Isaka wadiña nayaaka 40 hampinji yamusumbwiliyi Rabeka. Wamukeñeli nankashi. Mukuhita kwampinji, ekalili nawanyana ayedi awamayala ampamba.

Wamukulumpi amutuumbili nawu Esawu nawa wakansi nawu Yakoba. Esawu wakeñeli mwisaña nawa wadiña chibinda chikupu. Ilaña Yakoba wakeñeli kushakama hetala.

Mumafuku akunyima, mwana weyala wawedi amwinkeleña mpata yeneni nimali anashiyiwu kudi tata yindi wunafwi. Iyi yuma ayiteneneña nawu wuswana. Muchisaka chaIsaka, muniwu wuswana mwabombeleli niyikaninu yamushiikiliwu Abarahama kudi Yehova. Esawu hashiliku maana kuniyi yikaninuku, ilaña Yakoba welukili nindi yadiña yalema nankashi.

Ifuku dimu Esawu wafuntili hetala iku nafwi chinzeya kufuma mwisaña mwayiliyi nakujaha anyama. Watiyili ivumba dadiwahi dayakuda yatelekeleñayi Yakoba nawa wahosheli nindi: ‘Nafwi nzala! Nyinkihu oyu yakuda yichinana!’ Yakoba wahosheli nindi: ‘Nukukwinka, ilaña sambilaku kusanyika kudi ami neyi wukunyinka wuswana weyi.’ Esawu wahosheli nindi: ‘Indi wuswa wami nakadiilamu mwodi! Wutambuli. Ami inakukeña hohu kuda.’ Wunakutoñojoka neyi Esawu welili chuma chachiwahi? Inehi. Esawu wahanini chuma chasweja kulema muloña wayakuda hohu.

Chelili Isaka nashinakaji dehi, mpinji yashikili yakukiswila mwanindi wawedi. Ilaña Rabeka wamukwashili Yakoba, mwanawu wakansi kulonda atambuli nkisu. Esawu chelukiliyi chumichi, wahilili nankashi nawa wafuukwilihu nindi ajahi mwanyikindi. Isaka naRabeka akeñeleña kumukiña Yakoba, dichi amulejeli nawu: ‘Yaña wakashakami naLabani mana kwamama yeyi, sampu Esawu nawundishi muchima.’ Yakoba watiyilili mwamulejeliwu anvwali jindi nawa wayili kulonda apulwishi wumi windi.

Yehova wamushiikili Yakoba nindi wukumukiñaña neyi chamukiñileñayi Abarahama niIsaka. Yakoba washakamineña kwiluña dateneneñawu nawu Harani, dikwasumbwililiyi, wekalili nawanyana amavulu nimaheta.

Nkumininaku, Yehova wamulejeli Yakoba nindi: ‘Funtaku kwituña denu.’ Dichi Yakoba wanyamukili nichisaka chindi nakufunta. Chayileñawu, kudi antu enjili nakumuleja Yakoba nawu: ‘Manakweyi Esawu nakwinza nawa wudi nawamayala 400!’ Yakoba watiyili woma nindi Esawu nakukeña kumwila chatama hamu nichisaka chindi. Wamulombeli Yehova nindi: ‘Mwani ñamwini kudi manakwami.’ Ifuku dalondelelihu, Yakoba wamutemesheleli Esawu anyikoku amavulu, ampembi, añombi, angameli niayimbuulu kwikala chawaana.

Hawowuna wufuku iku Yakoba wudi nkawindi, wamweni kañelu! Kañelu watachikili kulwisha nindi. Alwishili sampu nichikwachili. Hela chakwila Yakoba amukatishili, wamuumbiliku wanyi. Kañelu wahosheli nindi: ‘Ñuumbiku niyeña.’ Ilaña Yakoba wahosheli nindi: ‘Nukukuumbaku wanyi sampu wunankiswili.’

Nkumininaku, iwu kañelu wamukiswilili Yakoba. Dichi Yakoba welukili nindi Yehova wukumukiña kudi Esawu.

Hayoyina ntetemena, Yakoba wamweni Esawu hamu nawamayala 400 hahalehi. Yakoba washili chisaka chindi hanyima nakutwaminaku nawa wamunoñaminini manakwindi mapampa 7. Esawu wamukinkililili lufuchi Yakoba nakumukumbata. Awa amanakwamuntu adilili nawa aleteli kuwunda. Wunakutoñojoka neyi Yehova watiyili ñahi nanjila mwamanishililiyi Yakoba iku kukala?

Esawu wafuntili kumukala wawu nawa Yakoba watwalekelihu nalwendu lwindi. Yakoba wadiña nawanyana awamayala 12. Majina awu adiña Rubeni, Simiyoni, Levi, Yuda, Dani, Nafitali, Gadi, Asheri, Isakari, Zebuluni, Yosefu niBenjamini. Hakachi kanawa anyana, Yehova wazatishili Yosefu kupulwisha antu jindi. Wuneluki chamuzatishiliyi? Tuyenu tutali.