KUDIZA 10

Kuhimpa Izu

Yishimu 8:4, 7

CHIKUMA: Hoshenu chiwahi yikuma yimukweti kulonda antu asañumuki kuhitila mukuhimpa izu, kudinyamuna hela kudikulula, kuhosha lufuchi hela chovu.

Himpenu ntiyakenu yezu. Nyamunenu izu hakushimuna yikuma nihakusañumuna antiyilili jenu. Dichimwatela kwila nihakutaña Nsona yawunsompeshi. Keheshenu izu neyi munakuhosha hayuma yakutiyisha woma hela yakwakamisha.

Bayi musweja kuhoshela hewuluku muloña antiyilili jenu akutoñojoka nawu munakuyizuwila. Neyi musweja kuhosha munjila yakusehesha, antiyilili jenu akusha muchima hadi enu bayi hayuma yimunakuhoshaku.
Himpenuña izu. Neyi mwidimi denu chetejewa kuhoshela hewulu, nyamunenu izu kulonda mumwekeshi iyena, kutoha kwachuma hela iluña. Kululenu izu neyi munakuhosha mazu akuneña hela akutiyisha woma.
Hoshenu lufuchi hela chovu. Hoshenu lufuchi hakutena nsañu yakuzañalesha. Hoshenu chovu neyi himukuhosha yikuma yamaneni.

Bayi mushikena kuhimpa nakuhosha chovu hela lufuchiku kuchina mwakenda kakashimwisha antiyilili. Bayi muhosha lufuchi nankashiku muloña izu dikuhanuka chiwahi wanyi.