya kulonda kuwahisha nachu hanamwañikili manji niyuma yikwawu yatamishaña mpepela hela menji kuhitila mulwisu lwawantu. Chakadi kujina, wunyonji walema chikupu kudi ‘Nleñi yeseki.’ (Yeremiya 10:12) Anetu nawa twatela kulemesha wunyonji.

6, 7. Indi Nshimbi jamwinkeluwu Mosi jakonkomweneni ñahi nawu akwakudifukula aYehova ateleli kwikala awunyonji?

⁶ Muloña wukwawu wutwatela kwikalila awunyonji wudi wakwila nawu Yehova, Mwanta wetu Chinaweji, wakeñaña akwakudifukula indi kwikala awunyonji. MuNshimbi yayinkeluwu aIsarela kudi Yehova, wunyonji wendeleleña hamu nakudifukula. Lushimbi lwahosheli chikupu nawu Hefuku daKubuta Nyiloña, kapristu muneni wateleleli kuwela mumenji mapampa kayedi. (Alevi 16:4, 23, 24) Atupristu akakwocha mulambu ayilejeli kwisuka kumakasawu nikuwela kunyendu yawu henohu kanda ahani mulambu kudi Yehova. (Kwidika 30:17-21; 2 Kushindulula 4:6) Lushimbi lwahosheli hayuma yikwawu 70 yamajilu akumujimba niyakujilola yidika. Dichi neyi kaIsarela wudi namajilu, hateleleli kudifukulaku—neyi yodifukula henohu wudi namajilu, amubabesheleña kuhitila mukumujaha. (Alevi 15:31) Yowu muntu wakaanineña kulondela njila yakuditookeshelamu, yabombelelumu kuwela mumenji nikukosa mahinindi, ‘amufumishileña mukachi kachipompelu.’—Kuchinda 19:17-20.

⁷ Hela chakwila, hitwalondelaña Nshimbi jamwinkeluwu Mosuku, chatukwashañaku kwiluka chatoñojokañayi Nzambi hawunyonji. Mwamweni, Nshimbi yakonkomweneni nawu antu adiña nakudifukula kudi Nzambi ateleleli kwikala awunyonji. Yehova hanabalumukiku. (Malaki 3:6) Hakwila nawu Yehova yeteji kulomba kwetu, chiña kwikala ‘kutooka nawa kwakadi majilu.’ (Yakoba 1:27) Dichi, twatela kwiluka chuma chakeñañayi Yehova kudi etu kutalisha hansañu yawunyonji.

YUMA YAKEÑEKAÑA HAKWIKALA AWUNYONJI KUMESU ANZAMBI

8. Indi Yehova wakeñaña nindi twikali awunyonji muyumanyi?

⁸ MuBayibolu, nhoshelu yakwila nawu kwikala wawunyonji hiyalumbuluka hohu kwikala nawunyonji wakumujimbaku. Kwikala wawunyonji kumesu aNzambi kwakundama kuyuma yejima yamuchihandilu chetu. Yehova wakeñaña nindi twikali awunyonji muyuma yiwana yalema—kuspiritu, muyililu, muyitoñojoka, nikumujimba. Twayenu tushinshiki chalumbuluka iyi yuma yejima.

9, 10. Indi kwikala awunyonji kuspiritu kwalumbulukadi, nawa chumanyi chatondolwelañawu akwaKristu alala?

⁹ Wunyonji wakuspiritu. Hakwila twikali awunyonji kuspiritu bayi tubombashanaña kudifukula kwalala nakwakutwambaku. Hampinji yafuminuwu aIsarela muBabiloni nakufunta kuYerusalema, ateleleli kutiyilila kukonkomwena kwonenewa kwakwila nawu: “Idikenumu, bayi mukunka kuchuma chamajiluku . . . ikalenu atooka.” (Isaya 52:11) Chuma cheneni chafuntililuwu aIsarela kuYerusalema chadiña chakutachika cheñi kudifukula kudi Yehova. Kudifukula kweniku kwateleleli kwikala kutooka—kwakadi majilu nantañishilu yamuneñeshaña Nzambi, yililu, nitushidikilu twamunsakililu yaweniBabiloni.

¹⁰ Makonu, hakwikala akwaKristu alala, twatela kubabala kulonda tubuli kuditamisha nakudifukula kwakutwamba. (1 Akorinda 10:21) Twatela kusoñama kuyumiyi, muloña kuluwañesha kwansakililu yakutwamba kunatandi chikupu. Mumatuña amavulu, mudi yisemwa yashiyashana, nyidimu, niyidika yakundama kuntañishilu yansakililu yakutwamba, chidi neyi yitoñojoka yakwila nawu chuma chimu chekala mukachi ketu chatwalekañahu nakuhanda neyi tunafwi. (Mukwakutaŋisha 9:5, 6, 10) AkwaKristu alala atondolwelaña tushidikilu twakundama kunsakililu yakutwamba.b Dichi hitwaketeja antu kutwikakeja nawu tufumpi nshimbi jamuBayibolu jakudifukula kwawunyonjuku.—Yililu 5:29.

11. Indi kwikala nayililu yawunyonji kwabombelamu chumanyi, nawa muloñadi chitwatela kwikalila nayililu yawunyonji?

¹¹ Yililu yawunyonji. Hakwila nawu twikali nayililu yawunyonji, twatela kutondolwela nyichidi yejima yawuvumbi. (Aefwesesa 5:5) Dichi twatela kwikala nayililu yawunyonji. Neyi chitukumona mukapetulu kanalondeluhu kawunu mukanda, hakwila nawu tushakami mukukeña kwaNzambi, twatela ‘kutemuka wuvumbi.’ Ayivumbi abulaña kubalumuka “hiyamba kaswana wanta waNzambuku.” (1 Akorinda 6:9, 10, 18) Kumesu aNzambi antu amuchidiwu ekala hakachi kawantu “atama nankashi.” Neyi akañanya kwikala nayililu yawunyonji, ‘akekala . . . mukufwa kwamuchiyedi.’—Chimwekeshu 21:8.

12, 13. Kunuñañananyi kudi hakachi kayitoñojoka nayililu, nawa tunateli kwikala ñahi awunyonji muyitoñojoka?

¹² Yitoñojoka yawunyonji. Yitoñojoka yaleñelaña muntu kuzata yuma. Dichi neyi twiteja yuma yatama kulamata muyitoñojoka nimumuchima wetu, chakubula nikuhita mpinji chikutuleñela kukoña yuma yamajilu. (Matewu 5:28; 15:18-20) Ilaña neyi tukutoñojokaña hayuma yayiwahi nawa yawunyonji, tunateli kwikala nayililu yawunyonji. (Afwilipi 4:8) Tunateli kwikala ñahi nayitoñojoka yawunyonji? Chuma chimu chitwatela kwila, twatela kutondolwela yisela yejima yinateli kuluwañesha yitoñojoka yetu.c Cheñi nawa, tunateli kwikala nayitoñojoka yawunyonji kuhitila mukudiza Izu daNzambi mpinji yejima.—Masamu 19:8, 9.

¹³ Hakwila nawu tushakami mukukeña kwaNzambi, chikuwaha neyi tukwikala awunyonji kuspiritu, muyililu, muyitoñojoka, nikumujimba. Iyi yililu yakwikala awunyonji anayihoshi chikupu mutupetulu tukwawu twawunu mukanda. Ichi dinu, twayenu tuhanjeki hachililu chamuchiwana, wunyonji wakumujimba.

TUNATELI KWIKALA ÑAHI AWUNYONJI KUMUJIMBA?

14. Muloñadi wunyonji wakumujimba chiwabulila kwikala chuma chakudifuukwila?

¹⁴ Wunyonji wakumujimba wabombelamu kuhemba mujimba wetu chiwahi nikuwahisha nyikala yetu. Komana wunyonji wamuchidiwu hichuma chatela kudifuukwilayi muntu yomweni chakadi antu amakwawu kudiñijamu? Akwakudifukula aYehova kwila afuukula mwenimuku. Neyi chitunahanjekuhu dehi, wunyonji wakumujimba walema kudi Yehova. Watukiñaña nawa watuleñelaña kumwekesha chekalayi Yehova. Toñojokenu hachakutalilahu chidi kumatachikilu. Neyi mwamonaña mwana wamwekanaña majilu mpinji yejima, chakadi kujina chikuyileñela kutoñojoka chekala anvwali janowu mwana, netuku? Hitunakukeña mmwekenu yetu hela chuma chejima muchihandilu chetu kuleta kasawuntu hadi Tata yetu wamwiwulu hela kukañesha nsañu yitwashimwinañaku. Izu daNzambi dahosha nawu: “Bayi mwila chuma chakudimbwisha nachu muntu hela chimuku, kulonda mudimu wetu abuli kuwumona kutama. Twadimwekeshaña mwakwila nawu tuyakwakukalakala mudimu waNzambi muyuma yejima.” (2 Akorinda 6:3, 4) Hanu dinu, tunateli kwikala ñahi awunyonji kumujimba?

15, 16. Indi mmwekenu yawunyonji yabombelamu chumanyi, nawa yakuvwala yetu yatela kumwekana ñahi?

¹⁵ Wunyonji wahalwetu nimmwekenu. Hela chakwila yisemwa niyihandilu yenda kushiyashana mumatuña, twatela kukeña njapawu nimenji kulonda tuweleña mafuku ejima nikumona kwila nawu tunakumwekana chachiwahi hamu nawanyanetu. Wunyonji wabombelamu kwisuka kumakasa nanjapawu henohu kanda tudyi hela kukwata kuyakudya, hakufuma kumusalanyi, nihanyima yakukosa nyapi hela kuvwika nkemba. Kuwela kumakasa nanjapawu kwakañeshaña nyisoñu nawa kwakiñaña mawumi. Kunateli kukañesha kutanda kwatububu twafwana twaletaña nyisoñu, nakukwasha antu kubula kukata nyisoñu yakuhitisha. Mumatuña mwekala matala amavulu abula nyipayipi yamajilu, majilu anateli kuyishikila, neyi chelileñawu muIsarela wakushankulu.—Kuhituluka 23:12, 13.

¹⁶ Yakuvwala yetu niyena yakeñekaña kuyikosa mafuku ejima kulonda yimwekaneña chachiwahi. Chumichi hichinayi mukwila nawu mukwaKristu watela kwikala nayakuvwala yawuseya hela mafashoni akatatakaku, ilaña yatela kwikala yawunyonji, yayiwahi, nawa yatelela. (1 Timotewu 2:9, 10) Hichikweti muloña neluña kutwashakamañaku, tunakukeña mmwekenu yetu ‘yiwahishi kuleja kwaNzambi, Chamwinu chetu, muyuma yejima.’—Titusa 2:10.

17. Muloñadi itala detu nihanzi chihatela kwikalila hawunyonji?

¹⁷ Itala detu nihanzi. Hadaha itala detu hidinateli kwikala dawuhandu hela dasweja kutohaku, ilaña datela kwikala dawunyonji nawa dalubanji kushika hakumina ñovu jetu. Chochimu, neyi twazatishaña motoka hakuya nakupompa nimumudimu wakushimwina, twatela kumona kwila nawu wunakumwekana chiwahi mukachi nihanzi. Bayi tuvulamena netu wunyonji wetala nihanzi wahanaña wunsahu hadi Nzambi yitwalombañaku. Cheñi, twayidizishaña antu netu Yehova hiNzambi wawunyonji, nawa ‘wakajilumuna akisañanaña iseki,’ nawa Wanta windi keña wubalumuni mukala wetu wahamaseki kwikala paradisa. (Chimwekeshu 11:18; Luka 23:43) Chalala, tunakukeña mmwekenu yetala detu niyuma yitukweti yilejeña antu nawu nimakonu tunakudiza yaaku yawunyonji yikatukwashaku kushakama mwituña dadiha dinakwinza.

18. Tunateli kulemesha ñahi Itala detu daWanta?

¹⁸ Iluña detu dakudifukwila. Kukeña kutwamukeña Yehova kwatuleñelaña kulemesha Itala detu daWanta, iluña dakudifukula kwalala munodu iluña. Neyi amaha anenzi hetala dakupompela, twakeñaña atiyi kuwaha chinakumwekana iluña detu dakupompela. Dichi twatela kudiwahisha mpinji yejima nikudihemba chachiwahi kulonda dileteña ikoku. Twalemeshaña Itala detu daWanta kuhitila mukuzata nañovu jejima kulonda tudihembi chiwahi. Komana hikukooleka kwikala nampinji yakuzataku mudimu ‘wakuwahisha nikuloñesha’ maluña etu akudifukwila. (2 Kushindulula 34:10) Dichitwatela kwila neyi tunapompi Mwitala daKupompelamu hela itala dikwawu dakupompelamu kupompa kwamaneni.

KUTONDOLWELA YAAKU NIYILILU YATAMA

19. Hakwila twikali awunyonji kumujimba, yumanyi yitwatela kutondolwela, nawa Bayibolu yatukwashaña ñahi?

¹⁹ Hakwila twikali awunyonji kumujimba, twatela kutondolwela yaaku niyililu yatama, yidi neyi makanya, kunwa walwa chatama, nikuzatisha yitumbu yateñwishaña hela yuma yashetana. Bayibolu hiyashimuna chikupu yuma yatama yejima niyaaku yayishimashima niyililu yinatandi mukaayi makonuku, ilaña yikweti nshimbi yatuleñelaña kwiluka chatoñojokañayi Yehova hayuma yamuchidiwu. Hamuloña wakwiluka chamonañayi Yehova yuma, kukeña kwetu kutwamukeña kwatuleñelaña kwila yuma yamuzañaleshaña. Twayenu tushinshiki hanshimbi jitanu jamuNsona.

20, 21. Yililu yamuchidinyi yakeñañayi Yehova nindi tuleki, nawa muloñanyi waweni wutwatela kwovwahila?

²⁰ “Enu akwetu twakeña, ichi chanatukanuwu mwenimu, tuditookeshenu kutama kwamujimba nikwaspiritu; tukoleshenu kujila nawoma waNzambi.” (2 Akorinda 7:1) Yehova nakukeña nindi tuleki yililu yatamishaña mujimba nispiritu yetu, hela yalamataña muyitoñojoka yetu. Dichi twatela kutondolwela yililu yateñwishaña yelukawu nawu yaletaña kukala kumujimba nimuyitoñojoka.

²¹ Bayibolu yatulejaña muloña waweni wutwatela ‘kuditookeshela kukutama kwejima.’ Mukanda wa 2 Akorinda 7:1 watachika namazu akwila nawu: “Ichi chanatukanuwu mwenimu.” Yikaninwinyi? Neyi chinashimunuwu mumavasi ahanyima, Yehova wakana nindi: “Ninami nukuyitambula; Nukwikala Tata yenu.” (2 Akorinda 6:17, 18) Chitoñojokenu: Yehova wakana kuyihemba nikuyikeña neyi tata yawantu chakeñayi mwanindi weyala hela wamumbanda. Ilaña, Yehova wakashikija iyi yikaninu neyi mutondolwela yuma yatamishaña ‘mujimba nispiritu.’ Komana hichikuwahaku neyi mukwiteja yaaku yejima yakushimana hela yililu yatama kukañesha wubwambu wenu wawuwahi naYehova.

22-25. Nshimbinyi jamuNsona jinateli kutukwasha kuleka yaaku niyililu yamajilu?

²² “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.” (Matewu 22:37) Yesu wahosheli hanilu lunshimbi nindi dilu lwabadika nshimbi jejima. (Matewu 22:38) Yehova nakukeña nindi tumukeñi nankashi. Hakwila nawu tumukeñi namuchima wetu wejima, nawumi wetu, nimaana etu ejima, twatela kuleka yililu yinateli kusha wumi wetu hakatoña hela kuluwañesha yitoñojoka yatwinkawu kudi Nzambi.

²³ “[Yehova] diyi wenkaña antu wumi nimuuya niyuma yejima.” (Yililu 17:24, 25) Wumi hichawaana chakufuma kudi Nzambi. Twamukeña Mukwakuhana, dichi twatela kulemesha chawaana chatwinkayi. Twatondolwelaña yaaku yejima hela yililu yafwana, yaletaña kukala, muloña tweluka netu yililu yamuchidiwu yamwekeshaña nawu hitwalemesha chawaana chawumuku.—Masamu 36:9.

²⁴ “Keñaku mukwenu neyi chiwadikeña eyi aweni.” (Matewu 22:39) Yaaku niyililu yamajilu kakavulu hiyaluwañeshaña hohu muntu wunakuyikoñaku ilaña niantu amakwawu. Chakutalilahu, wishi wamakanya wunakufukumuka mukanwa kamukwakunwa makanya wukuletesha antu abulaña kunwa makanya kuchihujola. Muntu wahela antu adikumayi nawu wafumpaña nshimbi yaNzambi yakwila nawu tukeñi akwetu. Kuhitila muyililu yindi wamwekesha cheñi nindi watwambaña neyi yahosha nindi wamukeña Nzambi.—1 Yowanu 4:20, 21.

²⁵ ‘Ovwahilenuña anyuli niakwawanta, nakwila mwakuyilejawu.’ (Titusa 3:1) Mumatuña amavulu, nshimbi hiyeteja muntu kuhemba hela kuzatisha yitumbu yikwawuku. Hakwikala akwaKristu alala, hitwahembaña hela kuzatisha yitumbu yakaanishawu munshimbuku.—Aroma 13:1.

26. (a) Hakwila nawu tushakami mukukeña kwaNzambi, chumanyi chitwatela kwila? (b) Muloñadi chichawahila kwikala awunyonji kumesu aNzambi?

²⁶ Hakwila nawu tushakami mukukeña kwaNzambi, twatela kwikala awunyonji, bayi muyuma yantesha hohuku, ilaña muyuma yejima. Eñañi, kuleka yaaku niyililu yatama kwakala, ilaña tunatweshi kuleka.d Chalala, ichi hichihandilu chachiwahi, muloña Yehova watulejaña mpinji yejima kulonda tuhetelumu etu aweni. (Isaya 48:17) Sweje-e, neyi twikala nawunyonji tukuzañalala muloña tuneluki netu tunakumwekesha chekalayi Nzambi yitwakeña, chikufumamu tukushakama mukukeña kwindi.

[Tumazu twaheshina]

[Chikasha/Mwevulu wudi hefu 94]

KOMANA NAFWILAÑA KWILA YUMA YALOÑA?

Lushimbi: “Nafumbaña mujimba wami nakuwukofwola, kuchina kunkinjika ami aweni nashimwinaña antu acheñi.”—1 Akorinda 9:27.

Malwihu yimwatela kudihula

▪ Neyi muchima wunakunleja nawu nikoñi chuma chatama, komana nalombaña spiritu yaNzambi kulonda yinkwashuku nibuli kwila yuma yatama?—Matewu 6:13.

▪ Indi antu yinadikunda nawu, mafilimu yinatalaña, nitumina tunatiyililaña, yankwashaña ñahi kubula kwila yuma yatama?—1 Petulu 4:3, 4.

▪ Muloñadi nyidimu yayiwahi yitwakoñaña chiyikubulila kutwinka lusesa lwakwila yuma yatama?—Matewu 23:25-28.

▪ Muloñadi chinnakeñeli kukabakana neyi chakabakeniyi Yesu hakwila nkeñelu yaNzambi?—1 Petulu 2:21; 4:1.

▪ Nateli kumulumbulwila ñahi muntu chinabulilaña kunwa makanya?—Aroma 12:1, 2.

▪ Komana natoñojokaña nami neyi nakañanyi chantesha mukulwisha kwakutondolwela yuma yawuzondu chinayi mukwila nawu nimukwakukañanya chikupu?—Aroma 7:21-25.

[Chikasha chidi hefu 96]

“YUMA YEJIMA YINATWESHEKI KUDI NZAMBI”

Helene wahosheli nindi: “Hinadiñi nayaaka 15, nanwineña makanya mafuku ejima niwalwa nawamabwambu jami kukukuma kwamulungu. Mukuhita kwampinji, hela chakwila nadiña mujiki nawa mama yawantu wanyana yisatu, nateñukili nakunwa yitumbu yashetana yakokeni. Chihandilu chami chadiñi chayihuñu nankashi. Hela chochu, natachikili kudiza Bayibolu, nawukwashu waYehova, natachikili kwikala nachihandilu chachiwahi nawa nalekeli yuma yejima yanteñwili. Ilaña, hichadiñi chaswayi kulekaku, sweje-e kunwa yitumbu yakokeni. Natoñojoki nami chakadi wukwashu waYehova hinadi kutwesha kuhimpa yuma yejimiyuku. Ichi dinu nukuhosha chikupu nami nadimweni kushikijewa kwamazu aYesu akwila nawu: ‘Yuma yejima yinatwesheki kudi Nzambi’”—Matewu 19:26.

[Tumazu twaheshina]

[Nyevulu yidi hefu 91]

Kwikala awunyonji kwabombelamu wunyonji wakumujimba hihanzi