Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
JANUARY 3-9
YUMA YALEMA YAMWIZU DANZAMBI | ANSOMPESHI 15-16
“Wunfukeji Watama Chikupu!”
Wunfukeji hiChinjikijilu Chatama Chakwilukilaku Mpinji Yitunashikumu!
Tusambilenu kutala hadi kavuba nsañu Delila, akeñeluwu chikupu kudi Nsompeshi Samisoni. Samisoni wakeñeleña kwasa njita nawaFwilistinu nakulwila antu jaNzambi. Hadaha hamuloña wakwiluka nawu Delila hamukeñeli Samisoni nankashuku, amayala atanu awaFwilistinu amwinkeli Delila mali amavulu kulonda yayileji kajindilu kamwinkeleña Samisoni ñovu jabadika kulonda amujahi. Iwu nfukeji Delila watambwili mali amwinkeluwu ilaña wesekeli kufuñununa kafuta kaSamisoni mapampa kasatu, wakañenyi. Watwalekeluhu nakumukakeja “namazu indi, hakumushinjila.” Nkumininaku, “yena yotiya nikumuchima bwi neyi kufwa hohu.” Yamuleja nikumuleja nindi kanda yatewuleñahu dehi nsuki, neyi yatewula ñovu jikumumana. Chelukiliyi, Delila wamukaamikili Samisoni hamakata indi nawa walejeli antu nindi amutewuli nsuki, kufumahu wamuhanini kumakasa awayilumbu jindi kulonda amwili mwakeñeleñawu. (Ansomp. 16:4, 5, 15-21) Wakoñeli chuma chatama nankashi! Hamuloña walwisu, Delila wamufukejeleli muntu wamukeñeli nankashi.
w05 1/15 27 ¶5
Yikuma Yamaneni Kufuma muMukanda waAnsompeshi
14:16, 17; 16:16. Kushinjila muntu kuhitila mukumukakeja nikudila kunateli kuluwañesha wubwambu.—Yishimu 19:13; 21:19.
Wunfukeji hiChinjikijilu Chatama Chakwilukilaku Mpinji Yitunashikumu!
Indi adisumbula anateli kwikala ñahi nakashinshi kudi enikwawu? Izu daNzambi dahoshaña nawu: “Luñaku nañodeyi [hela nfumweyi] wakuwukwenzi weyi,” dahosha cheñi nawu, “Shakamaku nakuzañajala nañodeyi [hela nfumweyi] wakeña.” (Yish. 5:18; Mukwa. 9:9) Hampinji yinakushinakajilawu hamu, atela ‘kusha maana’ niyitoñojoka hamaluwi awu. Dikwila nawu atela kudakamena wumu namukwawu, kwikala nampinji yakushakama hamu, nikudikunda chikupu. Atela kusha maana hakuhemba maluwi awu nikukolesha wubwambu wawu naYehova. Cheñi nawa, adisumbula atela kudizila Bayibolu hamu, kuzatila hamu mwiha mpinji yejima, nikulombela hamu nkisu jaYehova.
IKALENU ASHINSHIKA KUDI YEHOVA
Muchipompelu mwekalaña antu akoñeli nshidi yeneni nawa ayizuwilili ‘nañovu hansañu oyu, kulonda akoli mukwitiya kwakukuhwelela.’ (Tit. 1:13) Amakwawu ayihañili muchipompelu hamuloña wayililu yawu yatama. Ilaña ‘antu etejaña kufumba,’ kwayikwashaña kwikala akola cheñi kuspiritu. (Heb. 12:11) Twatela kwiladi neyi ntaña yetu hela ibwambu detu anamuhañi muchipompelu? Twatela kumwekesha kashinshi kudi Nzambi bayi kudi muntu anahañuwuku. Yehova nakututala kulonda amoni neyi tunakwovwahila lushimbi lwindi lwakubula kudikunda namuntu wahañawu.—Tañenu 1 Akorinda 5:11-13.
Yuma Yalema yakuSpiritu
w05 3/15 27 ¶6
Yehova Diyi Wamwinkeli Samisoni Ñovu Yakushinda!
Samisoni wadiña nayitoñojoka yambukaku yakufwila kwila chuma chakeñeleñayi, kuzuña njita nawaFwilistinu. Washakamini hetala damumbanda chivumbi muloña wakeñeleña kuzuña nawayilumbu jaNzambi. Samisoni wakeñeleña iluña kwatela kukamayi nawufuku, nawa idi iluña dadiña hohu kwitala dachivumbi. Samisoni hatoñojokeleñahu jakwila wuvumbiku. Wahindukili mukachi kawufuku, yakwata niyenzelu yakuchiisu champwembu yamukala niyishimi yayu nimukomenu kumu, yayijuula nikuyijuula, hakuyisha hamafwiji indi hakuyisenda nakutwala kwiwulu dampidi kwakwihi naHeberoni, hadiña makilomita 60. Nzambi diyi wamulombweleña nawa diyi wamwinkeli ñovu.—Ansompeshi 16:1-3.
JANUARY 10-16
YUMA YALEMA YAMWIZU DANZAMBI | ANSOMPESHI 17-19
“Mukubula Kwovwahila Nshimbi jaNzambi Mwafumaña Kukala”
it-2 390-391
Mika
1. Iyala kaEfweremi. Mika wafumpili lushimbi lwamu 8 lwahanshimbi 10 (Kwi 20:15), weyili siliva 1,100 yamama yindi. Chetejeliyi nindi weyili nakufuntisha siliva, mama yindi wahosheli nindi: “Siliva yina ami namujilikiliyi Yehova yakufuma kuchikasa chami yamwanami, yakwila nachu mukishi wakusoña nimukishi wakusuñununa; dichi dinu nukukufuntishilayu.” Wasendeli siliva 200 nakwinka muchiji, niyena welili “mukishi wakusoña nimukishi wakusuñununa” nkumininaku ayishili mwitala daMika. Mika “wadiñi netala dawankishi,” watuñili niifwodi ninkishi jakupanda, wajilikili nimwanindi weyala wumu kulonda yekali kapristu kindi. Hela chakwila welili iyi yuma kulonda amulemeshi Yehova, welili chatama muloña wafumpili lushimbi lwahosha hakubula kupesha ankishi (Kwi 20:4-6) nawa wadiwili nshimbi jaYehova jahatabanaka nijawupristu. (Ans 17:1-6; Kuh 12:1-14) Nkumininaku, Mika wasendeli Jonatani mwijikulu aMosi mwana kaGereshomi kwitala dindi nawa wamwilishili iwu iyala kaLevi kwikala kapristu kindi. (Ans 18:4, 30) Chawushona, chineli watiyili kuwaha nayuma yeliliyi, Mika wahosheli nindi: “Ichi dinu neluki nami Yehova wakañila chachiwahi.” (Ans 17:7-13) Ilaña Jonatani hadiña wamuchisaka chaAroniku nawa hateleleli kuzata mudimu wawupristuku, ichi chuma chaletesheli Mika kuluwañeshelaku cheñi.—Kuc 3:10.
it-2 391 ¶2
Mika
Hashimbwili wanyi, Mika niamayala adiñawu nawu atachikili kuyilondela anyana kaDani. Chelili anayiwani dehi nawa ayihuli nawu kunasoñidi, Mika wahosheli nindi: “Munatambuli ankishi ami inelili, nikapristu, himukudiyila kwenu, indi ami nashali nadi?” Dichi anyana kaDani amulejeli Mika nawu neyi atwalekahu kuyilondela akumujaha. Mika chamweniyi nindi anyana kaDani anasweji ñovu, wabalumukili nakufunta kwitala dindi. (Ans 18:22-26) Anyana kaDani ajahili aLayishi nikwocha mukala wawu, kuhiñahu atuñili musumba waDani hadiña Layishi. Jonatani nianyanindi ekalili atupristu awa anyana kaDani, “emikili mukishi owu wakusoña weliliyi Mika nyaka yejima yadiñi itala daNzambi [tabanaka] muShilo.”—Ans 18:27-31.
Yuma Yalema yakuSpiritu
Bayibolu Yapela Kutiya Nawa Yakwashaña
Makonu, kudi wunsahu wawuvulu wunakumwekesha nawu twatela kuzatisha ijina daYehova. Bayibolu yamu 2013 yasonekawu chachiha yaNew World Translation asonekamu ijina daNzambi mapampa 7,216. Dikwila nawu abombeleluku mapampa 6 kubadika Bayibolu yamu 1984. Hakachi kaniyi namba, atanu ayibombelumu muloña ijina daNzambi adiwana katataka muNyivuñilu yawaninuwu kukaluñalwiji kaDead Sea. (Talenu tumazu twaheshina.) Atanu ekala hamukanda wa 1 Samweli 2:25; 6:3; 10:26; 23:14, 16. Yamuchitanu nakamu, yekala hamukanda waAnsompeshi 19:18, ayisonekeli muloña asandujoleli mumamanyusikilituputi akunyaka.
JANUARY 17-23
YUMA YALEMA YAMWIZU DANZAMBI | ANSOMPESHI 20-21
“Twalekenuhu Kulomba Kudi Yehova”
Komana Munateli Kumwimbujola Fwinehasi Neyi Muholokela Mukukala?
Amayala akuGibeya akumuchidi waBenjamini akoñeli chuma chatama, akakejeli ntombu yawaLevi nawu akami nindi nawa amujahili, dichi nyichidi yikwawu yanyamukili ayili nakwasa njita nawaBenjamini. (Ansomp. 20:1-11) Alombeli kudi Yehova nawu yayikwashi henohu kanda atachiki kuzuña, ilaña ayishindili mapampa kayedi, amavulu afwili. (Ansomp. 20:14-25) Komana ateleleli kutoñojoka nawu kulomba kwawu hikwashikileña kudi Yehovaku? Komana mwalala Yehova wakeñeleña nindi ayi nakwasa njita hamuloña wachuma chatama chamwekeni?
Komana Munateli Kumwimbujola Fwinehasi Neyi Muholokela Mukukala?
Chumanyi chitwatela kudizilaku? Kukala kukwawu kwamwekanaña muchipompelu kwatwalekañahu hela chakwila aeluda azataña nañovu nikulomba wukwashu waNzambi. Neyi chumichi chimwekana, aeluda atela kwanuka mazu aYesu akwila nawu: ‘Twalekenuhu nakulomba akuyinka; keñakeñenu mukuwana; dondomwenenu akuyenzulwila.’ (Luka 11:9) Hela chakwila kulomba kwawu abula kukwakula swayi, ankoñi atela kwiluka nawu Yehova nateli kwakula hampinji yindi yatelela.
Yuma Yalema yakuSpiritu
Komana Mweluka?
Indi nyonji yakwasa nachu ayizatishileña ñahi kunjita?
Davidi wamujahili Goliyati nanyonji yakwasa nachu. Chinamwekani neyi Davidi wadizili chakuzatisha nyonji yakwasa nachu hampinji yadiñayi kabiña.—1 Samweli 17:40-50.
Nyonji yakwasa nachu ayimwekesha munyevulu yakuleña yakunyima yawaEjipitu nawaAshuri. Iyi nyonji yakwasa nachu yadiña nampapa hela kadihina kwakasilileñawu nyonji yiyedi. Mukakwasa washileñamu ilola dasenena hela danjiñumuki dadiña namasentimita 5 nakushika ku 7.5 nawa dadiña namagilamu 250. Wazuyileña nyonji yakwasa nachu kuhiñahu wombileña kumwonji wumu nawa ilola dafumineñamu nakuya nakwasa hanatontiyi.
Mpinji yavumbujoleleñawu kuMiddle East awanini malola amavulu akwasa nachu azatishileñawu kunyima hakuzuña njita. Amashidika akuluka yitembi neyi anasi malola endeleña makilomita 160 nakushika 240 haora (160 nakushika ku 240 km/h). Antu adiza chikupu akanaanaña nawu monji wakwasa nachu kwila wasa neyi wuta wamukunji nehi, ilaña monji wakwasa nachu wunateli kujahañana.—Ansompeshi 20:16.
JANUARY 24-30
YUMA YALEMA YAMWIZU DANZAMBI | LUTI 1-2
“Ikalenuña naKukeña kwaKashinshi”
Imbujolenu Amabwambu jaYehova
Antaña jaLuti ashakamineña kuMowabi. Wadi kufunta kudi antaña jindi nawa adi kumuhemba chiwahi. Welukili antu akuMowabi, idimi nichisemwa chawu. Nyawomi wamulejeli wanyi Luti chisemwa nidimi dakuBetelemi. Nawa Nyawomi wakameneni nindi wakatwesha wanyi kumuwanina Luti iyala hela itala mwakukama. Dichi Nyawomi wamulejeli Luti kufunta kuMowabi. Neyi chitwamona, Oripa “wafuntili kumukala wawu nikudi ankishi indi.” (Luti 1:9-15) Ilaña Luti wafuntili wanyi kudi antaña jindi niankishi jawu.
Imbujolenu Amabwambu jaYehova
Chinamwekani neyi Luti wamwilukili Yehova kuhitila mudi nfumwindi hela Nyawomi. Welukili nindi Yehova wekala wanyi neyi anzambi akuMowabi. Wamukeñeli Yehova nawa welukili nindi wateleleli kumukeña nikudifukula kudi yena. Dichi Luti watondeli mwamaana. Wamulejeli Nyawomi nindi: “Antu eyi akwila antu ami. Nzambi yeyi wukwila Nzambi yami.” (Luti 1:16) Twakoleshewaña neyi tutoñojoka hadi Luti chamukeñeliyi Nyawomi. Ilaña chuma chatukoleshaña chikupu hikukeña kwamwekesheliyi Luti kudi Yehova. Chumichi chamuzañalesheli Bowazi, wamuhamekeli Luti hakukeña ‘kubatama mumpuula jaYehova.’ (Tañenu Luti 2:12.) Mazu azatishiliyi Bowazi anateli kutwanukisha kana kakada chikakeñaña kukikiña mumpuula jamama yindi. (Masamu 36:7; 91:1-4) Munjila yoyimu, Yehova wamukiñili Luti nawa wamukiswilili hamuloña wachikuhwelelu chindi. Luti waditoñesheluhu wanyi namwafuukwiliyi.
Yuma Yalema yakuSpiritu
w05 3/1 27 ¶1
Yikuma Yamaneni Kufuma muMukanda waLuti
1:13, 21—Komana Yehova wamumwesheli Nyawomi kalula nikumuletela kukala? Inehi, nawa Nyawomi hamutwikilihu Nzambi muloña hayuma yidi yejimaku. Hela chochu, hamuloña wayuma yamumwekeneni, watoñojokeli nindi Yehova diyi wamumwesheli kalula. Watiyili chikela nikutama. Ilaña muyina mpinji, muntu neyi wavwalaña anyana achimweneña nawu hinkisu nawa neyi hinshinta achimweneña nawu hiishiñu. Chelili yabuli kwikala nawejikulu nawa yajimbeshi anyanindi ayedi, hadaha Nyawomi watoñojokeli nindi Yehova namusawuli.
JANUARY 31–FEBRUARY 6
YUMA YALEMA YAMWIZU DANZAMBI | LUTI 3-4
“Ikalenu Nejina Dadiwahi Nawa Twalekenuhu Kwikala Nadu”
“Wumumbanda Washinshika”
Chakadi nikujina, mazu amwovu nawa amawahi ahosheliyi Bowazi amukundejeli Luti. Wahosheli nindi: “Yehova akukiswili nkisu, mwanami. Hela hakusambila wela chachiwahi, katataka wunasweji dehi, ochu chiwunabuli kukeña anyikwenzi hela abula kuheta, hela aheta.” (Luti 3:10) ‘Mpinji yakusambila’ yamwekesheliyi Luti kukeña kwakashinshi himpinji yafuntiliyi naNyawomi kuIsarela nawa yamwakameneniyi. ‘Mpinji yakukumishaku’ yadiña hana hahosheleñayi. Bowazi washimwini nindi chineli Luti wadiña kansi wadi kutonda iyala wakumusumbula hadi akwenzi, samaheta hela kazweñi. Ilaña, wakeñeleña kumwila Nyawomi chachiwahi ninfumwindi wafwa dehi, kulonda ijina damuntu wafwa dehi dibuli kujiya chili mukala windi. Ichi chuma dichaletesheli Bowazi kumukeña iwu kansi wamumbanda muloña wakudihana kwindi.
“Wumumbanda Washinshika”
Luti wazañaleli nawa watoñojokeli hamazu ahosheliyi Bowazi nindi amwilukili kudi antu ejima nawu wadiña “mumbanda washinshika.” Chakadi nikujina, chafwilileñayi kumwiluka Yehova nikumukalakela nichena chaletesheli ijina dindi kwikala dadiwahi. Wamumwekesheleli cheñi Nyawomi niantu jindi luwi. Nawa wahimpili chihandilu chindi kulonda yenjilili tushidikilu nichisemwa chabulili kwilukayi. Neyi twimbujolaña chikuhwelelu chaLuti, tukuyilemeshaña akwetu niyisemwa yawu. Neyi twilaña yumiyi, ninetu tukwikala nejina dadiwahi.
“Wumumbanda Washinshika”
Bowazi wamusumbwili Luti. Kuhiñahu twatañaña netu: ‘Yehova wamuletesheli kwimita ivumu, wavweli mwana weyala.’ Ambanda amuBetelemi amukiswilili Nyawomi nawa amuhamekeli Luti hakwikala chiwahi kudi Nyawomi kubadika chinateli kwikala anyana awamayala atanu nayedi. Twadizaña netu chimwahitili mpinji mwana kaLuti wekalili nkakulula yaMwanta Davidi. (Luti 4:11-22) Davidi, niyena wekalili nkakulula yaYesu Kristu.—Matewu 1:1.
Yuma Yalema yakuSpiritu
w05 3/1 29 ¶3
Yikuma Yamaneni Kufuma muMukanda waLuti
4:6—Munjilanyi nkuuli mwadi ‘kutamishilayi’ wuswana windi neyi yawukuula? Chatachi, neyi muntu wunaholokeli muwuzweñi nalandishi mpata yawuswana windi, nkuuli wanoneleña mali nakumufweta muntu walandili mpata hawuseya wapimineñayi kwesekeja nayaaka yinashaliku nakushika kuJubili yinalondelihu. (ALevi 25:25-27) Kwila mwenimu kwakehesheleñaku wuseya wamali ahanineñayi. Dichi neyi Luti yekala namwana, mwanindi diyi wadi kuswana mpata chatela ayiswani kudi ntaña yamuntu wayikuulili.
FEBRUARY 7-13
YUMA YALEMA YAMWIZU DANZAMBI | 1 SAMWELI 1-2
“Mulejenuñamu Yehova Yuma Yejima muKulomba”
Walombeli Kudi Nzambi naKumuleja Yuma Yadiña kuMuchima
12 Hana wemikila ambuña Nzambi ejima chakutalilahu kutalisha hakulomba. Yehova wayilejaña antu jindi kulomba kudi yena chakadi kushintajala, nakumuleja kukala kwejima kukwetuwu neyi chelaña mwana wakuhwelela nvwali yindi wukweti kukeña. (Tañenu Masamu 62:8; 1 Atesalonika 5:17.) Kapostolu Petulu amoneneni kusoneka awa mazu akukundeja kutalisha hakulomba kudi Yehova nindi: “Mutwikenu kwakama kwenu kwejima, muloña yena wayihembaña.”—1 Pet. 5:7.
w07 3/15 16 ¶4
Hana Chekaliliyi naKuwunda
Yumanyi yitunakudizila kuyuma yejimiyi? Dichi neyi tunakulomba kudi Yehova hakukala kutukweti, twatela kumulejamu chitunakutiya. Neyi chakwila hitukutwesha kumanisha oku kukalaku, twatela kumushila Yehova kukala kwetu. Dichuma chabadika chitwatela kwila.—Yishimu 3:5, 6.
Yuma Yalema yakuSpiritu
w05 3/15 21 ¶5
Yikuma Yamaneni Kufuma muMukanda waSamweli
2:10—Muloñadi Hana chamulombeleliyi Yehova nindi “wakamwinka ñovu mwanta” henohu muIsarela mwadiña mwanta wanyi? Nshimbi yaMosi yashimwineñahu dehi nawu muIsarela mwakekala mwanta. (Kuhituluka 17:14-18) Henohu wudi kwakwihi nakufwa, Yakoba waprofweteli nindi: “Nkuunyi yawanta [chinjikijilu chawanta] hiyakafuma kudi Yudaku.” (Kutachika 49:10) Kubombelahu, Yehova wahosheli hadi nkakulula yawaIsarela wamumbanda Sara nindi: “Anyanta jawantu amba kafuma kudi yena.” (Kutachika 17:16) Dichi Hana walombeleña kutalisha hadi mwanta wakumbidi.
FEBRUARY 14-20
YUMA YALEMA YAMWIZU DANZAMBI | 1 SAMWELI 3-5
“Yehova Watoñojokelañaku”
Yena Wañovu Jejima Ilaña Watoñojokelañaku
Samweli watachikili ‘kumukalakela Yehova’ hatabanaka hachidiñayi kansi. (1 Sam. 3:1) Wufuku wumu henohu Samweli namanishi dehi kuzata nyidimu, kudi chuma chamwekeni. (Tañenu 1 Samweli 3:2-10.) Watiyili izu dinakumutambika. Samweli watoñojokeli nindi Kapristu Muneni Eli diyi wamutambikili, dichi wovwahilili nakuya lufuchi kudi Eli nakuhosha nindi: “Yamonu; wunantambiki.” Eli wahosheli nindi yami wanyi. Chumichi chamwekeni cheñi kapampa kayedi, Eli welukili nindi Nzambi diyi wadiña nakumutambika Samweli. Dichi wamulejeli iwu kansi chatela kwakulayi, nawa Samweli wovwahilili. Muloñadi Yehova chabuliliyi kudishimuna kudi Samweli hakusambila? Bayibolu hiyashimunaku, ilaña yuma yamwekeni yamwekesheli nawu chuma chalema chadiña chakwila nawu wamutoñojokeleliku kansi Samweli. Munjilanyi?
Yena Wañovu Jejima Ilaña Watoñojokelañaku
4 Tañenu 1 Samweli 3:11-18. Nshimbi yaYehova yashimwini nawu atwansi atela kulemesha akulumpi, sweje-e anyuli. (Kwid. 22:28; Lev. 19:32) Komana Samweli wamwekesheli kuhamuka hakuya nakumuleja Eli mazu awunsompeshi waNzambi nantetemena? Inehi! Chakadi nikujina, Bayibolu yashimuna nawu Samweli “watiyili woma wakumuleja Eli chimwenu chamweniyi.” Hela chochu, Nzambi wamwekesheli hatooka kudi Eli nindi wadiña nakumutambika Samweli. Dichi, Eli wamulejeli Samweli kushimuna yuma yamulejeliwu. Wamulejeli nindi: “Bayi [wunjindaku]; yuma yejima yahoshayi Yehova naneyi.” Samweli wovwahilili nawa “wamulejeli mwejima to-o.”
Yuma Yalema yakuSpiritu
w05 3/15 21 ¶6
Yikuma Yamaneni Kufuma muMukanda waSamweli
3:3—Komana Samweli wakaamineña Mwamweni Mwajila? Inehi mwani. Samweli wadiña kaLevi wamuchisaka chaKohati abulili kwikala atupristu. (1 Kushindulula 6:33-38) Muloña wachumichi, hiyamwitejeli “[kwiñila] nakumona yuma yajilaku.” (Kuchinda 4:17-20) Iluña dajila mwamwitejeliwu Samweli kwiñila mwadiña hohu muchipañu chatabanaka. Dimwakamineñayi. Chinamwekani neyi, Eli niyena wakamini muchipañu. Dichi mazu akwila nawu “mwadiñi chimbañu chaNzambi” ateneneña iluña mwadiña tabanaka.
FEBRUARY 21-27
YUMA YALEMA YAMWIZU DANZAMBI | 1 SAMWELI 6-8
“Mwanta Weyi Hinyi?”
it-2 163 ¶1
Wanta waNzambi
Alombeli Nawu Ekali naMwanta. Kwakwihi nayaaka 400 yahitilihu kufuma hedikiliwu aIsarela nawa yaaka kubadika ha 800 yahitilihu kufuma hatiyañeni Nzambi chitiyañenu naAbarahama, aIsarela alombeli nawu ekali namwanta watela kuyilombolaña neyi chadiña nyunza yikwawu nawanyanta. Chuma chalombeliwu chamwekesheli nawu amukaanini Yehova kwikala mwanta wawu. (1Sa 8:4-8) Dichi antu akuhweleleli nawu Nzambi wakaleta wanta kwesekeja nachamukaniniwu Abarahama niYakoba, neyi chitunashimunihu dehi. Kudi cheñi wunsahu wukwawu waletesheli akuhweleleli mumazu awuprofwetu ahosheliyi Yakoba hadiñayi kwakwihi nakufwa kutalisha hadi Yuda (Kut 49:8-10), mumazu ayilejeliwu aIsarela kudi Yehova hanyima yakufuma muEjipitu (Kwi 19:3-6), mumazu ahosheliwu muchitiyañenu chaNshimbi (Kuh 17:14, 15), nimumazu amakwawu ahosheleliyi Nzambi mudi kaprofwetu Balami (Kuc 24:2-7, 17). Mama yaSamweli washinshika Hana niyena wamwekesheli mukulomba kwindi nindi dichakuhweleliyi. (1Sa 2:7-10) Hela chochu, Yehova wadiña kanda yasololi chikupu “yuma yajila yakujinda” kutalisha haWanta nawa wadiña kanda yashimuni mpinji yiwukenza hela kwakekalila iyi nfulumendi chili mwiwulu hela hamaseki. Dichi antu aluwañesheli hakulomba nawu ayinki mwanta wawuntu.
Womikili Hela Chakwila Kwadiña Yuma Yamuneñesheli
Talenu chakwiliyi Yehova chelili Samweli yamuleji mukulomba hayuma yakeñeleñawu antu: ‘Tiyililaku mwizu dawantu, wili mwejima mwakukwilawu; ochu yeyi analekuwu wanyi, yami analekuwu, nibuli kwikala mwanta wawu wakuyiyuulaña.’ Awa mazu amukundejeli Samweli, ilaña antu wenawa amutukili Nzambi Mukwakubadika. Yehova walejeli kaprofwetu kindi kusoñamisha aIsarela hakukala kwakayimwekena hamuloña wakukeña mwanta wankanu kuyiyuula. Chelili Samweli yayisoñamishi, antu amukanjikijili nawu: ‘Nehi, chiña twikali namwanta wetu wakutuyuula hohu.’ Hamuloña wakumwovwahila Nzambi yindi mpinji yejima, Samweli wayili nakumuwayisha manji mwanta atondeluwu kudi Yehova.—1 Samweli 8:7-19.
Chiyuulu chaYehova Anakuchihakwilaku!
Yuma yamwekeni yamwekesheli walala wakusoñamisha kwaYehova. Hamuloña wakuyiyuula kudi muntu, kwaleñeleli aIsarela kumona kukala kwakweni, sweje-e hampinji mwanta yabuliliyi kwikala washinshika. Hakutoñojoka hachakutalilahu chawaIsarela, hitunateli kuhayama hakwiluka netu hayaaka yayivulu yinahituhu, nfulumendi jayuulewaña nawantu abula kumwiluka Yehova jinakañanyi kuleta yuma yayiwahi yahaya nyakaku. Mwamweni, akajipolitiki amakwawu alombaña kudi Nzambi kulonda yayikwashi aleti kuwunda nikukiñewa. Hanu dinu, Nzambi nateli kukiswila ñahi antu abulaña kwovwahila chiyuulu chindi?—Mas. 2:10-12.
Yuma Yalema yakuSpiritu
w02 4/1 12 ¶13
Muloñadi Chimwatela Kupapatishewela?
Muntu watela kuhimpa henohu kanda yapapatishewi nakwikala Chinsahu chaYehova. Kuhimpa hichuma chelañayi muntu wunafuukulihu yomweni nindi wukumulondelaña Kristu Yesu chakufuma hamuchima. Muntu wamuchidiwu walekaña kwila yuma yatama nawa wadikasaña mumuchima kulonda eleña chaloña kumesu aNzambi. MuNsona, izu dachiHeberu nidachiGriki dakundama kukuhimpa datalisha kukufunta nikubalumuka. Ichi chilwilu chinakumwekesha kufunta kudi Nzambi kufuma kuyuma yatama. (1 Anyanta 8:33, 34) Mukuhimpa mwabombela “kuzata nyidimu yamwekeshaña kubalumuka.” (Yilwilu 26:20) Muntu watela kuleka kudifuukula kwakutwamba, watela kwilaña yuma kwesekeja nanshimbi jaNzambi nikudifukula kudi Yehova hohu. (Kuhituluka 30:2, 8-10; 1 Samweli 7:3) Kuhimpa kwenzaña neyi tuhimpa yitoñojoka yetu, yuma yitwafwilaña niyilwilu yetu. (Ezekeli 18:31) ‘Twafuntaña’ kuhitila mukuhimpa yilwilu yatama anakuvwala wuntu wawuha.—Yilwilu 3:19; AEfwesesa 4:20-24; AKolosi 3:5-14.
FEBRUARY 28–MARCH 6
YUMA YALEMA YAMWIZU DANZAMBI | 1 SAMWELI 9-11
“Hakusambila Sawulu Wadiña Wadikehesha Nawa Wadizoza”
Ikalenu Adizoza nawa Ilukenuña Mwakukumina
Toñojokenu chuma chamumwekeneni Mwanta Sawulu. Wadiña wadizoza henohu kanda yekali mwanta. Welukili mwakukumina nawa wachinineña kumudiisha wanta. (1 Sam. 9:21; 10:20-22) Ilaña mukuhita kwampinji, Sawulu wadivwimbili. Wamwekesheli ichi chilwilu chatama hanyima yakwikala hohu mwanta. Mpinji yimu hadiña nakumuchiñililawu kaprofwetu Samweli, wakañenyi kudiwunjika. Chatela yadizozi nikumukuhwelela Yehova nindi wukuyikwasha antu jindi, Sawulu wahanini mulambu wakushita hela chakwila wadiña wanyi nawuswa wakushita nyilambu. Chafuminimu, wajimbesheli wuselewa windi naYehova nawa amukaanini kwikala mwanta. (1 Sam. 13:8-14) Ichi chakutalilahu chinakutudizisha nawu twatela kutondolwela kwila yuma yitunabuli kwikala nawuswa wakuyila.
Chitunateli Kutwalekahu naMuchima Wakudihana
Mwanta Sawulu wekala chakutalilahu chakutusoñamisha etu nawu lwisu lunateli kutukañesha kwikala namuchima wakudihana. Hampinji yatachikiliyi kuyuula Sawulu wadiña muntu wadizoza hama. (1 Sam. 9:21) Wakaanini kuyibabesha aIsarela adiwili wanta windi, hela chakwila wadiña nawuswa wakuyibabesha muloña Nzambi diyi wamwinkeli chifulu. (1 Sam. 10:27) Mwanta Sawulu walondeleli wunlomboli waspiritu yaNzambi hampinji yayilombweleñayi aIsarela hayiluwu nakutapa aAmoni. Kuhiñahu mukudizoza wamuhamekeli chikupu Yehova wamukwashili kushinda.—1 Sam. 11:6, 11-13.
w95 12/15 10 ¶1
Amoni Ahembeli Nkunyi Hela Chakwila Ayitiyilili Luwi
Cheñi aAmoni ahembeli nkunyi hela chakwila Yehova wayitiyilili luwi. Yehova hadiwili chumichiku. ‘Chatiyiliyi nsañu oyu [yaNahashi] Spiritu yaNzambi hiyikwinza hadi Sawulu nañovu hiyikuzuwa nankashi.’ Kuzatisha ñovu yaSpiritu yaNzambi, Sawulu wapompesheli amayala añovu 330,000 kulonda ayi nakujilumuna Amoni chakwila “asheluhu amwañala nindu-ndu chakwila hela ayedi kwikala hamu nehi.”—1 Samweli 11:6, 11.
Yuma Yalema yakuSpiritu
w05 3/15 22 ¶8
Yikuma Yamaneni Kufuma muMukanda waSamweli Watachi
9:9—Kulemanyi kudi mumazu akwila nawu “muntu atenañawu katataka nawu kaprofwetu hakusambila amuteneneña nawu mukwakumona”? Awa mazu hadaha amwekesheleña nawu chiyaswejeleñawu atuprofwetu kuya mpuhu mumafuku aSamweli nimumafuku ayuulileña anyanta awaIsarela, izu dakwila nawu “mukwakumona” adisinsishili nezu dakwila nawu “kaprofwetu.” Samweli diyi atenawu nawu hikaprofwetu watachi hadi atuprofwetu.—Yilwilu 3:24.