Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
MAY 2-8
YUMA YALEMA YAMWIZU DANZAMBI | 1 SAMWELI 27-29
“Kafuta kaDavidi Kakuzuñilamu Njita”
it-1 41
Akishi
Davidi hamutemukileñayi Sawulu waswamini mumpata yaMwanta Akishi mapampa ayedi. Kapampa katachi hamukwatiliwu nawu hichilumbu, Davidi watwambili kuzaluka, nawa Akishi wamumbiliku nindi kwosi jikwilayi wazaluka. (1Sa 21:10-15; Ms 34:Mut; 56:Mut) Kamuchiyedi Davidi wayili nawamashidika 600 niyisaka yawu, nawa Akishi wayilejeli kushakama kuZikilagi. Hadi chaaka chimu natukweji tuwana tuyashakaminiwu, Akishi welukili nindi Davidi niamashidika indi ayileña nakulukuka nyisumba yawaYuda, komana nehi Davidi walukukileña aGeshuri, aGirizi niaAmaleki. (1Sa 27:1-12) Akishi wakilukili wanyi aka kafuta chakwila wamwilishili Davidi kwikala mushidika wakumukiña hampinji yadipompesheleñawu aFilisitinu kulonda ayi nakuzuña naMwanta Sawulu kushika nimpinji yamukaanishiliwu Akishi kumusenda Davidi kudi “ayilolu” jawaFilisitinu, dihafuntiliyi Davidi nawantu jindi kuZikilagi. (1Sa 28:2; 29:1-11) Chelili Davidi nekali dehi mwanta nawa nayi nakulwa nawaGati, Akishi amujahili wanyi. Washakamini kushika nimuchiyuulu chaSolomoni.—1An 2:39-41; talenu GATI.
Enu Akwenzi—Munateli Kwila Ñahi Hakwila Ayikuhweleli?
Talenu kukala kukwawu kwamweniyi Davidi. Kufuma hamuwayishiliwu kwikala mwanta, Davidi wahembeleleli hadi yaaka yayivulu hakwila amuswanyiki kwikala mwanta wawaYuda. (1 Sam. 16:13; 2 Sam. 2:3, 4) Haniyi mpinji, chumanyi chamukwashili Davidi kuhembelela nakudiwunjika? Chatela Davidi yadihombi, welileña yuma yatwesheleñayi. Chakutalilahu, mpinji yatemukililiyi mumpata yawaFwilistinu, Davidi wazatishili iyi mpinji kuzuña nawayilumbu jawaIsarela. Cheliliyi mwenimu, wakiñili muñinza yawaYuda.—1 Sam. 27:1-12.
it-2 245 ¶6
Kutwamba
Hela chakwila Bayibolu yakaanisha kutwamba, hichinayi mukwila nawu muntu watela kushimuna nsañu yakujinda kudi antu atela kubula kuyiluka oyu nsañuku. Yesu Kristu watufumbili nindi: “Bayi mwinka atuwa yuma yajila hela kunatila angulu mperola jenuku, kulonda abuli kuyidatola nanyendu yawu nawa ayibalumukili enu nakuyitabola chikupu.” (Mat 7:6) Dichaletesheleña mpinji yikwawu Yesu kubula kushimuna wunsahu wejima hela kwakula malwihu amakwawu neyi neluki nindi kwila mwenimu mukufuma kukala. (Mat 15:1-6; 21:23-27; Ywn 7:3-10) Chakadi nikujina, dichaletesheli Abarahama, Isaka, Rahaba, niElisha kubula kushimuna nsañu yejima kudi antu abulileña kudifukula kudi Yehova, hiyatwambiliku.—Kut 12:10-19; kape 20; 26:1-10; Yos 2:1-6; Yak 2:25; 2An 6:11-23.
Yuma Yalema yakuSpiritu
Komana Afu Anateli Kukwasha Amomi?
Toñojokenuhu ntahi. Bayibolu yashimunaña nawu muntu chafwayi ‘wafuntaña cheñi kwindi hamaseki indi’ nawa “mwafuukulayi munakisiki dehi.” (Masamu 146:4) Sawulu niSamweli wonsu wawu elukili nawu Nzambi wahiisha kutiyañana nawakwakuzakuka akishi. Muloña Sawulu hakusambila wahañili mukanka wawakwakuhoña.—Alevi 19:31.
Toñojokenu haniyi nsañu. Neyi chakwila Samweli washinshika wadiña kwoku muspiritu, komana wadi kufumpa nshimbi yaNzambi nikutiyañana namukwakuzakuka akishi kulonda adimoni naSawulu? Yehova wakaanini kuhosha naSawulu. Komana chalala mukwakuzakuka wadi kumukanjikija Nzambi Wabadika ñovu kulonda Sawulu atiyañani naSamweli wafwili? Inehi. Chakadi nikujina, iwu “Samweli” hadiña kaprofwetu washinshika waNzambuku. Wadiña spiritu, ndemoni watama wadifwikijili kwikala Samweli wafwili.
MAY 9-15
YUMA YALEMA YAMWIZU DANZAMBI | 1 SAMWELI 30-31
“Mushindamenenu Yehova Nzambi Yenu Kulonda Mwikali Akola”
w06 8/1 28 ¶12
Mutiyi Yehova Woma Kulonda Wikali Namuzañalu!
Chineli Davidi wamutiyileña Yehova woma chamukwashili kubula kwila yuma yatama. Cheñi chamukwashili kunyakala kufuukula chiwahi mpinji yadiñayi mukukala. Hadi chaaka chimu natukweji tuwana, Davidi niantu jindi amutemukili Sawulu nakuya nakuswama kuZikilagi mumpata yawaFilisitinu. (1 Samweli 27:5-7) Mpinji yafuminihu amayala, izanvu dawaAmaleki dalukukili musumba nakuwocha nawa dasendeli añodi jawu ejima, anyana, kushilahu tuhu niayimuna. Chafuntiliwu nawa chamweniwu chuma chamwekeni, Davidi niantu jindi adilili. Hashimbwili wanyi chineñi chatiyiliwu chayiletesheli kuzuwa, nawa awa amayala akeñeleña kumwasa Davidi malola. Hela chakwila waneñeli chikupu, Davidi hazeyeliku. (Yishimu 24:10) Kumutiya Nzambi woma kwamuletesheli yamushindameni Yehova, nawa “wadikolesheleli mudi Yehova.” Nawukwashu waNzambi, Davidi niantu jindi ayilondeleli aAmaleki nawa atambwili yuma yejima yasendeliwu.—1 Samweli 30:1-20.
Yehova Watuhembaña Kulonda Yakatwamwini
Davidi wamweni kukala kwakuvulu muchihandilu chindi. (1 Sam. 30:3-6) Mazwindi onenawu amwekeshaña nawu Yehova welukili chikupu chatiyileñayi. (Tañenu Masamu 34:18; 56:8.) Nzambi weluka chitwatiyaña anetu nawa. Yehova wakundamaña kwakwihi nanetu neyi ‘tunabaluki nyichima’ hela neyi ‘spiritu yinachikeki puchi.’ Nsañwiyi yatela kutukundeja neyi chiyamukundejeli Davidi wembili nindi: “Nukutiya kuwaha, Nukuzañalala naluwi lweyi; muloña wamweni yihuñu yami; welukili munamwenaña kukala.” (Mas. 31:7) Ilaña Yehova welaña yuma yayivulu kubadika hakumona hohu yihuñu yetu. Watukundejaña nikutukolesha. Njila yimu mwatukoleshelañayi hikupompa kwawakwaKristu.
Yuma Yalema yakuSpiritu
w05 3/15 24 ¶8
Yikuma Yamaneni Kufuma muMukanda wa 1 Samweli
30:23, 24. Chuma chafuukwiliwu chekala haKuchinda 31:27, chamwekeshaña nawu Yehova walemesha amanakwetu niahela ejima amukalakelaña muchipompelu. Dichi yuma yejima yitunakwila, ‘tuyileña nawumi wejima, neyi tunakumuzatila Yehova bayi antuku.’—AKolosi 3:23.
MAY 16-22
YUMA YALEMA YAMWIZU DANZAMBI | 2 SAMWELI 1-3
“Yumanyi Yitwadizilaña ‘Kuwuta Wamukunji’?”
w00 6/15 13 ¶9
Lemeshenu Antu Akweti Wuswa Mukachi Kenu
Komana Davidi watiyili woma hampinji yamukabishileñawu? Davidi wamudilili Yehova nindi, “Muloña antu . . . abula luwi akeñaña wumi wami.” (Masamu 54:3) Walombeli kudi Yehova nindi: “Mpulwishi kudi ayilumbu jami, eyi Nzambi . . . Antu akweti ñovu anlukukaña. Ilaña bayi neyi muloña wakwila nadikañili hela navulumwiniku, eyi Yehova. Hela chakwila hinakoñelihu chuma chatamaku, atemukaña nikudiloñesha kulonda alukuki. Neyi nikutambika, nyamukaku kulonda wumoni.” (Masamu 59:1-4) Chuma chamuchidiwu chayimwekenahu dehi—chakwila kwosi chuma chatama chimunamwili muntu wukweti wuswa ilaña yatwalekahu kuyila chatama? Davidi wamulemesheli Sawulu. Davidi wazañaleli wanyi chafwiliyi Sawulu, dihafumini yembi iwu mukeña nindi: “ASawulu naYonatani, ayikeñeli nawa ayilemesheli muchihandilu chawu . . . Atemukileña kubadika ambuulu, adiña nañovu kubadika nyitupa. Enu anyana kaIsarela awambanda, mudilenu Sawulu.” (2 Samweli 1:23, 24) Davidi wamulemesheli chikupu wawayishewa waYehova hela chakwila wamwilileña chatama!
Kufukejela—Hichilwilu Chatuleteshaña Kwakama!
Bayibolu yahosha cheñi hadi antu amavulu adiña ashinshika. Tusambilenu kuhanjeka hadi antu ayedi kulonda twiluki yuma yitukudizilaku, tukutachika namuntu wamwekesheli kashinshi kudi Davidi. Hadaha Jonatani, wedi waMwanta Sawulu diyi wateleli kwikala mwanta muIsarela. Yehova wamutondeli Davidi nindi diyi wakekala mwanta muIsarela. Jonatani wetejeli mwafuukwiliyi Nzambi. Hamutiyilili Davidi ichima neyi kwiji hichilumbu chinduku. Ilaña, ‘muchima waJonatani wadikasili namuchima waDavidi hamu mbe’ nindi wakamwovwahilaña. Wamwinkeli Davidi yakuvwala nimpoku yindi yakabali niwuta wamukunji nimuya windi, dikwila nawu wamulemesheli nindi himwanta. (1 Sam. 18:1-4) Jonatani wazatili nañovu yejima kulonda ‘yamukoleshi Davidi,’ washili wumi windi hakatoña hakumwimenaku Davidi kudi Sawulu. Jonatani wamulejeli Davidi nindi: “Eyi wakekala mwanta waIsarela ami nakakukuma munyima.” (1 Sam. 20:30-34; 23:16, 17) Dihafumini Davidi kumwekesha wushona nikukeña kuhitila mukwimba kamina kawushona chelili Jonatani nafwi dehi.—2 Sam. 1:17, 26.
Yuma Yalema yakuSpiritu
it-1 369 ¶2
Manakwamuntu
Izu dakwila nawu “manakwamuntu” anateli cheñi kudizatisha hakutena antu anakuzatila hamu mukuwunda, adi nankeñelu yimu nawa anakufwila kwila chuma chimu. Chakutalilahu, Mwanta Hirami wakuTira wamuteneni Mwanta Solomoni nindi manakwindi, bayi neyi hamuloña wakwila wejima wawu adiña anyanta nawa adiña nayifulu yoyimuku, ilaña hadaha muloña wakwila azatilileña hamu mudimu wakupula mapulanga niyuma yikwawu yakuzatisha kuTembeli. (1An 9:13; 5:1-12) “Talenu! Okuwaha nawa omuzañalu Amana kwamuntu kushakama hamu mukunuñañana!” Awa mazu asonekeliyi Davidi anakumwekesha nawu bayi neyi kusemuka hohu ivumu dimu, dikwaleteshaña amanakwamuntu kunuñañana nikuzatila hamu mukuwundaku. (Ms 133:1) Kafwampi, kukeña kwadiña hakachi kaDavidi naYonatani kwamuletesheli Davidi kumutena Yonatani nindi himanakwindi. (2Sa 1:26) Antu adi nayaku niyilwilu yadifwana, hela oyu yilwilu yatama, niwena anateli kuyitena nawu amanakwamuntu.—Yis 18:9.
MAY 23-29
YUMA YALEMA YAMWIZU DANZAMBI | 2 SAMWELI 4-6
“Mutiyenu Yehova Woma Kulonda Mubuleña Kwila Yuma Yahelayi”
w05 5/15 17 ¶8
Yikuma Yamaneni Kufuma Mumukanda waSamweli Wamuchiyedi
6:1-7. Hela chakwila chuma chakeñeleñayi Davidi kwila chadiña tuhu chachiwahi, Wakañenyi kusenda chimbañu hesekeliyi kuchisendela mwitemba muloña wakwila walondeleli wanyi nshimbi jaNzambi jahosheleña hachakuchisenda. (Kwidika 25:13, 14; Kuchinda 4:15, 19; 7:7-9) Uza chanyakeliyi kukwata kuchimbañu chamwekeshaña nawu twatela wanyi kudiwula yuma yakeñañayi Nzambi nindi twileña neyi tunakukeña kwila yuma yitunakumona netu yayiwahi.
w05 2/1 27 ¶20
Yuma Yejima Yelañayi Yehova Yaloña
Mwatela kwiluka nenu Uza welukili chahosha nshimbi. Chimbañu chadiña nakwimenaku Yehova. Nshimbi yashimwini nawu Chimbañu hiyateleleli kuchikwata kudi muntu anabuli kwitejawuku, yashimwini nawu muntu wejima wukufumpa ilu lushimbi atela kumujaha. (Kuchinda 4:18-20; 7:89) Dichi, ateleleli kovwahila iji Nshimbi jejima hakusenda chimbañu. Uza wadiña kaLevi (hela chakwila wadiña kapristu wanyi), dichi watela welukili chahosheli Nshimbi. Nawa hadi yaaka yayivulu yahitilihu, ichi Chimbañu achihembeleleña mwitala datata yindi. (1 Samweli 6:20–7:1) Chashakaminiku yaaka 70, kushika nimpinji yenjili nakuchisenda Davidi. Dichi kufuma tuhu kuwansi Uza watela welukili nshimbi yahosheleña kutalisha kuChimbañu.
w05 2/1 27 ¶21
Yuma Yejima Yelañayi Yehova Yaloña
Neyi chitwahosha dehi, Yehova wamonaña jidi mumuchima wamuntu. Chineli izu dindi datena chilwilu chamwekesheliyi Uza nawu “chilwilu chakubula kalemesha,” Yehova watela wamweni chilwilu chakudivwimba mumuchima waUza hela chakwila hosi hasonekawu. Komana Uza wadiña wadinka wanta, wakeñeleña kuzata nyidimu yinabuli kumwinkawu? (Yishimu 11:2) Komana mudimu wamwinkeliwu wakulombola chimbañu hamesu awantu, chahembeleliwu mwitala datata yindi, wamuletesheli yatachiki kudimona nindi walema kubadika akwawu? (Yishimu 8:13) Komana chikuhwelelu chaUza chadiña chazeya hakwila atoñojoki nindi Yehova wukutwesha wanyi kukiña chimbañu chamwimeneneñaku? Hituneluki chaletesheliku, ilaña tuneluki netu chuma cheliliyi Yehova chaloña. Hadaha wamweni jadiña mumuchima waUza dichaletesheli yanyakali kumubabesha.—Yishimu 21:2.
Yuma Yalema yakuSpiritu
w96 4/1 29 ¶1
Mpinji Yejima Umbilenuña Chiteli Chenu Hadi Yehova
Chineli Davidi diyi wadiña Mwanta niyena haniyi mpinji waluwañesheli. Chuma cheliliyi chamwekeshaña nawu niantu adi nawubwambu wawuwahi naYehova mpinji yikwawu anateli kuluwañesha neyi adi mukweseka. Chatachi Davidi wahilili. Nkumininaku watiyili woma. (2 Samweli 6:8, 9) Wubwambu wakola wadiñayi nawu naYehova wadiña mukweseka kwakweni. Haniyi mpinji Davidi wakañenyi kumbila chiteli chindi hadi Yehova, muloña wakubula kwovwahila nshimbi jindi. Komana ninetu chinateli kutumwekena mpinji jikwawu? Komana twamwinkaña Nzambi nyiloña muloña wakukala kutunamoni kunafumi mukubula kwovwahila nshimbi jindi?—Yishimu 19:3.
MAY 30–JUNE 5
YUMA YALEMA YAMWIZU DANZAMBI | 2 SAMWELI 7-8
“Yehova Nakwati Chitiyañenu naDavidi”
“Wanta Weyi Wakakola Ngu Chikupu”
Yehova watiyili kuwaha hakudihana kwaDavidi kwakufuma hamuchima. Hakwakula kudihana kwaDavidi nawa kwesekeja nawuprofwetu, Nzambi watiyañeni chitiyañenu naDavidi nindi wakatonda muntu wamuchisaka chawanta waDavidi wakayula haya nyaka. Natani washimwini kudi Davidi chamukaninuwu kudi Nzambi nawu: “Nimutaña weyi niwanta weyi wakakola ngu chikupu kumesu eyi haya nyaka; itanda deyi dakakola ngu haya nyaka.” (Vasi 16) Indi Nswana wahaya nyaka wamunichi chitiyañenu, Wamba kayula haya nyaka hinyi?—Kutachika 49:10; Masamu 89:20, 29, 34-36.
“Wanta Weyi Wakakola Ngu Chikupu”
Yesu wakuNazareta diwadiña mwana kaDavidi. Hakushimuna kuvwalika kwaYesu, kañelu wahosheli nindi: “Yehova Nzambi wakamwinka itanda datata yindi Davidi dawanta; wakekala mwanta wakumutaña waYakoba haya nyaka; wanta windi hiwamba kakumaku.” (Luka 1:32, 33) Dichi chitiyañenu chatiyañeniyi naDavidi chashikijeweli hadi Yesu Kristu. Komana nakuyula, bayi kuhitila mukukeña kwawantuku, ilaña kuhitila muchikaninu chaNzambi chamwinkaña ñovu yakuyula haya nyaka. Twatela kwiluka netu kukana kwaNzambi mpinji yejima kwashikijewaña.—Isaya 55:10, 11.
Ikalenu naChikuhwelelu Chakola muWanta
Shinshikenu Yehova chamukaniniyi Mwanta Davidi wamuIsarela wakushankulu kuhitila muchitiyañenu chaDavidi. (Tañenu 2 Samweli 7:12, 16.) Yehova watiyañeni ichi chitiyañenu naDavidi hampinji yayuulileñayi Davidi muYerusalema, wamukanini nindi Mesiya wakafuma muchisaka chindi. (Luka 1:30-33) Dichi, Yehova washimwini hatooka to-o cheñi nindi muchisaka chaDavidi dimu mwakafuma nyuuli wakekala ‘mwenichiyuulu’ chetanda daWanta wawuMesiya. (Ezek. 21:25-27) Kuhitila mudi Yesu, wanta waDavidi ‘wakakola ngu-u haya nyaka.’ Chalala, mwana kaDavidi ‘wakashakama haya nyaka, niitanda dindi dawanta dakashakama shakame-e neyi itañwa.’ (Mas. 89:34-37) Eñañi, chiyuulu chawuMesiya hichikakoña yuma yatamaku nawa chikahetesha antu haya nyaka!
Yuma Yalema yakuSpiritu
it-2 206 ¶2
Mafuku Akukuminina
Wuprofwetu waBalami. Henohu aIsarela Kanda eñili mwituña daChikaninu kaprofwetu Balami wamwilili Mwanta Balaki wakuMowabi nindi: “Twaya nukuleji chuma chakayilawu antu jeyi kumbidi kudi awa antu [Isarela]. . . . Katumbwa kakafuma kudi Yakoba, nawa nkuunyi yakafuma kudi Isarela. Nawa chakadi nikujina, wakachika ihama daMowabi nikubalola tuwekesi twawanyana awamayala ejima aletaña yikonkojola.” (Kuc 24:14-17) Chibalu chatachi chashikijeweli chaniwu wuprofwetu “katumbwa” kemeneneñaku Mwanta Davidi, wayimikili mushindu aMowabi. (2Sa 8:2) Chinamwekani hatooka nawu kushikijewa kwaniwu wuprofwetu “mafuku akukuminina,” atachikili chelili Davidi yekali mwanta. Chineli Davidi wemeneneñaku Mwanta wawuMesiya, iwu wuprofwetu wakashikijewa cheñi mpinji yikela Yesu nemiki dehi mushindu ayilumbu jindi.—Isa 9:7; Ms 2:8, 9.
JUNE 6-12
YUMA YALEMA YAMWIZU DANZAMBI | 2 SAMWELI 9-10
“Davidi Wamwekesheli Kukeña Kwalala”
w06 6/15 14 ¶6
Munateli Kwikala Namuzañalu Waweni
Davidi wasonekeli nindi: “Wudi namuzañalu yowu muntu watoñojokelañaku muntu wakehelamu.” Watwalekelihu nindi: “Yehova wakamupulwisha mwifuku dayihuñu. Yehova wakamukiña nawa wakamuhemba wamumi. Akamutena nawu wudi namuzañalu.” (Masamu 41:1, 2) Davidi chamwakameneniyi nikumumwekeshela kukeña Mefibosheti wadiña chifwayi, mwana kaYonatani ibwambu daDavidi, wamwekesheli chilwilu chachiwahi chakwakamena antu anakukeñeka wakuyikwasha.—2 Samweli 9:1-13.
w05 5/15 17 ¶12
Yikuma Yamaneni Kufuma muMukanda wa 2 Samweli
9:1, 6, 7. Davidi welili mwakaniniyi. Ninetu nawa twatela kuzata nañovu kulonda twileña mutunahoshi.
w02 2/15 14 ¶10
Omikili Kukala Kwadiña Neyi Mwiña Mumujimba
Chimwahitili mpinji Mwanta Davidi, muloña wakukeña kwamukeñeliyi Yonatani, wamumwekesheleli Mefibosheti kukeña niluwi. Davidi wamwinkeli mpata yejima yadiña yaSawulu, nawa wamwinkeli Ziba wadiña hembi yaSawulu mudimu wakuhemba iyi mpata. Davidi wamulejeli cheñi Mefibosheti nindi: ‘Mpinji yejima wukudaña kumesa yami.’ (2 Samweli 9:6-10) Chakadi nikujina wushona nikukeña kwa Davidi kwamumwekesheleliyi Mefibosheti kwamukwashili kukeheshaku chineñi hamuloña wawufwayi windi. Chumanyi chitunakudizilaku? Ninetu twatela kumwekeshelaña wushona antu anakukabakana nakukala kudi neyi mwiña mumujimba.
Yuma Yalema yakuSpiritu
it-1 266
Wevu
Antu amavulu akushankulu akukabeta kakumusela kushilahu naIsarela alemesheli chikupu wevu muntu weyala amulemesheleña neyi wudi nawevu. Nshimbi jaNzambi jayikaanishili aIsarela kutetateta “nsuki yamumbavu”yekala hakachi ketelu nadisu nawa wayikaanishili cheñi kutetateta nsuki yashika nikuwevu. (Lev 19:27; 21:5) Chakadi nikujina inchi chadiña chaaku chawasenji chakundamini kukudifukula kwakutwamba.
JUNE 13-19
YUMA YALEMA YAMWIZU DANZAMBI | 2 SAMWELI 11-12
“Bayi Mwiteja Kufwila Kwatama Kuyiyuuleñaku”
Munateli Kusopoka Mumuhetu waDiyabolu!
Lwisu lwamuletesheli Mwanta Davidi kuvulamena yuma yamwinkeliwu kudi Yehova, maheta, mpuhu nichashindiliyi ayilumbu jindi amavulu. Davidi welukili nindi yawaana yaNzambi ‘yasweja kuvula, kutwesha kuyichinda nehi.’ (Mas. 40:5) Ilaña mpinji yimu, Davidi wavulameneni yuma yamwinkeliyi Yehova. Hela chakwila Davidi wadiña nawambanda amavulu, wetejeli kufwila kwatama kumukojeji kufwila ñoda mukwawu. Iwu mumbanda wadiña Batisheba nawa nfumwindi wadiña Uriya kaHiti. Dichi Davidi welili wuvumbi naBatisheba, nawa wamwinkeli ivumu. Chuma cheliliyi Davidi chadiña chatama, ilaña wabombelelihu nichuma chikwawu chasweja kutama, wakwatili kafuta kakumujahilamu Uriya. (2 Sam. 11:2-15) Chumanyi chatoñojokeleñayi Davidi? Komana watoñojokeleña nindi Yehova wukumumona wanyi? Kambuña aYehova wadiña washinshika wekalili nalwisu, nawa lwamuleteleli kukala. Nkumininaku, Davidi wetejeli nshidi jindi nawa wabalumukili. Watiyili kuwaha chamwanakeneniwu kudi Yehova.—2 Sam. 12:7-13.
Muloñadi Chitwatela Kumwovwahila Yehova nawa Munjilanyi?
Yehova hamutondeli Davidi kwikala mutu wachisaka chindi hohuku, ilaña nihadi aIsarela ejima. Chineli wadiña mwanta, Davidi wadiña nañovu chikupu. Mpinji yikwawu wazatishileña chatama ñovu yindi nawa wakoñeleña yiluwa yamaneni. (2 Sam. 11:14, 15) Wamwovwahilili Yehova kuhitila mukwiteja kufumba. Chalombeleñayi kudi Yehova, wamulejelimu chatiyileñayi. Wazatili nañovu hakwila nawu yovwahili kufumba kwaYehova. (Mas. 51:1-4) Kubombelahu, wadiña wadizoza chakwila wetejeli kufumba kwafumini kudi amayala niambanda. (1 Sam. 19:11, 12; 25:32, 33) Davidi wadizilili kuyiluwa yindi nawa washili maana hakumukalakela Yehova.
Itejenu Nshimbi niYishina yaNzambi Yidizishi Chinleji Chenu
Tunakukeña wanyi kumona kukala kwafumaña mukufumpa nshimbi jaNzambi kulonda tudiziliku. Twatela kudizila kudi antu aluwañesheli asonekawu nshidi yawu Mwizu daNzambi. Yishimu 1:5 yahosha nawu: “Mukwamaana atiyi, asweji kudiza.” Mwamweni, twatambwilaña kufumba kwakuwahi kufuma kudi Nzambi, neyi tutaña nikutoñojoka nsañu yawantu ashimunawu muBayibolu. Chakutalilahu, toñojokenu chichamukatili Mwanta Davidi chafumpiliyi nshimbi jaYehova nakwila wuvumbi naBatisheba. (2 Sam. 12:7-14) Hampinji yitunakutaña nikutoñojoka haniyi nsañu, twatela kudihula netu: ‘Mwanta Davidi wadi kutondolwela ñahi kutiya kutama kwatiyiliyi hamuloña wakwila wuvumbi naBatisheba? Neyi yami namweni kweseka kwamuchidiwu, nadi kwikala nañovu yakutondolwela kukoña nshidi? Nadi kutemuka neyi cheliliyi Yosefu tahindi nadi kukoña nshidi neyi cheliliyi Davidi?’ (Kutach. 39:11-15) Neyi tutoñojoka hayuma yatama yafumaña mukwila nshidi, tukudikasa mumuchima wetu ‘nakuhela yatama.’
Yuma Yalema yakuSpiritu
it-1 590 ¶1
Davidi
Yehova wamweneña ilaña cheñi wasolweli ninshidi yakoñeliwu. Neyi Yehova wetejeli nsañu ya Davidi na Batisheba kuyisompa kudi antu kushidamena hanshimbi jaMosi, wejima wawu adi kuyijaha nimwanawu wamuwuvumbi wachidiña kanda yasemuki wadi kufwila kumu namama yindi. (Kuh 5:18; 22:22) Hela chochu, Yehova wasompeli iyi nsañu yomweni nawa wamutiyilili Davidi luwi muloña wachitiyañenu chaWanta chamukaniniyi. (2Sa 7:11-16), Cheñi nimuloña wakwila Davidi watiyilileña akwawu luwi. (1Sa 24:4-7; esekejenu Yak 2:13) Nawa nihamuloña wakwila Nzambi wamweni chabalumukiliwu mumuchima aDavidi na Batisheba. (Ms 51:1-4) Ilaña cheñi wayibabesheli. Yehova wahosheli kuhitila mudi kaprofwetu Natani nindi: “Ichi inakukuletela kukala kufuma mwitala deyi.”—2Sa 12:1-12.
JUNE 20-26
YUMA YALEMA YAMWIZU DANZAMBI | 2 SAMWELI 13-14
“Aminoni Waleteli Kukala Muloña Wakufwila Kwindi Kwatama”
it-1 32
Abisalomi
Kumujaha Aminoni. Lubanji lwadiña namuhela Abisalomi Tamari lwaletesheli manakwindi Aminoni kutachika kumufwila. Aminoni chatwambiliyi kukata wamutambikili Tamari nindi yenzi kwitala dindi nakumutelekela, nawa wakaamini nindi chakumukanjikija. Hanyima yakukaama nindi Aminoni wamuheleli Tamari kubadika chamukeñeliyi hakusambila nawa wamuhañili. Abisalomi wamuwanini Tamari nadiputi mawuti kumuntu nawa natabuli munkukumba windi wavwalileñawu anyana kamwanta wamwekesheleña nawu himujiki wambulahu dehi kukama neyala. Washikeneni kwiluka nindi muhelindi anamwili chuma chatama nawa wahosheli nindi Aminoni diyi wunakoñi chuma chamuchidiwu, chinakumwekesha nawu wadiña weluka dehi nindi manakwindi wadiña nakumufwila muhelindi. Abisalomi wamulejeli muhelindi kuvulamenaku kuniyi nsañu nawa wamusendeli kwitala dindi nakushakama nindi.—2Sa 13:1-20.
Ikalenu Nachilwilu chaKudihemba
Bayibolu yashimuna yakutalilahu yakusoñamisha yawantu abulili kudihemba kutalisha hawuvumbi. Yashimuna cheñi yuma yatama yafumañamu neyi muntu yabula kudihemba. Neyi kudi muntu wunakumona kukala kudi neyi kwamweniyi Kim, watela kutoñojoka chuma chamumwekeneni mukwenzi wabula maana ashimunawu muYishimu kapetulu 7. Toñojokenu cheñi chamumwekeneni Aminoni, niyuma yatama yafuminimu muyuma yeliliyi. (2 Sam. 13:1, 2, 10-15, 28-32) Anvwali atela kukwasha anyanawu kulonda adihembeña nawa ekali namaana kutalisha hansañu yawuvumbi. Atela kuhanjeka haniyi nsañu hakudifukula kwachisaka, kuzatisha nsañu yamuBayibolu yitunashimuni.
it-1 33 ¶1
Abisalomi
Yaaka yiyedi yamanini. Nawa mpinji yakutewula nyikoku yashikili mpinji yekalileñaku chawija, Abisalomi waloñesheli chawija kuBayali Hazori haleheli makilomita 22 (hela netu mamayilu 14) Kukabeta kasumbwañesha chimunswa namusela waYerusalema, watambikili anyana kamwanta niDavidi yomweni. Chelili tata yindi yakaani kuya, Abisalomi wamulembeleleli nindi yamwiteji Aminoni wedi windi yayi nakumwimenaku. (Yis 10:18) Aminoni “chazañaleliyi navinyu hachawija” Abisalomi walejeli añamba jindi nindi amutapi. Anyana amakwawu atemukili nakufunta kuYerusalema, ilaña Abisalomi watemukili nakuya muwunkoli kudi nkaka yindi weyala wakuSiriya muwanta waGeshuri, kukabeta kakumusela kaÑaliliya. (2Sa 13:23-38) “Mpoku yaKabali” yateneniyi kaprofwetu Natani ichi yineñili mwitala daDavidi nawa yikutwaleka kushika tuhu nikukufwa kwindi.—2Sa 12:10.
Yuma Yalema yakuSpiritu
g04 12/22 8-9
Lubanji Lwalweni Lwalala Chikupu
Talenu chakutalilahu chamwana kaDavidi Abisalomi. Hela chakwila wadiña walubanji chikupu wekalili muntu watama. Bayibolu yahosha hadi yena nawu: “MuIsarela mwejima, himwadiñahu iyala ahamekeleñawu chikupu wamwekeneña lubanji neyi Abisalomiku. Kufuma kunyinu yakumwendu windi kushika nihakachi kamutu windi, hadiñahu nehujiku.” (2 Samweli 14:25) Hela chochu, lwisu lwindi lwamuletesheli kumwimakena tata yindi nikufwila kuhukula wanta. Cheñi wakaamini nawantombu jaTata yindi. Chafuminimu kuzuwa kwaNzambi kwenjili hadi Abisalomi nawa wafwili kufwa kwayeña.—2 Samweli 15:10-14; 16:13-22; 17:14; 18:9, 15.
Munateli kudikunda namuntu wudi nayilwilu neyi yaAbisalomi? Inehi. Muwihi tunateli kuhosha netu wadiña muntu watama. Lubanji lwadiñayi nalu hilwamukwashili kwikala nayilwilu yayiwahi hela kwikala washinshikaku, nawa hilwamukiñili kukufwaku. Ilaña muBayibolu atenamu antu amavulu adiña namaana , adiña nayilwilu yayiwahi ilaña hiyahoshahu halubanji lwawu lwakumesuku. Mwamweni, chuma chasweja kulema hikuwaha kwawu kwamumuchima.
JUNE 27–JULY 3
YUMA YALEMA YAMWIZU DANZAMBI | 2 SAMWELI 15-17
“Abisalomi Wadikañili Muloña Wakudivwimba”
it-1 860
Mukwakutwaminaku
Kunyima akwakutwaminaku atwaminineñaku iku mwanta nakwinza nekalu dindi hanyima nakuleja antu nawu mwanta nakwinza nawa amukwashileñaku nimuyuma yashiyashana. (1Sa 8:11) Abisalomi niAdoniya, niwena alondeleli ichi chisemwa, hakudilemesha nihakumwekesha nawu anekali dehi anyanta, atemesheli akwakutwaminaku 50 iku wena anakulondela namakalu awu hanyima.—2Sa 15:1; 1An 1:5; talenu AKWAKUTWAMINAKU.
Kalakelenu Nzambi Wasubulaña Antu
MuBayibolu mwekala yakutalilahu yayivulu yawantu aluwañesheli akwawu. Abisalomi, mwana kaMwanta Davidi wudi hakachi kawantu aluwañesheli akwawu. Abisalomi wadiña iyala walubanji chikupu. Kufwana Satana, ichima denzeli mumuchima windi, muloña watachikili kufwila wanta watata yindi hela chakwila yena hateleleli kwikala mwantaku. Hakufwila kuhukula wanta watata yindi, Abisalomi wakwatili kafuta kakumwekesha neyi wayikeña akwawu aIsarela hampinji yoyimu wayilejeleña mukubabala nindi chota chamwanta hichayakamenañaku. Eñañi, neyi cheliliyi Diyabolu mwitempa daEdeni, Abisalomi wadimwekesheli kudi antu neyi wadiña nakuyikwasha nawa hampinji yoyimu wadiña nakumutwambila tata yindi.—2 Sam. 15:1-5.
it-1 1083-1084
Hebironi
Chimwahitili yaaka mwana kaDavidi Abisalomi wafuntili kuHebironi nawa dikwakwatililiyi kafuta kakumutambula tata yindi wanta. (2Sa 15:7-10) Hamuloña wakwila iwu musumba wadiñahu dehi musumba weneni muYuda, nawa cheñi diwu musumba mwavwalikililiyi, Abisalomi dimwatachikililiyi kupompesha antu kulonda yahukuli wanta watata yindi. Chimwahitili mpinji, mwijikulwa Davidi, Mwanta Rehobowami, wawutuñulwili iwu musumba. (2An 11:5-10) Hanyima yakwila musumba waYuda anawujilumuni dehi kudi eniBabiloni nawa hanyima yakwila anafumi dehi muwunkoli, aYudeya amakwawu ashakamini muHebironi (Kiriyati Ariba).—Ne 11:25.
Yuma Yalema yakuSpiritu
Komana Mukweti Wunsahu Walala?
Hadaha ninetu antu anateli kututwambila. Shinshikenu chakutalilahu chaMefwibosheti naMwanta Davidi. Davidi wamumwekesheleli Mefwibosheti chisambu niluwi nakumufuntishila cheñi mpata yankaka yindi Sawulu yejima. (2 Sam. 9:6, 7) Mukuhita kwampinji, Davidi watambwilili nsañu yatama hadi Mefwibosheti. Chakubula nikuwana wunsahu walala, Davidi wamutambwili Mefwibosheti yuma yindi yejima. (2 Sam. 16:1-4) Davidi chamwihwiliyi Mefwibosheti, wamweni nindi naluwañeshi nawa wamufuntishilili Mefwibosheti chibalu chayuma. (2 Sam. 19:24-29) Davidi neyi wasambilili kuwana wunsahu walala kachi wakoñeli chuma chatama wanyi.