Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
MARCH 3-9
YUMA YALEMA YAMWIZU DANZAMBI YISHIMU 3
Mwekeshenu Nenu Mwamukuhwelela Yehova
ijwbv chibaaba 14 ¶4-5
Yishimu 3:5, 6—“Bayi Wukundamena haMaana Eyiku”
“Mukuhweleli Yehova namuchima weyi wejima.” Twamwekeshaña netu twamukuhwelela Nzambi neyi twila yuma kwesekeja nachakeñañayi. Twatela kumukuhwelela Nzambi chikupu, namuchima wetu wejima. MuBayibolu, muchima kakavulu watalisha kuwuntu wetu wamukachi, mwabombela chatiyañayi muntu, yuma yamusañumunaña, chatoñojokañayi niyilwilu yindi. Dichi, kumukuhwelela Nzambi namuchima wetu wejima mwabombela yuma yayivulu kubadika hachitwatiyaña. Twafuukulañahu muniyi njila, muloña tweluka chikupu netu Nleñi yetu weluka yuma yinateli kutuwahila.—ARoma 12:1.
“Bayi wushindamena hamaana eyiku.” Twatela kumukuhwelela Nzambi, hitwatela kushindamena hayitoñojoka yetu yabula kuwaninaku. Neyi tudishindamena hela twiteja kufuukula, tunateli kwila yuma yinateli kumwekana neyi yayiwahi hakusambila, ilaña nkumininaku mukufuma yatama. (Yishimu 14:12; Yeremiya 17:9) Maana aYehova abadika chikupu maana etu. (Isaya 55:8, 9) Neyi chakwila atulombolaña nayitoñojoka yindi, chihandilu chetu chikwikala chiwahi.—Isamu 1:1-3; Yishimu 2:6-9; 16:20.
ijwbv chibaaba 14 ¶6-7
Yishimu 3:5, 6—“Bayi Wukakela kuMaana Eyiku”
“Munjila jeyi jejima wutoñojokeña hadi yena.” Twatela kwiluka chamonañayi Nzambi muyuma yamuchihandilu chetu nimuyuma yejima yalema yitwafuukulaña. Twelaña mwenimu kuhitila mukulomba wunlomboli windi nikulondela yuma yahoshañayi Mwiizu dindi, Bayibolu.—Isamu 25:4; 2 Timotewu 3:16, 17.
“Yena wakakwolwela njila jeyi.” Nzambi wololaña njila jetu kuhitila mukutukwasha kulondela nshimbi jindi jaloña. (Yishimu 11:5) Dichi twatondolwelaña nyihetu nawa twadiluñishaña chihandilu chamuzañalu.—Isamu 19:7, 8; Isaya 48:17, 18.
be 76 ¶4
Pamenuña—Yilenuñaku haMbidi
Muloña wakwila wahitahu dehi mukukala kwakuvulu muchihandilu, muntu nateli kwikala mukweseka kwakutoñojoka nindi: ‘Iku kukala nakumonahu dehi. Neluki chinatela kwila.’ Komana iku hikutoñojoka mwamaana? Yishimu 3:7 yatubabeshaña nawu: “Bayi wudimona eyi aweni neyi wukweti maanaku.” Yuma yitwahitañamu muchihandilu yinateli kutukwasha kutoñojoka chikupu nakukala kwamwekanaña muchihandilu. Neyi tunakupama, yuma yitwahitañamu muchihandilu yinateli kuletesha yitoñojoka ninyichima yetu kwiluka nawu twakeñakeña wukwashu waYehova hakwila twili chiwahi. Komana kupama kwetu, kwamwekenaña bayi mukudikuhwelela hampinji yitunakuhita mukukalaku, ilaña kuhitila mukushindamena muwunlomboli waYehova muchihandilu chetu. Chumichi chamwekeshaña nawu kwosi chuma chitunateli kwila muñovu jetu nawa twatwalekañahu kumukuhwelela nikumukeña Tata yetu wamwiwulu.
Yuma Yalema yakuSpiritu
w06 9/15 17 ¶7
Yikuma Yamaneni Kufuma muMukanda waYishimu
3:3. Twatela kwikala nakukeña kwenzala luwi nawa ashinshika nikukwimwekesha kudi antu neyi chitunateli kumwekesha ileñi damunshiñu dalema wuseya. Cheñi twatela kusoneka iyi yilwilu munyichima yetu nikuyilisha yiikali yalema kudi etu.
MARCH 10-16
YUMA YALEMA YAMWIZU DANZAMBI YISHIMU 4
“Hembaku Muchima Weyi”
Munateli Kuhemba Ñahi Muchima Wenu?
HaYishimu 4:23, izu dakwila nawu “muchima” datalisha ‘kuwuntu wamukachi’ hela “mwami mwakujinda.” (Tañenu Isamu 51:6 nitumazu twaheshina.) Muchima wunateli cheñi kwimenaku yuma yitwatoñojokaña, chitwatiyaña, yilwilu niyuma yitwafwilaña. Muchima watalisha kuchitwekala mukachi, bayi chitwamwekanaña hanjiku.
Munateli Kuhemba Ñahi Muchima Wenu?
Neyi tunakukeña netu tuhembeña muchima wetu, twatela kwiluka yuma yinateli kuluwañesha muchima wetu nawa twatela kuzatilahu swayi kulonda tudikiñi. Izu dekala haYishimu 4:23 dabalumunawu nawu “hembaku,” datwanukishaña mudimu wazatileñawu akwakutalatala. Mumafuku aMwanta Solomoni, akwakutalatala emeneña hewulu dampwembu yamusumba nawa avumishileña mpuña neyi amona nawu kudi ayilumbu anakwinza. Neyi tunakufwikija iyi yuma chikutukwasha kwiluka chuma chitwatela kwila hakwila tumukañeshi Satana yabuli kuluwañesha yitoñojoka yetu.
Mumafuku akunyima, akwakutalatala azatilileña hamu nawakwakuhemba kuyiisu. (2 Sam. 18:24-26) Wejima wawu azatilileña hamu hakukiña musumba nikushinka yiisu neyi amona nawu kunakwinza chilumbu. (Nehe. 7:1-3) Chinleji chetu chadizishewa naBayibolu chinateli kuzata neyi mukwakutalatala nikutusoñamisha neyi Satana hakukeña kuluwañesha muchima wetu, dikwila nawu kuluwañesha yitoñojoka yetu, chitwatiyaña, yilwilu yetu hela yuma yitwafwilaña. Neyi chinleji chetu chitusoñamisha, twatela kuchovwahila nikutondolwela wubanji.
Munateli Kuhemba Ñahi Muchima Wenu?
Hakwila nawu tuhembi muchima wetu hitwatela kutondolwela hohu yuma yatamaku, ilaña twatela cheñi kwiteja yitoñojoka yayiwahi. Toñojokenu cheñi hachakutalilahu chamusumba wudi mumpwembu. Mukwakuhemba kuchiisu washinkileña chiisu kuchina ayilumbu jawu akenda keñila, ilaña mpinji yikwawu washinkwileña kuchiisu kulonda eñiji yakuda niyuma yikwawu yakeñekeleña. Neyi chakwila yiisu abulileña kuyishinkula, antu amumusumba adi kufwa nanzala. Munjila yoyimu, twatela kwenzununa muchima wetu nakwiteja yitoñojoka yaNzambi yitukwashi.
“Hembaku Muchima Weyi!”
Muloñadi chitwatela kuhemba muchima wetu wachifwikija? Nzambi wamusañumwini Mwanta Solomoni kusoneka nindi: “Hembaku muchima weyi chakubadika chiwahembaña yuma yejima, muloña mwenomu dimu mwedikaña wumi.” (Yishimu 4:23) Chihandilu chetu chamakonu nikuchiñeja kwetu kwakumbidi kwashindamena hachekala muchima wetu wachifwikija. Muloñadi? Muloña Nzambi watalaña mumuchima. (1 Samweli 16:7) ‘Himuchima wamuntu wamukachi,’ weluka chatiyañayi Nzambi hadi etu.—1 Petulu 3:4.
Yuma Yalema yakuSpiritu
Muchiñililenuña Yehova Yakawahishi Yuma?
Yishimu 4:18 yatulejaña nawu “njila yawantu aloña yidi neyi mwaana wahakucha, wayaña nakutooka nichikushika itañwa mwiwulu.” Mazu atalisha munjila yasolwelañamu Yehova nkeñelu yindi chovu-chovu kudi antu jindi. Hela chochu, iyi vasi yinateli cheñi kutukwasha kwiluka mukwaKristu chahimpañayi yilwilu yindi muchihandilu chindi nakuswina kwakwihi naYehova. Muntu hanateli kushikena kwikala ibwambu daNzambi hohenohuku. Hahitaña mpinji. Neyi tudizaña nankashi nikuzatisha kufumba kwekala Mwizu daNzambi nikutwatambwilaña mukuloñesha kwindi, tukutachika kwikala nayilwilu neyi yaKristu chovu-chovu. Tukusweja cheñi kumwiluka Nzambi. Talenu Yesu chalumbulwiliyi ichi chikuma.
MARCH 17-23
YUMA YALEMA YAMWIZU DANZAMBI YISHIMU 5
Tondolwelenu Wuvumbi
w00 7/15 29 ¶1
Munateli Kwikala Akadi Majilu Mukanu Kaayi Munenzali Wuvumbi
Munichi chishimu, mukanshidi anamwesekeji “namumbanda cheñi”—chivumbi. Mazu azatishileñayi akumukokola nachu adiña atowala neyi ipuma dawuchi nawa asenena kubadika manji amuolivi. Yilwilu yakukokola nachu yawuvumbi komana hiyatachikaña muniyi njilaku? Chakutalilahu, talenu chuma chamumwekeneni nsoneki walubanji wejina daAmy wayaaka 27. Wahosheli nindi: “Kudi iyala wumu kumudimu wañushaña maana nankashi nikunhameka nankashi hadi hejima. Chatiyakanaña chiwahi neyi kudi muntu wunakukumona. Ilaña neluka nami iyi yilwilu yayiwahi yammwekeshelañayi wakeñaña nindi twili wuvumbi. Hinukwiteja yilwilu yindi yekoku kunkokolaku.” Mazu akulambisha amukakukokola kakavulu akokolaña neyi wuneluki wanyi chinakuhoshelayi owu mazu. Muloña wachumichi twatela kuzatisha wuswa wetu wakutoñojoka.
w00 7/15 29 ¶2
Munateli Kwikala Akadi Majilu Mukanu Kaayi Munenzali Wuvumbi
Yuma yafumañamu hanyima yakwila wuvumbi yalula neyi mutondu walula nawa yawambuka neyi mpoku yakabali yawumwemu kuyedi, dikwila nawu kuyeña nawa munateli kufuma nikufwa. Kakavulu yuma yalula yafumañamu diyi yeniyi, kutukabisha kudi chinleji chamuchima, kwimita ivumu dakubula kukeña, hela yikatu yasambukilaña muloña wakwila wuvumbi. Toñojokenu kuyeña kwatiyañayi muntu wukweti mwinikwindi wuneli wuvumbi. Kwila wuvumbi kamu hohu kukuletesha muntu kwikala nachineñi chakabula kumana swayi. Eña, yuma yafumaña mukwila wuvumbi yakataña.
w00 7/15 29 ¶5
Munateli Kwikala Akadi Majilu Mukanu Kaayi Munenzali Wuvumbi
Twatela kushakamaña hahalehi nawantu elaña wuvumbi. Muloñadi wutwatela kudikamikila hatooka kuhitila mukutiyilila kutumina twawu twatama, kutala yisela yatama, hela kutala nyevulu yanzekesi? (Yishimu 6:27; 1 AKorinda 15:33; AEfwesesa 5:3-5) Nawa chikutama neyi tuyikokolaña kuhitila mukuyikenkamina hela mukwikala nanvwalilu nimmwekenu yatama!—1 Timotewu 4:8; 1 Petulu 3:3, 4.
Yuma Yalema yakuSpiritu
w00 7/15 29 ¶7
Munateli Kwikala Akadi Majilu Mukanu Kaayi Munenzali Wuvumbi
Dimuloña waweni Solomoni wakonkomweneni hayuma yatama yafumaña muwuvumbi. Wujila nikubula kudilemesha eyi aweni, jendelaña hamu. Komana kwila chumichi muloña wakufwila kumanisha mpwila yeyi yawuvumbi hela yawantu acheñi hikwatiyishaña nsonyiku? Kwila wuvumbi namuntu wabula kwikala mwinikweyi, hikubula kudilemesha eyi aweni.
MARCH 24-30
YUMA YALEMA YAMWIZU DANZAMBI YISHIMU 6
Chumanyi Chitunateli Kudizila Kudi Nzenkeneni?
it-1 115 ¶1-2
Nzenkeneni
‘Maana Akuvwalika Nawu.’ Maana awanzenkeneni bayi neyi ekalaña nawu muloña wakubabala mukutoñojokaku, ilaña hamuloña wamaana ayinkawu kudi Ñleñi yawu. Bayibolu yahosha hachelañawu anzenkeneni nawu ‘aloñeshaña yakuda yawu munvula, nawa apompeshaña yakuda yawu muchilaaka chakwaañula.’ (Yis 6:8) Chuma chimu chavula kuwanika hadi nzenkeneni jamboka-mboka jamuPalestine, jaañulaña, hela jadimaña, nzenkeneni (Messor semirufus), jahembaña mbutu yayivulu munooña nawa ayizatishaña muyilaaka, kushilahu nimumpinji yanvula helaña yakuda yinekali yakala kuwana. Iyi nzenkeneni kakavulu yawanikaña kuwuhulilu, kwekalaña mbutu ninsaachi yayivulu. Neyi nvula yizowesha mbutu yahembeliwu, nzenkeneni yaañulaña, yatwalaña mbutu hamwana kulonda yuumi. Ayiluka nawu yafumishaña kamuchima kakeni kambutu yinahembiwu kulonda yibuli kumena. Mukanka wanzenkeneni yaañulaña wamwekenaña munjila yazatishañawu nankashi kushilahu nimafulu ambutu ashalaña hawiñililu.
Yilwilu Yayiwahi Yekala naNzenkeneni. Kusandujola kwantesha hadi anzenkeneni kukutuletesha kwiteja mazu akwila nawu: “Eyi nkopi, yaku kudi nzenkeneni; Shinshikaku chelañayi yuma kulonda wiikali namaana.” (Yis 6:6) Bayi neyi akweti hohu maana akudiloñeshela chadimu nayuma yakumbidiku, ilaña akweti chilwilu chakutatakena nimuchima wakufwila kwilamu, kakavulu asendaña yuma yalema yinabadiki hanyijimba yawu mapampa kayedi hela nikubadikahu, azataña hakumina ñovu jawu kulonda amanisha mudimu wawu, nawa alekaña wanyi hela chakwila akudimbuka, kuselumuka hela akwalumukila mwakunama. Chakuhayamisha ekala anuñañana, ahembaña maluña awu awunyonji nawa adakamenaña, kakavulu asendaña wunadikatishi hela wunazeyi nakumutwala kuwina wawu.
w00 9/15 26 ¶3-4
Hembaku Ijina Deyi
Kufwana anzenkeneni, kwila ninetu twikala adikita nehi? Kuzata nañovu nikufwila kuwahisha nzatilu yetu kwakuwahi chili anakututala hela nehi. Mwamweni, kushikola, kumudimu, nihakuzata nyidimu yakuspiritu, twatela kuzata hakumina ñovu jetu. Neyi anzenkeneni chadiluñishañawu yuma yayiwahi yafumaña mukudikita kwawu, Nzambi niyena nakukeña nindi ‘tumoneña yuma yayiwahi yafumaña mumudimu windi wakola wejima.’ (Mukwakutañisha 3:13, 22; 5:18) Chinleji chamuchima chitooka nikuzañalala diwufwetu wafumaña mukuzata nañovu.—Mukwakutañisha 5:12.
Kuzatisha malwihu ayedi anakubula kukeñeka kwakula, Solomoni nakuhindwisha nkopi nindi: “Eyi nkopi, wukutwalekahu kukaama kushika mpinjinyi? Wukuhinduka mutulu mpinjinyi? Kukaama chantesha, tulu twantesha, kuvuña makasa chantesha nakunooka, wuzweñi weyi wakenza neyi ikombi, nawa yuma yiwakeñaña neyi muntu wunadimanyeki.” (Yishimu 6:9-11) Henohu nkopi wuchidi wakaama, wuzweñi wanyakalaña kumushikena neyi ikombi, nawa kukaankila kwamulukukaña neyi muntu wunadimanyeki. Mumaha ankopi mwanyakalaña kuvumba nsela nikanyuñi. (Yishimu 24:30, 31) Bizinesi yindi yakisikaña hohu mukapinji kantesha. Muntu wamwiñija mudimu wukutwalekahu kuhemba muntu wamuchidiwu kushika mpinjinyi? Nawa kadizi wabulaña kushaku maana kukutaña yuma yadizañayi nateli kupasa kushikola?
Yuma Yalema yakuSpiritu
w00 9/15 27 ¶3
Hembaku Ijina Deyi
Yuma 7 yashimuna yishimu hiyuma yamaneni nawa mwadivuñila yuma yejima yatama. “Mesu adinka wanta” ‘nimuchima wakasaña tufuta twafwana’ hinshidi yakukoñela muyitoñojoka. “Idimi datwambaña” ‘nichinsahu wakutwamba watwambaña mpinji yejima’ himazu atama. ‘Makasa apwekeshaña mashi akadi muloña’ ‘ninyendu yatemukilaña kuyuma yatama, hiyilwilu yatama. Nawa chuma chasweja kuhelayi Yehova himuntu wakojejaña antu ashakamaña hamu mukuwunda kubula kutiyañana. Kuvulilaku kwaniyi yuma kufuma ha 6 kushika ku 7 kunakumwekesha nawu ndandanda yaniyi yuma yinawanini wanyi muloña antu atwalekahu nakuvulishilaku yilwilu yawu yatama.
MARCH 31–APRIL 6
YUMA YALEMA YAMWIZU DANZAMBI YISHIMU 7
Tondolwelenu Yuma Yinateli Kuyitwala muKweseka
w00 11/15 29 ¶5
“Hembaku Nshimbi Jami Kulonda Wutwalekihu Kuhanda”
Windu hadiña nakusumbilayi Solomoni yadiña natumapwata—hadaha ayikwata kudi mapulanga nawa hadaha akusoña chachiwahi. Itañwa chidinahumi, munyikwakwa muneli mwidima. Namoni mukwenzi weyala wudi nkawindi munjila. Chineli wudana kashinshi hela maana, akumusenda. Chakadi nikujina, neluki idi iluña dinakuhitayi nawa neluki nichuma chinateli kumumwekena kunakuhitilayi. Mukwenzi weyala nenzi kwakwihi “namaakenu indi,” adi kunjila yaya kwitala dindi. Iwu mumbanda washakamaña iku hinyi? Nawa nakukeñadi?
w00 11/15 30 ¶4-6
“Hembaku Nshimbi Jami Kulonda Wutwalekihu Kuhanda”
Nyivumbu yaniwu mumbanda yasenena. Chineli wahamuka, nahoshi mazu indi chakadi woma. Yuma yejima yinakuhoshayi wayiloñesha dehi kulonda amukokoli iwu mukwenzi. Chinahoshiyi nindi walambula dehi nyilambu yakuwunda niwawa washikija dehi mwakaniniyi, nadimwekeshi nindi waloña, nakumwekesha nindi wapama kuspiritu. Nyilambu yakuwunda yalambwileñawu hatembeli muYerusalema mwabombeleli mbiji, wuña walembuluka, manji, nivinyu. (ALevi 19:5, 6; 22:21; Kuchinda 15:8-10) Chineli muntu walambwileña mulambu wakuwunda wadileñaku yena nichisaka chindi, chumichi chamwekesheleña nawu kwitala dindi kwadiña yakuda yayivulu niyakunwa. Iwu mumbanda nakuhosha nindi iwu mukwenzi wukudiluñisha chikupu neyi aya nindi. Nafumi mwitala dindi nakukeñakeña iwu mukwenzi. Chikutama nankashi, neyi muntu wudi wejima wukukuhwelela iyi nsañu. Muntu wumu wadiza Bayibolu wahosheli nindi: “Mwamweni wenjili nakukeñakeña muntu, komana chalala wenjili nakukeña iwu mukwenzi? Chisupi hohu—hadaha wudi neyi iwu mukwenzi—diyi wunateli kumukuhwelela.”
Hanyima yakumukokola navwalili yindi, namazu indi ekoku, mukumupakata, nawa nedimi dindi nikununkila kadivumba kakawahi kamanji. Nahoshi nindi: “Naali mahina amawahi hakadidi kami, Mahina awulombu wawuwahi akuEjipitu. Hakadidi kami nasansihu mora, shilambwe nisinamoni.” (Yishimu 7:16, 17) Naali kadidi kindi chachiwahi namahina awulombu wawuwahi akuEjipitu nawa nasansihu namanji amavumba amawahi mora, shilambwe nisinamoni.
Natwalekihu nindi: “Inzaku, twaya tumanishi mpwila yetu yakukeña nichikukucha; twaya tudiluñishi kukeña hamu.” Bayi neyi iwu mutambi wakuya nakuda antu ayedi hohuku, ilaña munabombeli niyuma yikwawu. Chuma chinakumukanayi kuya nakudiluñisha hikwila wuvumbi. Kudi iwu mukwenzi, iwu mutambi wakuzañalesha! Hakwila amuhukuli muchima cheñi, nabombelihu nindi: “Muloña nfumwami nafumihu; nayi kwakulehi. Wasenda ipakumuna damali, wukufunta wanyi sampu ifuku dakamwekana kakweji kamukuma.” (Yishimu 7:18-20) Namukoleshi nindi, yuma yikwikala hohu chachiwahi, nfumwindi nayi nakwila bizinesi kwakulehi nawa wakafunta swayi wanyi kunayiyi. Ilaña weluka chikupu chakukokola! “Hakumudimbeka nakumushinjila chikupu. Hakumukokola namazu akulambisha.” (Yishimu 7:21) Chiña iyala hohu, iyala wudi neyi Yosefu diyi wunateli kukaana ikoku damuchidiwu. (Kutachika 39:9, 12) Komana iwu mukwenzi wadiña wakola?
w00 11/15 31 ¶2
“Hembaku Nshimbi Jami Kulonda Wutwalekihu Kuhanda”
Iwu mukwenzi kwila atwesha kukaanaku iwu mutambiku. Hanyima yakuluwankana muyitoñojoka, hakumulondela, “neyi chizamba chañombi anakuya nakujahawu.’ Neyi iyala wudi mupompa chikukañanyayi kutemuka, iwu neñili munshidi. Nakumona wanyi wubanji wudimu sampu “muvu wunapwiki muchima windi wachidambanda,” dikwila nawu, sampu nekali nachilonda chikumukojeja kufwa. Iku kufwa kunateli kwikala kwakumujimba muloña wukukata yikatu yasambukilaña yafumaña mukwila wuvumbi yikumujaha. Nawa chikumuletesha kufwa nikuspiritu; “wukujimbesha wumi windi.” Chihandilu chindi chejima chinatami chikupu nawa namuvulumuni Nzambi chikupu. Dichi nanyakali kusha wumi windi mukufwa neyi kada kadi mumuhetu!
Yuma Yalema yakuSpiritu
w00 11/15 29 ¶1
“Hembaku Nshimbi Jami Kulonda Wutwalekihu Kuhanda”
Solomoni natwalekihu nindi: “Jikasi [nshimbi jami] kunyinu yeyi; Jisoneki helola dawubasa damuchima weyi.” (Yishimu 7:3) Nyinu yalema nankashi kumesu etu nawa yazataña mudimu weneni kwila yuma yitunakukeña, yuma yitwadizaña muBayibolu hela maana amuBayibolu atela kwikala yanukishu nawa atela kutulombolaña mpinji yejima muyuma yejima yitwelaña. Twatela kuyisoneka helola dawubasa damumuchima wetu nikuyilemesha muchihandilu chetu.
APRIL 7-13
YUMA YALEMA YAMWIZU DANZAMBI YISHIMU 8
Tiyililenu kuMaana aYesu
“Namukeña Tata”
Muvasi 22, maana ahosha nawu: “Yehova wanleñeli nakwikala ntachikilu yanjila yindi, wakusambilahu hayuma yeliliyi kunyaaka oko-o.” Iyi vasi yahosha hachuma chikwawu bayi hamaanaku, muloña ichi chilwilu ‘hiyachileñeliku.’ Maana hiyakweti ntachikiluku, muloña Yehova wekala kwoku kufuma tuhu kunyaaka oko-o nawa wekala namaana mpinji yejima. (Isamu 90:2) Hela chochu, Mwana kaNzambi diyi wadiña “wedi wayileñaleña yejima.” Amuleñeli, diyi wadiña watachi kuleña hayuma yejima yaleñeliyi Yehova. (AKolosi 1:15) Mwana wadiñaku henohu iseki niiwulu kanda ayileñi neyi chalumbululawu muYishimu. Nawa hakwikala Izu, Mukakumuhoshelaku Nzambi, diyi njila yayiwahi mwamwekesheleliyi Yehova maana indi.—Yowanu 1:1.
“Namukeña Tata”
Yumanyi yelileñayi Mwana hadi yaaka yayivulu henohu kanda enzi hamaseki? Vasi 30 yatulejaña nawu wadiña “mukawukalawenu” waNzambi. Idi izu datalisha mudihi? AKolosi 1:16 yashimuna nawu: “Mudi yena dimwaleñeleliwu yuma yejima yamumawulu niyahamaseki. . . Yuma yejima ayileñeli kuhitila mudi yena nawa amuleñeleli yena.” Dichi Yehova, Nleñi, wazatishili Mwanindi, Mukawukalawenu hakuleña yuma yejima, kutachikila kuyileñaleña yakuspiritu yamwiwulu nakushika kuyileñaleña yamuluzwizu, iseki ninyitondu yayiwahi yashiyashana, anyama niyileñaleña yabadika yahamaseki, dikwila nawu antu. Munjila yikwawu, tunateli kufwanisha kunuñañana kwekala hakachi kaTata yawantu naMwana namukakufunjeka chakutuña itala wunakuzatila hamu namukakutuña, walondelaña chiwahi chinafunjekiyi. Kafwampi, neyi chileñaleña chidi chejima chitukomwesha, dikwila nawu tunakumushimeka Mukakufunjeka Muneni. (Isamu 19:1) Hela chochu, tunateli cheñi kwanuka kunuñañana kwakuwahi kwekala hakachi kaNleñi ‘namukawukalawenu.’
Neyi antu ayedi abula kuwanina anakuzatila hamu, mpinji jikwawu akañanyaña kutiyashana. Ilaña Yehova naMwanindi atiyashanaña. Mwana wazatili hadi yaaka yayivulu naTata yindi nawa amushimuna iku nakuhosha nindi: “Nadiña nakuzañalela kumesu indi mpinji yonsu.” (Yishimu 8:30) Mwamweni, wazañaleleña kwikala hamu naTata yindi, nawa Tata yindi niyena watiyileña chochimu. Chakadi nikujina, Mwana wekalili chikupu neyi Tata yindi, wembujoleli yilwilu yaNzambi. Tunamoni chaletesha kukeña kwekala hakachi kaTata yawantu naMwana kwiikali kwakola chikupu! Tunateli kuhosha chakadi kuhita mumbadi netu iku dikukeña kwakola nawa kunashimbuli kubadika kukeña kwejima.
w09 4/15 31 ¶14
Tumulemeshenu Yesu, Davidi Muneni nawa Solomoni Muneni
Muntu wumu hohu diyi wamubadikili Solomoni maana. Muntu yeniyi wadiñi Yesu Kristu, waditeneni nindi “wabadika Solomoni.” (Matewu 12:42) Yesu wahosheli “mazu awumi wahaya nyaka.” (Yowanu 6:68) Chakutalilahu, Mpanji yahaMpidi yabombelahu nshimbi jikwawu hanshimbi yekala muyishimu yaSolomoni. Solomoni washimwini yuma yayivulu yaletaña muzañalu kudi mukwakudifukula waYehova. (Yishimu 3:13; 8:32, 33; 14:21; 16:20) Yesu wakonkomweneni nindi yuma yakundama kukudifukula kwaYehova nikushikijewa kwayikaninu yaNzambi diyaletaña muzañalu walala. Wahosheli nindi: “Atuzweñi muspiritu anakooleki, muloña wanta wamwiwulu wunekali wawu.” (Matewu 5:3) Antu azatishaña nshimbi jekala muntañishilu yaYesu ayikundamishaña kwakwihi naYehova, “kaseloki kawumi.” (Masamu 36:9; Yishimu 22:11; Matewu 5:8) Kristu wemenañaku “maana aNzambi.” (1 Akorinda 1:24, 30) Chineli hiMwanta wawuMesiya, Yesu Kristu wekala ‘naspiritu yamaana.’—Isaya 11:2.
Yuma Yalema yakuSpiritu
g 5/14 16
‘Maana Anakutambika—Munakuyitiya?
▪ Mukanda waThe World Book Encyclopedia wahosha nawu Bayibolu “diwu mukanda wedishawu nankashi mukuhanda kwawantu. Ayibalumuna mapampa amavulu, nawa mumadimi amavulu, kubadika mukanda wudi wejima.” Bayibolu ichi yidi mumadimi akushika kwakwihi na 2,600 yamukuma hela yachibalu, dikwila nawu yawanina kudi antu akushika kumapesenti 90.
▪ Maana niwena “atwalekañahu kudila nezu dahewulu.” HaMatewu 24:14, twatañañahu nawu: “Niniyi nsañu yayiwahi yaWanta akayishimwina mwahita iseki dejima mwashakamawu antu kulonda yakekali wunsahu kunyuza yejima, kuhiñahu dinu kukuma [kwakanu kaayi] kwakenzi.”
APRIL 14-20
YUMA YALEMA YAMWIZU DANZAMBI YISHIMU 9
Ikalenu naMaana, Bayi aKwakusupishaku
“Tiyililaku kuMazu Amukamaana”
Kuhosha hohu chalala, chinateli kutukalila kwiteja neyi muntu natufumbi. Tunateli nikuhukana. Muloñadi? Hela chakwila, twetejaña netu twawanina wanyi, chinateli kutukalila kwiteja kufumba neyi muntu yashimuna chiluwa chitukweti. (Tañenu Mukwakutañisha 7:9.) Tunateli kudiyiñisha. Tunateli kutiya kutama chuma chinaleteshi atufumbi ninjila yinazatishiyi hakutufumba. Nawa nikutachika kuwana yiluwa mudi muntu wunatufumbi nakuhosha netu: ‘Hinyi wunamwinki wuswa wakwila nawu yenzi nakufumba? Netu niyena waluwañeshaña!’ Nawa neyi kufumba tunakukeñi wanyi hadaha tunateli kukudiwula, hela kwihula muntu mukwawu kulonda yatufumbi kwesekeja nachitunakukeña.
“Tiyililaku kuMazu Amukamaana”
Chumanyi chinateli kutukwasha kwiteja kufumba? Twatela kwikala adizoza nakwanuka netu twawanina wanyi nawa tunateli kuluwañesha mpinji jikwawu. Neyi chitwahanjeka dehi, Yoba wadiña nayitoñojoka yaluwa. Ilaña chimwahitili mpinji wahimpili yitoñojoka yindi nawa Yehova wamukiswilili. Muloñadi? Muloña Yoba wadiña wadizoza. Wamwekesheli nindi wadiña wadizoza chetejeliyi kufumba kwamufumbiliwu kudi Elihu hela chakwila Elihu wadiña kansi hadi yena. (Yoba 32:6, 7) Neyi twikala adizoza tunateli kutambwila kufumba hela chakwila tunakutoñojoka netu hiyatela kutufumbaku hela neyi muntu wunakutufumba hikansi hadi etu. Mukulumpi washakamaña kuCanada wahosheli nindi, “Chineli twadimonaña wanyi neyi chatumonañawu akwetu, chinateli kwikala chakala kuyilaku hambidi neyi chakwila kwosi muntu wunakutufumba.” Wejima wetu twatela kusoña mukaabu wakuspiritu kulonda twikali mukwakushimwina hela ntañishi wansañu yayiwahi wakulukila.—Tañenu Masamu 141:5.
Neyi anayifumbi monenuña nenu diyi njila munakuyimwekeshelayi Yehova kukeña. Yehova wakeñaña yuma yinateli kutukwasha. (Yish. 4:20-22) Neyi yatufumba kuzatisha Izu dindi, nyikanda yashindamena haBayibolu hela mukwetu mukaKristu wapama kuspiritu dikwila nawu nakutumwekeshela kukeña. AHeberu 12:9, 10 hahosha nawu, ‘Welaña mwenimu kulonda atukwashi.’
Shenu muchima hakufumba bayi hanjila munayifumbiliwuku. Mpinji yikwawu tunateli kutoñojoka netu hakuhanini munjila yayiwahi wanyi. Hela chochu, muntu wejima wunakufumbana watela kufumbana chiwahi kulonda muntu wunakufumbayi yeteji. (Ñal. 6:1) Ilaña neyi yetu anakufumbawu twatela kusha muchima kuyuma yitunateli kudizilaku kukufumba. Hela chakwila tunakutoñojoka netu adi kunfumba munjila yayiwahi. Twatela kudihula netu: ‘Hela chakwila nakeñi wanyi munjila mwanfumbilayi kudihu chuma chinatela kudizilaku? Kwila nidiwula yiluwa yamuntu wanfumba nehi nikusha muchima kuyuma yahoshayi nehi?’ Chikuwaha kudi etu mukufumba kutunatambwili kunonamu yikuma yitunateli kuzatisha muwumi wetu.—Yish. 15:31.
w01 5/15 30 ¶1-2
‘Mafuku Etu Akavula Muloña Wamaana’
Chelañayi muntu wukweti maana neyi anamufumbi chambukaku nachelaña mukakusupisha. Solomoni wahosheli nindi: “Dizishaku mukamaana, nawa wakasweja maana. Tañishaku mukakuloña, nawa wakatwalekahu kudizilaku yuma.” (Yishimu 9:8b, 9a) Mukamaana weluka nindi “kwosi kubabesha kwatiyishaña muntu kuwaha hampinji yinakumubabeshawuku, ilaña kwakataña, hela chochu, mukuhita kwampinji, antu etejaña kuyibabesha asoñaña mukaabu wawunda wakuloña.” (AHeberu 12:11) Hela chakwila kufumba kunateli kutukata kumuchima, hanu dinu muloñadi chitukukaanina hela kudikaña neyi chakwila kwiteja kunateli kutwiletesha kwikala namaana?
“Mwanta wamana natwalekihu nindi: “Tañishaku mukakuloña, nawa wakatwalekahu kudizilaku yuma.” (Yishimu 9:9b) Kwosi muntu wasweja maana hela washinakaja chikupu chakwila ashika hachipimu chakuleka kudizaku. Chatuzañaleshaña hama hakumona antu anashakami yaaka yayivulu anakwiteja chalala nikudihana kudi Yehova! Ninetu nawa tufwileña kwikala namuchima wakudiza nikwiteja yuma yitunakudiza.
w01 5/15 30 ¶5
‘Mafuku Etu Akavula Muloña waMaana’
Tukweti mudimu wakuzata hakumina ñovu yetu hakwila twiikali namaana. Hakukonkomwena ichi chikuma, Solomoni wahosheli nindi: “Neyi wikala namaana, maana akakukwasha eyi aweni, ilaña neyi wudi mukakusupisha, wakamona kukala eyi aweni.” (Yishimu 9:12) Muntu wukweti neyi maana, amukwashaña yomweni, nawa mukakusupisha wamonaña kukala kwadikeñela. Chalala, twamunaña jitwakuwaña. Dichi dinu, tutiyilileña “nakanañachima kumaana.”—Yishimu 2:2.
Yuma Yalema yakuSpiritu
w06 9/15 17 ¶5
Yikuma Yamaneni Kufuma muMukanda waYishimu
9:17—“Menji akwiya,” hichumanyi, nawa muloñadi ‘chiyatowelawu’? Chineli Bayibolu yesekeja kudibulakana kweyala namumbanda adisumbula nakunwa menji amawahi atuuta anatewuniwu mwishima, menji akwiya anakwimenaku kubulakana kwawantu abula kudisumbula. (Yishimu 5:15-17) Hadaha chaleteshaña awa menji akwiya kwikala atowala himuloña wakwila wuvumbi awilaña mukuswamujoka nawa awilaña atoñojokaña nawu watowala.
APRIL 21-27
YUMA YALEMA YAMWIZU DANZAMBI YISHIMU 10
Tunateli Kwikala Ñahi naMuzañalu Walala muChihandilu?
w01 7/15 25 ¶1-3
‘Muntu Waloña Wakiswilewa’
Muntu waloña amukiswilaña munjila yikwawu cheñi. “Makasa akatala aletaña wuzweñi, ilaña makasa adikita aletaña maheta. Mwana wazataña yuma nakashinshi wapompeshaña mbutu muchilaaka chakwañula, ilaña mwana waletaña nsonyi wakaamaña swayi.”—Yishimu 10:4, 5.
Mazu amwanta alumbulukaña kutalisha kudi akakuzata hampinji yakwañula. Mpinji yakwañula bayi neyi diyi mpinji yakukaama tuluku. Himpinji yakudikita chikupu nikuzata maora amavulu. Kafwampi, himpinji yakuzata swayi-swayi.
Chahosheleñayi hakwañula, bayi mbutuku, ilaña antu, Yesu walejeli atumbanji twindi nindi: “Mudimu wakwaañula weneni, ilaña akakukalakala anakehi. Dichi, mulombenu Mwini mudimu wakwaañula [Yehova Nzambi] kulonda atemeshi akakukalakala kumudimu windi wakwaañula.” (Matewu 9:35-38) Muchaaka chamu 2000, antu akubadika ha 14 miliyoni enjili nakwanakana Chanukishu chaKufwa kwaYesu—kuvula kwawaYinsahu jaYehova kubadika hamapampa ayedi. Hinyi wunateli kukaana nindi, ‘hiyanatookashani nakushika hampinji yakwañulaku’? (Yowanu 4:35) Akakudifukula alala amulombaña Nkaka yawu nawu ayinki akakukalakala amavulu iku niwena anakudikita chikupu mumudimu wakwilisha atumbanji kwesekeja nakulomba kwawu. (Matewu 28:19, 20) Nawa chafumamu Yehova wakiswilaña mudimu wawu! Muchaaka chamudimu chamu 2000, antu amaha akubadika ha 280,000 apapatisheweli. Niwena kumu afwilaña kwikala antañishi Hezu daNzambi. Dichi dinu lekenu tuzañalaleña nikutiya kuwaha muyinu mpinji yakwañula kuhitila mukudikita chikupu mumudi mu wakwilisha atumbanji.
w01 9/15 24 ¶3-4
Endenuña ‘muNjila yaKuloña’
Solomoni nashimuni kuloña chikwalemena. Nindi: “Maheta asamaheta himusumba windi wakiñewa. Kukala kwawatuzweñi hiwuzweñi wawu. Nyidimu yamuntu waloña yatwalaña kuwumi: ilaña yuma yelañayi muntu watama yatwalaña kunshidi.”—Yishimu 10:15, 16.
Maheta anateli kukiña muntu kuyuma yakeñekaña yamuchihandilu, neyi musumba wakola chiwunateli kukiña antu ashakamañamu. Nawa wuzweñi wunateli kuletesha muntu kukaba neyi kumwekana yuma yakadi kukuhwelela yamwekanaña muchihandilu. (Mukwakutañisha 7:12) Hela chochu, mwanta wamaana nakuhosha hakukala kwafumaña mukwikala mumaheta nimuwuzweñi. Muntu waheta wukushaña maana hohu kumaheta indi, nakutoñojoka nindi maheta indi “adi neyi mbañu yakiñewa.” (Yishimu 18:11) Nawa kazweñi niyena wukutoñojokaña nindi chineli wahutwa kwila ekala nakuchiñeja nehi. Dichi, wejima wawu chikuyikalila kwikala nejina dadiwahi naNzambi.
it-1 340
Nkisu
Yehova Chakiswilañayi Antu. “Nkisu yaYehova diyaheteshaña muntu, Nawa Yena habombelañaku kukalaku.” (Yis 10:22) Yehova wakiswilaña antu atiyañayi kuwaha kuhitila mukuyikiña, kuyikwasha kwila yuma yinakukeñawu, kuyilombola, kuyikwasha, nikuyinka yuma yinakukeñawu, kulonda adiluñishi.
Yuma Yalema yakuSpiritu
w06 5/15 30 ¶18
Muzañalu Wafumaña Mukwikala Ashinshika
“Nkisu yaYehova” diyaheteshaña antu jindi kuspiritu. Nawa anatuleji nawu “yena habombelañaku kukalaku.” (Yishimu 10:22) Hanu dinu muloñadi kweseka nimakabi chiyashikenañawu ambuña aNzambi amavulu ashinshika, nakuyiletela chineñi nimakabi? Iyi yuma yisatu yinalondelihu diyaleteshaña atumoneña kukala nikukabakana. (1) Nshidi jitwakoñaña. (Kutachika 6:5; 8:21; Yakoba 1:14, 15) (2) Satana niandemoni jindi. (AEfwesesa 6:11, 12) (3) Kaayi katama. (Yowanu 15:19) Hela chakwila Yehova wetejaña yuma yatama kutumwekena muniyi njila, bayi neyi diyi wayiletañaku. Kafwampi, “chawaana chejima chachiwahi nichawaana chejima chabadika kuwaha, chafumaña mwiwulu, chenzaña hamaseki kufuma kudi Tata yetu wayejeji yamwiwulu.” (Yakoba 1:17) Nkisu yaYehova yayiwahi hama.
APRIL 28–MAY 4
YUMA YALEMA YAMWIZU DANZAMBI YISHIMU 11
Bayi Wuchihoshaku!
w02 5/15 26 ¶4
Kashinshi Kalombolaña Antu Aloña
Kashinshi kawantu aloña kakwashaña antu, ilaña yuma yatama yelañawu antu atama yakojejaña antu amakwawu kukala. Mwanta waIsarela wahosheli nindi: “Mukakusekesha wamuletelaña ntuñi nindi kukala nakanwa kindi, Ilaña aloña ayipulwishaña muloña wakwiluka.” (Yishimu 11:9) Hinyi wukukaana nindi mukakutwamba, mukamatuñu, nhoshelu yawuzondu, nawa ninhoshelu yamukunkulwayi yaneñeshaña antu? Munjila yikwawu mazu awantu aloña, amawahi, atoñojokañahu henohu kanda ayihoshi, nawa atoñojokelañaku. Chineli wukweti maana amwamwinaña muloña kashinshi kindi kamuleteshaña kutoñojoka nakuhosha yikuma yamwekeshaña nawu antu anakumutwika nyiloña anakutwamba.
w02 5/15 27 ¶2-3
Kashinshi Kalombolaña Antu Aloña
Antu amumusumba alondelaña njila yakuloña aletaña kuwunda nawa ashakamaña chachiwahi nakukolesha amakwawu muchituñilu. Dichi, musumba welaña chiwahi—watumbakanaña. Antu ahoshaña mazu akutwamba, akukatishana niyuma yatama, aletaña yikonkojola, chineñi, kubula kunuñañana nikukala. Chumichi chavula nankashi kumwekana, sweje-e neyi owu antu kudi akwawu anakuyiluwañesha. Musumba wamuchidiwu wakabakanaña muyitoñojoka, munsañu jamajika kanwa, niyilwilu yatama hadaha nimunsañu jamali.
Chishina chashimunawu haYishimu 11:11 chakundama kudi antu jaYehova hampinji yinakudikundawu wumu namukwawu muchipompelu mwekalawu mudi tuhu neyi mumusumba. MuChipompelu mwekala antu apama kuspiritu—antu aloña alombolewaña nakashinshi kawu—akoleshaña akwawu hiizaza damuzañalu, adikita, nawa akwashanaña, nakuleta kalemesha kudi Nzambi. Yehova wakiswilaña ichi chipompelu, nawa chazataña chiwahi kuspiritu. Mumpinji-mumpinji, antu ahela nawa ahoshaña yuma yatama kutalisha hachinakwenda yuma, adi neyi muji wawulembi” wunateli kutaanda nikujaha antu amakwawu awubulili hakusambila. (AHeberu 12:15) Antu amuchidiwu kakavulu akeñaña kwikala nawuswa nikutiyakana. Atandishaña nsañu yakutwamba nawu aneli chiwahi wanyi, ekala nachaambu chamadimi, hela yuma yikwawu, mukachi kachipompelu hela hadi akulumpi. Kafwampi, tunwa twawu, tunateli kuleta chaambu muchipompelu. Twatela kushinka mumatu etu kulonda tubuli kutiyilila chinakuhoshawu nawa tufwileña kwikala antu apama kuspiritu kulonda tuleti kuwunda nikunuñañana mukachi kachipompelu?
w02 5/15 27 ¶5
Kashinshi Kalombolaña Antu Aloña
Chalala muntu wabulaña kutoñojoka chiwahi, hela “wabula muchima” wadiletelaña kukala yomweni! Hatweshaña kuhemba hakanwa kindiku chakwila chamushikijaña kumatuñu nikukuhosha kasawuntu. Akulumpi atela kunyakala kufumisha yilwilu yatama yamuchidiwu mudi iwu muntu. Kwambukaku “namuntu wabula muchima,” muntu wukweti kashinshi welukaña mpinji yakumwena. Chatela, ashimuni tujindilu, wabutaña hansañu. Weluka nindi idimi dakadi kuyuula dinateli kukisañana yuma, muntu wukweti kwiluka “washinshika muspiritu.” Wekala washinshika kudi akwawu akakwitiya nawa hafuñununaña tujindilu tunateli kuletela akwawu kukalaku. Antu ashinshika amuchidiwu ekala hinkisu yayeni mukachi kachipompelu!
Yuma Yalema yakuSpiritu
g20.1 11, chikasha
Chakwila Neyi Tunakwakama
“IKALENU NALUWI KULONDA MUBULEÑA KWAKAMA NANKASHI”
“Muntu wamuwahi wamwenañamu kuwaha yomweni, ilaña muntu wawukatu wadiletelaña yomweni kukala.”—YISHIMU 11:17.
Mukanda waOvercoming Stress mwekala kapetulu kahoshaña nawu “Ikalenu naLuwi Kulonda Mubuleña Kwakama Nankashi.” Ansoneki aniwu mukanda, aDr. Tim Cantopher, ahosheli nawu kwilila antu yuma yayiwahi kunateli kuletesha wumi wamuntu kuwahilaku nawa nateli kwikala namuzañalu. Kwambukaku, muntu wakadi luwi nawa watama muchima hekalaña namuzañaluku, nawa antu hiyadikundaña nindiku.
Tunateli kubula kusweja kwakama cheñi neyi twanukaña netu kwekala yuma yikwawu yitunateli kubula kutwesha muñovu jetu. Chakutalilahu, hitwatela kukeñaña netu ochu chuma chiña tuhu chimwekani muwufuku wumu hohuku. Bayi neyi ichi chinayi mukwila nawu twatela kudidiwula etu aweniku. Yesu wahosheli nindi: “Watela kukeña mukwenu neyi chiwadikeña eyi aweni.”—Maku 12:31.