Hachimu, September 1
Lwakatoñekela hadi etu neyi chejeji chetena dinakusela.—Luka 1:78.
Nzambi wamwinka Yesu ñovu yakumanisha kukala kwejima kunakumonawu antu. Kuhitila muyihayamisha yakoñeliyi, Yesu wamwekesheli ñovu yikwetiyi yakumanisha kukala kwejima kutunateli kukañanya kumanisha etu aweni. Chakutalahu, wukweti ñovu yakutusubula kuyuma yaleteshaña antu amoneña kukala, dikwila nawu kutusubula kunshidi yitwaswana nikukukala kwafumañamu, kukata nikufwa. (Mat. 9:1-6; Rom. 5:12, 18, 19) Yihayamisha yakoñeliyi yamwekesheli nawu nateli kuuka yikatu “yeñi-nayeñi” kushilahu nikusañula afu. (Mat. 4:23; Yow. 11:43, 44) Wukweti cheñi ñovu yakuwundisha mpepela yeneni nikushinda aspiritu atama. (Maku 4:37-39; Luka 8:2) Twakoleshewaña chikupu hakwiluka netu Yehova wamwinka Mwanindi iyi ñovu! Twatela kukuhwelela chikupu netu yuma yayiwahi yatukanawu yakaleta Wanta waNzambi yakashikijewa. Yihayamisha yakoñeliyi Yesu hadiñayi hanu hamaseki neyi muntu yatukwashaña kwiluka yuma yayivulu yakakoñayi hamu neyi Mwanta wamwiwulu waWanta waNzambi. w23.04 3 ¶5-7
Hachiyedi, September 2
Spiritu yasandujolaña muyuma yejima, kushilahu nimuyuma yakunama yaNzambi.—1 Kor. 2:10.
Neyi mudi muchipompelu cheneni nawa nenu kakavulu enu hiyayinkaña kukooleka kwakwakulahuku, munateli kwikala mukweseka kwakuleka kwakulahu. Ilaña bayi muzeya nakuleka kwakulahuku. Loñeshenuña ñakwilu jajivulu mukupompa-hikupompa. Chikufumamu, neyi anayinki wanyi kukooleka kwakwakulahu kumatachikilu akudi za, mukwikala nakukooleka kukwawu kwakwakulahu henohu kupompa kanda kumani. Neyi munakuloñesha Kaposhi Kakutalila Kakudizamu toñojokenu paragilafu niparagilafu chiyinakwatankani namutu hanashindameni chibaaba. Neyi mwila mwenimu, hadaha mukwikala nakukooleka kwakwakulahu munoyu nsañu yimunakudiza. Kubombelahu, munateli kudiloñesha kwakulahu mumaparagilafu mudi nsañu yakunama yamuBayibolu yakala kulumbulula. Muloñadi? Hadaha hakudiza haniyi nsañu kunateli kwikala hohu antu antesha akukeña kwakulahu. Indi neyi muwana nenu mpinji yejima yimwayaña nakupompa ayinkaña wanyi kukooleka kwakwakulahu? Hanjekenu nawukulombolaña henohu kupompa kanda lwihu lumukukeña kwakula. w23.04 21-22 ¶9-10
Hachisatu, September 3
Yosefu . . . welili mwamulejeliwu kudi kañelu kaYehova, nawa wamusendeli ñodindi kwitala.—Mat. 1:24.
Yosefu wovwahilileña wunlomboli waYehova, nawa chumichi chamuletesheli ekali iyala wamuwahi. Hadaha hadi mpinji jisatu jashiyashana, watambwilili nshimbi kudi Nzambi jakundamini chisaka chindi. Haniji mpinji jejima, wanyakeleña kwovwahila, hela chakwila chadiña chakala kwila mwenimu. (Mat. 1:20; 2:13-15, 19-21) Kuhitila mukulondela wunlomboli waNzambi, Yosefu wamukiñileña Mariya, kumukwasha nikumukeñela yuma yakumujimba. Toñojokenu hayuma yeliliyi Yosefu chiyaletesheli Mariya kusweja kumukeña nikumulemesha! Enu amayala, munateli kumwimbujola Yosefu kuhitila mukukeñakeña kufumba kwamuBayibolu hakwakamena yisaka yenu. Neyi mwovwahila iku kufumba, hela chakwila chikukala kwila mwenimu, mukumwekesha nenu mwamukeña ñodenu nawa mukukolesha wulu wenu. Muhela wakuVanuatu, wunashakami muwulu hadi yaaka kubadika 20, wahosheli nindi: “Neyi nfumwami akeñakeña wunlomboli waYehova nikuwuzatisha, namulemeshaña chikupu. Natiyaña kwikala wakiñewa, nawa nakuhwelelaña yuma yinafuukuliyi.” w23.05 21 ¶5