Nzambi Waleñeli Iwulu niIseki

Yehova Nzambi diyi Nleñi yetu. Waleñeli yuma yejima, yitwamonaña niyitwabulaña kumona. Henohu kanda aleñi yuma yitwamonaña, waleñeli añelu amavulu chikupu. Wayiluka añelu? Añelu hiyileñaleña yaleñeliyi Yehova yekala neyi yena. Hitukutwesha kuyimonaku, neyi chitwabulaña kumumona Nzambi. Kañelu watachi waleñeliyi Yehova wekalili nkwashi yindi. Iwu kañelu wamukwashili Yehova kuleña tutumbwa, mapulaneti niyuma yikwawu. Hakachi kanawa mapulaneti, hekala niiseki, mukala wetu wawuwahi.

Kuhiñahu Yehova wawahishili iseki kulonda mushakameña antu nianyama. Waleñeli itena kulonda ditoñekeña hamaseki. Waleñeli mapidi, tuluñalwiji nituloña.

Chumanyi cheliliyi cheñi? Yehova wahosheli nindi: ‘Inakuleña matahu ninyitondu.’ Nyitondu yanyikaabu yashiyashana, yisakola ninkenu jatachikili kumena. Kuhiñahu Yehova waleñeli anyama ejima. Anyama amuluzwizu, amumenji niakalabaña. Waleñeli anyama anyanya adi neyi tuchinchi nianyama amaneni adi neyi anzovu. Kanyamanyi kiwakeña?

Kuhiñahu Yehova wamulejeli kañelu nindi: “Tuleñenu muntu.” Antu akwambukaku nawatunyama. Akutuñaña yuma. Akuhoshaña, kuseha nikulomba. Diwu akuhembaña iseki nianyama. Wunamwiluki muntu asambililiwu kuleña? Tuyenu tutali.