Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
DECEMBER 3-9
YUMA YALEMA YAMWIZU DANZAMBI | YILWILU 9-11
“Chilumbu Wasweja Kutama Nekali Chinsahu Wadikita”
(Yilwilu 9:1, 2) Ilaña Sawulu wachidiña nandulu yakukabisha atumbanji twaMwanta nawa wayitiyishileña woma nindi wakayijilumuna wejima wawu, dichi wayili kudi kapristu muneni 2 nawa wamulombeli nindi yamwinki nyikanda yakuya nayu kumasinagogi amuDamakasa kulonda yakasi antu ejima anakwenda muNjila, amayala niambanda nakuyileta kuYerusalema.
Chipompelu “Chekalili Mukuwunda”
ANTU asweja kutama hiyakushika kuDamakasa, kwayileñawu nakwila chuma chatama. Akuyipalañesha atumbanji twaYesu mumatala awu, akuyikasa, akuyisawisha nikuyitwala kuYerusalema kulonda ayisompeshi muchota chaSanihedilini.
Ntwamina yawu, wejina daSawulu, wudi dehi namashi kumakasa. Hanashimbuli wanyi, wetejeli akwawu kujaha Stefwanu namalola, kambanji kaYesu wadihana. (Yil. 7:57–8:1) Nazeyi wanyi hanyima yakukabisha akwakulondela Yesu adi muYerusalema, Sawulu nakasi nimuya mumbunda kulonda yatwalekihu kuyikabisha. Nakukeña kujiyisha izanvu dawantu datenañawu nawu “Njila.”—Yilwilu 9:1, 2; talenu chikasha chinakwila nawu “Saul’s Mandate in Damascus,” hefu 61.
(Yilwilu 9:15, 16) Ilaña Mwanta wamulejeli nindi: “Yaña, muloña iwu iyala namutondi kulonda yashimuni ijina dami kudi akwanyuza, anyanta nikudi anyana kaIsarela. 16 Muloña nukumuleja chakadi kuhita mumbadi yuma yayivulu yatela kukabakanayi hamuloña wejina dami.”
Musakililenu Yehova Kañemi Ketu
Yehova wamonaña wanyi antu neyi chitwayimonaña. Ilaña washinshikaña mumuchima nikwiluka chitwekala wejima wetu. (Tañenu 1 Samweli 16:7b.) Yehova welili mwenimu hampinji yatuñiliyi chipompelu chawakwaKristu. Watondeli antu kwikala muchipompelu anateli kumonawu kudi antu nawu amukunkulwayi. (Yow. 6:44) Chakutalilahu, watondeli Sawulu kaFwarisi, wadiña “mukwakutuka Nzambi, mukwakukabisha akwawu, mukwawinyi.” (1 Tim. 1:13) Dichi Yehova watalili mumuchima waSawulu nawa hatoñojokeli nindi wadiña ndambu yamukunkulwayiku. (Yish. 17:3) Ilaña, Yehova welukili nindi nateli kumuwumba Sawulu kwikala ‘nsaba yakutonda’ wakashimwina “kudi aJentili, nikudi anyanta ankanu, nikudi aIsarela.” (Yilw. 9:15) Yehova watondeli cheñi antu amakwawu anateli kuwumbayi kwikala ‘yuma yalema,’ kushilahu tuhu niantu adiña akwakusheta walwa, amakombi niadiña nayilwilu yikwawu yatama. (Rom. 9:21; 1 Kor. 6:9-11) Chiyadiziliwu Nsona, amukuhweleleli Yehova nawa amwitejeli kuyiwumba.
(Yilwilu 9:20-22) hohenohu watachikili kushimwina mumasinagogi hadi Yesu nindi, iwu diyi Mwana kaNzambi. 21 Ilaña ejima atiyileña chahosheleñayi, ahayamini nankashi nakuhosha nawu: “Iwu muntu hidiyi ona wakabishileña antu atambikileña hanidi ijina muYerusalemaku? Komana iwu hidiyi ona wenjili nankeñelu yakukwata nikutwala atumbanji twaYesu kudi akulumpi jawatupristuku?” 22 Ilaña Sawulu, watwalekelihu kwikala nañovu nawa wayihayamishileña aYudeya ashakamineña muDamakasa, chalumbulwileñayi chiwahi nindi iwu diyi Kristu.
Chipompelu “Chekalili Mukuwunda”
Fwikijenu antu anahayami, anatiyi kutama nawa anahili hakumona Sawulu natachiki kushimwina nsañu yaYesu mumasinagogi. Ehwili nawu: “Iwu muntu hidiyi ona wakabishileña antu atambikileña hanidi ijina muYerusalemaku? (Yilw. 9:21) Sawulu halumbulwileñayi chamwilukiliyi Yesu, walumbulwili “chiwahi nindi iwu diyi Kristu.” (Yil. 9:22) Kulumbulula chiwahi hidikukuyikwasha kutiyaku. Kunateli kwenzununa wanyi yitoñojoka yawantu akeñesha chisemwa hela adi nanyichima yakudivwimba. Ilaña, Sawulu walekeli kulumbulula wanyi.
Kukeña Yuma Yalema yakuSpiritu
(Yilwilu 9:4) wadimbukili heseki nawa watiyili izu damulejeli nadu: “Sawulu, Sawulu, muloñadi chiwunakunkabishila?”
Chipompelu “Chekalili Mukuwunda”
Yesu chamwimikiliyi Sawulu munjila yaya kuDamakasa, hamwihwili nindi: “Muloñadi chiwunakukabishila atumbanji twamiku?” Neyi chitunamoni hewulu, wamwihwili nindi: “Muloñadi chiwunakunkabishila?” (Yil. 9:4) Mwamweni, neyi atumbanji twindi anakukabakana, Yesu watiyaña neyi yena diyi anakukabishawu.—Mat. 25:34-40, 45.
Neyi anakuyikabisha muloña wakumukuhwelela Kristu, ilukenu nenu Yehova niYesu aneluki kukala kumunakumona. (Mat. 10:22, 28-31) Chayinu mpinji, hiyanateli kumanisha kukala kutunakumonaku. Anukenu, hampinji yamujahileñawu Stefwanu kudi Sawulu, nihampinji Sawulu yakwatileñayi atumbanji ashinshika muYerusalema, Yesu watalileña hohu. (Yil. 8:3) Yesu wayikwashili wanyi hayina mpinji. Hela chochu, Yehova wazatishili Kristu kumukwasha Stefwanu niatumbanji amakwawu kwikala ashinshika.
(Yilwilu 10:6) Iwu iyala himwenyi wunashikeni kwitala daShimona, mukwakuloomba yitembi wukweti itala didi kuchikumu chakaluñalwiji.”
nwtsty nsañu yakudiza yidi ha Yil 10:6
Shimona, mukwakuloomba yitembi: Mukwakuloomba yitembi wafumishileña mavuji hela nsuwa-suwa nimanji ashalaña muyitembi. Kuhiñahu wayiloombeleña muwalwa wazuwa kulonda yatuñimu yuma yatuñañawu nayitembi. Yitembi yanunkaña neyi anayiloombi nawa yakeñekaña menji amavulu, dichaletesheli Shimona yashakameña kuchikumu chakaluñalwiji, hadaha kwakwihi naYopa. Kwesekeja nanshimbi jaMosi, mukwakuloomba yitembi amumweneña nawu wamajilu kubadika muntu wakwatileña yibimbi yawanyama. (Lev 5:2; 11:39) Dichi, aYudeya amavulu amweneña akwakuloomba yitembi nawu amukunkulwayi nawa hiyashakamineña nawuku. Mukanda waTalmud wahosha nawu akwakuloomba yitembi adiña namajilu kubadika akwakunona tuji twawanyama. Hela chochu, Petulu wamwekesheli chaambu wanyi chayiliyi nakushakama naShimona. Petulu chabuliliyi kumwekesha chaambu haniyi mpinji, chamukwashili hampinji yayiliyi nakuhempula muntu wabula kwitiya. Antu amakwawu adiza Bayibolu ahoshaña nawu izu dachiGiriki “damukwakuloomba yitembi” (byr·seusʹ) dadiña ijina daShimona dikwawu.
Kutaña Bayibolu
(Yilwilu 9:10-22) MuDamakasa mwadiña kambanji wejina daAnaniya nawa 11 Mwanta wamulejeli muchimwenu nindi: “Ananiya!” Yena waakwili nindi: “Yamonu Mwanta.” Mwanta wamulejeli nindi: “Nyamukaku, yaña mumukwakwa watenañawu nawu Woloka nawa wuyi kwitala daYudasi wihuli akuleji iyala wejina daSawulu wakuTarusa. Tiyaña, iwu iyala nakulomba, 12 nawa muchimwenu namoni muntu wejina daAnaniya nakwinza nakwiñila mudiyi nakumunañika makasa kulonda yatachiki kumona cheñi.” 13 Ilaña Ananiya wahosheli nindi: “Mwanta, natiyi kudi antu amavulu chinakuhoshawu hadi iwu muntu kutalisha hayuma yejima yatama yakoñeliyi kudi akwakujila eyi amuYerusalema. 14 Nawa anamwinki wuswa kudi akulumpi jawatupristu wakukwata antu ejima anakutambika hejina deyi.” 15 Ilaña Mwanta wamulejeli nindi: “Yaña, muloña iwu iyala namutondi kulonda yashimuni ijina dami kudi akwanyuza, anyanta nikudi anyana kaIsarela. 16 Muloña nukumuleja chakadi kuhita mumbadi yuma yayivulu yatela kukabakanayi hamuloña wejina dami.” 17 Dichi, Ananiya wayili nakwiñila mwitala nawa wamunañikili makasa nakumuleja nindi: “Sawulu, manakwami, Mwanta Yesu wamwekana kudi eyi munjila hiwenzaña, nantemeshi kulonda wutachiki kumona cheñi nawa winzali naspiritu yajila.” 18 Hohenohu, yuma yamwekeneña neyi makalu yafumini hamesu indi nawa watachikili kumona cheñi. Kuhiñahu wanyamukili, amupapatishili, 19 wadiili yakuda nawa wekalili nañovu. Washakaminiku mafuku amakwawu nawatumbanji muDamakasa, 20 hohenohu watachikili kushimwina mumasinagogi hadi Yesu nindi, iwu diyi Mwana kaNzambi. 21 Ilaña ejima atiyileña chahosheleñayi, ahayamini nankashi nakuhosha nawu: “Iwu muntu hidiyi ona wakabishileña antu atambikileña hanidi ijina muYerusalemaku? Komana iwu hidiyi ona wenjili nankeñelu yakukwata nikutwala atumbanji twaYesu kudi akulumpi jawatupristuku?” 22 Ilaña Sawulu, watwalekelihu kwikala nañovu nawa wayihayamishileña aYudeya ashakamineña muDamakasa, chalumbulwileñayi chiwahi nindi iwu diyi Kristu.
DECEMBER 10-16
YUMA YALEMA YAMWIZU DANZAMBI | YILWILU 12-14
“A Baranaba naPawulu Anelishi Atumbanji Kumaluña Akwakulehi”
(Yilwilu 13:2, 3) Chamuzatilileñawu Yehova nakushakama chakadi kuda, spiritu yajila yahosheli nawu: “Nfumishilenuhu Baranaba niSawulu kulonda azati mudimu innayitambikili.” 3 Dichi, hanyima yakushakama chakadi kuda nikulomba, ayinañikili makasa nawa ayilejeli nawu ayeña.
“Atiyili Muzañalu Nawa Enzeli naSpiritu Yajila”
Hanu dinu muloñadi spiritu yajila chiyalombweleli nawu aBaranaba naSawulu ayifumishihu “kulonda azati mudimu”? (Yil. 13:2) Bayibolu hiyashimunaku. Tweluka hohu netu spiritu yajila diyi yalombweli nawu ayitondi awa amayala. Kwosi chinjikijilu chamwekeshaña nawu atuprofwetu niantañishi amuAntiyoki akaanini iku kufuukula. Ilaña, etejeli mwafuukwili spiritu yajila. Toñojokenu chatiyiluwu aBaranaba naSawulu hakumona amanakwawu, ‘anashakami chakadi kuda nikulomba, anayinañiki makasa nawa anayileji nawu ayeña’ chakadi kuyitiyila ichima. (Yil. 13:3) Ninetu twatela kukwasha ejima anenkiwu nyidimu mukuloñesha, kushilahu niamayala iyanatondiwu kwikala atulama muchipompelu. Chatela tuyitiyileña ichima antu iyanenkiwu kukooleka, twatela “kuyitoñojokelaku chikupu mukukeña muloña wanyidimu yawu.”—1 Tesa. 5:13).
(Yilwilu 13:12) Owu nguvulu chamweniyi chuma chamwekeni, wetiyili, muloña wahayamini nayuma yadiziliyi hadi Yehova.
(Yilwilu 13:48) Antu akunyuza chatiyiliwu awa mazu, atachikili kuzañalala nikulemesha mazu aYehova, nawa antu ejima adiña nanyichima yashinshika yakukeña kwikala nawumi wahaya nyaaka, etiyili.
(Yilwilu 14:1) Pawulu naBaranaba chashikiliwu muIkoniyumu, eñilili musinagogi yawaYudeya nakuhosha munjila yakojejeli izaza dawantu deneni dawaYudeya niaGiriki etiyi.
“Yehova Wayikwashili Kuhosha naKuhamuka”
Hatachi, Pawulu naBaranaba emeni muIkoniyumu, mukala mwenzala yisemwa yawaGiriki nawa musumba wekala hakachi kanyisumba yamuÑalija yamuRoma. Muniwu musumba mwenzeli aYudeya, niantu abulili kubalumuka nakwikala aYudeya. Neyi chelileñawu diikalu, Pawulu naBaranaba eñilili musinagogi nawa atachikili kutañisha. (Yil. 13:5, 14) Ahosheli “munjila yakojejeli izaza dawantu deneni dawaYudeya niaGiriki etiyi.”—Yil. 14:1.
(Yilwilu 14:21, 22) Chamanishiliwu kushimwina nsañu yayiwahi muniwu musumba nikukwasha antu antesha kwikala atumbanji, afuntili kuLisitira, Ikoniyumu nikuAntiyoki. 22 Kwenoku akolesheleña atumbanji nikuyikonkomwena nawu atwalekihu kukuhwelela nawa ahosheli nawu: “Hakwila twakeñili muWanta waNzambi, twatela kumona lukadi lwaluvulu nankashi.”
Mukalakelenuña Nzambi naKashinshi Hela Munakumona “Lukadi Lwaluvulu”
Hanyima yakwendela musumba waDeribi, aPawulu naBaranaba ‘afuntili cheñi kuLisitira, nikuIkoniyumu, nikuAntiyoki. Hiyakukolesha atumbanji nakuyikonkomwena nawu akakeli muchikuhwelelu, nawu kwiñila muWanta waNzambi chiña tusambila kumona lukadi lwaluvulu.’ (Yil. 14:21, 22) Awa mazu hiyanateli kumwekana neyi akukolesha antuku. Kafwampi, nhoshelu yakwila nawu kumona “lukadi lwaluvulu” yinateli kuneñesha antu, bayi kuyikoleshaku. Hanu dinu, aPawulu naBaranaba ‘akolesheli ñahi atumbanji’ namazu akutena halukadi lwaluvulu?
Tunateli kuwana ñakwilu neyi tushinshika nakanañachima mazu ahosheliyi Pawulu. Hahosheli hohu nindi: “Chiña tuumika lukadi lwaluvuluku.” Ilaña wahosheli nindi: ‘Kwiñila muWanta waNzambi chiña tusambila kumona lukadi lwaluvulu.’ Dichi Pawulu wayikolesheli atumbanji kuhitila mukukonkomwena hayuma yayiwahi yafumaña mukwikala washinshika. Iwu wuloku wadiña walala. Eñañi, Yesu wahosheli nindi: ‘Muntu wakomika nikunsa diyi wakahanda.’—Mat. 10:22
Kukeña Yuma Yalema yakuSpiritu
(Yilwilu 12:21-23) Ifuku datondeliwu chidashikili, Herodi wavwalili yakuvwala yawanta nakushakama hachitwamu chakusompela nawa watachikili kuhosha nawantu. 22 Kuhiñahu, antu apompeli atachikili kubidika nawu: “Idi hiizu danzambi, bayi neyi damuntuku!” 23 Hohenohu, kañelu kaYehova wamuleteleli Herodi yikatu muloña wamulemesheli Nzambi wanyi, kuhiñahu amudiili kudi mavunyi nawa wafwili.
w08 5/15 32 ¶7
Yikuma Yamaneni Kufuma muMukanda waYililu
12:21-23; 14:14-18. Herodi wetejeli mpuhu yateleleli kuya kudi Nzambi hohu. Chuma chelili Herodi chinambuki nachuma chelili aPawulu naBaranaba anyakeli chikupu kukaana kuyilemesha nikuyihameka kudi antu. Bayi tudikeñelaña mpuhu hamuloña wayuma yitunakukoña mumudimu waYehovaku.
(Yilwilu 13:9) Kuhiñahu, Sawulu ateneneñawu cheñi nawu Pawulu, chenzeliyi naspiritu yajila, wamushinshikili chikupu
nwtsty nsañu yakudiza yidi ha Yil 13:9
Sawulu ateneneñawu cheñi nawu Pawulu: Kufuma tuhu hanu, Sawulu atachika kumutena nawu Pawulu. Iwu kapostolu wavwalikilili muRoma ilaña wadiña kaHeberu. (Yil 22:27, 28; Fwi 3:5) Chinamwekani neyi kufuma kuwansi amuteneneña majina ejima ayedi, dachiHeberu daSawulu nidachiRoma daPawulu. A Yudeya adiñaku hayina mpinji, sweje-e abulileña kushakama muIsarela, adiña namajina ayedi-ayedi. (Yil 12:12; 13:1) Antaña jaPawulu amakwawu niwena adiña namajina ayedi-ayedi, dachiRoma nidachiGiriki. (Rom 16:7, 21) Chineli wadiña “kapostolu wawantu akunyuza,” Pawulu amulejeli kushimwina nsañu yayiwahi kudi antu abulili kwikala aYudeya. (Rom 11:13) Chinamwekani neyi wazatishileña ijina dachiRoma, muloña welukili nindi didinateli kwilukawu antu amavulu. (Yil 9:15; Ñal 2:7, 8) Amakwawu ahoshaña nawu wazatishileña ijina dachiRoma muloña wamulemesheli Seriji Pawulosi, ilaña dimu wanyi, muloña Pawulu wadizatishileña nihanyima yakufuma muKipirosi. Amakwawu niwena ahoshaña nawu Pawulu wazatishileña wanyi ijina dachiHeberu, muloña dadifwanini nezu dachiGiriki diyateneneñawu nachu muntu (hela kanyama) wendaña nakuditiya (nakutayima).—talenu nsañu yakudiza yidi ha Yil 7:58.
Pawulu: MuNsona jawakwaKristu jachiGiriki ijina daPauʹlos, dafuma kwizu dachiLatin Paulus, datalisha mukwila nawu “Kanti hela Kanyanya,” adizatisha mapampa 157 hakumutena kapostolu Pawulu nawa kapampa kamu hakumutena nguvulu wamuKiriposi wejina daSeriji Pawulosi.—Yil 13:7.
Kutaña Bayibolu
(Yilwilu 12:1-17) Hanoyu mpinji, mwanta Herodi watachikili kukabisha antu amu adiña muchipompelu. 2 Wajahili Yakoba mana kwaYowanu nampoku yakabali. 3 Chamweniyi nindi chumichi chayitiyishili aYudeya kuwaha, wayili nawa nakukwata Petulu. (Chumichi chamwekeni hamafuku aChawija chaMankendi Akadi Iluñi.) 4 Wamukwatili nakumusha mukaleya, wamuhanini kudi mazanvu awana amashidika akumuhemba, mwizanvu dimu mwadiña mashidika awana, wakeñeleña kumuleta kudi antu neyi Chipandakenu chinahiti dehi. 5 Dichi Petulu amuhembeleli mukaleya, hela chochu, chipompelu chadiña nakumulombelaku chikupu kudi Nzambi. 6 Herodi chadiñayi kwakwihi nakumwidishamu, hawowenowu wufuku, Petulu wadiña wakaama hakachi kamashidika ayedi iku anamukasi namaleñi ayedi, nawa anhembi adiña kumbidi yachenzelu nakuhemba kaleya. 7 Ilaña kañelu kaYehova wemeni kwenoku, dichi chejeji chatoñekeli mukapeka kamukaleya. Iwu kañelu chamweteliyi Petulu kukabavu, wamuhindwishili nakumwila nindi: “Hindukaku swayi-swayi!” Hohenohu maleñi aholokeli kumakasa indi. 8 Kañelu wamulejeli nindi: “Vwalaku yakuvwala ninkwabilu jeyi.” Welili mwomwenomu. Nkumininaku wamulejeli nindi: “Vwalaku chakuvwala cheyi chahewulu, wunlondeleña.” 9 Dichi wedikili nawa wamulondeleleña, ilaña welukili wanyi nindi chuma chamwekeneña kuhitila mudi kañelu chadiña chalala. Kafwampi, watoñojokeleña nindi hichimwenu hohu chinakumonayi. 10 Chelili anahiti dehi hadiña nhembi watachi niwamuchiyedi, ashikili hachenzelu chachikuñu chakwidikila kufuma mukaleya nakuya mumusumba nawa ochu chenzelu chenzunukili chacheni. Chelili anediki dehi, ayilili hamu munjila yoyimu hakapinji kantesha, hohenohu kañelu yamushiya nikumushiya. Nawa Petulu chelukiliyi chuma chamwekeneña, wahosheli nindi: “Ichi dinu neluki 11 chikupu nami Yehova watemesha kañelu kindi nakuñamwina muchikasa chaHerodi nikuyuma yejima yadiña nakukuhwelelawu aYudeya nawu yikummwekena.” Chelili neluki dehi chumichi, wayili kwitala daMariya mama yaYowanu ateneneñawu nawu Maku, kwenoku kwapompeli antu amavulu nawa adiña nakulomba. 13 Chadondomweneniyi hachenzelu chakwiñilila, ñamba wakansi wamumbanda wejina daRoda wenjili nakutala muntu wadondomweneneña. 14 Owu ñamba chatiyiliyi nindi odu izu daPetulu, wazañaleli nankashi chakwila henzunwini kuchenzeluku, ilaña wayili lufuchi mukachi nakushimuna nindi Petulu nemani kuchiisu. 15 Wena amulejeli nawu: “Eyi dinu wunazaluki tahindi?” Ilaña yena watwalekelihu nakuyileja chikupu nindi diyi. Wena atachikili kuhosha nawu: “Hikañelu kindi.” 16 Petulu watwalekelihu nakudondomwena. Chenzunwiniwu kuchenzelu, amumweni nawa ahayamini. 17 Ilaña wayimwenesheli nachikasa nawa wayilejeli chamwidishiliwu kudi Yehova mukaleya, nawa wahosheli nindi: “Mukamuleji Yakoba nianakwami yuma yejimiyi.” Hohenohu wedikili nakuya kwiluña dikwawu.
DECEMBER 17-23
YUMA YALEMA YAMWIZU DANZAMBI | YILWILU 15-16
“Afuukwili Kushindamena Hezu daNzambi”
(Yilwilu 15:1, 2) Dichi amayala amu akunkumukili kufuma kuYudeya nakutachika kutañisha amanakwetu nawu: “Neyi mubula kwalama kwesekeja nachaaku chaMosi, hiyakayamwinaku.” 2 Chelili aPawulu naBaranaba anambokelimu dehi nanowu antu nikuditaadeka nawu chikupu, atondeli Pawulu, Baranaba niantu amu kulonda atwali iyi nsañu kudi apostolu niakulumpi adiña muYerusalema.
“Ambokelelimu”
Luka watwelekelihu nindi: “Chelili aPawulu naBaranaba anambokelimu dehi nanowu antu nikuditaadeka nawu chikupu, [akulumpi] atondeli Pawulu, Baranaba niantu amu kulonda atwali iyi nsañu kudi apostolu niakulumpi adiña muYerusalema.” (Yil 15:2) Mazu akwila nawu “anambokelimu” “nikuditaadeka” anakumwekesha chatiyiliwu antu haniyi mpinji, nawa chipompelu chamu Antiyoki chakañenyi kumanisha kuna kukala. Hakwila aleti kuwunda nikunuñañana, chipompelu chafuukwilihu kutwala iyi “nsañu kudi apostolu niakulumpi adiña muYerusalema,” adiña mwizanvu dalombolaña. Yumanyi yitukudizila kudi akulumpi amuAntiyoki?
(Yilwilu 15:13-20) Chamanishiliwu kuhosha, Yakoba wahosheli nindi: “Enu amayala, anakwami, ntiyililenu. 14 Simeyona nalumbululi chiwahi chikupu Nzambi chabalumukililiyi kudi antu akunyuza katachi nakunonamu antu ejina dindi. 15 Imu dimu mwaya nimazu awaTuprofwetu neyi chochasonekawu nawu: 16 ‘Hanyima yayumiyi, nakafunta kulonda nakalemi cheñi itenti daDavidi dalemukila hamaseki, nakawahisha hakisika nakudilema cheñi neyi chochidadiña, 17 kulonda antu akashalahu akamukeñakeñi chikupu Yehova, hamu niantu akunyuza yejima, owu atenañawu nejina dami, ichi dichinahoshiyi Yehova wunakukoña yumiyi, 18 oyu yelukawu kufuma kutachi.’ 19 Hela chochu, kufuukula kwami hikudi kwakwila nami tukabishi antu akunyuza anakubalumukila kudi Nzambiku, 20 ilaña tuyisonekeli kulonda atondolweleña yuma yinatamishiwu kudi ankishi, niwuvumbi, nianyama akushotomona nimashi.
Akwakristu Alala Alemeshaña Izu daNzambi
Nsañu yidi hamukanda waAmosa 9:11, 12 diyayikwashili kumanisha iku kukala. Neyi chayisonekawu ha Yilwilu 15:16, 17, nawu: ‘Nakafunta, nakatuñulula cheñi tabanaka yaDavidi yinashiwuki; nakajikajika munahumoki, nakayimika cheñi; kulonda antu anashali akakeñakeñi Yehova, niantu akunyuza yejima, antu anatumbuwu ijina dami, dimwanahoshiyi Yehova.’
Ilaña muntu nateli kuhosha nindi, ‘iyi nsona hiyinakuhosha nawu aJentili ekalili akakwitiya ateleli kuyalamishaku.’ Eña, ilaña, aYudeya akwaKristu atiyili mwatalishili iyi nsona. A Yudeya akwaKristu amweneña aJentili alamishiluwu nawu hiyana kwawu bayi neyi ‘antu amunyuzaku.’ (Kwid. 12:48, 49) Chakutalilahu, kwesekeja naBayibolu yaBagster’s version of the Septuagint, mukanda waEsita 8:17 wahosha nawu: “A Jentili amavulu ayalamishili, nawa ekalili aYudeya.” Dichi antu atiyili nsañu yashimwinuwu muNsona yakwila nawu antu ejima anashali mwitala daIsarela (dikwila nawu aYudeya niantu alamishiluwu abalumukili kwikala aYudeya) hamu ‘nawantu ejima amunyuza’ (aJentili ayizuzu) akekala antu anatumbuwu ijina daNzambi. Dichi, aJentili akeñeleña kwikala akwaKristu hiyateleleli kuyalamishaku.
(Yilwilu 15:28, 29) Muloña spiritu yajila hamu ninetu, tunafuukulihu kubula kuyishilahu enu chiteli chikwawu, chiña hohu yumiyi yalema: 29 muleki yuma yalambulañawu antu kudi ankishi, nimashi, nianyama akushotomona niwuvumbi. Neyi mukuleka chikupu yumiyi, mukwila chiwahi. Mushakameña chachiwahi!”
(Yilwilu 16:4, 5) Chahitileñawu munyisumba, ayinkeleña antu nshimbi jakasiliwu apostolu niakulumpi adiña muYerusalema nawu ajovwahileña. 5 Dichi, yipompelu yatwalekelihu kwikala nachikuhwelelu chakola nawa antu avulilileñaku hefuku-hefuku.
“Kukolesha Yipompelu”
Pawulu naTimotewu azatilili hamu yaaka yayivulu. Chineli adiña akwakwenda, azatileña nyidimu yashiyashana kwimenaku izanvu dalombolaña. Bayibolu yahosha nawu: “Chahitileñawu munyisumba, ayinkeleña antu nshimbi jakasiliwu apostolu niakulumpi adiña muYerusalema nawu ajovwahileña.” (Yil. 16:4) Chakadi nikujina, yipompelu yalondeleleña wunlomboli wafumineña kudi apostolu niakulumpi muYerusalema. Muloña wakwovwahila, “yipompelu yatwalekelihu kwikala nachikuhwelelu chakola nawa antu avulilileñaku hefuku-hefuku.”—Yil. 16:5.
Kukeña Yuma Yalema yakuSpiritu
(Yilwilu 16:6-9) Kubombelahu, ahitili muFwirijiya nimwituña daÑalija, muloña spiritu yajila yayikaanishili kuhosha mazu mukabeta kaAsiya. 7 Cheñi, chakunkumukililiwu kuMisiya, azatili nañovu kulonda ayi kuBitiniya, ilaña spiritu yaYesu yayikaanishili. 8 Dichi ahitili kuMisiya nakukunkumukila kuTirowasi. 9 Nawa nampinji yawufuku, Pawulu wamweni chimwenu mwamweniyi iyala wakuMasidoniya nemani kwenoku iku nakumulembelela nindi: “Zambukilaku kunu kuMasidoniya wutukwashiku.”
Dizilenu Kudi Apostolu aYesu Adiña Atona
Yumanyi yitunateli kudizila muniyi nsañu? Ilukenu nenu cheliliyi Pawulu nindi yoyi kuAsiya spiritu yaNzambi yamulekesheli. Cheñi, chashikiliyi Pawulu kwakwihi naBitiniya Yesu wamulejeli mwakwilila. Nkumininaku, cheliliyi Pawulu nashiki dehi kuTirowasi, Yesu wamulejeli kuya kuMasidoniya. Chineli Yesu diyi Mutu wachipompelu, nateli kutulombola munjila yoyimu. (Kol. 1:18) Chakutalilahu, hadaha munakutoñojoka kuzataku wupayiniya hela kuya kwiluña kudi kukaankila kweneni kwawakwakushimwina. Yesu nateli kuyilombola naspiritu yaNzambi neyi muzatila hayuma yimunakukeña kwila. Chakutalilahu: Ñendeshi nateli kuteñulula motoka yindi nakubalumukila kuchimunswa hela kuchidiilu chiña neyi motoka yinakwenda. Munjila yoyimu, Yesu nateli kutulombola kuzata chikupu mumudimu wetu wakushimwina chiña neyi tushimwinaña, kuzata nañovu kulonda tushikiji chikonkwanyi chetu.
(Yilwilu 16:37) Ilaña Pawulu wayilejeli nindi: “Atweteleli hamesu awantu chakadi muloña nakutuumbila mukaleya hela chakwila tudi aRoma. Komana, anakukeña atuumbiku mukuswamujoka tahindi? Inehi, chikutwesheka wanyi! Yilejenu awenawu enzi nakutwidishamu.”
nwtsty nsañu yakudiza yidi ha Yil 16:37
tudi aRoma: Dikwila nawu, enimbu amuRoma. Pawulu wadiña mwenimbu wamuRoma, hadaha niSilasi. Nshimbi yamuRoma yahosheli nawu mwenimbu atela kumusompesha chiwahi nawa hiyatela kumwetela hadi antu amavulu chakadi kumusompeshaku. Enimbu amuRoma adiña nawuswa wazatishileñawu kudi kwejima kwayileñawu mwituña dawu. Mwenimbu wamuRoma wejima wateleleli kulondela nshimbi jamwituña dawu, bayi jamunyisumbaku. Neyi naluwañeshi, wateleleli kwiteja kumutwala kuchota chamunodu iluña; ilaña, wadiña nawuswa wakutwala cheñi muloña windi kuchota cheneni chamuRoma. Neyi muloña weneni, wadiña nawuswa wakutwala muloña windi kudi mwanta yomweni. Kapostolu Pawulu washimwinini chikupu mwahita wanta wejima wawaRoma. Chineli wadiña kaRoma, wazatishili wuswa windi mapampa kasatu. Katachi hadiñayi muFwilipi, halejeliyi akulumpi amuchota chanyiloña nindi amweteli chakubula kumusompesha.—Kamuchiyedi nikamuchisatu, talenu nsañu yakudiza yidi ha Yil 22:25; 25:11.
Kutaña Bayibolu
(Yilwilu 16:25-40) Ilaña kwakwihi nahakachi kawufuku, aPawulu naSilasi alombeleña nikumulemesha Nzambi natumina, nawa antu akasiliwu mukaleya adiña nakuyitiya. 26 Hohenohu kwenjili mutentanshi weneni chakwila wanyinkesheli niyikuku yakaleya. Kubombelahu, yenzelu yejima yashikeneni dakwenzunuka nawa mpompa mwayihatiliwu wejima wawu jasopokeli. 27 Mukwakuhemba kaleya chahindukiliyi, wamweni yenzelu yakukaleya yenzunuka, dichi waholeli mpoku yindi yakabali nakukeña nindi yadijahi, muloña watoñojokeli nindi antu akasiliwu mukaleya anatemuki dehi. 28 Ilaña Pawulu wabidikili nezu datiyakana nindi: “Bayi wudijahaku, muloña wejima wetu tudi mwomu!” 29 Hohenohu walombeli yimunyi, weñilili lufuchi mukachi iku nakuzala muloña wawoma nawa wadibukili heseki kunyendu yaPawulu naSilasi. 30 Wayidishili hanji nakuyihula nindi: “Enu akulumpi, yumanyi yinatela kwila kulonda akañamwini?” 31 Wena amwakwili nawu: “Kuhwelelaku mudi Mwanta Yesu nawa akakwamwina eyi hamu niamwitala deyi.” 32 Kuhiñahu, amulejeli yena niamwitala dindi ejima mazu aYehova. 33 Dichi wayisendeli hayoyenoyu ora yawufuku nakuyikosa hayilonda yawu. Hohenohu, yena niamwitala dindi ejima ayipapatishili. 34 Wayileteli mwitala dindi nakuyiloñeshela yakuda kumesa, wazañaleli chikupu hamu nawantu ejima amwitala dindi nanochu chamwitiyiliyi Nzambi. 35 Chikwachili, anyuuli amumusumba atemesheli atupasu nakuhosha nawu: “Yuumbenuku owu amayala.” 36 Mukwakuhemba kaleya wamulejeli Pawulu mazu awatupasu nindi: “Anyuuli amumusumba anatemeshi amayala nawu ayuumbiku enu ayedi. Dichi idikenu nawa yenuña mukuwunda.” 37 Ilaña Pawulu wayilejeli nindi: “Atweteleli hamesu awantu chakadi muloña nakutuumbila mukaleya hela chakwila tudi aRoma. Komana, anakukeña atuumbiku mukuswamujoka tahindi? Inehi, chikutwesheka wanyi! Yilejenu awenawu enzi nakutwidishamu.” 38 Atupasu ayili nakushimuna awa mazu kudi anyuuli amumusumba. Awa anyuuli chatiyiliwu nawu awa amayala adiña aRoma, atiyili woma. 39 Dichi enjili nakuyilembelela awa amayala, hanyima yakwila anayidishi dehi hanji, ayilejeli nawu afumi mumusumba. 40 Ilaña chedikiliwu mukaleya ayili kwitala daLidiya; chamweniwu anakwawu, ayikolesheli nawa afuminiku nakuya.
DECEMBER 24-30
YUMA YALEMA YAMWIZU DANZAMBI | YILWILU 17-18
“Mwimbujolenu Kapostolu Pawulu haKushimwina nihaKutañisha”
(Yilwilu 17:2, 3) Dichi kwesekeja nachaaku chaPawulu, weñilili mukachi mwadiñawu, nawa hadi sabata jisatu wahanjekeleña nawu kuzatisha Nsona, 3 wayilumbulwilileña nakuyileja kuhitila mukuzatisha nsona nindi, chateleleli Kristu kukabakana nikumusañula kufuma mudi afu, nakuhosha nindi: “Iwu Yesu inidi nakuyishimwina, diyi Kristu.”
nwtsty nsañu yakudiza yidi ha Yil 17:2, 3
wahanjekeleña: Pawulu hakuminineña hohu dakuyishimwina nsañu yayiwahiku. Wayilumbulwilileña nikuyileja wunsahu walala wamuNsona, dikwila nawu Nsona jachiHeberu jonenawu. Bayi neyi wakuminineña hohu dakutaña Nsonaku; ilaña wajilumbulwileña nawa welukileña Nsona yakuleja antiyilili jindi. Izu dachiGiriki dakwila nawu di·a·leʹgo·mai adilumbulula nawu hikwila “iwu yahoshahu iwu yahoshahu; kuhanjeka hela kutiyañana.” Idi izu adizatishaña hakutena antu anakuhanjeka. Idi izu dachiGiriki didazatishawu cheñi ha Yil 17:17; 18:4, 19; 19:8, 9; 20:7, 9.
kuyileja kuhitila mukuzatisha nsona: Idi izu muchiGiriki datalisha mukwila nawu “kutenteka hamu (hakamwihi).” Ichi chinakumwesha nawu Pawulu wesekejeli wuprofwetu waMesiya wekala muNsona jachiHeberu nayuma yamwekeni muchihandilu chaYesu, kulonda yamwekeshi Yesu chashikijiliyi wuprofwetu.
(Yilwilu 17:17) Dichi, watachikili kuhanjeka musinagogi nawaYudeya niantu amakwawu adifukwileña kudi Nzambi nawa hefuku-hefuku wahanjekeleña nawantu awanikileña hachisankanu.
nwtsty nsañu yakudiza yidi ha Yil 17:17
hachisankanu: Ichi chisankanu (muchiGiriki, a·go·raʹ) chadiña hakachi kakabeta kasumbwañesha mujika namusela waAkropolosi naAtenisi, chadiña cheneni, hadaha mahekita 5. Munichi chisankanu elilileñamu yuma yikwawu, bayi neyi kulanda nakulandulula hohuku. Dadiña iluña deneni dakuselujolelamu nawa mwenzeli mapolitiki nichisemwa. Antu amuAtenisi atiyileña kuwaha kuya nakuhanjekela hanidi iluña.
(Yilwilu 17:22, 23) Dichi Pawulu wemeni mukachi kawaAriyopagasi nakuhosha nindi: “Enu amayala amuAtenisi, namoni nami muyuma yejima, munakutiya anzambi woma nankashi kubadika akwenu ejima. 23 Chakutalilahu, chinahitañanaña mumusumba nakushinshika nakanañachima yuma yimwalemeshaña, nawana nikameña hakusoneka nawu ‘Kudi Nzambi Wabula Kwilukewa.’ Dichi yeniwu imunakudifukulaku chakadi kwiluka, diyi inidi nakuyishimwina.
nwtsty nsañu yakudiza yidi ha Yil 17:22, 23
Kudi Nzambi Wabula Kwilukewa: Mazu achiGiriki akwila nawu A·gnoʹstoi the·oiʹ adiña cheñi hakameña kadiña muAtenisi. Antu amuAtenisi amwekesheli nawu achinineña anzambi jawu kuhitila mukuyituñila jitembeli nitumeña, nawa ayituñilili nitumeña anzambi jawu akubaza, adi neyi nzambi Wakuhamuka, Wakudikehesha, Wañovu, Wakukanjikija niwaWushona. Atela atoñojokeleña nawu neyi ashiyahu nzambi wumu wukuyila chuma chatama, dichaletesheli asonekeña hakameña nawu “kudi Nzambi Wabula Kwilukewa.” Muloña wanaka kameña, antu etejeli nawu kwekala Nzambi iyabulili nikwiluka. Pawulu mukubabala wazatishili aka kameña hakutachika kuyishimwina nikuyileja Nzambi walala, iyenjili nakwilukawu.
Kukeña Yuma Yalema yakuSpiritu
(Yilwilu 18:18) Hela chochu, chelili Pawulu nashakamiku dehi mafuku amavulu, wayishalishili anakwindi nawa wayili mumbopolu kuSiriya hamu naPrisila niAkwila. Watewilili nsuki yindi muKenikiri muloña wakusanyika kwasanyikiliyi.
w08 5/15 32 ¶5
Yikuma Yamaneni Kufuma muMukanda waYililu
18:18—Chumanyi Pawulu chadishiililumu? Antu amakwawu adiza jaBayibolu ashimuna nawu Pawulu wadishiililumu kudishiilamu kwawaNazari. (Kuch. 6:1-21) Hela chochu, Bayibolu hiyashimuna chuma chadishiililumu Pawuluku. Kubombelahu, Nsona hiyashimuna neyi chakwila Pawulu wadishiililumu henohu kanda yabalumuki hela henohu wabalumuka dehi hela dihatachikileñayi kudishiilamu indi kwiji dihakumishiliyuku. Hela chakwila wadishiililumu hela nehi, kudishiilamu kwamuchidiwu hikwadiña kwatamaku.
(Yilwilu 18:21) ilaña wayishalishili nakuyileja nindi: “Neyi Yehova neteji, nakafunta cheñi kudi enu.” Hohenohu wafumini kuEfwesesa nambopolu
nwtsty nsañu yakudiza yidi ha Yil 18:21
neyi Yehova neteji: Nhoshelu yakukonkomwena nawu Nzambi wukukwasha hanochu chuma chiwunakukeña kwila. Kapostolu Pawulu wanukileña ichi chishina mafuku ejima. (1Ko 4:19; 16:7; Heb 6:3) Kambanji Yakoba niyena wakolesheli antañi jindi kuhosha nawu: “Neyi Yehova neteji, twakahanda nawa twakela ichi hela china.” (Yak 4:15) Muntu wejima wukuhosha nindi “neyi Yehova neteji” watela kuzata kwesekeja nankeñelu yaYehova, bayi yakumina dakuhoshaku. Iyi nhoshelu bayi neyi yekala yakuhosha hohu nezu datiyakanaku ilaña kakavulu yekala yakuhoshela mumuchima.—talenu nsañu yakudiza yidi ha Yil 21:14; 1Ko 4:19; Yak 4:15; sgd chibalu 2
Kutaña Bayibolu
(Yilwilu 17:1-15) Kufumahu, ahitili muAmfwipoli nikuApoloniya nawa enjili kuTesalonika kwadiña sinagogi yawaYudeya. 2 Dichi kwesekeja nachaaku chaPawulu, weñilili mukachi mwadiñawu, nawa hadi sabata jisatu wahanjekeleña nawu kuzatisha Nsona, 3 wayilumbulwilileña nakuyileja kuhitila mukuzatisha nsona nindi, chateleleli Kristu kukabakana nikumusañula kufuma mudi afu, nakuhosha nindi: “Iwu Yesu inidi nakuyishimwina, diyi Kristu.” 4 Chafuminimu, antu amu hakachi kawu etiyili nawa atachikili kuzatila hamu naPawulu, Silasi niaGiriki amavulu adifukwileña kudi Nzambi, kubombelahu niambanda amakwawu alema niwena dicheliliwu. 5 Ilaña aYudeya chatiyiliwu ichima, afumbili amayala atama adiña nakuhitañana hachisankanu nawa atuñili izanvu dawakwamadombu datachikili kuleta ipumba mumusumba. Dichi alukukili itala daYasoni nakukeñakeñamu aPawulu naSilasi kulonda ayidishi nakuyileta kwizanvu dawakwamadombu. 6 Chakañenyiwu kuyiwana, akokañeshelelimu Yasoni nianakwetu amu nakuyitwala kudi anyuuli amusumba, iku anakubidika nawu: “Awa antu analeti kukala hamaseki hejima, anenzi nikunu, 7 nawa Yasoni nayitambwili mwitala dindi. Awa amayala ejima adikañaña nanshimbi jaKesari nawa ahoshaña nawu kudi mwanta mukwawu, Yesu.” 8 Izaza dawantu nianyuuli amusumba chatiyiliwu yumiyi, atiyili woma nankashi; 9 nawa Yasoni niantu adiñayi nawu chahaniniwu mali ayililiwu nawu afweti kulonda ayuumbiku, ayuumbiliku nakuyileja nawu ayeña. 10 Hohenohu nawufuku, amanakwetu atemesheli aPawulu naSilasi kuya kuBereya. Chashikiliwu kwenoku, eñilili musinagogi yawaYudeya. 11 Awa akwaBereya akeñeleña kudiza nankashi kubadika antu amuTesalonika, muloña wena atambwilili mazu namuchima wawu wejima, adiña nakutalatala muNsona hefuku-hefuku nakanañachima kulonda amoni neyi yumiyi yadiña yalala hela nehi. 12 Dichi, antu amavulu hakachi kawu etiyili niambanda aGiriki amakwawu alema niamayala amu niwena dicheliliwu. 13 Ilaña aYudeya amuTesalonika chatiyiliwu nawu Pawulu nakushimwina mazu aNzambi nimuBereya, ayili kwenoku nakusañumuna mazaza awantu nikuyitiyisha kutama. 14 Hohenohu, anakwetu amutemesheli Pawulu kuya kukaluñalwiji, ilaña Silasi niTimotewu ashalili kwenoku. 15 Hela chochu, antu amushinjikijileñaku Pawulu, amushikijili kuAtenisi, nawa afuntilimu hanyima yakuyileja nawu ayileji aSilasi naTimotewu enzi kudi Pawulu swayi-swayi.
DECEMBER 31–JANUARY 6
YUMA YALEMA YAMWIZU DANZAMBI | YILWILU 19-20
“Dihembenuña Enu Aweni, Hembenuña niMukanka waNyikoku Wejima”
(Yilwilu 20:28) Dihembenuña enu aweni, hembenuña nimukanka wanyikoku wejima iyayitondelelihu enu kudi spiritu yajila kwikala atulama, kulonda mubiñeña chipompelu chaNzambi, ochu chalandiliyi namashi aMwanindi.
“Biñenu Mukanka Wanyikoku yaNzambi”
5 Kapostolu wasonekeli nindi akulumpi ateleleli ‘kubiña mukanka wanyikoku yaNzambi wayinkawu.’ Chadiña chalema nankashi kwiluka nawu mukanka wanyikoku wambala waYehova niYesu Kristu. Aeluda adi kulumbulula kumesu aNzambi chahembeleñawu nyikoku yaNzambi. Twili netu ibwambu denu imwakeñesha yayileja nindi mumuhembeluku anyanindi neyi nafumuhu. Komana himukuyihemba chachiwahi nikuyidyishaku? Neyi mwana wumu yakata, himwatela kumutwala kuchipatela kulonda amuukiku? Munjila yoyimu, aeluda muchipompelu atela ‘kubiña chachiwahi chipompelu chaNzambi chalandiliyi namashi aMwanindi yomweni.’ (Yil. 20:28) Anukaña nawu mukoku wejima amulandili namashi alema aKristu Yesu. Chineli amba kalumbulula, aeluda adiishaña, kukiña nikwakamena anyikoku.
(Yilwilu 20:31) Dichi, tonenuña nawa ilukenu nenu hadi yaaka yisatu, hinalekeli kuyikonkomwena enu namadilu mwaana niwufuku hamuntu-hamuntuku.
Aeluda Akwakristu ‘Hiyakwakukalakala Hamu Nanetu Kulonda Tuzañalaleña’
Atubiña azataña nañovu nankashi. Mpinji jikwawu, aeluda achishaña wufuku wejima nakutoñojoka hanjila yakukwashilamu nyikoku yaNzambi nikukwasha akwawu akakwitiya kuspiritu. (2 Kor. 11:27, 28) Hela chochu, aeluda azataña mudimu wawu namuchima wumu nawa namuzañalu neyi cheliliyi Pawulu. Wayisonekeleli aKorinda nindi: “Nukutiya kuwaha nankashi kudikisañana, hela kudihana ami aweni kukoola wumi wenu.” (2 Kor. 12:15) Eñañi, hamuloña wakukeña amana kwindi, Pawulu wazatili nañovu hakuyikolesha. (Tañenu 2 Akorinda 2:4; Fwi. 2:17; 1 Tesa. 2:8) Dihafumini amana kwindi amukeñi nankashi Pawulu.—Yil. 20:31-38.
(Yilwilu 20:35) Ami nayileji chakutalilahu muyuma yejima nami mukuzata nañovu neyi chochenichi, dimu mumunateli kukwashila antu azeya nawa mwatela kwanuka mazu aMwanta Yesu, chahosheliyi yomweni nindi: ‘Mukuhana mwekala muzañalu chikupu kubadika wekala mukutambwila.’”
“Nabuli Muloña Wamashi Awantu Ejima”
Chihandilu chaPawulu chambukiliku chikupu nachawakwawu adi kutachika kulombola mukanka wanyikoku. Wazatileña nañovu kulonda yabuli kutwika chipompelu chiteli. Hazatilileña amanakwindi kulonda yadiheteshiku. Pawulu wayikonkomweneni akulumpi amuEfwesesa kwikala namuchima wakudihana. Wayilejeli nindi: ‘Mwatela kukwasha antu azeya.’ Watwalekelihu nindi: “Mwatela kwanuka mazu aMwanta Yesu, chahosheliyi yomweni nindi: ‘Mukuhana mwekala muzañalu chikupu kubadika wekala mukutambwila.’”—Yil 20:35.
Kukeña Yuma Yalema yakuSpiritu
(Yilwilu 19:9) Ilaña antu amu chakaaniniwu chikupu kwitiya nakusawula Njila hamesu awantu, Pawulu wafumini kuyadiñawu nawa wasendeli atumbanji, hefuku-hefuku wahanineña jimpanji mukapeka keneni kahashikola yaTirunusa.
“Atwalekelihu naKutanda” Hela Chakwila Kwadiña Ikañesha
Pawulu watela wahanineña jimpanji mukapeka keneni kashikola kufuma nampinji ya 11:00hrs nakushika 16:00hrs mafuku ejima. (Yil. 19:9, tth.) Ayina mpinji yadiña mpinji yayiwahi ilaña kwatatileña nankashi, dichaletesheleña antu kuleka kuzata nakuya hachayili. Fwikijenu neyi chakwila Pawulu walondeleli iyi ndandanda hadi yaaka yiyedi, wadi kutañisha maora akubadika ha 3,000. Chumichi nichena dichaletesheli izu daYehova kutwalekahu kutanda. Pawulu wazatileña nañovu nawa wahimpileña. Wahimpileña mpinji kulonda yawaneñahu antu hanyikala. Chumanyi chafuminimu? “A Yudeya niaGiriki ejima ashakamineña mukabeta kaAsiya, atiyili mazu aMwanta.” (Yil. 19:10) Washimwinini chikupu!
(Yilwilu 19:19) Dichi, antu amavulu owu akoñeleña yuma nawukwashu wawandemoni apompesheli nyikanda yawu hamu nakuyochela hamesu awantu ejima. Nawa chachindiliwu wuseya waniyi nyikanda, washikili kumali 50,000 asiliva.
“Atwalekelihu naKutanda” Hela Chakwila Kwadiña Ikañesha
Hanyima yakwila anyana kaSeva anasawuki dehi, antu atachikili kumutiya Nzambi woma nawa amavulu etiyili nawa alekeli kupanda. Chisemwa chawaEfwesesa chenzeli nakupanda. Nyikayi niwaña javulili nankashi nawa ajisonekeleña munyikanda neyi chasonekeleñawu tumina twakupanda. Antu amavulu muEfwesesa aleteli nyikanda yawu yakupanda nakuyochela hamesu awantu, hela chakwila iyi nyikanda yadiña yawuseya weneni, makonu yinateli kufwa makombakaji amadola. Luka washimwini nindi: “Mazu aYehova atwalekelihu nakutanda nawa emikileña mushindu chikupu.” (Yil 19:17-20) Chalala chashindili kutwamba nikukuhwelela mudi andemoni! Twatela kwimbujola yuma yeliliwu awa antu ashinshika. Ninetu makonu tunakushakama mukaayi munenzali kupanda. Neyi kudi yuma yitukweti yakundama kukupanda, twatela kwila neyi chelili Aefwesesa, twatela kuyocha! Tuzatenu nañovu kulonda tubuleña kudiñija muniyi yuma yamajilu.
Kutaña Bayibolu
(Yilwilu 19:1-20) Hampinji yachidiñayi Apolosi muKorinda, Pawulu wahitili mumaluña adiña kwakulehi nejiya nakukunkumukila kuEfwesesa. Kwenoku wawaniniku atumbanji amu 2 nawa wayihwili nindi: “Mwatambwilili spiritu yajila hampinji yimwekalili akwakwitiya?” Wena amwakwili nawu: “Etu kanda tutiyeñahu dehi nawu kwekala spiritu yajila.” 3 Dichi wayihwili nindi: “Hanu dinu, ayipapatishili muchipapatishinyi?” Wena aakwili nawu: “Muchipapatishi chaYowanu.” 4 Pawulu wahosheli nindi: “Yowanu wapapatishileña nachipapatishu chakumwekesha nawu muntu nabalumuki mumuchima kuhitila mukuleja antu nindi akuhweleli mudi owu wadiña nakwinza hanyima yindi, dikwila nawu mudi Yesu.” 5 Chatiyiliwu chumichi, ayipapatishili mwijina daMwanta Yesu. 6 Nawa Pawulu chayinañikiliyi makasa, spiritu yajila yenjili hadi wena, dichi atachikili kuhosha nikuprofweta mumadimi amboka-mboka. 7 Wejima wawu hamu adiña amayala kwakwihi na 12. 8 Hadi tukweji tusatu, wayileña musinagogi nakuhosha nakuhamuka, nakuhana jimpanji nikuhanjeka nawantu nakuyishinjila hansañu yaWanta waNzambi. 9 Ilaña antu amu chakaaniniwu chikupu kwitiya nakusawula Njila hamesu awantu, Pawulu wafumini kuyadiñawu nawa wasendeli atumbanji, hefuku-hefuku wahanineña jimpanji mukapeka keneni kahashikola yaTirunusa. 10 Watañishili haniyi shikola hadi yaaka yiyedi chakwila aYudeya niaGiriki ejima ashakamineña mukabeta kaAsiya, atiyili mazu aMwanta. 11 Nawa Nzambi wakoñeleña nyidimu yañovu yabadika kuhitila mudi Pawulu, 12 chakwila antu asendeleña yakuvwala niyitambala yamukunkileña Pawulu hamujimba nakuyitwala kudi antu adiña nanyisoñu nawa akoleleña, niandemoni ayifumineña. 13 Ilaña aYudeya amu ahitañeneñamu nakufumisha andemoni niwena esekeli kuzatisha ijina daMwanta Yesu kudi antu adiña nawandemoni; ahosheleña nawu: “Nayikonkomweni kuhitila mwijina daYesu owu ashimwinañayi Pawulu.” 14 Dichi kwadiña anyana awamayala 7 amukulumpi wawatupristu kaYudeya wejina daSeva elileña mwenimu. 15 Ilaña ndemoni wayihwili nindi: “Ami Yesu namwiluka, Pawulu niyena namwiluka, hanu dinu enu, yenu anyi?” 16 Hohenohu owu iyala wadiña nandemoni wayimotokeleli, wayibadikili ñovu wejima wawu nakuyimika mushindu, chakwila atemukili nzekesi munodu itala nawa ayikatishili. 17 Chumichi chatiyakeni kudi antu ejima, aYudeya niaGiriki ashakamineña muEfwesesa; dichi wejima wawu atiyili woma nawa ijina daMwanta Yesu atwalekelihu nakudituumbakesha. 18 Antu amavulu ekalili akwakwitiya enjileña nakwiteja nikushimuna yilwilu yawu hatooka. 19 Dichi, antu amavulu owu akoñeleña yuma nawukwashu wawandemoni apompesheli nyikanda yawu hamu nakuyochela hamesu awantu ejima. Nawa chachindiliwu wuseya waniyi nyikanda, washikili kumali 50,000 asiliva. 20 Mazu aYehova atwalekelihu nakutanda nawa emikileña mushindu chikupu.