Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
© 2025 Watch Tower Bible and Tract Society of Pennsylvania
SEPTEMBER 1-7
YUMA YALEMA YAMWIZU DANZAMBI YISHIMU 29
Kaanenu Yitoñojoka niTushidikilu Twabula Kwikala muNsona
wp16.06 6, chikasha
Yimwenu Kutalisha Hadi Antu Ekala Mwiwulu Mwabulaña Kumwekana
Neyi chochekala atuyili adi mumaleñi, antu amavulu anakuyitiyisha woma nayuma yidi neyi kupanda niaspiritu atama. Akeñaña mawaña, kudikasa jayitumbu niyitumbu yikwawu yakudikiña nachu. Bayi mwilaña yuma yamuchidiwuku. Bayibolu yatwikoleshaña nawu: “Mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.” (2 Kushindulula 16:9) Nzambi walala, Yehova, wukweti ñovu chikupu kubadika Satana, wukuyikiña neyi mumukuhwelela.
Hakwila Yehova yayikiñi, mwatela kwiluka nikwila yuma yamutiyishaña kuwaha. Chakutalilahu, muyaaka nkulakaji yakusambila, akwaKristu amumusumba waEfwesesa apompesheli nyikanda yawu yejima yahosha hajakupanda nakuyocha. (Yilwilu 19:19, 20) Munjila yoyimu, hakwila Nzambi yayikiñi, mwatela kuleka yuma yejima, yidi neyi kupanda, kudikasa yitumbu, mutookela, nyikanda yahosha hakupanda, yitumbu “yakudikiña” nachu niyuma yejima yabombelamu kupesha.
Hakwilenuku Chalala Kutalisha Hansañu yaKufwa
13 Neyi kudi yuma yimwajinokaña kutalisha hatushidikilu, lombenu kudi Yehova kulonda yayinki maana. (Tañenu Yakoba 1:5.) Kuhiñahu sandujolenuña munyikanda yetu. Neyi chinatwesheki, ihulenuku akulumpi muchipompelu chenu. Akuyileja chakwila wanyi, ilaña anateli kuyikwasha kuwana yishina yamuBayibolu yidi neyi yitunahanjekihu. Neyi mwila mwenimu, mukufumba “ñovu [jenu] jakutoñojoka” nawa iji ñovu jikuyikwasha “kwaambula yuma yayiwahi nayatama.”—Heb. 5:14.
‘Nukwendaña muChalala Cheyi’
12 Yuma yachisemwa yakaanishawu munsona niyilwilu yatama. Antaña jetu, akwetu mutwazatilaña niakwetu akashikola, anateli kutuleja nawu twanakaneña nawu hamu mafuku akusemuka nimafuku akunooka. Tunateli kutondolwela ñahi ikakeja dachisemwa nikwanakana mafuku akunooka amuneñeshaña Yehova? Hakwila twili mwenimu, twatela kumonaña yumiyi neyi chayimonañayi Yehova. Kutaña nyikanda yetu yahosha kwafumini mafuku akunooka, yinateli kutukwasha. Neyi tutoñojokaña muloña waweni Nsona chiyakaanishila kwanakana mafuku akunooka, twelukaña netu tunakwenda munjila “yetejañayi Mwanta.” (Efwe. 5:10) Kumukuhwelela Yehova niIzu dindi dachalala kukutukwasha kubula “kutiya antu woma.”—Yish. 29:25.
Yuma Yalema yakuSpiritu
it “Kulumbisha” ¶1
Kulumbisha
Kuhameka munjila yawunfwikiji; yakumukumbwa; yamakudi, hela yakusweja kumuhameka. Ayizatishaña munjila yakuhameka chikupu kulonda amutiyishi kuwaha muntu anahamekiwu munjila yakulumbisha, nawa chumichi chinateli kumuletesha kutachika kutoñojoka mwaluwa. Chuma chafwilañawu hikukeña ayitiyeña kuwaha hela hadaha kudi chuma chinakukeñawu kudi ona muntu, kumuletesha ona muntu kutiya nindi watela kumukuhwelela muntu wunakumuhameka hela kumulemesha. Awa mazu akudimbana, ayizatishaña kulonda aleteshi muntu anakuhamekawu chikupu afwi mumuhetu. (Yis 29:5) Kuzatisha mazu akudimbana hikwamwekeshaña maana afumaña kudi Nzambiku; ilaña himaana amukanu kaayi, chamwekeshaña nawu antu adikeña aweni, adi nachaambu niwunfwikiji. (Yak 3:17) Kutwamba, kulemesha antu munjila yamakudi niwunfwikiji, hijamuzañaleshaña Nzambiku.—2Ko 1:12; Ñal 1:10; Efw 4:25; Kol 3:9; Chi 21:8.
SEPTEMBER 8-14
YUMA YALEMA YAMWIZU DANZAMBI YISHIMU 30
“Bayi Wunyinka Wuzweñi Hela Mahetaku”
Kukeña Kwamuchidinyi Kwaletaña Muzañalu Walala?
10 Hela chochu, wejima wetu twatela kwikala namali. Mali atukwashaña kudihemba nachu. (Mukwa. 7:12) Komana muntu nateli kwikala namuzañalu neyi wudi nayuma yakudikwashamu kumujimba? Eña! (Tañenu Mukwakutañisha 5:12.) Aguri mwana kaYake wasonekeli nindi: “Bayi wunyinka hela wuzweñi hela mahetaku. Ndiishi yakuda yantelela.” Tunateli kwiteja chuma chaletesheli yakaani kwiteja wuzweñi wasweja. Walumbulwili nindi, hakeñeleña chuma chikumuleñela yeyiku muloña kwiya kwaletaña kasawuntu hejina daNzambi. Hanu dinu muloñadi chalombeleliyi kubula kwikala namaheta amavulu? Wasonekeli nindi: “Nakenda kasweja kwikuta hinakadikaleyi nami, Yehova hinyi?’” (Yish. 30:8, 9) Chakadi nikujina, mweluka antu alemesha maheta awu chatela amulemeshi Nzambi.
11 Antu akeña mali hiyanateli kumuzañalesha Nzambiku. Yesu wahosheli nindi: “Hikudi muntu wunateli kukalakela anyanta ayediku; watela kuhelahu wumu nakukeñahu mukwawu, hela wukukakelahu wumu nakusekeshahu mukwawu. Himunateli kukalakela Nzambi hampinji yoyimu niMahetaku.” Watachikili namazu akwila nawu: “Lekenu kudilumbikila maheta hamaseki hekala tunzembula nindala janoñeshaña nawa hekala amakombi eñilaña nakwiya. Ilaña, dilumbikilenu maheta mwiwulu mwabula tunzembula hela ndala janoñeshaña nawa mwabulaña kwiñilawu amakombi nakwiya.”—Mat. 6:19, 20, 24.
12 Amavulu eluka nawu kushakama chihandilu chapela kwayizañaleshaña nawa kwayikwashaña kwikala nampinji yeneni yakumukalakela Yehova. Jack, washakamaña kuUnited States, walandishili itala dindi deneni nikuleka bizinisi yindi muloña welukili nindi neyi yela mwenimu wukukalakala chiwahi wupayiniya hamu nañodindi. Wahosheli nindi: “Chadiña chakala kushiya mukala wetu wawuwahi niyuma yetu. Hayaaka yayivulu henohu kanda, nafuntileña kwitala iku nahili muloña wakukala kunamweneña kumudimu. Ñodami, yena wadiña payiniya wampinji yejima nawa wadiña namuzañalu mpinji yejima. Wahosheleña nindi, ‘Nikweti mukulumpi wami wamudimu wamuwahi!’ Ichi ninami nazataña wupayiniya, wejima wetu twazatilaña mukulumpi wamudimu wumu, Yehova.”
w87 5/15 30 ¶8
Mutiyenuña Yehova Woma Nawa Mukwikalaña naMuzañalu
◆ 30:15, 16—Iyi yakutalilahu yinakuhosha hachikumanyi?
Yinakulumbulula chekala lwisu. Mazambu anwaña nankashi mashi amavulu, nimuntu wekala nalwisu mpinji yejima wakeñaña mali amavulu hela ñovu. Chochimu, Shelu niyena hekutañaku ilaña watwalekahu kutambwila antu amavulu afwaña. Mumbanda nshinta ‘nakukeña’’ mwana. (Kutachika 30:1) Chaaña chenjili mwituña nakunwa menji ejima nawa hashimbwili wanyi ituña dejima domini. Nawa kesi kanamanishi yuma yejima yanatilawu mukesi nawa mulañi wunanyamuki nakumanisha yuma yejima yakwataña kesi swayi. Dichelaña nimukalwisu. Ilaña antu alombolewaña namaana aNzambi hiyekala nalwisu lwamuchidiwuku.
Kuhemba Mali—Munateli Kwila Ñahi Mwenimu?
Hembenuña mali henohu kanda mulandi. Hela chakwila chinateli kumwekana neyi chakushankulu, kuhemba mali henohu kanda mulandi chuma, diyi njila yimu mwakuhembela mali enu chiwahi kulonda mubuli kwikala nakukala kwamali. Kwila muniyi njila kwakwashaña amavulu kubula kwikala nanyikudi nikukala kwafumañamu, chidi neyi kuhana mali amavulu, anateli kuhanayi muntu kubadika hawuseya wayuma yinalandiyi. MuBayibolu, nzenkeneni amushimuna nawu wukweti maana muloña wapompeshaña “yakuda yindi muchilaaka chakwaañula” kulonda akayizatishi kumbidi.—Yishimu 6:6-8; 30:24, 25.
Twalekenuhu Kwikala Mwenyi waYehova Haya Nyaaka!
18 Chalema nankashi kudishinshika etu aweni kutalisha hachitwamonaña mali. Dihulenu nenu: ‘Komana mpinji yejima natoñojokaña hamali niyuma yinatela kulandamu? Neyi nakongoli mali, nashintajalaña kuyifuntisha nakutoñojoka nami muntu wankongwesheli nakuyikeña wanyi? Komana kwikala namali kwanleteshaña kudimona kulema chakwila nakañanyaña kwikala namuchima wakuhana? Nasompeshaña amanakwetu niahela nami asweja kukeña maheta muloña hohu wakwila akweti mali? Komana nadikundaña nawantu aheta nakudiwula atuzweñi?’ Tukweti kukooleka kwabadika kwakwikala enyi jaYehova. Ilaña tunateli kutwalekahu kwikala enyi jindi neyi tutondolwelaña kusweja kukeña mali. Neyi twila mwenimu, Yehova hamba katushiyaku!—Tañenu AHeberu 13:5.
Yuma Yalema yakuSpiritu
Yileñaleña Yamwekeshaña Maana aYehova
11 Chibatata hikanyama kanyanya kanateli kutudizisha yuma yalema. (Tañenu Yishimu 30:26.) Aka kanyama kanyanya kashakamaña mumalola. Chibatata chadikiñaña kudi ayidanyi hamuloña wakumwena hahalehi nawa chaswamaña mumeena amumalola. Hakwila nawu ekaleña neyena mumpinji yachishika nikudikiña kuyidanyi, ayibatata ashakamaña hamu munyikanka.
12 Yumanyi yitunateli kudizila kudi chibatata? Tachi, ilukenu nenu aka kanyama hikashaña wumi waku hakatoñaku. Ilaña kazatishaña chiwahi mesu aku amwenaña hahalehi kulonda kumwena ayidanyi kwakulehi, nawa kashakamaña kwakwihi nameena kulonda kuswama ayidanyi. Chochimu, anetu twatela kwikala asoñama kulonda tutweshi kwiluka yuma yatama yabulaña kumwekana yidi mukanu kaayi kaSatana. Kapostolu Petulu wakonkomweneni akwaKristu nindi: “Babalenu, tonenu; mukwankunyi nenu Diyabolu wudi nakuya nakutambatamba nakukeñakeña akudyayi, neyi mutupa wabulumaña.” (1 Pet. 5:8) Hampinji yadiñayi Yesu hanu hamaseki, watwalekeluhu kwikala watona, nakudikiña kukweseka kwaSatana kwejima kwakufumpa kashinshi Kindi. (Mat. 4:1-11) Yesu, wayimikililili atumbanji twindi chakutalilahu chachiwahi!
13 Njila yimu mutwatela kwikalila atona yidi yakuzatisha yuma yatukiñaña kuspiritu yatuloñeshelañayi Yehova. Hitwatela kudiwula kudiza Izu daNzambi nikuwanikaña kukupompa kwawakwaKristuku. (Luka 4:4; Heb. 10:24, 25) Kubombelahu, neyi chibatata chichatwalekañahu kushakama hamu nawakwawu, twatela kudikunda chikupu nawakwetu akwaKristu kulonda ‘tudikolesheña wumu namukwawu.’ (Rom. 1:12) Kuhitila mukuzatisha yuma yatuloñeshelañayi Yehova yakutukiña nachu, twamwekeshaña nawu tuneteji mazu aDavidi ñimbi yamasamu, wasonekeli nindi: “Yehova diyi ilola dami, diyi mpwembu yami, diyi wampulwishaña, diyi Nzambi yami, diyi ilola dami dakola ngu, Dimu nukubatamina.”—Mas. 18:2.
SEPTEMBER 15-21
YUMA YALEMA YAMWIZU DANZAMBI YISHIMU 31
Yuma Yitwadizilaña Kudi Mama yaWantu Chafumbañayi Mwanindi
Kutala Anyana Mpinji Yejima Hikwamanishaña Kukalaku
Yitañishenu nsañu yejima yahosha hakudikama. Kuyisoñamisha kwalema. (1 AKorinda 6:18; Yakoba 1:14, 15) Hela chochu, Bayibolu yahosha hansañu yakudikama neyi hichawaana chahanayi Nzambi, bayi neyi muhetu waSatanaku. (Yishimu 5:18, 19; Kamina kaSolomoni 1:2) Neyi muyileja atumpululu hela atunkaña kutama kwekalamu hohu chikuyileñela kujinoka, hiyakwiluka chahosha nsona haniyi nsañuku. Kansi wamumbanda wejina daCorrina wakuFrance wahosheli nindi, “Anvwali jami anlejeleña chikupu hansañu yawuvumbi nawa chumichi chanleñeleli kwiluka nami kudikama hichuma chatama.”
Ilukenu chikupu nenu anyanenu aneluki nsañu yejima yahosha hakudikama. Mama yawantu wakuMexico wejina daNadia wahosheli nindi, “Nafwilaña kuleja chikupu anyanami nami kudikama hichuma chachiwahi chatwinkayi Yehova Nzambi nindi tudiluñisheña. Ilaña antu adisumbula hohu diwu atela kudiluñisha chumichi. Chumichi chinateli kutuletela muzañalu hela makabi kwesekeja nanjila yitukuchizatishila.”
ijwhf chibaaba 4 ¶11-13
Hanjekenuña Nawanyanenu haNsañu Yakunwa Walwa
Ikalenuña atachiki kuhanjeka nawu haniwu mutu. Tata yawantu wakuBritain wejina daMark, wahosheli nindi: “Anyana eluka wanyi neyi chakwila atela kunwa walwa hela nehi. Namwihwili mwanami wadiña nayaaka 8, neyi chakwila chachiwahi kunwa walwa hela nehi. Natwalekelihu kuhanjeka nindi mumesu awunda nawa munjila yayiwahi, nawa chumichi chamukwashili kushimuna yitoñojoka yindi mukukasunuka.”
Mukumukwasha mwanenu kutwalekahu kutoñojoka nankashi hakutama kwekala mukunwa walwa neyi chakwila muhanjekañahu nindi kakavulu. Kwesekeja nayaaka yidi namwanenu, hanjekenu nindi hansañu yawalwa hampinji yimunakuhanjeka hayuma yikwawu yatela kwilukayi, yidi neyi chakudikiña hamukwakwa ninsañu yawuvumbi.
Ikalenu akutalilahu. Anyana ekala neyi siponji, elaña yuma yelañawu antu. Nawa akakusandujola awana nawu anyana avula kwila yuma yelañawu anvwali jawu. Chumichi chinayi mukwila nawu neyi munwaña walwa kulonda mukeheshiku yitoñojoka, chikuletesha mwanenu kutoñojoka nindi kunwa walwa diyi njila yinateli kumukwasha kuleka kwakama. Dichi ikalenuña akutalilahu amawahi. Mwatela kwiluka hakukumina neyi munakunwa walwa.
g17.6 9 ¶5
Dizishenuña Anyanenu Kwikala Adizoza
Mukwashenu ahaneña. Mwekeshenu chikupu kudi mwanenu nenu “mukuhana mwekala muzañalu chikupu kubadika wekala mukutambwila.” (Yilwilu 20:35) Munateli kwila ñahi mwenimu? Tanjikenu hamu namwanenu majina awantu anakukeñeka kuyikwasha, chidi neyi kuyilandilaku yuma, kuyisendaku, hela kuyiwahishilaku yuma. Kuhiñahu musendenuña mwanenu hampinji yimunakukwasha amakwawu. Lekenu mwanenu amoni muzañalu wumukweti hampinji yimunakukwasha antu anakankili. Neyi mwila mwenimu, mukwikala chakutalilahu chachiwahi nawa mukumukwasha mwanenu kwikala wadizoza chikupu.—Chishina chamuBayibolu: Luka 6:38.
Yuma Yalema yakuSpiritu
w92 11/1 11 ¶7-8
Shikola muMafuku Akunyima
7 MuIsarela, anyana ayidizishileña henohu achidi ankemba kudi atata jawu niamama jawu. (Kuhituluka 11:18, 19; Yishimu 1:8; 31:26) Muntu wadiza chikupu jamuBayibolu E. Mangenot wasonekeli muFrench Dictionnaire de la Bible, nindi: “Neyi mwana atachika hohu kuhosha, amudizishileña nsañu yantesha yamuNshimbi. Amama yindi adiña nakufuntisha funtishahu kumutañila vasi; neyi nayiluki dehi, adiña nakumutañila yikwawu. Mukuhita kwampinji, ana mavasi asonekawu atwesheleñawu kuhembela kumutu ayisonekeleña mumakasa awanyanawu. Dichi, atachikileña kuyidizisha chakutaña, nawa neyi anakuli dehi, atwalekeleñahu kwovwahila nshimbi jamukwitiya kwawu kuhitila mukutaña nikutoñojoka chikupu hanshimbi jamwanta.”
8 Chumichi chinakumwekesha nawu njila yapela yazatishileñawu kudiza anyana hikuhembela yuma kumutu. Yuma yadizileñawu kutalisha hanshimbi jaYehova nichelileñayi nawantu jindi yadiña nakuyishika chikupu hamuchima. (Kuhituluka 6:6, 7) Kulonda anyanawu atoñojokeñahu. (Isamu 77:11, 12) Hakwila ayikwashi atwansi niakulumpi kwanuka yuma yinadiziwu, azatishileña yuma yashiyashana. Azatishileña yuma yidi neyi kutachika mazu hela nyikuku yamazu nansona jojimu hela jadifwana, kusoneka mundonda mavasi anakuhosha hachuma chimu ilaña atachika nansona jambuka neyi chekala isamu dimu, kulondela ndonda yansona jawu (chidi neyi Yishimu 31:10-31); kufuntisha funtishahu mazu wowamu (mazu anatachiki nansona yoyimu hela nachivumina chochimu); nimanaambala azatishawu, adi neyi ana azatishawu kwishina dachikunku chaYishimu kapetulu 30. Nawa, Kalenda yaGezer, yinashimbuli nankashi hakachi kanyikanda yachiHeberu yakunyima, antu amakwawu adiza Bayibolu chikupu ahoshaña nawu ayisonekeli kudi mwana kashikola wakeñeleña kudeseka kulonda amoni yuma yinakwanukayi.
SEPTEMBER 22-28
YUMA YALEMA YAMWIZU DANZAMBI MUKWAKUTAÑISHA 1-2
Twalekenuhu Kudizisha Ikiñu Dikahiñahu
“Kunjikaku Yumiyi Kudi Antu Ashinshika”
3 Etu amavulu twakeña mudimu wutwazataña nawa twakeñaña kuwuzata haya nyaaka. Chawushona, kufuma tuhu mumafuku aAdama, makiñu ejima akulaña nakuyisinsa kudi amakwawu. (Mukwa. 1:4) Munanu mafuku, iku kuhimpa kunateli kuleta kukala kwashiyashana kudi akwaKristu alala. Mudimu wawantu jaYehova wunatandi kwejima. Chitunakuzata nyidimu yayiha, kunakwinza njila yayiha yakuzatilamu nawa iyi njila yinabombelimu kuzatisha tekinoloji. Akulumpi amakwawu chinakuyikalila kwendela hamu naniku kuhimpika. (Luka 5:39) Hela chakwila amakwawu anakutwesha, atwansi akweti ñovu yakuzata kubadika akulumpi. (Yish. 20:29) Dichi, akulumpi akumwekesha kukeña neyi akwasha atwansi kudiloñesha kuzata nyidimu yikwawu.—Tañenu Masamu 71:18.
4 Chinateli kuyikalila amanakwetu adi nakukooleka kweneni mukuloñesha kudizisha atwansi. Amakwawu achinaña nawu akuyitambula kukooleka kukwetiwu. Amakwawu atoñojokaña nawu akuyitambula ñovu nawa atoñojokaña nawu atwansi hiyakutwesha kuzata neyi chazatañawuku. Amakwawu niwena nawu hiyakweti mpinji yakudizisha amakwawuku. Ilaña atwansi, atela kudizoza neyi anayinki wanyi kukooleka.
Yuma Yalema yakuSpiritu
it “Mukwakutañisha” ¶1
“Mukwakutañisha”
Ijina dachiHeberu dakwila nawu Qo·heʹleth (datalisha kudi Mukwakutañisha; mukwakupompesha; mukwakukuñulula”) nakulumbulula chiwahi mudimu wukwetiyi mwanta munfulumendi yamukuloñesha yadiluñishileñawu aIsarela. (Mkw 1:1, 12) Wadiña himudimu wanyuuli kupompesha antu jaNzambi adihana hamu kulonda amukuhweleli chikupu Mwanta wawu walala nawa Nzambi yawu. (1An 8:1-5, 41-43, 66) Muloña wachumichi, chili mwanta wadiña wamuwahi hela watama, amwilukilileña kuchelileñayi namuza neyi chakwila wawulombweleña kudifukula kudi Yehova hela nehi. (2An 16:1-4; 18:1-6) Mukwakutañisha, Solomoni, wadiña wapompesha dehi aIsarela nialunda nawu, kushilahu niantu ashakamineña nawu hadi mpinji yantesha kuya kutembeli. Muniwu mukanda wafuukwilihu kupompesha antu jaNzambi kuyifumisha kuyuma yamukunkulwayi nikunyikaabu yakadi nyidimu yamukanu kaayi nakuyitwala kunyidimu yaNzambi, kwadihanini iwu muza. Ijina dazatishawu muBayibolu yaIngilishi adifumisha kukubalumuna kwaQo·heʹleth muSeptuagint yachiGiriki, yatenañawu nawu, Ek·kle·si·a·stesʹ (Mukwakutañisha), daya mukwila nawu “muntu wamuchipompelu (chipompelu).”
SEPTEMBER 29–OCTOBER 5
YUMA YALEMA YAMWIZU DANZAMBI MUKWAKUTAÑISHA 3-4
Koleshenu Chibaaba Chenu chaNyonji Yisatu
ijwhf chibaaba 10 ¶2-8
Chakuzatisha Chiwahi Yozelu Hampinji Yatelela
● Kuzatisha chiwahi yozelu kunateli kukwasha antu adi muwulu. Chakutalilahu, eyala namumbanda azatishaña mafoni namwaana kulonda ahanjekeña neyi adi hamu wanyi.
Jonathan wahosheli nindi: “Neyi wusoneka kameseji nakuhosha neyi ‘Nakukeña’ hela ‘Nakwanuki’ yinateli kuletesha kukeña kwenu kuswejelaku.”
● Kubula kuzatisha chiwahi yozelu kunateli kuleta kukala muwulu. Chakutalilahu, amakwawu azatishaña nankashi mafoni awu, chakwila akañanyaña kwikala nampinji yakuhanjeka nawenikwawu.
Julissa wahosheli nindi: “Neluka nami kakavulu kwekalaña mpinji yakeñañawu anfumwami kuhanjeka nanami, ilaña akañanyaña muloña nekalaña hafoni.”
● Amakwawu ahoshaña nawu anateli kuhanjeka chiwahi nawenikwawu hampinji yoyimu anakuzatisha foni hela tabuleti. Muntu wadiza jachihandilu chawantu Sherry Turkle, wahosheli nindi, “Kwila yuma yayivulu hampinji yimu hikudidimba hohu.” Watwalekelihu nindi neyi tunakukeña kwila yuma yayivulu hampinji yimu, tukukañanya kuyila kwesekeja nachitunakeñi. Wahosheli nindi kwesekeja nachekala yuma, “Nzatilu yetu yafuntaña mwishina neyi tushilahu mudimu wukwawu hanyidimu yitunakuzata.”
Sarah wahosheli nindi, “Natiyaña kuwaha kuhanjeka nanfumwami, ilaña bayi kuhanjeka nindi henohu nakwila yuma yikwawuku. Neyi nakwila yuma yikwawu chamwekeshaña nawu nateli kuzañalala neyi chochinateli kuzañalalayi nachozelu chindi hohu.”
Chikuma chidi chakwila nawu: Njila yimunakuzatishilamu yozelu yinateli kukwasha wulu wenu hela kuleta kukala muwulu.
Ilishenu “Muzuzu waYa” Wutwalekihu Kubidima
12 Adisumbula anateli kuyimbujola ñahi aAkwila naPrisila? Toñojokenu yuma yimunateli kwilila hamu namwinikwenu. Chatela muzateña iyi nyidimu iwu nkawindi-iwu nkawindi, kwila muyizatila hamu neyi adisumbula nehi? Chakutalilahu, aAkwila naPrisila adiña nakushimwina hamu. Komana ninenu mwatanjikaña kuzatila hamu mpinji yejima? Akwila naPrisila azatilileña cheñi hamu. Hadaha enu nimwinikwenu himwazataña mudimu wowumuku, ilaña kwila muzatila hamu nyidimu yahetala nehi? (Mukwa. 4:9) Neyi mudikwashaña munyidimu, mukudikundaña nankashi nawa mukwikalaña nampinji yakuhanjeka. Amanakwetu aRobert nawaLinda anashakami muwulu hadi yaaka kubadika 50. Manakwetu Robert wahosheli nindi: “Kuhosha hohu chalala, hitwekalaña nampinji yeneni yakuya nakuhemena hamuku. Ilaña neyi inakukosa yeña nawa mwinikwami enza nakuyikombola, neyi inakuseya hanji nawa enza nakunkwashaku, nazañalalaña nankashi. Kwilila hamu yuma kwatunuñañeshaña. Kukeña kwetu kwaswejelañaku.”
13 Hela chochu, anukenu nenu, kushakama hohu hamu hikunateli kuyinuñañeshaku. Muhela wumu wasumbuka wakuBrazil wahosheli nindi: “Munanu mafuku, chineli kunasweji kwikala yuma yayivulu yaluwañeshaña, nenzi nakuwana nami tunateli kufwa mumuhetu wakutoñojoka netu twekalaña nampinji yakwikala hamu chineli twashakamaña mwitala dodimu. Nenzi nakwiluka nami kudi chuma chikwawu chinatela kwila kubadika hohu kushakama hamu namwinikwami. Natela cheñi kwila yuma yinakumwekesha nawu nashi maana kuyuma yinakukeñayi.” Talenu manakwetu Bruno niñodindi Tays chelañawu hakwila amwekeshi nawu anashi maana kuyuma yinakukeñayi mukwawu. Wahosheli nindi: “Hampinji yitudi hamu nakunooka, twatentekaña mafoni etu kwakulehi kulonda twiikali nampinji yakudiluñishila hamu.”
14 Hela chochu, indi neyi enu nimwinikwenu mwatiyaña wuudi wakwilila hamu yuma? Hadaha yuma yakeñayi mukwenu enu himwayikeñaku, indi kwiji mwadihilishaña. Chumanyi chimwatela kwila? Toñojokenu hakesi kashimunawu hakusambila. Hikatachikaña kubidima hohenohuku. Kakeñekaña kutwalekahu kusonselaku chovu-chovu nansonsu jamaneni. Munjila yoyimu, kwila mutachika kwilila hamu yuma kuhitila mukwikala nakapinji kantesha ifuku niifuku nehi? Ililenuña hamu yuma yimwakeña wejima wenu, bayi yikumuhilisha mwinikwenuku. (Yak. 3: 18) Neyi mutachika kwilila hamu itu tuyuma twanyanya, mukutachika cheñi kusweja kudikeña namwinikwenu.
Ilishenu “Muzuzu waYa” Wutwalekihu Kubidima
3 Hakwila elishi ‘muzuzu waYa’ wutwalekihu kubidima, eyala namumbanda atela kuzata nañovu kukolesha wubwambu wawu naYehova. Iwu wubwambu wukukwasha ñahi wulu wawu? Neyi adisumbula alemeshaña wubwambu wawu naTata yawu wamwiwulu, chayipelelaña kulondela kufumba kwindi, nawa chumichi chinateli kuyikwasha kutondolwela nikumanisha kukala kunateli kuletesha kukeña kwawu kukehi. (Tañenu Mukwakutañisha 4:12.) Antu apama kuspiritu afwilaña cheñi kumwimbujola Yehova nikwikala nayilwilu yamwekeshañayi, chidi neyi luwi, kudiwunjika nikwanakena. (Efwe. 4:32–5:1) Adisumbula amwekeshaña yilwilu yamuchidiwu, kukeña kwawu kwaswejelañaku. Muhela Lena wunashakami muwulu hadi yaaka kubadika 25, wahosheli nindi, “Chekalaña chaswayi kukeña nikulemesha muntu wapama kuspiritu.”
Yuma Yalema yakuSpiritu
it “Kukeña” ¶39
“Kukeña”
“Mpinji yaKukeña.” Yehova wamwekeshelaña wanyi kukeña antu abula kutelela kuyimwekeshelaku, hela antu elaña yuma yatama. Yena wamwekeshelaña kukeña muntu wejima sampu atachika kumwekesha nindi wamuhela Nzambi. Kuhiñahu dinu mpinji yashikaña yakuleka kuyimwekeshela kukeña. Yehova Nzambi niYesu Kristu akeña kuloña nawa ahela kutama. (Ms 45:7; Heb 1:9) Ana antu amuhela chikupu Nzambi walala hiyakeñekaña kuyimwekeshela kukeñaku. Mwamweni, hikukisa hohu mpinji kutwalekahu kumwekeshela kukeña antu amuchidiwu, muloña antu amuhela Nzambi hiyaketeja kukeña kwindiku. (Ms 139:21, 22; Isa 26:10) Dimuloña waweni Nzambi chayihelelayi nawa wukweti mpinji yakuyibabeshelamu.—Ms 21:8, 9; Mkw 3:1, 8.
OCTOBER 6-12
YUMA YALEMA YAMWIZU DANZAMBI MUKWAKUTAÑISHA 5-6
Chitwamwekeshaña Netu Twamulemesha Chikupu Nzambi Yetu Wabadika
Muhamekenu Yehova Kuhitila muKumwekesha Kalemesha
17 Twatela kushaku kashinshi chikupu kakumwekesha kalemesha hakudifukula kudi Yehova. Mukwakutañisha 5:1 yahosha nawu: “Chiwukuya kwitala daNzambi kahembi mwendu weyi.” Mosi niYoshuwa ayilejeli kusubula nkwabilu jawu neyi adi mwiluña dajila. (Kwid. 3:5; Yosh. 5:15) Adiña nakwila mwenimu kulonda kumwekesha kalemesha hela kutiya woma. Atupristu amuIsarela ayilejeli kuvwala tuputula twamahina amawahi “twakuyibuta nachu abuli kwikala nzekesi.” (Kwid. 28:42, 43) Ichi chayikañesheleña kubula kushakama nzekesi hakukalakala kukameña. Muntu wejima wamuchisaka chawatupristu wateleleli kulondela nshimbi yaNzambi yakumwekesha kalemesha.
18 Dichi twatela kumwekesha kalemesha hakudifukula. Hakwila nawu twikali atelela kulemeshewa, twatela kumwekesha kalemesha. Kalemesha kitwamwekeshaña bayi kekala kakunyivumbu hela kachaaku chakutwilukilahuku. Katela kubadika hachamonañawu antu nakwesekana nachamonañayi Nzambi washinshikaña mumuchima wetu. (1 Sam. 16:7; Yish. 21:2) Twatela kwikala nakalemesha nawa katela kumwekena muyilwilu yetu, muwubwambu wetu nawakwetu, nichitwadimonaña etwaweni. Mwalala, mpinji yejima kalemesha katela kumwekenaña munhoshelu nimuyuma yitwelaña. Kutalisha kuyilwilu yetu, munvwalilu nikudiwahisha, twatiyililaña mazu akapostolu Pawulu akwila nawu: “Bayi mwila chuma chakudimbwisha nachu muntu hela chimuku, kulonda mudimu wetu abuli kuwumona kutama. Twadimwekeshaña mwakwila nawu tuyakwakukalakala mudimu waNzambi muyuma yejima.” (2 Kor. 6:3, 4) ‘Twawahishaña kuleja kwaNzambi, Chamwinu chetu, muyuma yejima.’—Tit. 2:10.
Kudiza Bayibolu Kunateli Kuyileñela Kulombaña Chiwahi
21 Yesu wadiña nachikuhwelelu nawa walombeleña munjila yakalemesha. Chakutalilahu, henohu kanda yamusañuli Lazaru, ‘Yesu wafumbwili mesu kwiwulu, hakwila nindi, Tata nakusakilili chiwunantiyi. Ninami neluka nami eyi wantiyaña mafuku ejima.’ (Yow. 11:41, 42) Komana kulomba kwenu kwamwekeshaña nawu mwekala nakalemesha nichikuhwelelu? Neyi mutaña kulomba kwaYesu kwakutalilahu, mukwiluka nenu, yuma yalema yateneniyi yadiña yakujilika ijina daYehova, kwinza kwaWanta windi, nikushikija yuma yakeñañayi. (Mat. 6:9, 10) Toñojokenu hakulomba kwenu. Komana kulomba kwenu kwamwekeshaña nawu mwakeña Wanta waYehova, mwelaña yuma yakeñañayi nikujilika ijina dindi dajila? Mwatela kwila mwenimu hakulomba.
‘Ilenu Mumwakanini’
12 Hela chochu, chipapatishu hintachikilu hohu. Ilaña, twatela kutwalekahu kwila yuma kwesekeja nachitwadikanini netu tukumukalakelaña Nzambi. Dichi, twatela kudihula netu: ‘Wuspiritu wami wunakuyilaku hambidi kufuma hampinji yinapapatisheweli? Inakutwalekahu kumukalakela Yehova namuchima wejima? (Kol. 3:23) Komana nalombaña, natañaña Izu daNzambi, nayaña kukupompa kwachipompelu nikushimwina mpinji yejima? Tahindi nafunti hanyima hakuzata iyi nyidimu yakuspiritu?’ Kapostolu Petulu walumbulwili nindi tunateli kubula kufunta hanyima neyi tutwalekahu kukoleshaña chikuhwelelu chetu, kuumika nikumwakama Nzamb.—Tañenu 2 Petulu 1:5-8.
Yuma Yalema yakuSpiritu
Malwihu Kufuma Kudi Antañi
Mukwakutañisha 5:8 yatalisha kudi nyuuli wakabishaña atuzweñi nikuyiheñeshela wuñaji. Nyuuli watela kwanukaña nindi kudi muntu wamubadika hela wukweti wuswa munfulumendi wunakumumona. Kafwampi kudi cheñi amakwawu akweti yifulu kumubadika. Chawushona anyuuli ejima amunfulumendi jawantu akweti majika kanwa nawa antu amavulu akabakanaña muloña wamajika kanwa.
Hela chakwila yuma yinakumwekana neyi hiyakawahaku, tunateli kukundejewa hakwiluka netu Yehova ‘wayimonaña nianyuuli ejima abadika’ adi munfulumendi yawantu. Tunateli kumulomba Nzambi nikuumbila yisenda yetu hadi yena. (Mas. 55:22; Fwi. 4:6, 7) Tweluka netu “mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.”—2 Kushi. 16:9.
Dichi, Mukwakutañisha 5:8 yatulejaña chidi yuma munfulumendi yawantu mukaayi; mpinji yejima kwekala muntu wukweti wuswa wabadika. Chuma chasweja kulema, iyi vasi yinateli kutukwasha kwiluka netu Yehova diyi wabadika, Muntu Wukweti Wuswa Wabadika wakuuyula. Nakuyuula kuhitila mudi Mwanindi, Yesu Kristu Mwanta waWanta. Wañovu Jejima, wamonaña yuma yejima, wukweti wuñanji nawa wekala chiwahi niMwanindi dichekalayi.
OCTOBER 13-19
YUMA YALEMA YAMWIZU DANZAMBI MUKWAKUTAÑISHA 7-8
“Yenuña Kwitala Kudi Kudila”
it “Kudila” ¶9
“Kudila”
Mpinji yaKudila. Mukwakutañisha 3:1, 4 yahosha nawu kwekala “mpinji yakudila nimpinji yakuseha; mpinji yakutumpa nimpinji yakuhañana.” Neyi chitwatoñojokaña etu antu neyi muntu nafwi, netu muntu wamaana wayaña “kwitala kudi kudila” chatela ayi kwitala kudi chawija. (Mkw 7:2, 4; esekejenu Yis 14:13.) Dichi, muntu wamaana wazatishaña iku kukoleka kumwekesha wushona nikukundeja anakudila, chatela adiwuleña iyi mpinji muloña wakukeña kuditiyisha yomweni kuwaha. Kwila mwenimu, kukumukwasha kutoñojokaña hawuntu windi nikutoñojoka munjila yayiwahi kutalisha hadi Nleñi yindi.
Kwashenu Antu Adi naChineñi Kulonda Atweshi Kuumika
15 William wafwishili ñodindi yaaka yinahitihu walumbulwili nindi: “Nasakililaña neyi antu amakwawu anukaña yuma yayiwahi yelileña ñodami; chañanukishaña nami adiña amukeña nawa amulemesheli. Wukwashu wamuchidiwu wankwashaña hama. Mazu awu ankundejaña nankashi, muloña ñodami wadiña walema chikupu kudami nawa wadiña ibwambu dami.” Nfwila Bianca walumbulwili nindi: “Chankundejaña neyi akwetu alombela hamu nanami nikutañaku nsona yimu hela jiyedi. Chankwasha neyi ahoshaña hadi nfumwami nawa neyi anakuntiyilila chinnakuhosha hadi yena.”
“Dililenuña Hamu Nawantu Adilaña”
16 Ilukenu nenu kulombelaku akwenu akwaKristu anafwishi kwalema. Hela chakwila chinateli kuyikalila kulomba iku munaneñi, ilaña kulomba kwenu kwakulemba kumukuyilombelaku iku munakudila hela munakushikoka, kunateli kuyikundeja ananeñi. Dalene wahosheli nindi, “Mpinji yikwawu neyi ahela enza nakunkundeja nayilaña nami alombi neyi chinatwesheki. Hakutachika kulomba, chayikalilaña kutena mazu ilaña chihahita mpinji atachikaña kuhosha chiwahi nawa alombaña chakufuma hamuchima. Chikuhwelelu chawu, kukeña kwawu, nichañakamenañawu chakoleshaña chikuhwelelu chami.”
“Dililenuña Hamu Nawantu Adilaña”
17 Antu amakwawu atwalekañahu kuneña hadi mpinji yayilehi amakwawu nehi. Dichi, yihempulenuña mpinji yejima, bayi neyi hampinji yinafwishiwu hohuku, ilaña nihampinji yakwila antu ejima anapalañani dehi. “Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.” (Yish. 17:17) Akwetu akwaKristu akundejaña muntu wudi wejima sampu nichakamanishayi chineñi chindi.—Tañenu 1 ATesalonika 3:7.
18 Yidika yakwanuka afu, tumina, mafoto, nyidimu hela tuhu mavumba niyivumina hela yilaaka yinateli kukojeja antu anafwishi kutachika kuneña cheñi. Yuma yayivulu yelañayi muntu wunafwishi mwinikwindi yinateli kumuneñesha, chidi neyi kuya kukupompa kwañinza hela kuChanukishu. Manakwetu wumu wahosheli nindi, “Naneñeli chikupu ifuku dinanakeneña ifuku ditwadisumbwili, chadiña chakala. Ilaña amanakwetu niahela antesha afuukwilihu kunloñeshela kachidika kanyanya nawamabwambu jami kulonda nibuli kwikala nkawami.”
19 Ilukenu nenu, antu anafwishi akeñekaña kuyikolesha mpinji yejima. Junia wahosheli nindi, “Kakavulu neyi muloñeshela muntu chidika munabuli kudibombela jakwanakana chakwashanaña nankashi. Mpinji yamuchidiwu yayiwahi nawa yaleñelaña muntu kukundejewa.” Mwamweni, hitunateli kumanisha chineñi chejima chamuntu wunafwishi muntu akeñayiku, ilaña tunateli kukundeja nikuwundishaku chineñi chamuntu wunafwishi neyi tumukwashaku nyidimu yimu. (1 Yow. 3:18) Gaby wahosheli nindi: “Namusakililaña Yehova hakukeña kwamwekesheliwu aeluda añendeleleli hampinji yinadiña nachineñi. Ankwashili nankashi kumona Yehova chakundejañayi.”
Yuma Yalema yakuSpiritu
“Dihu Hakuyilukilawu Kudi Antu Ejima Nawu Mudi Atumbanji Twami”
18 Mpinji yikwawu tunateli kukeña kuya nakumuwana mukwetu mukakwitiya wunatuneñeshi. Hela chochu, twatela kusambila kudihula malwihu adi neyi: ‘Komana nikweti wunsahu wejima?’ (Yish. 18:13) ‘Tahindi welilamu hohu wanyi?’ (Mukwa. 7:20) ‘Kanda niluwañesheñahu dehi muniyi njila?’ (Mukwa. 7:21, 22) ‘Neyi niya nakumuwana, komana nukuletesha kukala kutohelaku kubadika iku kwinnakukeña kumanisha?’ (Tañenu Yishimu 26:20.) Neyi tutoñojokaña hamalwihu amuchidawa, tunateli kukunkulula netu kukeña kutwamukeña manakwetu kukutuletesha tudiwuliku hohu kuchuma chinatwiliyi.
OCTOBER 20-26
YUMA YALEMA YAMWIZU DANZAMBI MUKWAKUTAÑISHA 9-10
Monenuña Kukala Kumukweti Munjila Yayiwahi
Bayi ‘Mumuhililaña Yehovaku’
20 Ilukenu wumwatela kutwika muloña. Muloñadi chitwatela kwilila mwenimu? Muloña makabi amakwawu yetu twayikojejaña. Neyi yetu tunayikojeji, twatela kwiteja. (Ñal. 6:7) Bayi mweseka kumutwika Yehova muloña hamakabi imukumonaku. Muloñadi? Talenu ichi chakutalilahu: Motoka yinateli kwikala nañovu yakutemuka chikupu. Fwikijenu ñendeshi nasweji kutemwisha chikupu nakubadika hachipimu hatela kukuminayi neyi nakuhita hakondamina mukwakwa chikupu, nawa motoka yalumuka. Komana twatela kutwika muloña atuñili wuna motoka? Inehi, hitunateli kuyitwika muloñaku. Munjila yoyimu, Yehova watuleñeli nawuswa wakufuukulahu etu aweni. Ilaña watwinka cheñi nshimbi jitwatela kulondela hakufuukulahu chachiwahi. Dichi muloñadi wutwatela kumutwikila Nleñi yetu muloña hayiluwa yetu?
21 Hela chochu, bayi neyi kukala kwejima kwenzaña hamuloña wayiluwa yetu niyililu yatamaku. Yuma yikwawu yamwekanaña hamuloña ‘wampinji nakululakana.’ (Mukwa. 9:11) Sweje-e dinu, twatela kwiluka netu Satana Diyabolu diyi wakojejaña yuma yatama yidi mukaayi kejima. (1 Yow. 5:19; Chim. 12:9) Diyi chilumbu—bayi Yehovaku!—1 Pet. 5:8.
Yehova Wakeña Ambuña Indi Adizoza
10 Kudizoza kwapeleshañaku cheñi chihandilu chetu. Mpinji yikwawu tukumonaña hela kuhita muyuma yitukutoñojokaña netu yatelela wanyi. Mwanta wamaana Solomoni wahosheli nindi: “Namoni anduñu hiyakwendela hatuwalu, hakwila atulamba hiyakwenda hamaseki neyi anduñu.” (Mukwa. 10:7) Antu eluka yuma hela nyidimu ayihamekaña wanyi. Ilaña ahamekaña nankashi antu abula kwiluka nyidimu hela yuma. Hela chochu, Solomoni welukili nindi chachiwahi kwiteja yuma chiyidi chatela muntu yahili nayuma yamwekanaña muchihandilu. (Mukwa. 6:9) Neyi twadizoza chinateli kwikala chaswayi kwiteja yuma kwesekeja nachiyidi.
Komana Yuma Yimwelaña Hampinji Yakunooka Yayiheteshaña?
MUBAYIBOLU yejima, twawanañamu mazu amwekeshaña nawu Yehova wakeñaña nindi tutwalekuhu nakuhanda nikudiluñisha muchihandilu. Chakutalilahu, mukanda waMasamu 104:14, 15 wahosha nawu Yehova diyi wasoñeshaña ‘yakuda mumaseki, nivinyu yakuluñisha nachu muchima wamuntu, nimanji akulezumwisha nachu mesu indi, niyakuda yaluñishaña muntu mumuchima.’ Eñañi, Yehova wakulishaña yisakola kulonda yisoñi mbutu, manji itwadaña, nivinyu yitwanwaña. Ilaña vinyu ‘yaluñishaña cheñi muchima.’ Yabadika hakuhemba wumi nawa yatuzañaleshaña. (Mukwa. 9:7; 10:19) Mwalala, Yehova wakeñaña nindi tuzañalaleña, nyichima yetu yinzaleña ‘nakuluña.’—Yilw. 14:16, 17.
2 Dichi, hitwatela kuneña neyi mukuhita kwampinji tuwana mpinji ‘yakushinshika chachiwahi atujila ahaluzwizu’ ‘niwuluya wamwisaña’ hela kudiluñisha nanyidimu yikwawu yatuzañaleshaña nikuleñela wumi wetu wikali wawuwahiku. (Mat. 6:26, 28; Mas. 8:3, 4) Kwikala namuzañalu muchihandilu “hichamukunkulu chakudi Nzambi.” (Mukwa. 3:12, 13) Dichi neyi tukumonaña mpinji yakunooka netu niyena yidi hakachi kayawana yatwinkawu chikutuleñela tuyizatisheña munjila yayiwahi yikuzañaleshaña Mukwakuhana.
Yuma Yalema yakuSpiritu
it “Matuñu, Kutwamba” ¶4, 8
“Matuñu, Kutwamba”
Matuñu anateli kuletesha muntu kutwamba, nawa anateli kumutamisha muntu anakutwambilawu. Mazu amaana ekala haMukwakutañisha 10:12-14 alala, akwila nawu: “Nyivumbu yachisupi yamuletelaña yihuñu. Mazu asambilaña kwidika mukanwa kindi awusupi, nawa mazu indi akukumishaku akuzaluka chikupu. Ilaña chisupi watwalekañahu hohu kuhosha.”
Hela chakwila matuñu mpinji yikwawu anateli kumuneñesha muntu hela kubula kumuneñesha (kunateli kwikala kutwamba hela kuletesha muntu kutachika kutwamba), kutwamba kwaneñeshaña antu, kuyikatisha kumuchima mpinji yejima nikuletesha antu kubobola. Hadaha munateli kwikala nkeñelu yakukeña kukatisha muntu hela nehi. Munjila yidi yejima, mukakutwamba amumonaña chatama kudi Nzambi, muloña “[kukuwa] ntaadi hakachi kawantu evumu dimu” kwekala hakachi kayuma yahelayi Nzambi. (Yis 6:16-19) Izu dachiGiriki dakwila nawu “mukakutwamba” hela “mukakwinka akwawu nyiloña” hidiyabolosi. Idi izu adizatisha cheñi muBayibolu kwikala nkumbu yaSatana “Diyabolu,” mukakutwamba wabadika wamutwambilili Nzambi. (Ywn 8:44; Chi 12:9, 10; Kut 3:2-5) Chumichi chamwekeshaña kwafumini kutwamba kwamuchidiwu.
OCTOBER 27–NOVEMBER 2
YUMA YALEMA YAMWIZU DANZAMBI MUKWAKUTAÑISHA 11-12
Ikalenuña Akola Kumujimba Nawa Diluñishenuña
g 3/15 13 ¶6-7
Komana Mpepela Yayiwahi niMwaana, “Hiyitumbu”?
Mwaana niwena wukweti ñovu yakujaha tububu. Mukanda waJournal of Hospital Infection walumbulula nawu “tububu twatuvulu twaletaña yikatu yamumpepela twafwaña namwaana.”
Munateli kuzatisha ñahi mwaana nimpepela? Munateli kwidika hanji himunateli kushakama hadi mpinji yamweseka hamwaana nikwonaku mpepela yayiwahi. Kwila mwenimu kukuyikwasha.
Lemeshenu Chawaana chaWumi Chatwinkawu Kudi Nzambi
6 Hela chakwila Bayibolu himukanda wahosha hansañu jakukola kumujimba hela hayakuda yitwatela kudaku, yamwekeshaña Yehova chatoñojokañayi kutalisha hayumiyi. Chakutalilahu, watukonkomwenaña kudikiña “kuyuma yafwana” yinateli kukisañana mujimba wetu. (Mukwa. 11:10) Yuma yinateli kusha wumi wetu muwubanji, dikwila nawu kufwa hakuda nikusheta, yejima ayikaanisha muBayibolu. (Yish. 23:20) Yehova wakeñaña tudiyuuleña hampinji yitunakufuukula yuma yitwatela kuda nikunwa nawa nikuvula kwayu—1 Kor. 6:12; 9:25.
7 Tunateli kufuukula yuma yikumwekesha nawu twasakililaña chikupu hachawaana chawumi chatwinkawu kudi Nzambi kuhitila mukuzatisha wuswa wetu wakutoñojoka. (Mas. 119:99, 100; tañenu Yishimu 2:11.) Chakutalilahu, twazatishaña chiwahi wuswa wetu wakutoñojoka hayuma yitwafuukulaña kuda. Neyi kudi yakuda yitwakeña ilaña yatukatishaña kumujimba, twafuukulañahu kubula kuyida. Twamwekeshaña cheñi netu twatoñojokaña mwamaana neyi tukaamaña swayi, kukolesha mujimba mpinji yejima, kudiwahisha kumujimba nikuhemba matala etu nawunyonji.
“Ikalenu Akakwila Mwaya Izu”
2 Etu akakudifukula aYehova, twekala antu amuzañalu. Muloñadi? Kudi yuma yayivulu yaleteshaña, ilaña chuma chimu chatukwashaña nankashi hikutaña Izu daNzambi mpinji yejima nikufwila kuzatisha yuma yitunakudiza.—Tañenu Yakoba 1:22-25.
3 Kudi yuma yayivulu yayiwahi yafumañamu neyi “[twikala] akakwila mwaya izu.” Chuma chimu chidi chakwila nawu, tweluka netu iyi hinjila yimu yitwamutiyishilañamu Yehova kuwaha. Kwiluka chumichi kwatuzañaleshaña. (Mukwa. 12:13) Neyi tunakuzatisha yuma yitunakutaña Mwizu daNzambi donenewa, twekalaña namuzañalu muchihandilu chetu nikukolesha wubwambu wetu nawakwetu akakwitiya. Hadaha chumichi chayimwekenahu dehi muchihandilu chenu. Kubombelahu, twatondolwelaña kukala kwakuvulu kwamonañawu antu abulaña kwovwahila nshimbi jaYehova. Chakadi nikujina, tukwiteja mazu ahosheliyi Mwanta Davidi. Hanyima yakutena nshimbi, yanukishu, niwunsompeshi waYehova mukamina, wakunkulwili nindi: “Mukuyihemba, mwafumaña yuma yayiwahi.”—Mas. 19:7-11.
Yuma Yalema yakuSpiritu
it “Kwonena” ¶10
“Kwonena”
Hela chochu, wunsahu wamwekeshaña nawu, bayi neyi ana amayala azatishiliyi Nzambi kusoneka Nsona adiña neyi makina adiña nakukwata hohu yuma yadiña nakuhoshawuku. Twatañaña kutalisha hadi kapostolu Yowanu nawu “Nzambi wamoneneni,” amumwekesheleli Chimwenu kuhitila mudi kañelu “muyinjikijilu” nawa hohenohu Yowanu “washimwini wunsahu wamazu aNzambi niwunsahu washimwiniyi Yesu Kristu, eña, yuma yejima yamweniyi.” (Chi 1:1, 2) “Chamoneneniwu [hela netu, “hadiñayi muspiritu”]” Yowanu ‘wakasumukili wudi mwifuku daMwanta’ nawa amulejeli nawu: “Yuma yiwunakumona, yisoneki mumuvuñilu.” (Chi 1:10, 11) Dichi, chinamwekani neyi Nzambi wamweni nindi chidi hohu chiwahi kwiteja ansoneki aBayibolu kuzatisha maana awu kutonda mazu ninyikuku yamazu hakulumbulula nachi yimwenu yamweniwu (Hab 2:2), iku mpinji yejima nakuyuula maana awu nikuyilombola kulonda nsañu yinakusonekawu yiikali yoloka nawa yalala, yikwesekana nankeñelu yaYehova. (Yis 30:5, 6) Kuzata kwazatileñawu nañovu ana ansoneki anakumwekeshi haMukwakutañisha 12:9, 10, nawu adiña nakutoñojoka chikupu, kusandujola nikuyisha mundonda kulonda “awani mazu amawahi nikusoneka mazu atelela achalala.”—Esekejenu Lu 1:1-4.