Nakumutañisha Nikodemu Nawufuku

Hampinji yidiyi muYerusalema haChipandakenu chamu 30 C.E., Yesu nakoñi yinjikijilu hela yihayamisha. Chinafumimu, antu amavulu anamukuhweleli. Nikodemu kaFwarisi nawa muntu wamuchota chawaYudeya chatenañawu nawu Sanihedirini natiyi kuwaha. Chineli nakukeña kwilukilahu jajivulu, namwendeli nawufuku hadaha nakuchina nindi ijina dindi dikutama nawa nlomboli jawaYudeya amakwawu.

Nikodemu nahoshi nindi: “Rabi, tuneluki netu wudi ntañishi wunafumi kudi Nzambi, muloña kwosi muntu wunateli kukoña iyi yihayamisha yiwunakukoñaku, chiña neyi Nzambi wudi nayena.” Dichi, Yesu hakumwakula namuleji Nikodemu nindi hakwila muntu akeñili muWanta waNzambi watela “kuvwalika kamuchiyedi.”—Yowanu 3:2, 3.

Hanu dinu muntu nateli kuvwalika ñahi kamuchiyedi? Nikodemu nehuli nindi: “Komana nateli kwiñila mwivumu damama yindi kamuchiyedi nakuvwalika cheñi?”—Yowanu 3:4.

Inehi, dimwatalisha kuvwalika kamuchiyedi wanyi. Yesu nalumbululi nindi: “Neyi muntu abula kuvwalika mumenji nikuspiritu, kwila eñila muWanta waNzambi nehi.” (Yowanu 3:5) Chamupapatishiliwu Yesu nichenjili spiritu yajila hadi yena, dichi ‘wavwalikili kufuma mumenji nikuspiritu.’ Hayina mpinji, izu dafumini mwiwulu nawu: “Iwu diyi Mwanami, inakeña, inatiyaña kuwaha.” (Matewu 3:16, 17) Muniyi njila, Nzambi wabidikili nindi namuleti Yesu mwanindi wakuspiritu nakuchiñeja kwakwiñila muWanta wamwiwulu. Mukuhita kwampinji, haPentekosita 33 C.E., spiritu yajila akayichila hadi amakwawu akapapatishewa dichi niwena akavwalika kumuchiyedi nakwikala anyana kaNzambi akeñayi akuspiritu.—Yilwilu 2:1-4.

Dichi, chinamukalili Nikodemu kutiyishisha yuma yinakutañishayi Yesu haWanta. Dichi, Yesu namuleji nsañu yikwawu kutalisha hamudimu windi wadimena hakwikala Mwana kaNzambi. Yesu nahoshi nindi: “Neyi chanyamwiniyi Mosi kapela mwisaña, niMwana kamuntu niyena dichiyatela kumunyamunawu, kulonda muntu wejima wukumukuhwelela akekali nawumi wahaya nyaaka.”—Yowanu 3:14, 15.

Kunyima aIsarela asumineñawu kudi tupela twawulembi atalileña kudi kapela kawuneñu kulonda apuluki. (Kuchinda 21:9) Munjila yoyimu, antu ejima atela kumukuhwelela Mwana kaNzambi kulonda ayamwini kukufwa nawa akeli nawumi wahaya nyaaka. Kuhosha hakukeña kwaYehova kutalisha haniyi nsañu, Yesu namuleji cheñi Nikodemu nindi: “Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela akabuli kujilumuka, ilaña akekali nawumi wahaya nyaaka.” (Yowanu 3:16) Dichi, munu muYerusalema hanyima yakwila munahiti dehi tukweji 6 kufuma hatachikililiyi mudimu windi, Yesu namwekeshi nindi diyi njila yakupulukilamu.

Yesu namuleji Nikodemu nindi: “Nzambi hatemesheli Mwanindi mukaayi nakusompesha kaayiku. Chumichi chinatalishi mukwila nawu hamutemesheli kulonda enzi nakusompesha kutama hela antu ejima kulonda ayijilumuniku. Ilaña, neyi chinahoshiyi Yesu, amutemesheli kulonda “kaayi akamwini kuhitila mudi yena.”—Yowanu 3:17.

Nikodemu wenjili kudi Yesu mumwidima muloña watiyileña woma. Dichi Yesu naleki kuhanjeka nindi nanawa mazu akwila nawu: “Dichi aha dihanashindameni wunsompeshi: chejeji [dikwila nawu wumi waYesu niyuma yatañishileñayi] chinenzi mukaayi, ilaña antu anakeñiku mwidima chatela akeñi chejeji, muloña nyidimu yawu yatama. Muntu wejima wakoñaña yuma yatama wahela chejeji nawa henzaña kuchejejiku, kulonda nyidimu yindi abuli kuyidiwula. Ilaña muntu wejima wakoñaña yuma yayiwahi wenzaña kuchejeji, kulonda nyidimu yindi yimwekani nawu nayizati kwesekeja nankeñelu yaNzambi.”—Yowanu 3:19-21.

Chinamushalili iwu kaFwarisi nawa ntañishi yawaIsarela, Nikodemu kutoñojokahu hayuma yinatiyiyi kutalisha hadi Yesu mumudimu wukweti hakushikija nkeñelu yaNzambi.