Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
© 2024 Watch Tower Bible and Tract Society of Pennsylvania
SEPTEMBER 2-8
YUMA YALEMA YAMWIZU DANZAMBI MASAMU 79-81
Mwekeshenu Nenu Mwakeña Ijina daYehova Dajila
Ifutu Danyiloña ‘Chawaana Chabadika Kuwaha’ Kufuma Kudi Tata
5 Tunateli kumwekesha ñahi netu twajilika ijina daYehova? Kuhitila muyilwilu yetu. Yehova wakeñaña nindi twikali ajila. (Tañenu 1 Petulu 1:15, 16.) Dichi twatela kudifuukula kudi Yehova hohu nikumwovwahila namuchima wetu wejima. Hela chakwila anakutukabisha, twatela kulondela yishina ninshimbi yindi yaloña. Neyi twilaña yuma yaloña, tukutoñeka chejeji nakuleta kalemesha hejina daYehova. (Mat. 5:14-16) Chineli twajila, chihandilu chetu chamwekeshaña nawu nshimbi yaYehova yayiwahi nawa netu Satana watwambaña. Wejima wetu twaluwañeshaña, neyi tuluwañesha, twatela kubalumuka mumuchima nakuleka yilwilu yamuneñeshaña Yehova.—Mas. 79:9.
ijwbv 3 ¶4-5
ARoma 10:13—“Kutambika Hejina daYehova”
MuBayibolu, mazu akwila nawu “Kutambika hejina daYehova” atalisha bayi neyi hakwiluka ijina daNzambi nihakudizatisha hakudifukulaku. (Masamu 116:12-14) Munabombeli kumukuhwelela Nzambi nikulomba wukwashu kudi yena.—Masamu 20:7; 99:6.
Yesu Kristu walemesheli ijina daNzambi. Mazu indi akutachikilahu mukulomba kwindi kwachitalilu adiña nawu: “Tata yetu wekala mumawulu, ijina deyi diikali dajila.” (Matewu 6:9) Yesu wamwekesheli cheñi nindi twatela kwiluka, kwovwahila, nikukeña muntu wukweti idi ijina neyi tunakukeña kwikala nawumi wahaya nyaaka.—Yowanu 17:3, 6, 26.
Yuma Yalema yakuSpiritu
it-2 111
Yosefu
Ijina daYosefu Dinelukewi. Chineli Yosefu wadiña nachifulu chalema hadi anyana kaYakoba awamayala, chateleli ijina dindi kudizatisha hakutena nyichidi yejima yaIsarela (Ms 80:1) yejima yenjili nakubombelawu muwanta wakukabeta kakuchimunswa. (Ms 78:67; Amo 5:6, 15; 6:6) Ijina dindi nidena datukwashaña kutiyishisha wuprofwetu wamuBayibolu. Ezekeli wamweni muwuprofwetu nindi wuswana waYosefu wakekala wamaseka ayedi (Eze 47:13), wumu wakela kuchiisu chamusumba “Yehova Wudi Mwenomu” hakekala ijina daYosefu (Eze 48:32, 35), nimukanda wakunuñañesha antu jaYehova, Yosefu amutena nawu himwanta wachibalu chimu chamuza nawa Yuda himwanta wachibalu chikwawu. (Eze 37:15-26) Wuprofwetu waObadiya wamwekeshaña nawu “Amwitala daYakoba” akajilumunaku “amwitala daEsawu” (Oba 18), nawa Zekariya washimwini nawu Yehova wakamwina “mwitala daYosefu.” (Zek 10:6) Chatela ateni Efuremu, Yosefu namwekani neyi wumu hakachi kanyichidi yaIsarela yakuspiritu.—Chi 7:8.
Chineli Yosefu amutena haChimwekeshu 7:8 chinakumwekesha nawu kadidi kamuwuprofwetu kafwililihu Yakoba katalishileña kudi Isarela wakuspiritu. Dichi, chatuzañaleshaña hakwiluka nawu Mukañovu waYakoba, Yehova Nzambi, wahanini Kristu Yesu neyi Kabiña Wamuwahi wafwilili “nyikoku.” (Ywn 10:11-16) Kristu Yesu niyena wekala chikuku chelola dakwiwombu hashindamena tembeli yaNzambi yawaIsarela akuspiritu. (Efw 2:20-22; 1Pe 2:4-6) Nawa iwu Kabiña nawa Ilola wudi naWañovu Jejima, Nzambi.—Ywn 1 1:1-3; Yil 7:56; Heb 10:12; esekejenu Kut 49:24, 25.
SEPTEMBER 9-15
YUMA YALEMA YAMWIZU DANZAMBI MASAMU 82-84
Lemeshenuña Kukooleka Kumukweti
Yuma Yitwadizilaña Kudi Atuda
Antu ashakamineña muYerusalema elukili chikupu tumbimbi, twavulileña kutuñila yisakala yatu mumakeki. Tukwawu twatuñilileña yisakala yatu mwikeki datembeli yaSolomoni. Chakadi nikujina, tumbimbi twatuñilileña mwikeki datembeli hachaaka-hachaaka twelukili nawu didu ilaña dadiwahi, munateli kukulishilawu anyanawu chakadi kuyiluwañesha.
Nsoneki Wesamu 84, mwana kaKora, wadiña nakuzatila hatembeli mulungu wumu hakakweji, wayimweneña iyi yisakala mwikeki datembeli. Kufwila kwikala neyi tumbimbi twadiña nayisakala yahaya nyaaka mwitala daYehova, wahosheli nindi: “Matabanaka eyi o chawahawu, eyi Yehova wamazaza! Muchima wami wafwilaña, Mwalala, wakuminaña dakuhwidila nakufwila kuyipañu yaYehova . . . Mwalala, musweswa nawani itala dindi, nikambimbi kanawani chisakala chindi kwakusemena anyanindi, kwokutumeña tweyi, eyi Yehova wamazaza, yeyi Mwanta wami walukanu, yeyi Nzambi yami!” (Masamu 84:1-3) Komana etu, kushilahu nianyanetu, twamwekeshaña mpwila yamuchidiwu nikusakilila kuhitila mukuya kuchipompelu chawantu jaNzambi mpinji yejima?—Masamu 26:8, 12.
w08 7/15 30 ¶3-4
Ikalenu Nahakukumina naYuma Yimunakuhembelela, nawa Ikalenu naMuzañalu
Kukula kumujimba hela yikatu yinateli kuletesha tubuleña kwila yuma neyi chitwelileña mumudimu waYehova. Neyi mudi anvwali, munateli kutachika kutoñojoka nenu mwahetelañamu nankashi wanyi mukudiza kwahalwenu nihakupompa kwawakaKristu muloña mpinji yeneni yayaña kukwakamena anyanenu anyanya. Neyi chakwila musha maana hayuma yimukubula kwila chinateli wanyi kuyikañesha kwila yuma yimwatela kwila?
Hadi yaaka yayivulu yinahitihu, kaLevi wumu wamwekesheli iyena dakukeña kuzata nyidimu yadi kubula kutweshayi. Amwinkeli kukooleka kwakuzatila hatembeli nyilungu yiyedi muchaaka. Hela chochu, wamwekesheli iyena dasweja dakufwila kwikalaña kwakwihi nakameña mpinji yejima. (Ms. 84:1-3) Chumanyi chamukwashili iwu iyala washinshika kumonaña nyidimu yitiyi nindi yinashikili? Welukili nindi nikushakama mumalubanza atembeli kwadiña hikukooleka. (Ms. 84:4, 5, 10) Hohamu ninetu, chatela tusheña muchima hayuma yitukubula kwila, twatela kutoñojokaña nikusakilila hayuma yitukutwesha kwila.
Yehova Nzambi Yenu Wayilemesha!
12 Neyi munakuhita muyikatu, mwatela kwiluka nenu Yehova neluki yuma yimunakuhitamu. Lembenu kudi yena yayikwashi kutoñojoka munjila yayiwahi hakukala kumukweti. Kuhiñahu zatishenu Bayibolu kulonda muwani mazu akukundeja ayisonekelayi Yehova. Shenu muchima hamavasi amwekeshaña nawu Yehova walemesha ambuña indi. Chimukwilaña mwenimu, mukumona nenu Yehova wamuwahi kudi antu amukalakelaña nakashinshi.—Mas. 84:11.
Yuma Yalema yakuSpiritu
it-1 816
Mwana Wabula Tata Yindi
Chineli chadiña chaswayi kuvulamena awa anyana aneñeli nawa abulili wakuyikwasha, Yehova nazatishi awa mazu “wabula tata yindi” hakushimuna kuloña kwawaIsarela hikwashikili hela chamwamukiliwu. Muza hiwadileña yakuda yayiwahi yakuspiritu, mwana wabula tata yindi amwakameneneña. Neyi mwituña wuñaji wufumamu, mwana wabula tata yindi amumbileña chisayikila, nawa chumichi chakisileña muza. (Ms 82:3; 94:6; Isa 1:17, 23; Yer 7:5-7; 22:3; Eze 22:7; Zek 7:9-11; Mal 3:5) Ishiñu daYehova dashikeneneña ana akabishileña anyana akadi atata jawu. (Kuh 27:19; Isa 10:1, 2) Yehova nadilumbululi yomweni nindi “Nkuuli” (Yis 23:10, 11), Nkwashi (Ms 10:14), nawa Tata (Ms 68:5) yanawa antu. Yena diyi Wayisompelaña mwawuñanji (Kuh 10:17, 18), nakuyitiyila luwi (Hos 14:3), wayikwashaña (Ms 146:9), nawa wayihembaña amomi.—Yer 49:11.
Chinjikijilu chimu chakutwilukilaku nawu tudi akaKristu alala hikwakamena antu anakuneña muloña wakufwila anfumwawu hela anvwali jawu. Kambanji Yakoba nasonekeli akaKristu nindi: “Kudifukula kutooka nawa kwakadi majilu kwesekeja nachamonañayi Nzambi yetu nawa Tata, dikweniku: kuhemba chiwahi anyana anshona niambanda antuluwa anakumona lukadi nikudaambula kuyuma yatama yamukanu kaayi.”—Yak 1:27.
SEPTEMBER 16-22
YUMA YALEMA YAMWIZU DANZAMBI MASAMU 85-87
Kulomba Kwatukwashaña Kuumika
Komana Munakumwekesha Kulema kwaYehova?
10 Hakwila nawu tumwekeshi kulema kwaNzambi, twatela cheñi ‘kukakela mukulomba chakadi kuzeya.’ (Rom. 12:12) Twatela kulomba netu Yehova yatukwashi kulonda tumukalakeli munjila yakeñañayi. Dichi twatela kumulomba spiritu yindi yajila, kwikala nachikuhwelelu chakola, kutwinka ñovu jikutukwasha kutondolwela kweseka, nikutwinka wuswa ‘wakulumbulula mazu ansañu yalala mwayawu-mwayawu.’ (2 Tim. 2:15; Mat. 6:13; Luka 11:13; 17:5) Neyi chochashindamenañayi mwana hadi tata yindi, anetu nawa twatela kushindamena hadi Tata yetu wamwiwulu, Yehova. Neyi tulomba netu yatukwashi kulonda tumukalakeleña chikupu, twatela kukuhwelela netu wukutukwasha. Bayi tutoñojoka netu kulomba kwetu kunateli kumuhilishaku. Ilaña twatela kumushimeka mukulomba, kumusakilila, kukeña wukwashu windi sweje-e neyi tunaholokeli mukweseka nikumulomba kulonda yatukwashi kumukalakela munjila yakulemesha ijina dindi dajila.—Mas. 86:12; Yak. 1:5-7.
Yehova Chakulañayi Kulomba Kwetu
17 Tañenu Isamu 86:6, 7. Ñimbi yaMasamu Davidi wakuhweleleli nindi Yehova watiyileña nikwakula kulomba kwindi. Ninenu dichimunateli kukuhwelela. Yakutalilahu yawantu itunahanjekihu muchinu chibaaba yinatukwashi kukuhwelela netu Yehova nateli kutwinka maana niñovu yakutukwasha kuumika. Nateli kuzatisha amanakwetu niahela hela antu abulaña kudifukula kudi yena chayinu mpinji kulonda atukwashi muyuma yikwawu.
18 Hela chakwila mpinji jikwawu Yehova hanateli kwakula kulomba kwetu munjila yitunakuhweleliku, tweluka netu wakaakula. Wakatwinka wukwashu wutunakukeña nawa hampinji yitunakuwukeña. Dichi twalekenuhu kulomba nakukuhwelela nenu Yehova wukuyakamenaña chayinu mpinji nawa nenu “[wakekutisha] yuma yejima yayumi nayuma yakeñañawu” mukaayi kakaha kanakwinza.—Mas. 145:16.
Yuma Yalema yakuSpiritu
it-1 1058 ¶5
Muchima
Kukalakala “naMuchima Wejima.” Muchima wutwekala nawu nawa wazataña chiwahi, ilaña muchima wachifwikija wunateli kwikala muyedi. Davidi walombeli nindi: “Nkwashi nitiyeña woma ijina deyi namuchima wami wejima,” chinakumwekesha nawu muchima wamuntu wunateli kudambula neyi kudi yuma yiwunakukeña niwoma. (Ms 86:11) Muntu wamuchidiwu nateli kwikala “nanyichima yiyedi”—hakumukalakela Nzambi. (Ms 119:113; Chi 3:16) Muntu nateli cheñi kwikala “wanyichima yiyedi” (chinatalishi mukwila nawu, namuchima nimuchima), nakukalakela anyanta ayedi, hela kuhosha chuma chimu henohu muyitoñojoka yindi mudi yuma yacheñi. (1Ku 12:33; Ms 12:2, tth) Yesu wateneni antu anyichima yiyedi nindi hiyanfwikiji.—Mat 15:7, 8.
SEPTEMBER 23-29
YUMA YALEMA YAMWIZU DANZAMBI MASAMU 88-89
Chiyuulu chaYehova Dichabadika
Hakwilenuku Chiyuulu chaYehova!
5 Kudi chuma chikwawu chitukuhoshela netu Yehova hiNyuuli watelela. Wazatishaña ñovu jindi jakuyuula munjila yawuñaji walala. Wahosheli nindi: “Yami Yehova nelaña mwaluwi mwawuñaji nimwaloña hamaseki; muloña natiyaña kuwaha nayumiyi.” (Yere. 9:24) Washinshikaña wanyi munyikanda yanshimbi yasonekawu kudi antu abula kawanina kulonda yasompesheleñahu. Wuñaji windi waloña wafumaña kudi yomweni nawa diyi wayisonekeleli antu nshimbi. “Kuloña niwuñanji hichikuku chetanda [dindi]” dichi tunakuhweleli netu nshimbi, yishina yindi nimwafuukulañayi mwejima mwalala. (Mas. 89:14; 119:128) Kwambukaku naSatana wunakañanyi kuleta kuwunda mukaayi kejima, chiyuulu chaYehova chikaleta kuwunda.
Hakwilenuku Chiyuulu chaYehova!
10 Yehova hayuulaña munjila yatamaku. Muchiyuulu chindi antu akekala akasunuka nawa amuzañalu. (2 Kor. 3:17) Davidi wahosheli muniyi njila nindi: “Kumesu indi [aNzambi] kwekala nikulema niwanta; mwindi mwekalayi mudi niñovu nikuzañajala.” (1 Kushi. 16:7, 27) Ñimbi yamasamu Etani niyena wasonekeli nindi: “Antu akwiluka chakwimbawu mpuña anakooleki; hiyakwenda muchejeji chakumesu eyi, eyi Yehova. Hiyakutiya kuwaha nejina deyi mwaana wejima, hiyakutuumbakana nakuloña kweyeyi.”—Mas. 89:15, 16.
11 Kutoñojokahu chikupu hakuwaha kwaYehova mpinji yejima kunateli kutukwasha kukuhwelela netu chiyuulu chindi dichachiwahi. Twatiyaña neyi chatiyiliyi ñimbi yamasamu wembeli nindi: “Ifuku dimu muyipañu yeyi dinabadiki ikombakaji kuwaha.” (Mas. 84:10) Chinateli kwikala ñahi mwenimu? Chineli hiNleñi yetu, Yehova weluka yuma yitwakankilaña yinateli kutuletela muzañalu nawa watwinkañayi yejima. Yuma yatulejañayi yatukwashaña nawa yatuletelaña muzañalu. Hela chakwila yuma yatulejañayi kwila yakeñekaña kudihana.—Tañenu Isaya 48:17.
Ikalenu naChikuhwelelu Chakola muWanta
14 Shinshikenu Yehova chamukaniniyi Mwanta Davidi wamuIsarela wakushankulu kuhitila muchitiyañenu chaDavidi. (Tañenu 2 Samweli 7:12, 16.) Yehova watiyañeni ichi chitiyañenu naDavidi hampinji yayuulileñayi Davidi muYerusalema, wamukanini nindi Mesiya wakafuma muchisaka chindi. (Luka 1:30-33) Dichi, Yehova washimwini hatooka to-o cheñi nindi muchisaka chaDavidi dimu mwakafuma nyuuli wakekala ‘mwenichiyuulu’ chetanda daWanta wawuMesiya. (Ezek. 21:25-27) Kuhitila mudi Yesu, wanta waDavidi ‘wakakola ngu-u haya nyaka.’ Chalala, mwana kaDavidi ‘wakashakama haya nyaka, niitanda dindi dawanta dakashakama shakame-e neyi itañwa.’ (Mas. 89:34-37) Eñañi, chiyuulu chawuMesiya hichikakoña yuma yatamaku nawa chikahetesha antu haya nyaka!
Yuma Yalema yakuSpiritu
cl 281 ¶4-5
“Yeyi Hohu Washinshika”
4 Izu “dakashinshi” neyi chadizatishawu muNsona jachiHeberu datalisha kuluwi lwamwekeshelañayi muntu chuma chimu nawa watwalekañahu nanichi chilwilu chakadi kuleka. Mwabombela yuma yayivulu kubadika hohu kwikala washinshika. Kafwampi, muntu nateli kwikala washinshika hakampinji muloña dichatela kwilayi. Kwambukaku, kanshinshi kashindamena hakukeña. Cheñi izu “dakushinshika” dinateli kutalisha kuyuma yabula wumi. Chakutalilahu, ñimbi yamasamu wateneni kakweji nindi “chinsahu washinshika mumawulu” muloña wakwila kekalañaku mpinji yejima nawufuku. (Masamu 89:37) Ilaña kwila tushimuna kakweji netu kashinshika nehi. Muloña? Muloña mukashinshi mwekala kukeña—chilwilu chinateli kubula kumwesha chuma chabula wumi.
5 Kwesekeja naNsona, kashinshi kendelaña hamu nakukeña. Ichi chilwilu chamwekeshaña nawu hadi wubwambu hakachi kamuntu wunakumwekesha ichi chilwilu namuntu wunakumwekeshalawu. Kashinshi kamuchidiwu kalema chikupu. Hikadi neyi mankanda ahakaluñalwiji abwankañilaña neyi mpepela yinakukunka. Kwambukaku, kashinshi, hela netu kukeña kwakashinshi, kwashimata chikupu nawa kukweti ñovu yakushinda kukala kwasweja.
SEPTEMBER 30–OCTOBER 6
YUMA YALEMA YAMWIZU DANZAMBI MASAMU 90-91
Mukuhwelelenu Yehova, Hakwila Mwakashakami Yaaka Yayivulu
Antu Anakukeñesha Kushakama Yaaka Yayivulu
Bayi neyi asayantisiti ejima etejaña nawu yitumbu yakukañesha wushinakaji yinateli kukwasha muntu kushakama yaaka yayivulu kubadika chitwashakamaña makonuku. Mwalala, antu anakushakamaku yaaka yayivulu kutachika muyaaka yamuma 1800. Ilaña wunyonji, kudikiña kuyikatu yafwana nikuzatisha yitumbu dichuma chacheni chinaleteshi. Antu adizaña jamagini ahoshaña nawu antu makonu hiyanateli kubadika yaaka yatela kushakamawuku.
Hadi yaaka 3,500 yinahitihu, Mosi nsoneki waBayibolu wasonekeli nindi: “Yaaka yakuhanda kwetu hiyaaka 70, Hela 80 neyi muntu wakola. Hela chochu, yenzala nayihuñu nichineñi; yahitaña swayi, nawa twatuukaña.” (Masamu 90:10) Hela chakwila antu akuzata chamuchidinyi hakwila nawu ashakameña yaaka yayivulu, wumi wekala hohu neyi chahosheliyi Mosi.
Kwambukaku nayaaka yashakamañawu antu, yileñaleña yidi neyi urchin yamukaluñalwiji kachinana hela ñoñi yamumenji yinateli kushakama yaaka kubadika ha 200 nawa nyitondu yidi neyi giant sequoia yinateli kushakama makombakaji ayaaka. Neyi twesekeja yaaka yetu yakuhanda nayaaka yashakamaña iyi yuma niyuma yikwawu yekala nawumi, komana hitwadihulaña netu, ‘Komana iwu wumi wayaaka 70 hela 80 diwumi wekalaku hohu?’
wp19.1 5, chikasha
Nzambi Ijina Dindi Hinyi?
Antu amavulu ehulaña ilu lwihu. Hadaha ninenu mwadihulahu dehi. Tunateli kuhosha muniyi njila netu: Neyi yuma yekala mwiwulu nihamaseki kudi kuyafumini hela netu kudi wayileñeli, hanu dinu Nzambi wafumini kudihi?
Asayantisiti eteja nawu yuma yejima yekala mwiwulu niheseki yikweti ntachikilu. Kwesekeja naniyi nsañu, vasi yatachi muBayibolu yahosha nawu: “Hatachi Nzambi waleñeli nimawulu nimaseki.”—Kutachika 1:1.
Mawulu nimaseki hiyadileñeli aweniku; kwila jidi njilaku jajeni nehi. Kwosi chuma chinateli kudileña chacheniku. Neyi kwadiña wanyi chuma chidi chejima henohu mawulu nimaseki kanda ayileñi, chiña nikulelu dinu mawulu nimaseki kwosi. Hela chakwila hitunateli kutiyishisha chikupuku, ilaña kwadiña muntu waleñeli mawulu nimaseki. Yehova Nzambi, wañovu jejima nawa wukweti maana diyi Ntachikilu.—Yowanu 4:24.
Bayibolu yahosha nawu: “Nimapidi achidiñi kanda ayivwali, hela iseki nampata yamunu mwishina wuchidi kanda wutiyi nyisoñu yakuyivwalaku, kufumisha kumashiita, oko-o, nakutwala kunyaka yahaya nyaka, yeyi Nzambi hohu.” (Masamu 90:2) Dichi, Nzambi yomweni wadiñaku dehi. Kuhiñahu dinu, “hatachi” hakuleña yuma yekala mwiwulu niheseki.—Chimwekeshu 4:11.
Kukeña Chikwatukwashaña Kuleka Kutiya Woma
16 Satana weluka nindi twalemesha wumi wetu. Hela chochu, wahoshaña nindi tunateli kuleka yuma yejima yitukweti kushilahu niwubwambu wetu naYehova kulonda tubuli kufwa. (Yoba 2:4, 5) Satana hintwambi. Ilaña, chineli “wakojejaña kufwa,” Satana wazatishaña woma wutukweti kulonda tumushiyi Yehova. (Heb. 2:14, 15) Mpinji yikwawu antu amwimenañaku Satana ayitiyishaña woma akakudifukula aYehova nawu akuyijaha neyi akuleka wanyi kumukalakela. Hela, Satana nateli kuzatisha mpinji yitunakukeña kutuuka yikatu kulonda tufumpi yishina yamuBayibolu. Andotolu hela antaña jetu abula kwitiya anateli kutukanjikija nawu atwishili mashi mumujimba kulonda tufumpi nshimbi jaNzambi. Hela muntu nateli kutuleja njila yikwawu yakutuukilamu yambukaku nayishina yamuBayibolu.
17 Hela chakwila twakeñaña wanyi kufwa, tweluka netu Yehova watukeña hela chakwila tunafwi. (Tañenu ARoma 8:37-39.) Neyi amabwambu jaYehova afwa, wayanukaña neyi kwiji achidi amomi. (Luka 20:37, 38) Wafwilaña chikupu kuyisañula. (Yoba 14:15) Yehova wafweta wuseya weneni kulonda “[twakekali] nawumi wahaya nyaaka.” (Yow. 3:16) Tweluka Yehova chatukeñayi nawa nichatwakamenañayi. Dichi, chatela tumushiyi Yehova neyi tunakati hela tunakukeña kufwa, twatela kumulomba kulonda atukundeji, atwinki maana niñovu. Dicheliliyi Valérie hamu ninfumwindi.—Mas. 41:3.
Yuma Yalema yakuSpiritu
Komana Mukweti Kañelu Wayikiñaña?
Bayibolu hiyatañishaña nawu muntu wejima wukweti kañelu wamukiñañaku. Eña, Yesu niyena wahosheli nindi: “Dichi bayi mudiwula wumu hadi awa akehelamuku [atumbanji twaKristu], muloña inakuyileja nami añelu jawu ekala mwiwulu mpinji yejima atalaña kumesu aTata yami wekala mwiwulu.” (Matewu 18:10) Dichi, Yesu hatalishili mukwila nindi muntu wudi wejima wukweti kañelu wamukiñañaku, ilaña watalishili mukwila nindi añelu akamenaña atumbanji indi ejima. Hela chochu, akwakudifukula alala hiyadiñijaña muwubanji wakudikeñela nakukuhwelela nawu añelu jaNzambi akuyikiñaku.
Komana ichi chinayi mukwila nawu añelu akwashaña wanyi antu? Inehi. (Masamu 91:11) Amakwawu akuhwelela chikupu nawu Nzambi wayinka añelu ayikiñaña nikuyilombola. Kenneth, itwashimuna muchibaaba chatachi, wudi hakachi kawantu akuhwelela mwenimu. Hela chakwila hitunateli kukaanaku, hadaha mwakuhwelelayi dimu. A Yinsahu jaYehova mpinji yejima eluka chikupu nawu añelu ayikiñaña neyi adi mumudimu wakushimwina. Chineli añelu hitwayimonañaku, hitunateli kwiluka chayizatishañayi Nzambi hakukwasha antu akweti kukala kwamboka-mbokaku. Hela chochu, chatama wanyi kumusakilila Mukwakubadika hawukwashu watukwashañayi munjila yidi yejima.—Akolosi 3:15; Yakoba 1:17, 18.
OCTOBER 7-13
YUMA YALEMA YAMWIZU DANZAMBI MASAMU 92-95
Kumukalakela Yehova Dichuma Chalema muChihandilu!
Dikoleshenuña Wumu naMukwawu ‘Nankashi’?
5 Chuma chatachi chalema chikuletesha tutoñojoki kuzataku nyidimu yakuspiritu, hikumwekesha kusakilila kudi Yehova hakukeña kwindi niyuma yatwililayi. Ñimbi yamasamu wembili nindi: “Chachiwahi kumusakilila Yehova . . . Muloña wunantiyishi kuwaha namudimu weyi, eyi Yehova; nukudisamba nanyidimu yakumakaseyi.” (Mas. 92:1, 4) Enu atwansi, toñojokenu yuma yayinkayi Yehova. Wumi wenu, chikuhwelelu chimukweti, Bayibolu, chipompelu niyuma yimwachiñejaña kumbidi. Kutoñojoka kuzataku nyidimu yakuspiritu hinjila yimu yakumwekeshelamu kusakilila kudi Nzambi haniyi yuma yayinkayi nawa yikuyileñela kuswina kwakwihi nayena.
Hinyi Wawumbaña Yitoñojoka Yenu?
8 Kufwana nvwali wamuwahi, Yehova wakeñaña nindi anyanindi ekali nachihandilu chachiwahi. (Isa. 48:17, 18) Dichi, watwinkaña yishina yatukwashaña kwikala nayilwilu yayiwahi nichitunateli kushakamaña nawakwetu. Muniyi njila, watulejaña nindi tutoñojokeña neyi chatoñojokañayi nikwila yuma yakeñañayi. Nshimbi jindi hijatukañeshañaku, ilaña jatukwashaña kutoñojoka munjila yayiwahi. (Mas. 92:5; Yish. 2:1-5; Isa. 55:9) Jatukwashaña kwila yuma yinateli kutuletela muzañalu nikwikala antu amawahi. (Mas. 1:2, 3) Mwamweni, kutoñojoka neyi chatoñojokañayi Yehova kwakuwahi nawa kwakwashaña!
Yehova Nzambi Yenu Wayilemesha!
18 Chitunakushinakaja, twatela kwiluka netu kudi mudimu wunakukeñayi Yehova nindi tuzateña. (Mas. 92:12-15) Yesu watulejeli nindi Yehova walemesha nyidimu yejima yitwamuzatilaña hela chakwila yamwekenaña neyi yalema wanyi. (Luka 21:2-4) Dichi zatenu hanakumini ñovu jenu. Chakutalilahu, munateli kuhosha hadi Yehova, kulombelaku amanakwenu nikukolesha amakwawu kulonda atwalekihu kwikala ashinshika. Yehova wayimonaña nindi mudi akwakukalakala hamu nindi muloña wakumwovwahila, bayi hamuloña wanyidimu yimwakalakalañaku.—1 Kor. 3:5-9.
Yuma Yalema yakuSpiritu
cl 176 ¶18
“Ochavula Maheta aNzambi . . . Maana!”
18 Talenu kapostolu Pawulu chalumbulwiliyi maana aYehova: “Ochavula maheta aNzambi! Maana indi niyuma yelukayi ochiyakunama! Wunsompeshi windi ochiwakala kuwiluka nawa njila jindi ochijakala kujilondela!” (ARoma 11:33) Pawulu wamwekesheli nindi wahayamini namaana aYehova namazu akutachikilahu muniyi vasi akwila nawu “Ochavula.” Izu dachiGiriki dazatishiliyi dakwila nawu “maheta” dadifwana chikupu nezu dakwila nawu “mwikela.” Mwamweni, mazu azatishiliyi anakutukwasha kwiluka chekala maana aNzambi. Neyi tutoñojoka hamaana akwetiyi Yehova, chidi tuhu neyi tunakusumbila muwina weneni watonkama chikupu, kukuma nehi, hansa yachu tumona hiwakumina nichiwudi. (Masamu 92:5) Mwamweni neyi tutoñojoka hansañu yamuchidiwu chikutukwasha kwikala adikehesha?
OCTOBER 14-20
YUMA YALEMA YAMWIZU DANZAMBI MASAMU 96-99
“Shimunenu Nsañu Yayiwahi”!
Nsañu Yayiwahi Hichumanyi?
AKAKRISTU atela kushimwina “nsañu yayiwahi yawanta” dikwila nawu kulejaku antu, nakuyilumbulwila nawu Wanta hinfulumendi yakayuula antu aloña hakekala hamaseki kumbidi. Hela chochu, mazu akwila nawu “nsañu yayiwahi” ayizatisha munjila yikwawu muBayibolu. Chakutalilahu, yahosha nawu “nsañu yayiwahi yawamwinu” (Masamu 96:2); “nsañu yayiwahi yaNzambi” (ARoma 15:16); nawa “nsañu yayiwahi yaYesu Kristu.”—Maku 1:1.
Muwihi tukuhosha netu, munsañu yayiwahi mwabombela chalala chejima chahosheliyi Yesu nawa chasonekeliwu atumbanji twindi. Henohu kanda ayi mwiwulu, Yesu walejeli atumbanji twindi nindi: “Yenu mwakelishi antu akunyuza yejima ekali atumbanji, muyipapatisheña mwijina daTata nidaMwana nidaspiritu yajila, muyidizisheña ahembeña yuma yejima yinnayileji enu. (Matewu 28:19, 20) Dichi mudimu wawakaKristu alala bayi neyi wakuleja antu haWanta hohuku; ilaña atela nikufwilaña kwilisha atumbanji.
Chumanyi Chikamwekana Hefuku daKusompesha?
Neyi chinamwekeshuwu hamwevulu wudi kuchidiilu, antu amavulu atoñojokaña nawu Hefuku Dakusompesha antu amavulu nankashi akemana kwitanda daNzambi nakuyisompesha kwesekeja nayuma yakoñeleñawu, amakwawu akayinka wuloku wawumi mwiwulu nawa amakwawu akayikabisha muhelu. Hela chochu, Bayibolu yahosha nawu nkeñelu Yefuku daKusompesha yidi yakukuula antu kuyuma yatama. (Masamu 96:13) Nzambi watonda Yesu kwikala nsompeshi wakafuntisha kuloña kudi antu.—Tañenu Isaya 11:1-5; Yilwilu 17:31.
Kuwunda Hadi Ikombakaji Danyaka Nihaya Nyaaka!
18 Awuna wubwambu wawuwahi awuluwañesheli hampinji yelili Satana yadimbi antu adikañi nachiyuulu chaYehova. Dichi kufuma tuhu mu 1914, Wanta wawuMesiya wemika njila jakufuntishilamu kunuñañana nikuwunda. (Efwes. 1:9, 10) Muchiyuulu Chayaaka Ikombakaji, yuma yayiwahi ‘yichidi kanda yimwekani’ yikamwekana. Kuhiñahu ‘dihakenza kukumisha,’ dikwila nawu, kukumisha kwaChiyuulu chaKristu Chayaaka Ikombakaji. Chumanyi chikalondelahu? Hela chakwila amwinka “ñovu jamwiwulu nijahamaseki jejima,” Yesu hadivwimbañaku. Hafwilaña kuhukula chifulu chaYehovaku. Mukudizoza ‘wakahana wanta kudi Nzambi, Tata yindi.’ Wakazatisha chifulu chindi chalema niñovu yamwinkawu “kulonda kulemesha Nzambi.”—Mat. 28:18; Fwi. 2:9-11.
19 Haniyi mpinji, antu akayuulewaña naWanta hamaseki akekala awanina. Akembujola chakutalilahu chaYesu mukudizoza nawa aketeja chiyuulu chaYehova namuchima wumu. Akekala nakukooleka kwakumwekesha kukeña kwawu kwakwila mwenimu kuhitila mukupuluka kweseka kwakukumishaku. (Chim. 20:7-10) Kuhiñahu, akwakudikaña ejima, antu niañelu, akayijilumuna haya nyaka. Yakekala mpinji yamuzañalu nawa yakuluña chikupu! Yileñaleña yejima yakamuhameka Yehova namuzañalu muloña wakekala ‘yuma yejima kudi antu ejima.’—Tañenu Masamu 99:1-3.
Yuma Yalema yakuSpiritu
it-2 994
Kamina
Mazu akwila nawu “kamina kakaha” amwekana hohu mumukanda waMasamuku, ilaña nimumukanda waIsaya nikapostolu Yowanu. (Ms 33:3; 40:3; 96:1; 98:1; 144:9; 149:1; Isa 42:10; Chi 5:9; 14:3) Neyi tushinshikisha chiwahi nsañu yinanyeñumuki mazu akwila nawu “kamina kakaha” yinakumwekesha nawu tumina twamuchidiwu avula kutwimba muloña wayuma yayiha yinakoñiyi Yehova nyuuli wabadika mukuleña kwejima. Neyi chabidikawu namuzañalu haMasamu 96:10: “Yehova nekali Mwanta.” Yuma yayiha yinakoñiyi Yehova hakutohesha wanta windi kushilahu niyumiyi chiyinakwimenaku mawulu niiseki, diyinakuhoshahu “kamina kakaha.”—Ms 96:11-13; 98:9; Isa 42:10, 13.
OCTOBER 21-27
YUMA YALEMA YAMWIZU DANZAMBI MASAMU 100-102
Sakililenuña haKukeña kwaYehova kwaKashinshi
Chakudiloñesha Kupapatishewa
18 Kukeña kumwamukeña Yehova, dichilwilu chachiwahi chikupu chimukweti. (Tañenu Yishimu 3:3-6.) Kukeña kutwamukeña Nzambi kunateli kutukwasha kuumika kukala kutwamonaña muchihandilu. Kakavulu Bayibolu yahoshaña hakukeña kwaYehova kwakashinshi kwayimwekeshelañayi ambuñindi. Kukeña kwakashinshi kwatalisha mukwila nawu hamba kayishiya ambuñindi hela kuleka kuyikeñaku. (Mas. 100:5) Ayileña muchifwanisha chaNzambi. (Kutach. 1:26) Munateli kumwekesha ñahi kukeña kwamuchidiwu?
19 Mwekeshenuña kusakilila. (1 Tes. 5:18) Ifuku niifuku dihulenuña nenu, ‘Yehova nammwekesheli ñahi kukeña?’ Kuhiñahu, musakililenuña Yehova mukulomba kuhitila mukutena yuma yinayililiyi. Ilukenu nenu Yehova wayililaña yuma yayiwahi halwenu muloña wayikeña, neyi chelukiliyi kapostolu Pawulu hadi Yehova.. (Tañenu AÑalija 2:20.) Dihulenu nenu, ‘Komana ninami inakukeña kumumwekeshela kukeña?’ Kukeña kumwamukeña Yehova kukuyikwasha kutwalekahu kushinda kweseka nikuumika kukala kwejima. Kukuyisañumuna kutwalekahu kwila yuma yakuspiritu, nakumwekesha ifuku niifuku nenu mwamukeña Tata yenu.
“Hembenuña Yitoñojoka Yenu, Tonenuña!”
10 Wubanji wukwawu wutwatela kutondolwela wunabombelimu wusensi, kusweja kunwa walwa, kusweja kuda, nhoshelu yakuneñesha akwetu, kushilahu nikutala yisela yamadombu, nyevulu yanzekesi niyuma yikwawu. (Mas. 101:3) Mukankunyi netu, Diyabolu, mpinji yejima wakeñakeñaña njila yakuluwañeshelamu wubwambu wetu naYehova. (1 Pet. 5:8) Neyi tubula kwikala atona, Satana nateli kutuletesha kutachika kwikala nechima, kubula kwikala ashinshika, kwikala nalwisu, kuhelañana, kudivwimba ninkunyi. (Ñal. 5:19-21) Hakusambila, tunateli kutoñojoka netu iyi yilwilu yikutuluwañesha wanyi. Ilaña neyi tubula kuyibwitamu swayi-swayi, yinateli kukula neyi mutondu wafwana nawa mukufuma kukala.—Yak. 1:14, 15.
Komana Mukutiyilila Chinakutusoñamishayi Chikupu Yehova?
7 Chumanyi chitwatela kwila kulonda tutondolweli antañishi akutwamba? Hitwayitambwilaña mumataletu hela kuyimushaku. Hitwatañaña cheñi nyikanda yawu, kuyitala hachisanji chanyivwimbimbi, kutaña nsañu yasonekañawu haIntaneti, hela kusoneka mazu etu kunsañu yasonekañawu haIntanetuku. Muloñadi chitwafwilaña kuyitondolwela? Muloña twamukeña Nzambi “yansañu yalala.” Dichi hitwakeñaña kutiyilila kuntañishilu yakutwamba yambuka nansañu yalala yekala Mwizu daNzambuku. (Mas. 31:5; Yow. 17:17) Twakeña kuloñesha kunakuzatishayi Yehova hakututañisha nsañu yayiwahi yalala. Kuloñesha kwaYehova dikwatudizishili ijina daYehova nichidalumbuluka, kufuukula kwindi kudinu iseki, chuma chamwekanaña neyi tunafwi, nikuchiñeja kwakusañuka. Komana mwanukaña chimwazañaleli hampinji yimwadizili iyi nsañu yalala ninsañu yikwawu? Dichi bayi mwiteja nsañu yakutwamba yatañishaña antañishi akutwamba yiyileñeli mufumi mukuloñesha kwayidizishili nsañu yalalaku.—Yow. 6:66-69.
8 Hichidi namuloña namazu ahoshañawu antañishi akutwambaku, hitwatela kuyilondelaku! Kwosi chuma chatela kutuleñela kutiyilila kudi antu adi neyi mashima amenji omaku. Antu ayitiyililaña akatiya nsonyi. Tunakufwila kwikala ashinshika kudi Yehova nikukuloñesha kwindi. Kunu kuloñesha kanda kututiyisheñahu dehi nsonyi nawa mpinji yejima kwatwinkaña menji amavulu atooka ansañu yalala yaMwizu daNzambi.—Isa. 55:1-3; Mat. 24:45-47.
Yuma Yalema yakuSpiritu
it-2 596
Nkumbi
Neyi nkumbi naminyi dehi yakuda, kakavulu watukaña nakuya nakuwila kwiluña kwamwena, chawilayi wukudikundamena, neyi neñiji mutu windi mumpula, chakwila neyi muntu nemani hahalehi wukumona neyi ilola ditooka. Iwu kada welaña chumichi hadi mpinji yayilehi, chadikundamenañayi nakumwena chinesekani nachahosheliyi ñimbi yaMasamu haneñeliyi nakusoneka nindi: “Nafwani nkumbi wamwisaña.” (Ms 102:6) “Isaña” dinakutenawu hanu anakutena chinkalampata wanyi, ilaña anakutena mwiluña mwashakamañawu antu, hadaha mwiluña mudi nimenji. Muyilaaka yikwawu, mumaluña amakwawu akukabeta kachimunswa kachinekineki chaYodani mwekalaña nkumbi. MuIsarela mwekala nyichidi yisatu yaNkumbi. Javulamu hinkumbi jakukabeta kakumusela jitooka (Pelecanus onocrotalus); nkumbi jakuDalamatiya (Pelecanus crispus) ninkumbi jawulombu wapinki-hanyima (Pelecanus rufescens) jamwekanaña chakamu nakamu.
Nkumbi jakeña kuya kumaluña kwabulaña kudiminawu antu kulonda abuli kujiluwañesha. Kwenakuna jatuñaña yisakala nikutetula nawa jafumañaku hanyima neyi inshi jinamani dehi. Muloña wakwila wakeña kushakama nkawindi nikuya kumaluña amwena, iwu kajila amuzatisha muBayibolu kwimenaku mahembi. Kumwekesha Edomi chakashalayi mahembi, Isaya washimwineñahu dehi nindi nkumbi jakashakamaña mwituña. (Isa 34:11) Zefwaniya waprofweteleñahu dehi nindi nkumbi jakashakamaña hewulu dayishimi yaNineve, wamwekesheleña chakajilumukayi chikupu nawa niantu chakajimañanawu.—Zef 2:13, 14.
OCTOBER 28–NOVEMBER 3
YUMA YALEMA YAMWIZU DANZAMBI MASAMU 103-104
“Wanukaña Nindi Tudi Lunkuñu”
Mwimbujolenuña Yehova—Ikalenu Amwovu
5 Yehova wekala wamwovu muloña wakwila wadizoza nawa wukweti wushona. Chakutalilahu, Yehova wamwekesheli nindi wadizoza hampinji yadiñayi kwakwihi nakukisañana antu atama amuSodoma. Yehova wazatishili añelu jindi kumuleja muntu waloña Loti nindi atemukili kwiluña damapidi. Loti watiyileña woma kuya kunidi iluña. Dichi walembeli nindi yena nichisaka chindi ayiteji kuya nakushakama kuZowari, tawuni yanyanya yashimwiniyi Yehova nindi wukuyikisañana. Yehova wadi kumukanjikija Loti nindi chiña ovwahili mwamulejeliyi. Ilaña wetejeli mwalombeliyi Loti, hela chakwila chumichi chadi kuletesha abuli kukisañana Zowari. (Kutach. 19:18-22) Chimwahitili yaaka yayivulu, Yehova wayimwekesheleli antu ashakamineña muNiniva wushona. Watemesheli kaprofwetu Yona kuya nakubidika nsañu yakujilumuka kwamusumba niantu atama adiñamu. Ilaña aNiniva chabalumukiliwu mumuchima, Yehova wayitiyilili luwi nawa musumba hawujilumwiniku.—Yona 3:1, 10; 4:10, 11.
Mushindamenenu Yehova Neyi Cheliliyi Samusoni
16 Hela chakwila Samusoni wamweni kukala kwakuvulu muloña wanichi chiluwa chakoñeliyi, walekeli wanyi kuzata nañovu kulonda eleña nkeñelu yaYehova. Hela chakwila tunakoñi chiluwa nawa tunakukeñeka kutuzuwila hela kujimbesha kukooleka kutukweti, hitwatela kuleka kumukalakela Yehovaku. Anukenu nenu, Yehova wadiloñesha kutwanakena. (Mas. 103:8-10) Hichikweti muloña nayiluwa yetuku, Yehova nateli kutuzatisha neyi chamuzatishiliyi Samusoni.
17 Talenu chuma chamumwekeneni manakwetu wakansi Michael. Wadiña nakudikita chikupu mumudimu waYehova, wadiña nkoñi wakuzatila nawa payiniya wampinji yejima. Ilaña chawushona, wakoñeli chiluwa chaletesheli ajimbeshi kukooleka kwadiñayi naku muchipompelu. Wahosheli nindi, “Nadiña nakudikita chikupu mumudimu waYehova kushika tuhu nimpinji yamwekeni chumichi. Ilaña neyi mukulabula kwadisu, natiyili tuhu neyi kwosi chuma chinatela kwila mumudimu waYehova. Hinatoñojokelihu nami Yehova wakanshiya chisayikilaku, ilaña najinokeleña neyi chakwila wubwambu wami naYehova wakekalahu neyi chiwadiña hakusambila hela neyi nakamukalakelahu chikupu muchipompelu neyi chinadiña nakumukalakela.”
18 Chasweja kuwaha, manakwetu Michael walekeli wanyi kumukalakela Yehova. Wabombelelihu nindi: “Nashili maana hakuwahisha wubwambu wami naYehova kuhitila mukulomba kudi yena mpinji yejima, kudiza nikutoñojokahu chikupu.” Mukuhita kwampinji, manakwetu Michael wekalili cheñi nakukooleka muchipompelu. Chayinu mpinji himukulumpi nawa hipayiniya wampinji yejima. Wahosheli nindi: “Wukwashu nimazu akukolesha inatambwilileña, sweje-e kudi akulumpi, ankwashili kwiluka nami Yehova wuchidi wankeña. Ichi inakukalakala cheñi muchipompelu nachinleji chitooka. Ichi chuma chammwekeneni chankwasha kwiluka nami Yehova nateli kwanakena muntu wejima wunabalumuki chikupu mumuchima.” Twatela kukuhwelela chikupu netu Yehova wukutuzatisha nikutukiswila ninetu hela chakwila tunakoñi yiluwa, chakala hohu neyi tuzata nañovu nakuhimpa yilwilu yetu nikutwalekahu kumushindamena.—Mas. 86:5; Yish. 28:13.
Munateli Kutwesha Kushikija Yikonkwanyi Yenu yakuSpiritu
2 Neyi kudi chikonkwanyi chimuchidi kanda mushikiji, mwani bayi muzeyaku. Muloña nikushikija tuhu chikonkwanyi chanyanya chakeñekaña kwikala nampinji nikuzata nañovu. Muchima wumukweti wakufwila kushikija chikonkwanyi chenu wamwekeshaña nawu mwalemesha wubwambu wenu naYehova nawa munakukeña kumukalakela kwesekeja nahanakumini ñovu jenu. Yehova walemesha chimwazataña nañovu. Kafwampi, hakeñaña nindi mumwilili yuma yimukubula kutweshaku. (Mas. 103:14; Mika 6:8) Dichi mwatela kwimika chikonkwanyi chimukutwesha, kwesekeja nachidi yuma muchihandilu chenu. Neyi munemiki chikonkwanyi, yumanyi yimwatela kwila hakwila muchishikiji? Tuhanjekenu hanjila jimu jinateli kuyikwasha.
Yuma Yalema yakuSpiritu
cl 55 ¶18
Ñovu yaKuleña Yuma—“Ntuñi Yewulu niIseki”
18 Chumanyi chitwadizilaña kudi Yehova kutalisha hachazatishañayi ñovu yindi yakuleña? Twazañalalaña hakumona yuma yayivulu yaleñayi. Ñimbi wumu wesamu wahosheli nindi: “Nyidimu yeyi ochiyavula, eyi Yehova”! . . . Iseki denzala nayuma yiwaleña.” (Isamu 104:24) Mwamweni! Antu adiza jasayansi awana nawu kudi mamiliyoni ayuma yayivulu yaleñayi yekala hanu hamaseki; hela chochu, amakwawu ajinookaña neyi chakwila mwamweni iyi yileñaleña yabadika hamamiliyoni. Muntu neyi naleñi chuma, chuma chinatuñiyi chinateli kuuma mpinji yimu. Kwambukaku, Yehova wukweti ñovu jabadika, neyi chuma chaleñeliyi chikisika wekala nañovu yakuleñelahu chuma chikwawu chachiha.