Kusañuka Kwekalaku Muloña Wefutu Danyiloña

Chanukishu chatwinkaña kukooleka kwakutoñojoka hankisu yitwakatambwila kumbidi kuhitila mwifutu danyiloña, yidi neyi kusañuka. Yehova hakeñeleña nindi antu afweñaku. Dichatuleñelaña kuneña chikupu neyi tujimbesha muntu itwakeña. (1 Kor. 15:26) Yesu waneñeli chamweniyi atumbanji twindi anakudila Lazaru wafwili. (Yow. 11:33-35) Chineli Yesu wamwekesheleña yilwilu yaTata yindi yawanina, tunateli kukuhwelela chikupu netu Yehova niyena waneñaña neyi tujimbesha muntu itwakeña. (Yow. 14:7) Yehova watoñola mpinji yakasañulayi ambuñindi, anetu nawa twatela kukuhwelela netu akayisañula.—Yoba 14:14, 15.

Chineli Yehova hiNzambi wakuluwañeshaku, twatela kukuhwelela netu kusañuka kwakenda munjila yayiwahi. (1 Kor. 14:33, 40) Chatela kwakekaleña yipenji, kwakekala mpinji yakutambwila antu akasañulawu. Komana mwatoñojokaña hakusañuka, sweje-e neyi munaneñi? (2 Kor. 4:17, 18) Komana mwamusakililaña Yehova chahaniniyi ifutu danyiloña nikulumbulula muNyikanda Yajila nawu afu akahanda cheñi?—Kol. 3:15.

• Amabwambu jenwinyi niantaña jenwinyi imunakukeña kudimona nawu cheñi?

• Muntwinyi ashimunawu muBayibolu imunakukeña kudimona nikuhanjeka nindi?