Kuzatisha Yozelu haKupompa kwaChipompelu

Jinfulumendi jajivulu mukaayi kejima jinashiku nshimbi jakudishila chintampu nawa anakaanishi kupompa hamu. A Yinsahu jaYehova anakwovwahila iyi nshimbi nawa anatwalekihu kupompa kuzatisha njila yinateli kubula kuleta wubanji. Hakwila apompi hamu, anakuzatishaña yozelu yidi neyi Zoom.

Hakwila atwalekihu kupompa munjila yakiñewa, Izanvu Dalombolaña detejeli kuzatisha yawaana kulandila yipompelu maakawunti ahaZoom. Iwu wadiña wukwashu chikupu kudi yipompelu yadi kukañanya kulanda akawunti yaZoom yakushika kumadola $15-$20 nakubadikahu. Nawa yipompelu yatachikili kuzatisha maap hakusokankesha hohu antu antesha nawa njla yabula kukiñewa. Yipompelu yejima yazatishaña awa maakawunti amukuloñesha ahaZoom yadiluñishaña muloña aswayi kuzatisha, akiñewa nawa asokankeshañaku antu amavulu hakupompa. Chayinu mpinji, yipompelu kubadika ha 65, 000 mumatuña akubadika ku 170 anakuzatisha awa maakawunti.

Chipompelu chaKairagi, muManado, North Sulawesi, Indonesia, chalekeli kuzatisha app yawaana nakutachika kuzatisha akawunti yahaZoom yamukuloñesha. Manakwetu Hadi Santoso wahosheli nindi: “Niamanakwetu niahela abula kwiluka chakuzatisha yozelu niwena anakudiluñisha kupompa nawantu amavulu, muloña hiyanakusokankesha kukupompa kumu mapampa kakavuluku.”

Manakwetu Lester Jijón, Jr., mukulumpi muchipompelu chaGuayacanes Oeste muGuayaquil, Ecuador, wahosheli nindi: “Chineli amanakwetu niahela amavulu mali anakali, yipompelu yayivulu hiyadi kutwesha kulanda maakawunti ahaZoom kulonda chipompelu Chejima chitweshi kupompaku. Chineli maakawunti ahazoom analandiwu anakusonkakesha antu amavulu tunakutambikaña antu amavulu kukupompa chakadi kwakama naamba yikusokankesha kuzoom”

Manakwetu Johnson Mwanza, wamuZambia wamuchipompelu chaNgwerere North muLusaka, wasonekeli nindi: “Amanakwetu niahela anakuhoshaña nawu ntanjikilu yinashiku kuloñesha yazoom bayi neyi yinakutukwasha hohu kukundama kudi amanakwetu nawahelaku ilaña yinakutukwasha kwiluka netu Yehova watukeña nawa watwakamenaña.”

Awa maakawunti amukuloñesha anakuyilanda kuzatisha mali akukwasha kuwubanji wadimwekenaña. Awa mali afumaña hayawaana yahanañawu yakukwasha mudimu wamukaayi kejima. Yawaana yayivulu ayihanaña kuzatisha.jw.org. Twasakililaña nankashi chimwahanaña yawana mukudikeñela yakwashaña muwubanji wadimwekenaña mukaayi kejima.—2 Akorinda 8:14.