Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
NOVEMBER 5-11
YUMA YALEMA YAMWIZU DANZAMBI | YOWANU 20-21
“Wankeña Kubadika Iyi Tahindi?”
(Yowanu 21:1-3) Hanyima yayumiyi, Yesu wadimwekesheli cheñi kudi atumbanji twindi kuKaluñalwiji kaTiberasi. Ichi dichadiña kudimwekesha kwindi. 2 Shimona Petulu wadiña hamu naTomasi (ateneneñawu nawu Mpamba), niNataneli wakuKana yamuÑaliliya, nianyana kaZebedewu niatumbanji twindi amakwawu ayedi. 3 Shimona Petulu wayilejeli nindi: “Ami inakuya nakuta inshi.” Wena amwilili nawu: “Ninetu tunakuya neyi.” Dichi ayili nawa akandamini muwatu, ilaña hanowu wufuku hiyakwatilihu inshi hela wumuku.
(Yowanu 21:4-14) Hela chochu, chikwayileña nakucha, Yesu wemeni kuchikumu, ilaña atumbanji twindi hiyelukili nawu diyi Yesuku. 5 Kuhiñahu, Yesu wayihwili nindi: “Enu anyana, mudihu nayakuda yimwatela kuda tahindi?” Wena aakwili nawu: “Inehi!” 6 Wayilejeli nindi: “Lalumwinenu kaleñi kumbavu yawatu yakuchidiilu nawa mukukwata inshi.” Dichi akilalumwini, ilaña akañenyi kukikokela muwatu muloña mwafwili inshi jajivulu nankashi. 7 Hohenohu, kambanji akeñeliyi Yesu, wamulejeli Petulu nindi: “Mwanta diyi!” Shimona Petulu chatiyiliyi nawu Mwanta diyi, wavwalili chakuvwala chindi chahewulu, muloña wadiña nzekesi, nawa waduumbilili hakaluñalwiji. 8 Ilaña atumbanji amakwawu enjili muwatu wanyanya, iku anakukoka kaleñi mwadiña inshi jajivulu, muloña adiña kwakulehi wanyi nachikumu, hadiña hohu mamita kwakwihi na 90. 9 Chashikiliwu kuchikumu, amweni kesi kamakala iku anashihu inshi nimankendi. 10 Yesu wayilili nindi: “Letenuhu inshi jimu jimunakwati.” 11 Dichi Shimona Petulu wakandamini muwatu nawa wakokeleli kaleñi kuchikumu mwadiña inshi jajivulu jamaneni 153. Hela chakwila inshi jadiña jajivulu, kaleñi katabukili wanyi. 12 Yesu wayitambikili nindi: “Twayenu mudawuli.” Kwosi kambanji hela wumu wadiña nawulobu wakumwihula nindi: “Yeyinyi?” muloña elukili nawu Mwanta diyi. 13 Yesu wanoneli mankendi nakuyinka, nawa wayinkeli niinshi. 14 Aka kadiña kapampa kamuchisatu kamwekeniyi Yesu kudi atumbanji twindi kufuma hamusañwiliwu mudi afu.
(Yowanu 21:15-19) Chamanishiliwu kudawula, Yesu wamwihwili Shimona Petulu nindi: “Shimona mwana kaYowanu, komana wankeña kubadika iyi tahindi?” Yena wamwakwili nindi: “Eña Mwanta, weluka neyi nakukeña.” Yesu wamulejeli nindi: “Diishaña anyikoku ami anyanya.” 16 Wamwihwili cheñi kamuchiyedi nindi: “Shimona mwana kaYowanu, komana wankeña?” Yena waakwili nindi: “Eña Mwanta, weluka neyi nakukeña.” Yena wamulejeli nindi: “Biñaña anyikoku ami anyanya.” 17 Wamulejeli kamuchisatu nindi: “Shimona mwana kaYowanu, komana wankeña?” Petulu waneñeli nanochu chamwihwiliyi kamuchisatu nindi: “Komana wankeña?” Dichi yena wamulejeli nindi: “Mwanta, weluka yuma yejima; weluka neyi nakukeña.” Yesu wamulejeli nindi: “Diishaña anyikoku ami anyanya. 18 Inakukuleja chalala chikupu nami, hiwachidiña kansi, wadiña nakudivwika eyi aweni nikuya kwejima kuwakeñeleña kuya. Ilaña chiwakashinakaja, wakololaña makasa eyi nawa muntu wacheñi wakakuvwikaña nikukutwala kwejima kuwakabula kukeña.” 19 Wahosheli mwenimu kulonda yamuleji Petulu nindi iku kufwa kwamba kamulemesha Nzambi. Chamanishiliyi kuhosha awa mazu, wamulejeli nindi: “Twalekakuhu kunlondela.”
nwtsty nsañu yakudiza yidi ha Ywn 21:15, 17
Yesu wamwihwili Shimona Petulu: Yesu naPetulu ahanjekeli hanyima yakwila Petulu namukaani dehi Yesu kapampa kasatu. Yesu wamwihwili Petulu lwihu lwolumu mapampa kasatu kulonda yeluki neyi wamukeña, chumichi chaletesheli ‘Petulu kuneña.’ (Ywn 21:17) Mazu aYowanu ekala ha Ywn 21:15-17 azatishahu mazu ayedi achiGiriki akwila nawu: a·ga·paʹo nidakwila nawu phi·leʹo. muLunda, awa mazu ejima ayedi ayibalumuna nawu kukeña. Yesu wamwihwili Petulu mapampa kasatu nindi: “Komana wankeña?” Mapampa ejima asatu Petulu wetejeli nindi ‘wamukeña’ Yesu. Mapampa ejima etejeleñayi Petulu nindi wamukeña, Yesu wamukonkomweneni nindi iku kukeña kumusañumuni kudisha ‘nikubiña’ atumbanji twaYesu akuspiritu, iyatenawu haniyi nsona nawu anyana kanyikoku, hela ‘anyikoku anyanya.’ (Ywn 21:16, 17; 1Pe 5:1-3) Yesu wamwihwili Petulu mapampa kasatu kulonda yamwekeshi chamukeñayi, kuhiñahu wamwinkeli mudimu wakuhemba anyikoku. Yesu chelili mwenimu, wamwekesheli nindi wamwanakeneni Petulu chamukaaniniyi mapampa kasatu.
komana wankeña kubadika iyi tahindi?: Iyi nhoshelu yakwila nawu, “kubadika iyi” yinateli kutalisha mwamuvulu. Antu adiza Bayibolu amakwawu ahoshaña nawu watalishili mukwila nindi “komana wankeña kubadika chiwakeña awa atumbanji amakwawu tahindi?” hela nindi “komana wankeña kubadika chankeñawu awa atumbanji amakwawu tahindi?” Hela chochu, watela watalishili mukwila nindi “komana wankeña kubadika iyi yuma yejima tahindi?” dikwila nawu, inshi jakwatiliwu hela mudimu wakukwata inshi. Dichi awa mazu atalishili mukwila nawu: ‘Komana wankeña kubadika chiwakeña yuma yakumujimba hela maheta? Neyi wankeña, diishaña anyikoku ami anyanya.’ Welili chiwahi hakumwihula Petulu kwesekeja nachadiñayi hatachi. Hela Petulu wadiña hakachi kawatumbanji twaYesu akusambila (Ywn 1:35-42), hashikeneni kutachika kumulondela Yesu mafuku ejimaku. Ilaña, wafuntili kumudimu windi wakukwata inshi. Chimwahitili tukweji, Yesu wamulejeli Petulu kuleka mudimu wazatileñayi nakumwilisha yekali ‘chibinda chawantu.’ (Mat 4:18-20; Luk 5:1-11) Cheñi, hanyima yakufwa kwaYesu, Petulu wahosheli nindi wukufunta nakukwata inshi, dichi apostolu amakwawu amulondeleli. (Ywn 21:2, 3) Dichi, chinamwekani neyi Yesu wamulejeleña Petulu kulonda yafuukuluhu chiwahi: Wukutwamijaku mudimu wakukwata inshi, wemeneneñaku mulumba wanshi, tahindi wukutwamijaku mudimu wamwinkeliwu wakudisha anyana kanyikoku anyanya hela netu akwakumulondela Yesu?—Ywn 21:4-8.
kamuchisatu: Petulu wamukaanini Mwanta windi mapampa kasatu; Yesu wamwihwili mapampa kasatu kulonda yamwekeshi neyi wamukeña. Petulu chetejeliyi, Yesu wamulejeli kumwekesha kuna kukeña kuhitila mukutwamijaku mudimu wajila kubadika yuma yejima. Petulu amwinkeli mudimu hamu nawamanakwindi ashikahu wakudiisha, kukolesha, nikubiña mukanka wanyikoku yashinshika yaKristu. Awantu adiña awayishewa ilaña akeñekeleña kuyidiisha kuspiritu.—Luk 22:32.
Kukeña Yuma Yalema yakuSpiritu
(Yowanu 20:17) Yesu wamulejeli nindi: “Lekaku kunkakela, muloña kanda niyi kudi Tata. Ilaña yaña kudi amanakwami, wuyileji neyi, ‘Inakuya kudi Tata yami nawa Tata yenu, nikudi Nzambi yami nawa Nzambi yenu.’”
nwtsty nsañu yakudiza yidi ha Ywn 20:17
Lekaku kunkakela: Izu dachiGiriki dakwila nawu haʹpto·mai anateli kudibalumuna nawu “kukwata,” hela “kukakela kuchuma; kukudika hachuma.” Amakwawu abalumuna awa mazu aYesu nawu: “Bayi wunkunkaku.” Hela chochu, bayi neyi Yesu hamukaanishileña Mariya Mandaleni kumukunkaku, muloña wayikaanishili wanyi ambanda amakwawu “amukwatili kunyendu yindi” hanyima yakumusañula.” (Mat 28:9) Chinamwekani neyi Mariya Mandaleni watiyileña woma nindi Yesu keña yayi mwiwulu. Chineli wakeñeleña kwikala naMwanta mpinji yejima, wamukakeleli Yesu kulonda yabuli kumushiya. Hakwila yamwekeshi nindi wachidiña kanda yayi, Yesu wamulekesheli Mariya kumukakela, ilaña wamulejeli nindi yayi nakuyileja atumbanji twindi nsañu yakusañuka kwindi.
(Yowanu 20:28) Tomasi wamulejeli nindi: “Mwanta wami nawa Nzambi yami!”
nwtsty nsañu yakudiza yidi ha Ywn 20:28
Mwanta wami nawa Nzambi yami!: MuchiGiriki nawu “Mwanta wanami nawa Nzambi [ho the·osʹ] yanami!” Akwakubalumuna amakwawu ahoshaña nawu awa mazu amwekeneña neyi nakutena Yesu, ilaña wateneneña Nzambi, Tata yindi. Amakwawu ahoshaña nawu awa mazu muchiGiriki atalisha kudi Yesu. Hela neyi dimu, ilaña awa mazu akwila nawu “Mwanta wami nawa Nzambi yami” anateli hohu kulumbulukila mumukuku wamazu wamuNsona yonenewa. Chineli Nsona yamwekeshaña nawu Yesu wasambilili kutumina atumbanji twindi mazu nindi, ‘Inakuya kudi Tata yami nawa Tata yenu, nikudi Nzambi yami nawa Nzambi yenu,’ Hitwatela kuhosha netu Tomasi watoñojokeli nindi Yesu diyi Nzambi wañovu jejimaku. (Talenu nsañu yakudiza yidi ha Ywn 20:17.) Tomasi watiyili chalombeleñayi Yesu kudi Tata yindi nakumutena nindi “Nzambi walala wumu hohu.” (Ywn 17:1-3) Dichi Tomasi wamuteneni Yesu nindi “Nzambi yami” muloña wayuma yinalondelihu: Wamumweneña Yesu neyi hinzambi bayi neyi Nzambi wañovu jejimaku. (Talenu nsañu yakudiza yidi ha Ywn 1:1.) Hela wamuteneni Yesu neyi chelileña ambuña aNzambi akunyima, chayiteneniwu añelu atuminuwu kudi Yehova, asonekawu munsona jachiHeberu. Tomasi watela welukili nsona yashimuna chahosheleñawu antu, niansoneki aBayibolu chakwileñawu hela chahosheleñawu nawañelu neyi kwiji anakuhosha naYehova Nzambi. (Esekejenu Kut 16:7-11, 13; 18:1-5, 22-33; 32:24-30; Ans 6:11-15; 13:20-22.) Dichi, Tomasi wamuteneni Yesu nindi “Nzambi yami,” muloña welukili nindi Yesu wadiña nakumwimenaku nikumuhoshelaku Nzambi walala.
Kutaña Bayibolu
(Yowanu 20:1-18) Hefuku datachi mumulungu, Mariya Mandaleni wenjili kwijamu nabudidi henohu hachidi mwidima, nawa wamweni ilola anadilañumuniku dehi kwijamu. 2 Dichi wayili lufuchi kudi Shimona Petulu nikudi kambanji mukwawu akeñeliyi Yesu nakuyileja nindi: “Mwanta anamufumishimu mwijamu, nawa tuneluki wanyi kwanamushiwu.” 3 Kuhiñahu, Petulu nikambanji mukwawu ayili kwijamu. 4 Wejima wawu ayedi atachikili kutemukila hamu, ilaña kambanji mukwawu watemukili nankashi nakumushiyamu Petulu nawa diyi wadiña watachi kushika kwijamu. 5 Chabandaminiyi nakusumbilamu, wamwenimu kwamahina adiña hamaseki, ilaña weñililimu wanyi. 6 Kuhiñahu, Shimona Petulu niyena wamulondeleleña hanyima, nawa weñilili mwijamu. Dichi wamwenimu kwamahina adiña hamaseki. 7 Ihina damupombeliwu kumutu hidadiña hamu namahina amakwawuku, ilaña dadiña hakankawadu iku anadivuñeki. 8 Kuhiñahu, kambanji mukwawu owu wadiña watachi kushika kwijamu niyena weñililimu, wamweni nawa wakuhweleleli. 9 Muloña achidiña kanda atiyishi nsona yahosha nawu watela kusañuka kufuma mudi afu. 10 Dichi atumbanji afuntili kumatala awu. 11 Ilaña Mariya wemeni hanji kwakwihi nejamu, iku nakudila. Chadilileñayi, wabandamini nakusumbila mwijamu, 12 nawa wamweni añelu ayedi avwalili yakuvwala yitooka iku anashakami hashiliwu mujimba waYesu, wumu kunyitu mukwawu niyena kunyendu. 13 Dichi wena amwihwili nawu: “Eyi mumbanda, wunakudiladi?” Yena wayakwili nindi: “Mwanta wami anamufumishimu, nawa neluki wanyi kunamushiwu.” 14 Chamanishiliyi kuhosha awa mazu, washetumukili nawa wamweni Yesu nemani kwenoku, ilaña yena helukili nindi diyi Yesuku. 15 Yesu wamwilili nindi: “Eyi mumbanda, wunakudiladi? Hinyi iwunakukeña?” Yena chamweniyi nindi mukwakuzata mwitempa diyi, wamulejeli nindi: “Mwanta, neyi yeyi wunamusendi, nleji kuwunamushi kulonda niyi nakumusenda.” 16 Yesu wamutambikili nindi: “Mariya!” Yena chashetumukiliyi, wetejeli muchiHeberu nindi: “Raboni!” (dikwila nawu “Ntañishi!”) 17 Yesu wamulejeli nindi: “Lekaku kunkakela, muloña kanda niyi kudi Tata. Ilaña yaña kudi amanakwami, wuyileji neyi, ‘Inakuya kudi Tata yami nawa Tata yenu, nikudi Nzambi yami nawa Nzambi yenu.’” 18 Mariya Mandaleni wenjili nakuyileja atumbanji nindi: “Namumoni Mwanta!” Nawa wayilejeli yuma yamulejeliwu.”
NOVEMBER 12-18
YUMA YALEMA YAMWIZU DANZAMBI | YILWILU 1-3
“Spiritu Yajila Anayichili haChipompelu chawakwaKristu”
(Yilwilu 2:1-8) Chelili ifuku daChawija chaPentekosta kanda dimani, atumbanji ejima adipompesheli heluña dimu. 2 Hohenohu mwiwulu mwafumini lushindu neyi lwampepela yinakukunka nañovu, lwatiyakeni mwitala mwejima mwashakaminiwu. 3 Amweni madimi amwekeneña neyi nyizuzu yakesi, nawa awa madimi apalañeni, dichi idimi dimu denjili nakushakama hadi kambanji wejima wadiña mukapeka, 4 nawa wejima wawu enzeli naspiritu yajila chakwila atachikila kuhosha madimi amboka-mboka, kwesekeja nanochu chayikwashiliwu kudi spiritu. 5 Hayina mpinji, aYudeya amulemesheleña Nzambi afumini kunyuza yejima, ashakamineña muYerusalema. 6 Chatiyiliwu ilu lushindu, izaza dawantu dapompeli hamu nawa dahayamini, muloña muntu-himuntu watiyileña atumbanji anakuhosha iwu mwidimi dindi, iwu mwidimi dindi. 7 Chalala, ahayamini nankashi nakuhosha nawu: “Talenu, awa antu ejima anakuhosha, komana hiyaÑaliliyaku? 8 Hanu dinu, muloñadi wejima wetu chitunakutiyila iwu mwidimi dindi, iwu mwidimi dindi?
(Yilwilu 2:14) Ilaña Petulu wemeni hamu nanowu 11 nawa wahosheli nezu datiyakana nindi: “Enu antu amuYudeya ninenu ejima mwashakamaña muYerusalema, ilukenu chumichi nawa tiyililenu nakanañachima kumazu ami inukuhosha.
(Yilwilu 2:37, 38) Chatiyiliwu chumichi, atiyili kutama munyichima yawu, nawa amulejeli Petulu niakwawu apostolu nawu: “Enu amayala, anakwetu, twili ñahi?” 38 Petulu wayilejeli nindi: “Balumukenu munyichima wejima wenu hamuntu-hamuntu, ayipapatishi mwijina daYesu Kristu kulonda ayanakeni nshidi jenu nawa mukutambula chawaana chaspiritu yajila.
(Yilwilu 2:41) Dichi, antu ejima atambwilili izu dindi namuzañalu ayipapatishili, nawa hanodu ifuku abombeleliku antu akushika ku 3,000.
(Yilwilu 2:42-47) Wenawa antu atwalekelihu kwovwahila ntañishilu yawapostolu, kudikunda hamu, kudiila hamu yakuda nikulombela hamu. 43 Chalala, 44 antu ejima atachikili kutiya woma nawa apostolu atachikili kukoña yihayamisha niyinjikijilu yayivulu. Antu ejima etiyili adipompesheli hamu nawa adiña nayuma yoyimu, 45 alandishileña maheta niyuma yawu nakwinka mali antu ejima, kwesekeja nakukaankila kwamuntu himuntu. 46 Nawa apompeleña mutembeli ifuku niifuku nankeñelu yakudinuña hamu, cheñi atwalileña yakuda kumatala ashiyashana nikudila hamu yakuda yawu namuzañalu wasweja nimuchima wumu, 47 nakumulemesha Nzambi nikwikala nawubwambu wawuwahi nawantu ejima. Hampinji yoyimu, hefuku-hefuku, Yehova watwalekelihu kubombelaku antu ejima amwinineñayi.
w86 12/1 29 ¶4-5, 7
Yawaana Yazañaleshaña Muchima
Ifuku datachikili chipompelu chawakwaKristu mu 33 C.E., antu 3,000 abalumukili nakupapatishewa adiña nakudikunda, kudila hamu yakuda nikulombela hamu. Muloñadi chelililiwu mwenimu? Kulonda akoleshi chikuhwelelu chawu kuhitila mukutwalekahu “kwovwahila ntañishilu yawapostolu.”—Yil 2:41, 42.
AYudeya niantu abalumukili kwikala aYudeya enjili kuYerusalema nakushakama hohu hampinji yaChawija chaPentekosta. Ilaña ejima ekalili akwaKristu akeñeleña kushakama mafuku amavulu kulonda adizi yuma yayivulu yikuyikwasha kukolesha chikuhwelelu chawu. Dichi kwakeñekeleña yakuda nihakukama. Enyi amakwawu adiña namali amavulu amakwawu nehi. Dichi kwadiña kupompesha yawaana nikuyihana kudi antu abulili.—Yil 2:43-47.
Yuma yejima yalandishileñawu niyahanineñawu ayihanineña chakufuma hamuchima. Kwosi muntu wakanjikijileñawu kulandisha hela kuhanaku; cheñi bayi neyi yadiña njila yakuletesha antu ekali atuzweñiku. Bayi neyi akeñeleña nawu antu aheta alandishi yuma yawu kulonda ekali atuzweñiku. Ilaña, muloña wakuyitiyila akwawu akwakwitiya wushona hayina mpinji, alandishili yuma yawu kulonda akwashi mudimu waWanta.—Esekejenu 2 Akorinda 8:12-15.
Kukeña Yuma Yalema yakuSpiritu
(Yilwilu 3:15) ilaña Ntwamina Muneni wawumi enu mwamujahili. Hela chochu, Nzambi wamusañwili kufuma mudi afu, nawa tudi ayinsahu achumichi.
it-2 61 ¶1
Yesu Kristu
“Ntwamina Muneni wawumi.” Hakwila yamwekeshi luwi lwaTata yindi lwabadika, Yesu Kristu walambwili wumi windi wawanina. Chumichi chaletesheli atumbanji twaKristu atondewa kwikala nakukooleka kwakuyuula hamu nindi mwiwulu nikwenzununa njila kudi antu akayuulañawu kudi iwu Wanta. (Mat 6:10; Ywn 3:16; Efw 1:7; Heb 2:5; talenu IFUTU DANYILOÑA) Dichekalililiyi “Ntwamina Muneni [“Kalamba,” KJ; JB] wawumi” wawantu ejima. (Yil 3:15) Izu dachiGiriki dazatishawu hanu, datalisha mukwila nawu, “mukulumpi wawakulumpi,” izu dazatishiliwu hakumutena Mosi (Yil 7:27, 35) nawu “nyuuli” muIsarela.
(Yilwilu 3:19) “Dichi dinu, balumukenu munyichima yenu, mufunti kulonda nshidi jenu ajijimañeshi, kulonda yilaaka yakuhizumwisha yaletaña ñovu yifumi kudi Yehova yomweni
cl 265 ¶14
Nzambi ‘Wadiloñesha Kwanakena’
Kwanakena kwaYehova akulumbulula cheñi chiwahi hamukanda waYilwilu 3:19 nawu: “Dichi dinu, balumukenu munyichima yenu, mufunti kulonda nshidi jenu ajijimañeshi.” Awa mazu akukumishaku alumbulula izu dachiGiriki datalisha mukwila nawu “kukombwela, . . . kujima hela kukisañana.” Kwesekeja nawantu amakwawu adiza Bayibolu, ashimunaña nawu chidi neyi kujima nsona yasonekawu. Chumichi chatweshekeleña ñahi? Inki yazatishileñawu kakavulu kunyima ayituñileña nacarbon, gum nimenji. Neyi muntu namanishi dehi kusoneka, nateli kuzowesha siponja yindi nakujima nsona jejima. Chumichi chamwekeshaña luwi lwaYehova. Neyi yanakena nshidi yetu, chidi neyi nanoni siponja yakuzowesha mumenji nakujijima.
Kutaña Bayibolu
(Yilwilu 2:1-21) Chelili ifuku daChawija chaPentekosta kanda dimani, atumbanji ejima adipompesheli heluña dimu. 2 Hohenohu mwiwulu mwafumini lushindu neyi lwampepela yinakukunka nañovu, lwatiyakeni mwitala mwejima mwashakaminiwu. 3 Amweni madimi amwekeneña neyi nyizuzu yakesi, nawa awa madimi apalañeni, dichi idimi dimu denjili nakushakama hadi kambanji wejima wadiña mukapeka, 4 nawa wejima wawu enzeli naspiritu yajila chakwila atachikila kuhosha madimi amboka-mboka, kwesekeja nanochu chayikwashiliwu kudi spiritu. 5 Hayina mpinji, aYudeya amulemesheleña Nzambi afumini kunyuza yejima, ashakamineña muYerusalema. 6 Chatiyiliwu ilu lushindu, izaza dawantu dapompeli hamu nawa dahayamini, muloña muntu-himuntu watiyileña atumbanji anakuhosha iwu mwidimi dindi, iwu mwidimi dindi. 7 Chalala, ahayamini nankashi nakuhosha nawu: “Talenu, awa antu ejima anakuhosha, komana hiyaÑaliliyaku? 8 Hanu dinu, muloñadi wejima wetu chitunakutiyila iwu mwidimi dindi, iwu mwidimi dindi? 9 AParatiya, aMediya niaElamiti; antu ashakamaña muMesopotamiya, muYudeya nimuKapadosiya, amuPontu niamukabeta kaAsiya, 10 amuFwirijiya niamuPamfwiliya, amuEjipitu niamumaluña amuLibiya kwakwihi naKireni; aYudeya niantu abalumukili kwikala aYudeya afumini kuRoma; 11 Akereta; niaArabiya, tunakuyitiya anakuhosha hanyidimu yaNzambi yañovu mumadimi etu.” 12 Dichi, antu ejima ahayamini nankashi, nawa atachikili kudihula mulwawu nawu: “Indi chumichi chinatalishi mudihi?” 13 Hela chochu, amakwawu ayisupishileña nawu: “Awa antu anasheti vinyu yatowala.” 14 Ilaña Petulu wemeni hamu nanowu 11 nawa wahosheli nezu datiyakana nindi: “Enu antu amuYudeya ninenu ejima mwashakamaña muYerusalema, ilukenu chumichi nawa tiyililenu nakanañachima kumazu ami inukuhosha. 15 Kafwampi, awa antu hiyanasheti neyi chimunakutoñojokaku, muloña yinu hiora yamuchisatu yefuku. 16 Kwambukaku, iyi diyi nsañu yahosheliwu kuhitila mudi kaprofwetu Yoweli nawu: 17 ‘“Nawa mumafuku akukuminina,” Nzambi nahoshi nindi, “Nakahuñunwina spiritu yami hadi antu ejima, anyanenu awamayala niawambanda akaprofweta, anyikwenzi jenu awamayala akamona yimwenu nawa akulumpi jenu akalota yilota, 18 cheñi, mumafuku wenowu, nakahuñunwina spiritu yami nihadi anduñu jami awamayala niawambanda, niwena akaprofweta. 19 Nawa nakamwekesha yihayamisha mwiwulu, hanu hamaseki nakamwekesha yinjikijilu yamashi nikesi nimavu awishi. 20 Henohu ifuku daYehova deneni dakuhayamisha kanda dinzi, itena dakabalumuka mwidima nawa kakweji kakabalumuka mashi. 21 Dichi muntu wejima watambikaña hejina daYehova akamwamwina.”’
NOVEMBER 19-25
YUMA YALEMA YAMWIZU DANZAMBI | YILWILU 4-5
“Atwalekelihu Kushimwina Izu daNzambi naKuhamuka”
(Yilwilu 4:5-13) Ifuku dalondelelihu, anyuuli jawu, akulumpi niansoneki apompeli hamu muYerusalema, 6 hadiña niAnasi mukulumpi wawatupristu, Kayafwasi, Yowanu, Alesanderi niantaña jamukulumpi wawatupristu ejima. 7 Dichi, Petulu naYowanu ayimikili mukachi kawu nakutachika kuyihula nawu: “Chumichi munachikoñi nañovu janyi hela mwijina danyi?” 8 Kuhiñahu, Petulu wenzeli naspiritu yajila wayilejeli nindi: “Enu anyuuli jawantu ninenu akulumpi, 9 neyi munakukeña dalelu nenu tuyileji chuma chachiwahi chinamumwekeni iwu chifwayi nimuntu wunamuuki, 10 wejima wenu niantu ejima amuIsarela ilukenu nenu kuhitila mwijina daYesu Kristu wakuNazareta, owu imwajahilili hamutondu ilaña asañwiliwu kudi Nzambi kufuma mudi afu, diyi wunaleñeli iwu muntu wunemani kumesu enu kukola kumujimba. 11 Iwu Yesu diyi ‘ilola dimwadiwili enu akwakutuña, dinekali dehi ilola damwiwombu dahewulu.’ 12 Kubombelahu, wamwinu hiwudi mudi muntu wacheñiku, muloña kwosi ijina dikwawu hanu hamaseki datondayi Nzambi mukachi kawantu mutunateli kuwana wamwinuku.” 13 Antu chamweniwu nawu aPetulu naYowanu anakuhosha nakuhamuka, nawa chelukiliwu cheñi nawu adiña ataña shikola wanyi ilaña adiña hohu neyi akwawu antu abulili kutaña, ahayamini. Antu atachikili kwanuka nawu awa atumbanji ayedi adiña hamu naYesu.
w08 9/1 15, chikasha
Mazu Ahosheliwu Chiyekalili Nsona Yajila—Nsona niakwaKristu Akusambila
Komana Apostolu Adiña Ataña Shikola Wanyi?
Akwawuswa niakulumpi amuYerusalema “chamweniwu nawu aPetulu naYowanu anakuhosha nakuhamuka, nawa chelukiliwu cheñi nawu adiña ataña shikola wanyi ilaña adiña hohu neyi akwawu antu abulili kutaña, ahayamini.” (Yilwilu 4:13) Komana apostolu adiña ataña shikola wanyi? Bayibolu yaThe New Interpreter’s Bible yahoshahu hanawa mazu nawu: “Hadaha awa mazu atalisha wanyi mukwila nawu Petulu [niYowanu] hiyadiña ataña shikolaku. Amwekesheleña hohu chaambu chadiña hadi antu ansompeshi nawapostolu.”
w08 5/15 30 ¶6
Yikuma Yamaneni Kufuma muMukanda waYililu
4:13—Komana Petulu niYowanu adiña antu akadi kwiluka nyikanda hela abula kutaña? Inehi. Ayiteneni nawu “hiyantu akadi kwiluka nyikanda, hela kwiñila mumashikola amaana” muloña hiyayiluhu mumashikola awaYudeya mwadizishileñawu jansakililuku.
(Yilwilu 4:18-20) Hohenohu, ayitambikili nakuyileja chikupu nawu bayi ahosha hela kutañisha kuzatisha ijina daYesuku. 19 Ilaña aPetulu niYowanu ayilejeli owu antu nawu: “Disompelenu enu aweni neyi chidi hohu chiwahi kumesu aNzambi kuyovwahila enu hela kwovwahila Nzambi. 20 Ilaña etu, hitukutwesha kuleka kuhosha yuma yitunamoni nikutiyaku.”
(Yilwilu 4:23-31) Hanyima yakuyumbaku, ayili kudi akwawu atumbanji nawa ayilejeli yuma yayilejeliwu kudi akulumpi jawatupristu niakulumpi. 24 Akwawu atumbanji chatiyiliwu iyi nsañu, adinuñili hamu nakulomba kudi Nzambi nawu: “Mwanta Wabadika, Yeyi waleñeli iwulu niiseki nikaluñalwiji niyuma yejima yekalamu, 25 nawa yeyi wahosheli kuzatisha spiritu yajila kuhitila mukanwa kankakulula yetu Davidi, kambuñeyi neyi: ‘Muloñadi akwanyuza chahilililiwu niantu chatoñojokeleleñawu hayuma yamukunkulwayi? 26 Anyanta ahamaseki atandamini nianyuuli apompeli hamu kulonda alwi naYehova niwindi wawayishewa.’ 27 Chalala, wejima wawu ayedi, Herodi niPontusi Pilatu hamu nawantu akunyuza niantu amuIsarela apompeli hamu muniwu musumba nakulwa nakambuñeyi wajila Yesu, iwawayishili. 28 Apompeli hamu kulonda eli yuma yiwafuukwileñahu dehi. Yumiyi yamwekeni muloña wukweti ñovu nawa yamwekeni kwesekeja nankeñelu yeyi. 29 Ichi dinu eyi Yehova, tiyaku chinakututiyishawu woma nawa yikwashi anduñu jeyi kulonda atwalekihu kuhosha izu deyi nakuhamuka, 30 hampinji yoyimu wololeña chikasa cheyi nakuuka, iku yinjikijilu niyihayamisha yinakumwekana kuhitila mwijina dakambuñeyi wajila Yesu.” 31 Nawa chamanishiliwu kulomba nakulembelela, mwiluña mwapompeleliwu mwakankili, wejima wawu enzeli naspiritu yajila nawa ahosheleña mazu aNzambi nakuhamuka.”
it-1 128 ¶3
Apostolu
Mudimu muChipompelu chawakwaKristu. Spiritu yaNzambi chiyechikilili apostolu haPentekosta akolesheweli chikupu. Tupetulu tutanu twakusambila twamukanda waYilwilu twashimuna hadi Apostolu chahamukiliwu hakushimwina nsañu yayiwahi nikusañuka kwaYesu hela chakwila adiña nakuyikasa kuyeta nikuyijaha kudi akwawuswa. Hanyima yaPentekosta, hampinji yalombweleña apostolu, spiritu yajila yayikwashili, chafuminimu antu muchipompelu chawakwaKristu avulili. (Yil 2:41; 4:4) Atachikili kushimwina muYerusalema, kuhiñahu nimuSamariya, chimwahitili mpinji atachikili kushimwina mwahita kaayi kejima.—Yil 5:42; 6:7; 8:5-17, 25; 1:8.
Kukeña Yuma Yalema yakuSpiritu
(Yilwilu 4:11) Iwu Yesu diyi ‘ilola dimwadiwili enu akwakutuña, dinekali dehi ilola damwiwombu dahewulu.’
it-1 514 ¶4
ilola damwiwombu
Masamu 118:22 yashimuna nawu ilola dalekeli antuñi dikabalumuka “mutu wakwiwombu” (MuchiHeberu, roʼsh pin·nahʹ). Yesu wazatishili awa mazu awuprofwetu nakuditena yomweni nindi diyi “ilola damwiwombu” (MuchiGiriki., ke·pha·leʹ go·niʹas, mutu wakwiwombu). (Mat 21:42; Mak 12:10, 11; Luk 20:17) Neyi chekala ilola dahewulu dakwitala dinakumwekana, dichi Yesu Kristu niyena diyi chibaba chachipompelu chawakwaKristu awayishewa, esekejawu naTembeli yakuSpiritu. Petulu niyena wazatishili mazu ekala hamukanda waMasamu 118:22 hakutena Kristu, nikumwekesha nindi diyi “ilola” dalekeluwu antu kutuña ilaña Nzambi waditondeli kwikala “mutu wakwiwombu.”—Yil 4:8-12; talenu cheñi 1Pe 2:4-7.
(Yilwilu 5:1) Hela chochu, kwadiña iyala wejina daAnaniya, hamu nañodindi Safwira, alandishili iheta dawu.
Petulu niAnaniya Atwambili—Chumanyi Chitunateli Kudizilaku?
Ananiya niñodindi alandishili iheta dawu kulonda awanumu mali akukwasha nachu antu amaha apapatisheweli. Ananiya chatwaliliyi mali kudi apostolu, wahosheli nindi diwu mali ejima. Bayi neyi diwu mali ejimaku. Waswekeli mali amakwawu. Nzambi wamulejeli Petulu iyi nsañu, dichi Petulu wamwilili Ananiya nindi: “Hiwunatwambi kudi antuku, wunatwambi kudi Nzambi.” Hohenohu Ananiya yadimbuka niheseki, yofwa nikufwa. Chimwahitili maora asatu, iñodindi niyena wenjili. Welukili wanyi chuma chamumwekeneneni nfumwindi, niyena watwambili nawa wadimbukili nakufwa.
Kutaña Bayibolu
(Yilwilu 5:27-42) Dichi, ayileteli nakuyimika kudi akwaSanihedirini. Kuhiñahu, kapristu muneni wayihwili 28 nakuyileja nindi: “Twayikonkomwena netu bayi mutwalekahu kushimwina kuzatisha idi ijinaku, ilaña talenu, munenzeshi Yerusalema yejima nantañishilu yenu, nawa munakufwila kuleta mashi aniwu muntu hadi etu.” 29 Petulu niakwawu apostolu aakwili nawu: “Nzambi diyi nyuuli wutwatela kwovwahila bayi antuku. 30 Nzambi yawankakulula jetu wamusañwili Yesu, imwajahili kuhitila mukumukudika hamutondu. 31 Nzambi wamutuumbakesheli yeniwu nakumusha kuchikasa chindi chachidiilu nakumwilisha yekali Ntwamina Muneni nawa Chamwinu, kulonda yaleñeli aIsarela abalumuki munyichima nakuyanakena nshidi jawu. 32 Nawa etu tudi ayinsahu ayumiyi, nispiritu yajila yinenkiyi Nzambi antu amwovwahilaña nawa diyi nyuuli.” 33 Chatiyiliwu chumichi, chayitapili kumuchima chakwila akeñeleña kuyijaha apostolu. 34 Ilaña kaFwarisi wumu wejina daGamaleli, wanyamukili muSanihedirini; yeniwu muntu wadiña ntañishi waNshimbi walemesheliwu kudi antu ejima, dichi walejeli antu nindi ayitwali awa amayala hanji hakapinji kantesha. 35 Kuhiñahu wayilejeli antu nindi: “Enu antu amuIsarela, babalenu nachuma chimunakukeña kuyila awa amayala. 36 Chakutalilahu, henohu anu mafuku kanda ashiki, kwadiña muntu wejina daTeyudasa wadimweneña nindi walema nankashi, nawa amayala akushika ku 400 eñilili muchipompelu chindi. Ilaña amujahili, dichi antu ejima amulondeleleña ayipalañesheli nawa alekeli kumwekana. 37 Kufuma hadi Teyudasa, hahiñili Yudasi wakuÑaliliya mumafuku akudisonekesha, niyena nawa wakokeli antu amulondeleleña. Iwu iyala niyena wanoñeli nawa antu ejima amulondeleleña ayipalañesheli. 38 Dichi, kwesekeja naniyi yuma yinakumwekana, inakuyileja nami, bayi muyiluwañesha awa amayalaku, yilekenu. Muloña neyi aka kafuta hela iwu mudimu wunafumi kudi antu, jikufwomoka; 39 ilaña neyi jinafumi kudi Nzambi, himukutwesha kujifwomonaku. Muloña neyi kubabala nehi, mukuwana kwila nawu munekali akwakuzuña nayomweni Nzambi.” 40 Chatiyiliwu awa mazu, ovwahilili mwayifumbiliyi, dichi atambikili apostolu, ayeteli nakuyileja chikupu nawu aleki kuzatisha ijina daYesu hakuleja antu, nawa ayuumbiliku nawu ayeña. 41 Dichi afumini kudi akwaSanihedirini iku anazañalali, muloña ayisawili hamuloña wakuzatisha ijina dindi. 42 Nawa atwalekelihu nakutañisha nikushimwina nsañu yayiwahi hadi Kristu Yesu mutembeli kwitala nikwitala mafuku ejima.
NOVEMBER 26–DECEMBER 2
YUMA YALEMA YAMWIZU DANZAMBI | YILWILU 6-8
“Chipompelu Chachiha chawakwaKristu Anacheseki”
(Yilwilu 6:1) Mumafuku wenowu chelili atumbanji hiyakuvulilaku, aYudeya ahosheleña chiGiriki atachikili kutoobela aYudeya ahosheleña chiHeberu, muloña anfwila awu awambanda ayuminineña yakuda yanzañeneñawu yahefuku-hefuku.
“Nzambi Diyi Nyuuli Wutwatela Kwovwahila”
Chipompelu chachiha chamweni kukala nawa iku kukala kwafumini muchituñilu. Kukalanyi? Atumbanji amavulu apapatishiliwu adiña enyi muYerusalema nawa akeñeleña kudiza yuma yayivulu henohu kanda afunti kwafuminiwu. Atumbanji ashakamineña muYerusalema ahanineña yuma yawu kulonda alandimu yakuda niyuma yikwawu. (Yil. 2:44-46; 4:34-37) Haniyi mpinji, muchipompelu mwatachikili kumwekana kukala. Anfwila awambanda ahosheleña chiGiriki “ayuminineña yakuda yanzañeneñawu yahefuku-hefuku.” (Yil. 6:1) Ilaña, anfwila awambanda ahosheleña chiHeberu, ayuminineña yakuda wanyi. Iku kukala kwafumini hakwikala nachaambu. Kukala kwanyanya kwadi kuletesha chaambu chasweja kubadika ichi chitunashimuni.
(Yilwilu 6:2-7) Dichi apostolu 12 atambikili izaza dawatumbanji hamu nakuyileja nawu: “Chachiwahi wanyi etu kushiya izu daNzambi nakuya nakwanzañana yakuda kujimesa. 3 Dichi enu amanakwetu, tondenu amayala 7 mukachi kenu akweti yilwilu yayiwahi, enzala naspiritu nimaana kulonda tuyitondi akameneña iwu mudimu; 4 ilaña etu, tushi maana chikupu kukulomba nikumudimu wakushimwina mazu.” 5 Mazu ahosheliwu atiyishili izaza dawantu dejima kuwaha, dichi atondeli Stefwanu, iyala wadiña nachikuhwelelu chakola nawa wenzeli naspiritu yajila, niFwilipu niPorokorusi niNikanori niTimoni niPamenasi niNikola wakuAntiyoki, wabalumukili kwikala kaYudeya. 6 Kuhiñahu, ayileteli kudi apostolu nawa hanyima yakulomba, ayinañikili makasa. 7 Chafuminimu, izu daNzambi datwalekelihu nakutanda niatumbanji niwena atwalekelihu nakuvulilaku nankashi muYerusalema; nawa atupristu amavulu, etiyili.
“Nzambi Diyi Nyuuli Wutwatela Kwovwahila”
Chineli apostolu diwu adiña mwizanvu dalombweleña yipompelu yavulileña, elukili nawu chikuwaha wanyi wena “kushiya izu daNzambi nakuya nakwanzañana yakuda kujimesa.” (Yil. 6:2) Hakumanisha iku kukala, atumini atumbanji kuya nakukeñakeña amayala “enzala naspiritu nimaana” etejeliwu kudi apostolu kulonda “akameneña iwu mudimu.” (Yil. 6:3) Amayala ashikahu akeñekeleña muloña mudimu wadiñaku hiwadiña wakuhana hohu yakudaku ilaña nikuhemba mali, kulanda yuma yakeñekeleña nikuhemba marekodi. Amayala ejima atondeliwu adiña namajina achiGiriki, hadaha dichi chaletesheli ayiteji kudi ana ambanda anfwila akabishileñawu. Hanyima yakulombelahu apostolu atondeli amayala 7 kulonda “akameneña iwu mudimu.”
(Yilwilu 7:58–8:1) Chelili anamunatili dehi hanji yamusumba, atachikili kumwasa malola. Ayinsahu amweni chumichi atentekeli yakuvwala yawu yahewulu kunyendu yamukwenzi ateneneñawu nawu Sawulu. 59 Chamwasileñawu Stefwanu, walombeli nindi: “Mwanta Yesu, tambulaku spiritu yami.” 60 Kuhiñahu, wafukamini hamaseki nakubidika nezu datiyakana nindi: “Yehova, bayi wuyinka muloña waniyi nshidiku.” Chamanishiliyi kuhosha awa mazu, wakaamini tulu twakufwa.
8 Sawulu niyena wetejeli nindi amujahi Stefwanu. Hanodu ifuku, atachikili kukabisha chipompelu chadiña muYerusalema; dichi antu ejima apalañeneni mumaluña amuYudeya nimuSamariya kufumishaku hohu apostolu.
Kukeña Yuma Yalema yakuSpiritu
(Yilwilu 6:15) Nawa chelili antu ejima ashakamini muSanihedirini amushinshiki, amweni nawu kumesu indi kwamwekeneña neyi kumesu akañelu.
Stefwanu—“Wenzala Luwi niÑovu”
Kudi chuma chalema chamwekeni kumesu aStefwanu haniyi mpinji. Ansompeshi chiyamutaliliwu amweni kumesu indi kunabalumuki “neyi kumesu akañelu.” (Yil. 6:15) Añelu ashimunaña nsañu yaYehova Nzambi dichi atela kwikala akadi woma nawa awunda. Dichi chamwekeni niStefwanu—ninana ansompeshi amuheleli dichi chamumweniwu. Wekalili ñahi wawunda?
(Yilwilu 8:26-30) Hela chochu, kañelu kaYehova wamulejeli Fwilipu nindi: “Nyamukaku wuyi kukabeta kakuchidiilu munjila yakunkumuka kufuma kuYerusalema nakuya kuGaza.” (Iyi hinjila yahita muchinkalampata.) 27 Chatiyiliyi awa mazu, wanyamukili nakuya nawa chelili nindi yatali, wamweni ntuñu kaEtiyopiya, iyala wadiña nachifulu cheneni muchiyuulu chaKandesi mwanta wamumbanda wawaEtiyopiya, iwu iyala diyi wahembeleña maheta ejima aniwu mwanta. Iwu iyala wayili kuYerusalema nakudifukula, 28 wafuntileña kufuma kwayiliyi iku nashakami mwikalu dindi nawa nakutaña mukanda wakaprofwetu Isaya nezu datiyakana. 29 Dichi, spiritu yamulejeli Fwilipu nawu: “Yaku wuswini kwakwihi nadina ikalu.” 30 Fwilipu watemukili nakuya kwakwihi nanodu ikalu nawa wamutiyili iwu iyala nakutaña mukanda wakaprofwetu Isaya nezu datiyakana, wamwihwili nindi: “Nsañu yiwunakutaña, wunayiluki?”
Kushimwina “Nsañu Yayiwahi yaYesu”
16 AkwaKristu makonu adi nakukoleka kwakuzata mudimu neyi wazatili Fwilipu. Kakavulu ashimwinaña wunsahu wamumpanji nawa iyi nsañu yaWanta ayishimwinaña kudi antu, chidi neyi adi halwendu. Kakavulu, elukaña nawu akubulakana antu akweti mpwila. Muloña Bayibolu yalumbulula hatooka to-o nawu añelu diwu alombolaña mudimu wakushimwina kulonda nsañu yayiwahi yishiki kudi “akwanyuza yejima, akwanyichidi yejima, akwamadimi ejima niantu ejima.” (Chim. 14:6) Añelu chalombolañawu mumudimu wakushimwina chamwekeshaña nawu mazu ashimwiniyi Yesu alala. Muchishimu chindi chatidiku namatahu Yesu wahosheli nindi chiyikashika mpinji yakwañula—kukukuma kwanshakaminu yamakonu—“akwakumuna hiyañelu.” Wabombelelihu nindi yileñaleña yakuspiritu “[y]akakuñwija nikufumisha muWanta windi antu ejima aleñelaña akwawu kuvulumuna niantu akoñaña yakuluwalala.” (Mat. 13:37-41) Hampinji yoyimu, añelu akapompesha antu adi nakuchiñeja kwakuya mwiwulu nakwikala answana aWanta, kuhiñahu “izaza deneni” ‘dawanyikoku amakwawu, anakukeñayi Yehova kupompesha mukuloñesha kwindi.—Chim. 7:9; Yow. 6:44, 65; 10:16.
Kutaña Bayibolu
(Yilwilu 6:1-15) Mumafuku wenowu chelili atumbanji hiyakuvulilaku, aYudeya ahosheleña chiGiriki atachikili kutoobela aYudeya ahosheleña chiHeberu, muloña anfwila awu awambanda ayuminineña yakuda yanzañeneñawu yahefuku-hefuku. 2 Dichi apostolu 12 atambikili izaza dawatumbanji hamu nakuyileja nawu: “Chachiwahi wanyi etu kushiya izu daNzambi nakuya nakwanzañana yakuda kujimesa. 3 Dichi enu amanakwetu, tondenu amayala 7 mukachi kenu akweti yilwilu yayiwahi, enzala naspiritu nimaana kulonda tuyitondi akameneña iwu mudimu; 4 ilaña etu, tushi maana chikupu kukulomba nikumudimu wakushimwina mazu.” 5 Mazu ahosheliwu atiyishili izaza dawantu dejima kuwaha, dichi atondeli Stefwanu, iyala wadiña nachikuhwelelu chakola nawa wenzeli naspiritu yajila, niFwilipu niPorokorusi niNikanori niTimoni niPamenasi niNikola wakuAntiyoki, wabalumukili kwikala kaYudeya. 6 Kuhiñahu, ayileteli kudi apostolu nawa hanyima yakulomba, ayinañikili makasa. 7 Chafuminimu, izu daNzambi datwalekelihu nakutanda niatumbanji niwena atwalekelihu nakuvulilaku nankashi muYerusalema; nawa atupristu amavulu, etiyili. 8 Dichi Stefwanu, atiyileñawu kuwaha kudi Nzambi nawa wenkeliyi ñovu yindi, wakoñeleña yihayamisha niyinjikijilu yayivulu mukachi kawantu. 9 Ilaña amayala amakwawu amwizanvu dateneneñawu nawu Sinagogi Yawamayala Asubuka hamu nawantu amu akuKireni niAlesanderiya, kubombelahu niamakwawu afuminini kuSilisiya nikuAsiya, enjili kulonda aditaadikishi naStefwanu. 10 Hela chochu, hiyatwesheli kwimika mushindu maana nispiritu yajila yamukwashileña kuhoshaku. 11 Kuhiñahu ashinjilili antu mukuswamujoka kulonda ahoshi nawu: “Tunamutiyi chinahosheñayi mazu akumusawula Mosi niNzambi.” 12 Nawa asañumwini antu, akulumpi niansoneki, dichi amuvwakukilili, amukwatili chakumukanjikija nakumutwala kudi akwaSanihedirini. 13 Aleteli niayinsahu akutwamba ahosheli nawu: “Iwu iyala natwalekihu nakuhosha mazu akusawula dinu iluña dajila niNshimbi. 14 Chakutalilahu, tunamutiyi nakuhosha nindi iwu Yesu wakuNazareta wakasanda yinu tembeli nikubalumuna yaaku yatulejeliyi Mosi.” 15 Nawa chelili antu ejima ashakamini muSanihedirini amushinshiki, amweni nawu kumesu indi kwamwekeneña neyi kumesu akañelu.