Kapetulu 4

Muloñadi Wutwatela Kulemeshela Wunlomboli?

“Lemeshenu antu ejima.”—1 PETULU 2:17.

1, 2. (a) Muloñadi chichatwikalilaña kulemesha anlomboli? (b) Malwihwinyi yitukudiza?

MWAMONAHU dehi chelañayi mwana wanyanya neyi anamuleji kwila chuma chinakubula kukeñayi kwila? Mukumwena hehama dindi chihakuhimpika nenu mumuchima windi mudi ndombu yeneni. Chatiyayi anvwali jindi anakuhosha, yeluka nikwiluka nindi watela kuyilemesha. Ilaña haniyi mpinji, hanakukeña kwovwahila hohuku. Ndombu yidi mumuchima windi yinakumwekesha chuma chitwelaña wonsu wetu mumpinji mumpinji.

² Mpinji jikwawu chatwikalilaña kulemesha anlomboli. Komana ninenu chayikalilaña mpinji jikwawu kulemesha antu ayibadika? Neyi chayikalilaña, ilukenu nenu antu amavulu niwena chayikalilaña. Tunakushakama mumpinji yinakubulawu antu kulemesha anlomboli chikupu. Hela chochu, Bayibolu yahoshaña nawu twatela kulemesha antu enkawu ñovu jakutulombola. (Yishimu 24:21) Kafwampi, twatela kwila mwenimu neyi tunakukeña kushakama mukukeña kwaNzambi. Hela chochu, kudi malwihu yitwatela kudihula. Chumanyi chaleteshaña chitwikalileña kulemesha anlomboli? Muloñadi Yehova chakeñelañayi nindi tulemesheña anlomboli, nawa chumanyi chikutukwasha kwovwahila? Nkumininaku, munjilanyi mutunateli kulemeshela wunlomboli?

CHICHAKALILAÑA KULEMESHA ANLOMBOLI

3, 4. Indi nshidi nikubula kuwanina kwatachikili ñahi, nawa muloñadi nshidi chiyaletesha chitukalileña kulemesha anlomboli?

³ Tusambilenu kutala chantesha hayuma yiyedi yaleteshaña chitwikalileña kulemesha antu anakulombola. Chatachi, twawanina wanyi; chamuchiyedi, antu atulombolaña niwena hiyawaninaku. Nshidi jawantu nikubula kuwanina kwatachikili dehi kumashiita mwitempa daEdeni hamotokeluwu aAdama naEvu lushimbi lwaNzambi. Komana kudikaña dikwaleteli nshidi. Nikulelu, twekala nachaaku chakuvwalika nachu chakudikaña.—Kutachika 2:15-17; 3:1-7; Masamu 51:5; Aroma 5:12.

⁴ Hamuloña wanshidi yatwimakena, etu amavulu twatachikaña kudisamba nikudivwimba, ilaña twatela kuzata nañovu kulonda twikali nachililu chakudizoza chabula kwikala mudi antu amavulu. Hela chakwila tunamukalakeli Nzambi nakashinshi nyaka yayivulu, tunenzi twikali oma muchima nawa akwakudisamba. Chakutalilahu, talenu cheliliyi Kora, womikili hamu nawantu jaYehova nakashinshi mumakabi amavulu. Hela chochu, wafwilileña wanta nawa chamuleñeleli kudikaña naMosi chakubula kutiya nsonyi, iyala wamwovu nankashi hayina mpinji. (Kuchinda 12:3; 16:1-3) Toñojokenu cheñi hadi Mwanta Uziya, weñilili mutembeli yaYehova hamuloña wakudisamba nakukalakala mudimu wajila watela kukalakalawu atupristu. (2 Kushindulula 26:16-21) Awa amayala ayibabesheli chikupu hamuloña wakudikaña. Dichi yuma yatama yakoñeluwu yatela kutukwashaku wonsu wetu. Chiña tuleki kudisamba kwatukañeshaña kulemesha anlomboli.

5. Indi antu abula kuwanina azatishaña ñahi ñovu yawu chatama?

⁵ Munjila yikwawu, antu abula kuwanina ekala hayifulu akojejaña antu abuleña kulemesha anlomboli. Amavulu ekala nawukatu, atukanaña nikwetana, hela kumwesha antu kalula. Nawa chiyulu chawantu chenzala nsañu yakuzatisha wuswa chatama. (Mukwakutaŋisha 8:9) Chakutalilahu, Sawulu wadiñi muwahi, wadizoza heliliyi Yehova yamudishi wanta. Ilaña, watachikili kudisamba nikwikala nechima; kufumahu wamuyandishili Davidi iyala washinshika. (1 Samweli 9:20, 21; 10:20-22; 18:7-11) Nkumininaku Davidi wekalili hakachi kawanyanta amawahi muIsarela, ilaña wazatishili wuswa windi chatama hakushimba iñoda Uriya kaHiti nakutemesha ona iyala wakadi muloña kumbidi yanjita kulonda amujahi. (2 Samweli 11:1-17) Eña, kubula kuwanina kwakojejaña antu kuzatisha wuswa chatama. Sweje-e neyi anlomboli hiyamulemeshaña Yehovaku, dihaswejañawu dinu kwikala nawukatu. Chelili chilolu wakuBritain nalumbululi dehi chatachikiluwu apapa awaKatolika makabisha kwejima, wasonekeli nindi: “Kwikala nañovu kwakisañana antu, nawa kusweja kwikala nañovu kwakisañana muntu chikupu.” Chituneli tunadizi dehi hayuma yejimiyi, tutalenu hanilu lwihu: Muloñadi chitwatela kulemeshela anlomboli?

MULOÑADI WUTWATELA KULEMESHELA WUNLOMBOLI?

6, 7. (a) Indi kukeña kutwamukeña Yehova kwatuleteshaña kwiladi, nawa muloñadi? (b) Yumanyi yekala mukutiyilila?

⁶ Nyiloña yashikila yaleteshaña muntu kulemesha wunlomboli yashindamena hakukeña—kukeña kutwamukeña Yehova, akwetu antu, ninetu aweni. Hamuloña wakusweja kumukeña Yehova, twakeñaña kuzañalesha muchima windi. (Yishimu 27:11; Maku 12:29, 30) Tweluka netu chiyulu chindi, wuswa windi wakuyula yuma yejima, awijinooka kufuma tuhu hakudikaña kwadiñi muEdeni nawa antu amavulu adi kukabadi kaSatana nawa akaana chiyulu chaYehova. Ilañetu tudi namuzañalu wakwikala kukabadi kawanta waYehova. Neyi tutaña mazu awukeleñi ekala haChimwekeshu 4:11, nyichima yetu yahizumukaña. Twelukaña chikupu netu Yehova diyi Mwanta hohu wayuma yejima. Twahakwilañaku wanta waYehova, nikwiteja chiyulu chindi muchihandilu chetu chejima.

⁷ Mukalemesha kamuchidiwu mwabombela kwovwahila niyuma yikwawu. Twanyakalaña kumwovwahila Yehova muloña twamukeña. Hela chochu, kudi mpinji jikwawu jitwakañanyaña kwovwahila. Hampinji yamuchidiwu, kufwana ona kansi yitwatena hatachi, twatela kutiyilila. Twanukaña netu Yesu niyena wamutiyilileña Tata yindi hela chakwila chadiñi chuma chakala. Wamulejeli Tata yindi nindi: “Bayi ela munakeñamuku, chiña muwunakukeñeyi.”—Luka 22:42.

8. (a) Yumanyi yekala mukutiyilila wunlomboli waYehova makonu, nawa chumanyi chinakumwekesha chatiyañayi Yehova? (b) Chumanyi chikutukwasha kutiyilila kufumba nikwiteja kubabesha? (Talenu chikasha chidi hefu 46-7.)

⁸ Eña, makonu Yehova hahoshaña nanetu kanwa nakanwaku; wazatishaña Izu dindi niañimenu jindi awantu hamaseki. Dichi, twamwekeshaña netu twamutiyililaña Yehova kuhitila mukulemesha antu atondayi, hela etejayi kutwalekahu kwikala nawuswa wakutulombola. Chakutalilahu, neyi tukudikaña nanawa antu kuhitila mukukaana kufumba kwamuNyikanda kwatufumbañawu, tukumuneñesha Nzambi yetu. Chelili aIsarela atobi nikudikaña naMosi, Yehova wamweni yililu yawu nawu adiñi nakumutobela yena.—Kuchinda 14:26, 27.

9. Muloñadi kukeña akwetu antu chikukutuleñela kulemesha anakulombola? Lumbululenu.

⁹ Cheñi nawa twalemeshaña anlomboli muloña twakeña akwetu antu. Muloñadi? Difwikijenu neyi mudi ishidika. Hakwila nawu amashidika apuluki, chikushindamena hakutiyilila kwamushidika wudi wejima, kwovwahila, nikulemesha yimanku yawukulumpi. Neyi himunakwovwahila akulumpi jenuku, akwenu amashidika ejima anateli kwikala mukukala. Eña, amashidika awuntu akisañanaña nankashi mukanu kaayi. Ilaña, Yehova wukweti njita yakwashaña hohu antu. Bayibolu yamutena Nzambi kakavulu nawu “Nzambi wamazaza [wanjita].” (1 Samweli 1:3) Diyi Nlomboli wamukanka wanjita yayileñaleña yakuspiritu yañovu. Mpinji jikwawu, Yehova wafwanishaña ambuñindi ahamaseki neyi njita. (Masamu 68:11; Ezekeli 37:1-10) Neyi tukudikaña nawantu anatondiyi Yehova kwikala anlomboli jetu, komana hitunakusha akwetu amashidika akuspiritu mukukalaku? Neyi mukwaKristu yodikaña nawaeluda atondawu, antu amuchipompelu akuyandila kumu. (1 Akorinda 12:14, 25, 26) Neyi mwana yalumbuka, chisaka chejima chikuyandila kumu. Dichi twamwekeshaña kukeña kudi akwetu antu kuhitila mukuyilemesha nikuyovwahila.

10, 11. Indi mpwila yayeni yakuditiyisha kuwaha etu aweni yatukwashaña ñahi kwovwahila anlomboli?

¹⁰ Cheñi twalemeshaña anlomboli muloña chatukwashañaku etu aweni. Neyi Yehova yatwila nindi tulemeshi anlomboli, kakavulu watulejaña nikuwaha kwekalamu. Chakutalilahu, walejaña anyana kwovwahila anvwali jawu kulonda ashakami mafuku amavulu namuzañalu. (Kuhituluka 5:16; Aefwesesa 6:2, 3) Watulejaña kulemesha aeluda muchipompelu muloña neyi hitukwila mwokuku wulunda wetu naYehova Nzambi wukufwa. (Aheberu 13:7, 17) Watulejaña cheñi kwovwahila akwachiyulu kulonda twikali akiñewa.—Aroma 13:4.

¹¹ Komana himukwiteja nenu chitweluka muloña wakeñelañayi Yehova nindi twovwahileña chikutukwasha kulemesha anlomboluku? Hanu dinu, tutalenu chitwatela kulemesha anlomboli muyuma yisatu yamaneni yamuchihandilu chetu.

CHITWATELA KUMWEKESHA KALEMESHA MUCHISAKA

12. Mudimwinyi wamukunjikawu iyala nawa tata yawantu muchisaka, nawa munjilanyi iyala munateli kukalakelayi mudimu windi?

¹² Yehova yomweni diyi washiluku ntanjikilu yachisaka. Hakwikala Nzambi watanjika yuma chiwahi, waloñesha chisaka kulonda chizatikena chiwahi. (1 Akorinda 14:33) Wamwinka iyala nawa tata yawantu chifulu chakwikala mutu wachisaka. Iyala walemeshaña Mutu windi, Kristu Yesu, kuhitila mukwimbujola chazatishileñayi Yesu wumutu windi hachipompelu. (Aefwesesa 5:23) Dichi, iyala hatela kukañanya kukalakala mudimu winduku, chiña yawikoña chikupu; bayi yekala wawukatu hela wazuwaku, chiña wakukeña, watoñojokelañaku, nawa wawushona. Watela kwanuka nindi ñovu jindi jakuminamu, nawa habadika wunlomboli waYehovaku.

13. Indi mumbanda nawa mama yawantu nateli kuzata ñahi mudimu wamuchisaka munjila yakumuzañalesha Yehova?

¹³ Mumbanda nawa mama yawantu wazataña neyi nkwashi yeyala. Niyena amwinka wuswa muchisaka, muloña Bayibolu yahosha nawu “nshimbi jamama yeyi.” (Yishimu 1:8) Hela chochu, ñovu jindi hijabadika janfumwinduku. Mumbanda mukwaKristu walemeshaña wunlomboli wanfumwindi kuhitila mukumukwashaku kulonda yazati mudimu windi wawumutu wachisaka. Hamwinishaña iyala, hela kumuluwañesha, indi kwiji kumutambula chifuluku. Ilaña wakwashanaña nikwovwahila. Neyi haneteji munafuukuliyi iyalaku, watela kushimuna yitoñojoka yindi mumesu awunda, ilaña wukutwalekahu nakutiyilila. Neyi nfumwindi hetiyaku, wukumonaña kukala, dichi hakumwovwahila chikuletesha nfumwindi kumukeña Yehova.—1 Petulu 3:1.

14. Indi anyana anateli kuzañalesha ñahi anvwali jawu niYehova?

¹⁴ Anyana atiyishaña muchima waYehova kuwaha neyi ovwahilaña tata yawu nimama yawu. Aletaña cheñi kalemesha nimuzañalu kudi anvwali jawu. (Yishimu 10:1) Muyisaka mudi anvwali ajiki, anyana azatishaña nshimbi jojimu jakwovwahila, muloña eluka nawu nvwali yawu nakukeñesha nindi wena amukwasheña nikumwovwahila. Muyisaka mudi antu akalakalaña nyidimu yawu yayinkawu kudi Nzambi, mwekalaña kuwunda nimuzañalu chikupu. Chumichi chaletaña kalemesha kudi Ntachiki wayisaka yonsu, Yehova Nzambi.—Aefwesesa 3:14, 15.

CHITWATELA KUMWEKESHA KALEMESHA MUCHIPOMPELU

15. (a) Tunateli kumwekesha ñahi muchipompelu netu twalemeshaña wunlomboli waYehova? (b) Nshimbinyi yikutukwashaku kwovwahila anakutulombola? (Talenu chikasha chidi hamafu 48-9.)

¹⁵ Yehova watonda Mwanindi kwikala Nlomboli muchipompelu chawakwaKristu. (Akolose 1:13) Yesu niyena, namwinki ‘nduñu yindi wamaana nikashinshi’ mudimu wakukwasha antu jaNzambi hamaseki kukundama kwakwihi naYehova. (Matewu 24:45-47) Izaza Dalombolaña dawaYinsahu jaYehova demenañaku izaza danduñu. Neyi chichadiñi muchipompelu chawakwaKristu chamuyaaka nkulakaji yakusambila, makonu aeluda atambwilaña nshimbi nikufumba kudi Izaza Dalombolaña, chakubula añimeni hela kuhitila mudi añimeni, chidi neyi ankoñi endaña. Dichi etu neyi tulemesha wunlomboli wawaeluda akwaKristu, dikwila nawu tunakwovwahila Yehova.—Aheberu 13:17.

16. Munjilanyi aeluda mwayitondelañawu kudi spiritu yajila?

¹⁶ Aeluda niankoñi akuzatila hiyawaninaku. Niwena aluwañeshaña, neyi chochitwaluwañeshaña. Ilaña, aeluda ‘hiyamukunkulu mudi antu,’ ahanawu kulonda akwashi chipompelu chikali chakola kuspiritu. (Aefwesesa 4:8) Aeluda ayitonda kudi spiritu yajila. (Yililu 20:28) Munjilanyi? Muloña awa antu atela kuwanisha yuma yakeñekaña yasonekawu Mwizu daNzambi donenawu naspiritu. (1 Timotewu 3:1-7, 12; Titusa 1:5-9) Cheñi, aeluda ahitulukaña muyuma yakeñekaña hadi mana kwetu, alombaña spiritu yaYehova yajila kulonda yiyikwashuku.

17. Hakukalakala nyidimu yamuchipompelu, muloñadi ambanda chavwalilañawu yitambala mpinji yikwawu?

¹⁷ Muchipompelu, mpinji yikwawu mukuwana mwosi aeluda hela ankoñi akuzatila atela kukalakala mudimu wayinkawu, chidi neyi kulombola kwakuya mumudimu wamwiha. Neyi chidi mwenimu, ana kwetu amakwawu apapatishewa anateli kulombola. Neyi ana kwetu hosuwu, ahela akwaKristu ashikahu atela kulombola. Dichi neyi mumbanda nakukalakala mudimu wakunjikawu amayala hetala hela muchipompelu, watela kuvwala chitambala.a (1 Akorinda 11:3-10) Iyi nshimbi bayi neyi yasawulaña ambandaku. Ilaña, yayinkaña kukooleka kwakulemesha ntanjikilu yaYehova yawumutu, muchisaka nimuchipompelu.

KULEMESHA ANLOMBOLI JETUÑA

18, 19. (a) Munateli kulumbulula ñahi nshimbi jidi haAroma 13:1-7? (b) Twalemeshaña ñahi anlomboli jetuña?

¹⁸ AkwaKristu ashaku muchima wakulondela nshimbi jekala haAroma 13:1-7. Chimukutañaña haniyi nsañu, mukumona nenu “anyanta,” anatenuwu hanu hinfulumendi jawantu. Hamuloña wakwila Yehova wajiteja kutwalekahu, jakalakalaña nyidimu yamaneni, kukañesha madombu nikukoña nyidimu yayiwahi. Dichi twamwekeshaña kalemesha kunfulumendi kuhitila mukwovwahila nshimbi. Twatela kumona nawu tunafweti nyisonku yejima, kusoneka chiwahi yipapilu yakeñaña nfulumendi, kulondela nshimbi jitwatela kwovwahila, nichisaka, nimudimu hela maheta etu. Ilaña kwila twovwahila anlomboli jamatuña neyi akutwila nawu tudikañi naNzambi, chinjila. Twakulaña neyi chakwiluwu apostolu kunyima nawu: ‘Twatela kwovwahila Nzambi neyi nyuli bayi antuku.’—Yililu 5:28, 29; talenu chikasha chinakwila nawu “Hinyi Yinatela Kwovwahila?” chidi hefu 42.

¹⁹ Twalemeshaña cheñi anlomboli jetuña kuhitila mukulemesha antu amakwawu. Mpinji jikwawu, tunateli kuhosha nawanlomboli anfulumendi kanwa nakanwa. Kapostolu Pawulu wahosheluhu nawanyuli amuchidiwu chidi neyi Mwanta Herodi Agiripa niÑuvulu Fesitusi. Awa amayala aswejeli yiluwa, ilaña Pawulu wayiteneneña nakalemesha. (Yililu 26:2, 25) Twembujolaña chakutalilahu chaPawulu, chili mukwanshimbi hinyuli muneni hela hikapokola wamwiluña detu. Hashikola, atwansi akwaKristu afwilaña kuhana kalemesha kamuchidiwu kudi antañishi jawu nikudi akulumpi jashikola niankoñi. Ilaña, hitwalemeshaña hohu antu eluka yuma yitwakuhwelelaku; twalemeshaña cheñi niantu adikañaña nawaYinsahu jaYehova. Mwamweni, niantu abula kwitiya ejima atela kumona nawu twekala nakalemesha.—Aroma 12:17, 18; 1 Petulu 3:15.

20, 21. Kukoolekanyi kukwawu kwafumaña mukumwekesha kalemesha kakeni kudi anlomboli?

²⁰ Dichi bayi twikala nawudi hakumwekesha kalemeshaku. Kapostolu Petulu wasonekeli nindi: “Lemeshenu antu ejima.” (1 Petulu 2:17) Neyi antu eluka nawu twayilemesha chikupu, anateli kuzañalala nankashi. Anukenu nenu, makonu antu hiyanakuvula kumwekesha kalemeshaku. Dichi neyi tukumwekesha kalemesha, dikwila nawu tunakwovwahila lushimbi lwaYesu lwakwila nawu: “Chejeji chenu chitoñekaña kumesu awantu, kulonda amonaña nyidimu yenu yayiwahi, alemeshaña Tata yenu wudi mwiwulu.”—Matewu 5:16.

²¹ Mukanu kaayi mudi mwidima, antu akweti nyichima yayiwahi anakuyikokela kuchejeji chakuspiritu. Dichi neyi tukumwekesha kalemesha muchisaka, muchipompelu, nikudi akwamatuña tukukokola antu amakwawu nawa tukwendela nawu hamu muchejeji. Oyuma yitwatalilaña okuwaha! Hela chakwila antu hiyakenza kudi Nzambuku, twatela kwiluka netu tunakumuzañalesha Yehova neyi tulemesha antu nawa chakatukwashaku kushakama mukukeña kwindi. Iwu hiwuloku weneni chikupu.

[Tumazu twaheshina]

[Chikasha chidi hefu 42]

HINYI YINATELA KWOVWAHILA?

Lushimbi: “Yehova diyi nsompeshi yetu, Yehova diyi mukwakutwinka nshimbi, Yehova diyi mwanta wetu.”—Isaya 33:22.

Malwihu yimwatela kudihula

▪ Chumanyi chinadi kwila neyi anleja nawu nifumpi nshimbi jaYehova?—Matewu 22:37-39; 26:52; Yowanu 18:36.

▪ Chumanyi chinadi kwila neyi anleja nawu nileki kwila mwaya nshimbi jaYehova?—Yililu 5:27-29; Aheberu 10:24, 25.

▪ Chumanyi chatela kunkwashaku kwovwahila anlomboli?—Aroma 13:1-4; 1 Akorinda 11:3; Aefwesesa 6:1-3.

[Chikasha chidi hefu 46, 47]

“TIYAKU MWAKUKULEJAWU, ITIJAKU KUKUFUMBA”

Yililu yaSatana, yakudikaña, nimadombu, yinatandi mukaayi makonu. Bayibolu yahoshaña nawu Satana diyi “mwanta wamuluzwizu wañovu” nawa yashimunaña nawu “wakoñeshaña katataka mudi akwakujikwa.” (Aefwesesa 2:2) Antu amavulu makonu hiyanakukeña hela chanti kuyilombola kudi akwawuku. Chawushona, yililu yakudimena yineñili nimudi amana kwetu muchipompelu chawakwaKristu. Chakutalilahu, eluda nateli kuhana kufumba hawubanji wafumaña mukuluwalala hela muyisela yamadombu, ilaña amakwawu anateli kukaana hela kuhilashana. Wonsu wetu twatela kulondela mazu adi haYishimu 19:20: “Tiyaku mwakukulejawu, itijaku kukufumba, kulonda wakekali namaana kukukuminina kweyi.”

Hanu dinu chumanyi chikutukwashaku? Talenu yuma yisatu yakojejaña antu kukaana kuyileja hela kuyifumba, nawa mutali chahosha Bayibolu.

▪ “Namoni hatela kunlejaku.” Tunateli kutoñojoka netu mazu atulejawu hiyanakundami kudi etuku hela netu muntu wunatulejeña heluka chidi nsañu yejimaku. Hamuloña wakufuukula lufuchi chikutuleñela kudiwula munatulejuwu. (Aheberu 12:5) Chineli wonsu wetu hitwawaninaku, yitoñojoka yetu diyi twatela kuhimpa, netuku? (Yishimu 19:3) Komana hikwadiña chuma chaletesha atwifumbuku? Dichi twatela kushinshika hachuma chaletesha atwifumbi. Izu daNzambi datulejaña nawu: “Kwataku kufumbika mbe, bayi yena akukosomokaku; muhembi muloña yena diyi wumi weyi.”—Yishimu 4:13.

▪ “Natiya kutama munjila yanlejelamu.” Chalala, Izu daNzambi dashimuna njila mutwatela kulejela muntu. (Aŋalija 6:1) Hela chochu, Bayibolu yahoshaña cheñi nawu: “Antu ejima anavulumuni, anakañanyi kushika mwashikila kulema kwaNzambi.” (Aroma 3:23) Dichi njila yimu hohu mutwatela kutambwila kufumba kwalala munjila yayiwahi yoyakufuma kudi muntu waloña. (Yakoba 3:2) Yehova wazatishaña antu abula kuwanina kutwifumba, dichi chikuwaha neyi tukubula kushinshika hanjila yinakutufumbilamu. Ilaña, shinshikenu hansañu yinayifumbiluwu, nawa lombenu kulonda mwiluki chakuzatisha mazu anayilejuwu.

▪ “Hanashikilumu kunlejaku!” Neyi tutoñojoka netu yiluwa yamuntu wunakutufumba diyi yinaleñeli tubuli kutiya mwanatufumbiyi, twatela kwanuka yikuma yinashimunuwu hewulu. Cheñi nawa neyi tunakutoñojoka netu hitwatela kufumbewaku muloña wawukulumpi, yuma yitunamoni, hela kukooleka kutukweti muchipompelu, twatela kuhimpa yitoñojoka yetu. MuIsarela wakunyaka, mwanta wadiñi nanyidimu yamaneni, ilaña wateleleli kwiteja atuprofwetu, atupristu, niantu amakwawu hakachi kawayilolu kumufumba. (2 Samweli 12:1-13; 2 Kushindulula 26:16-20) Makonu, kuloñesha kwaYehova kwatondaña amayala abula kuwanina kulonda ahaneña kufumba, nawa akwaKristu apama etejaña iku kufumba nikukwizatisha. Dichi neyi tukweti nyidimu yayivulu hela tweluka yuma yayivulu kubadika akwetu, twatela kushaku muchima chikupu kulonda twikali chakutalilahu chachiwahi nawa adizoza kuhitila mukwiteja kufumba nikukwizatisha.—1 Timotewu 3:2, 3; Titusa 3:2.

Eñañi, kwosi niwumu wukuhosha nindi ami kwila anfumba nehi. Dichi tufwilenu kwiteja kufumba kwejima kukutufumbawu, nikukwizatisha, nawa tuswejenu kumusakilila Yehova hakutwinka chawaana chakupulwisha wumi. Komana kufumba hinjila yimu yamwekeshelañamu Yehova nindi watukeña nawa tunakukeña kushakama mukukeña kwindi.—Aheberu 12:6-11.

[Chikasha chidi hefu 48, 49]

“OVWAHILENU ANLOMBOLI JENU”

MuIsarela wakushankulu, kwadiñi kukankila kweneni kwakwikala nawantu akulombola. Mosi nkawindi hadi kutwesha kulombola yihita yawantu endeleña hamu mwisaña dafwanaku. Hanu dinu welilidi? “Mudi aIsarela ejima Mosi watondelumu amayala ashinshika, wayikunjikili ekali akulumpi jawantu, awa ayuli makombakanji awantu, awa ayuli makulakaji awantu, awa ayuli makumi atanu awantu, awa ayuli makumi awantu.”—Kwidika 18:25.

Muchipompelu chawakwaKristu makonu, kudi kukankila kwamuchidiwu kwawanlomboli. Dihafuma izanvu damudimu wamwiha kwikala namukwakutwaminina, chipompelu chikweti aeluda, yipompelu yayivulu yikweti nkoñi wañinza, jiñinza nijena jikweti nkoñi wankambi, niituña nidena dikweti Komiti Yetuña hela Komiti yaMutayi. Hamuloña waniyi ntanjikilu, muntu wejima wukweti mudimu wawukabiña watela kusha kashinshi kudi anyikoku jaYehova amwinkawu kwakamena. Atubiña amuchidiwu akashimunamu kudi Yehova niKristu.—Yililu 20:28.

Iyi ntanjikilu yakulombwelamu yipompelu yatuleñelaña wonsu wetu kwovwahila nikutiyilila. Dichi bayi twikala nayililu yaDiyotefwesi, wabulileña kulemesha anlomboli amumpinji yinduku. (3 Yowanu 9, 10) Ilaña twatela kutiyilila mazu akapostolu Pawulu, wasonekeli nindi: “Ovwahilenu anlomboli jenu nakuyitiyilila, muloña ahembaña nyichima yenu, nawu twamba kashimunamu; kulonda eli mwenimu namuzañalu bayi nakuneñaku, muloña neyi akuneña hichikuyikwasha enuku.” (Aheberu 13:17) Antu amakwawu ovwahilaña neyi eteja munayilejuwu kudi anlomboli ilaña akaanaña kwovwahila neyi atadika munayilejuwu hela neyi anakañanyi kwiluka muloña waweni wunayilejeluwu. Hela chochu, anukenu nenu, mukutiyilila mwekala nikwovwahila hela hichinakukeñeka nawu twovwahiluku. Dichi, wonsu wetu twatela kudihula netu, ‘Komana novwahilaña nikutiyilila kudi anlombolaña?’

Hela chochu, Izu daNzambi hidashimuna ntanjikilu yejima hela njila yakeñekaña hakukwasha chipompelu nawu chizatikeñaku. Ilaña, Bayibolu yahosha nawu: “Yuma yejima ayili chakutela nakuloña.” (1 Akorinda 14:40) Izaza Dalombolaña dovwahilaña ilu lushimbi kuhitila mukushaku jinjila jashiyashana ninshimbi jajiwahi kulonda yuma yejima muchipompelu yendeña chiwahi nawa mukutelela. Aeluda atondawu niankoñi akuzatila afwilaña kulondela iyi ntanjikilu nikwikala chakutalilahu chakwovwahila. Ekala cheñi ‘ovwaha, anyakalaña kutiyilila’ ayilombolaña. (Yakoba 3:17) Dichi, izanvu nizanvu damudimu wamwiha, chipompelu, ñinza, nkambi, niituña dikweti izanvu dawakwakwitiya, danuñañana dembujolaña mukutelela chikupu Nzambi wamuzañalu.—1 Akorinda 14:33; 1 Timotewu 1:11.

Munjila jikwawu, mazu aPawulu ekala haAheberu 13:17 niwena akonkomwenaña hakudikaña chikwekalila kwafwana. Kudikaña kunateli kukojeja anlomboli kuzata mudimu wawu ‘nakuneña.’ Chatela yikali njila yayiwahi yakumukalakelamu Yehova nawa yakukwashilamu ana kwindi, ilaña yinateli kwikala chitelu neyi mana kwetu wukukolama nikudikaña hadi anyikoku. Chikufumamu, hichikuyikwasha “enuku,” chipompelu chejima. Cheñi nawa, kudi kukisika kukwawu kwamwekanaña neyi muntu yokaana kutiyilila ntanjikilu yaNzambi. Wubwambu windi naYehova wukuluwankana neyi yobula kutiyilila hamuloña wakudisamba, yodishila nichikinza naTata yindi wamwiwulu. (Masamu 138:6) Dichi, wonsu wetu tufwilenu kwovwahila nikutiyilila.

[Nyevulu yidi hefu 40, 41]

MukwaKristu nawa tata yawantu wembujolaña chazatishañayi Kristu wumutu windi