October

Komana mpinji jikwawu chayikalilaña kwovwahila? Mwanta Davidi chamukalilileña, dichi walombeli kudi Nzambi nindi: “Nsañumuni mukachi kami kulonda mwiikali muchima wakukwovwahila.” (Mas. 51:12) Davidi wamukeñeli Yehova. Hela chochu, mpinji jikwawu chamukalilileña kwovwahila, ninetu chatukalilaña. Muloñadi? Chatachi, twaswana chaaku chakubula kwovwahila. Chamuchiyedi, Satana mpinji yejima wafwilaña kutuletesha tudikañi neyi chadikañiliyi. (2 Kor. 11:3) Chamuchisatu, twashakamaña mukaayi mwekala antu ekala nachilwilu chakudikaña, “spiritu yinakuzatika mudi anyana kakudikaña.” (Efwe. 2:2) Twatela kuzata nañovu kulwisha namuchima wakufwila kukoña nshidi nikukaana ikakeja dafumaña kudi Diyabolu nikaayi kindi dakutukojeja tubuleña kwovwahila. Twatela kuzata nañovu kulonda tumwovwahileña Yehova niantu enkayi wuswa wakulombola. w23.10 6 ¶1

Chumanyi chitunateli kudizila kuchihayamisha chakoñeliyi Yesu chakubalumuna menji kwikala vinyu? Twadizilañaku chitunateli kwikala adizoza. Yesu hadisambili nachihayamisha chakoñeliyiku; kafwampi hadisambileña nayuma yejima yelileñayiku. Ilaña wadizozeleña nawa wetejeleña kalemesha nimpuhu yejima kuya kudi Tata yindi. (Yow. 5:​19, 30; 8:28) Neyi twikalaña adizoza neyi Yesu hitwakadisambaña nayuma yitwelañaku. Bayi tudisambaña etu aweniku, ilaña tudisambeña hakukooleka kutukweti kwakukalakela Nzambi wamuwahi. (Yer. 9:​23, 24) Twatela kumwinka kalemesha kamutelela. Kwosi chuma chachiwahi chitunateli kwila chakadi wukwashu waYehovaku. (1 Kor. 1:​26-31) Neyi twadizoza, hitukukeñaña netu atuhamekeña hayuma yayiwahi yitwelilaña akwetuku. Twazañalalaña muloña tweluka netu Yehova wamonaña nawa walemeshaña yuma yitwelaña. (Esekejenu Matewu 6:​2-4; Heb. 13:16) Mwamweni, twamutiyishaña Yehova kuwaha neyi twikalaña adizoza neyi Yesu.—1 Pet. 5:6. w23.04 4 ¶9; 5 ¶11-12

Chamwoneneniwu, kapostolu Pawulu wakolesheli akaKristu kutwamijaku yuma yatiyishaña akwawu kuwaha. Tunateli kuzatisha ñahi iku kufumba hampinji yitunakupompa? Kuhitila mukwanuka netu akwetu niwena anakukeña kwakulahu. Toñojokenu chumichi. Neyi munakuhanjeka nawakwenu, komana mukuhoshaña nankashi chakwila anakukañanya nikuhoshahu? Inehi! Mukukeña niwena ahosheñahu. Munjila yoyimu, hakupompa, twakeñaña antu amavulu akuleñahu. Kafwampi, njila yimu yayiwahi yakukoleshelamu amanakwetu niahela hikuyinka kukooleka kwakumwekeshelamu chikuhwelelu chawu. (1 Kor. 10:24) Dichi twatela kwihihishañaku ñakwilu jetu, kulonda amavulu ekali nakukooleka kwakwakulahu. Hela neyi munakuhana ñakwilu yayihi, tondolwelenu kuhosha hayikuma yayivulu nankashi. Neyi muhosha yuma yejima yidi muparagilafu, akwenu akukañanya yikuma yakwakula. w23.04 22-23 ¶11-13

Twatela kwanuka kulema kwakutwalekahu kukwasha akwetu, sweje-e mumudimu wetu wakushimwina. Twatela kwikala amwovu mumudimu wetu wakushimwina. Twawanaña antu akuhwelela yuma yashiyashana, akweti yilwilu yashiyashana ninkulilu yashiyashana. Kapostolu Pawulu wahimpileña kwesekeja nachidi yuma, nawa ninetu tunateli kudizila kudi yena. Yesu wamutondeli Pawulu kwikala “kapostolu kunyuza.” (Rom. 11:13) Muloña waniwu mudimu, Pawulu washimwinineña kudi aYudeya, aGiriki, antu ataña, antu amunyikala, antu alema nianyanta. Hakwila ashiki hanyichima yanawa antu ejima ashiyashana, Pawulu wekalili “yuma yejima kudi antu ejima.” (1 Kor. 9:​19-22) Washileña muchima kuchisemwa chawu, nkulilu niyuma yakuhweleleli antu ashimwinineñayi kulonda awani njila yayiwahi yakuyishimwinamu. Ninetu tunateli kushimwina chiwahi neyi twikalaña amwovu nawa tuhimpaña njila yakushimwinamu kwesekeja nakukala kukwetiwu antiyilili jetu. w23.07 23 ¶11-12

Antu ekala nachilwilu chakwovwaha akola, bayi neyi azeyaku. Chakeñekaña kuzata nañovu hakwila tutweshi kushinda kukala kweneni. Kwovwaha hichilwilu chekala hakachi ‘kanyikaabu yaspiritu.’ (Ñal. 5:​22, 23) Izu dachiGiriki dabalumunawu nawu “kwovwaha” mpinji jikwawu adizatishileña hakulumbulula kawalu wamwisaña anafwomoniwu. Fwikijenu kawalu wamwisaña anovwahishiwu. Hela chakwila iwu kawalu nekali wamwovu, ilaña wakola. Etu antu, tunateli kwikala ñahi ovwaha nawa hampinji yoyimu akola? Bayi nañovu jetu etu aweniku. Chuma chinateli kutukwasha hikulomba spiritu yaNzambi, nakumuleja netu atukwashi kwikala nanichi chilwilu chachiwahi. Kudi wunsahu wawuvulu wunakumwekesha nawu tunateli kwikala ovwaha. AYinsahu amavulu amwekeshaña nawu ekala ovwaha neyi anayivuloki kudi akakudimbulula, nakuletesha antu kubula kwikala nayitoñojoka yaheña hadi aYinsahu.—2 Tim. 2:​24, 25. w23.09 15 ¶3

Muchimwenu chakutiyisha woma, kapostolu Yowanu wamweni akulumpi 24 mumawulu anakudifukula kudi Yehova. Amushimekeli Nzambi nakuhosha nawu watelela kutambwila “kulema, kalemesha niñovu.” (Chim. 4:​10, 11) Kudi yuma yayivulu yaleteshaña añelu ashinshika niwena amushimekeña Yehova nikumulemesha. Ekala hamu nindi mwiwulu nawa amwilukisha chikupu. Amonaña yilwilu yindi chiyamwekenaña muyuma yelañayi. Chamonañawu yuma yinakwilayi Yehova, chayileteshaña amushimekeña. (Yoba 38:​4-7) Ninetu twatela kumushimeka Yehova mukulomba kwetu, nakumuleja yuma yitwakeña hadi yena nichaleteshaña tumulemesheña. Hampinji yimunakutaña nikudiza Bayibolu, fwilenuña kwiluka yilwilu yamwekeshañayi Yehova yayitiyishaña kuwaha nankashi. (Yoba 37:23; Rom. 11:33) Kuhiñahu mulejenu Yehova chimwatiyaña hanoyu yilwilu. Tunateli cheñi kumushimeka Yehova hayuma yatwililañayi niyelilañayi chisaka chetu chejima chakuspiritu.—1 Sam. 2:​1, 2. w23.05 3-4 ¶6-7

Mu 1919, Babiloni Muneni wakañenyi kutwalekahu kwikala nañovu hadi antu jaNzambi. Muchochina chaaka, “nduñu wamaana nikashinshi” watachikili kuzata kulonda akwashi antu akweti nyichima yashinshika kutachika kwenda ‘muNjila yaKujila.’ (Mat. 24:​45-47; Isa. 35:8) Mudimu wazatiliwu “akakuwahisha njila” ashinshika kunyima, wunakwashi antu atachika dehi kwenda muniyi njila yeneni kumwiluka chikupu Yehova ninkeñelu yindi. (Yish. 4:18) Atweshaña cheñi kwila yuma kwesekeja nachakeñañayi Yehova. Yehova hakuhwelelaña nindi antu jindi ashikeni kuhimpa hohenohuku. Ilaña natwalekihu kuyitookesha chovu-chovu. Wejima wetu twakazañalala chikupu hampinji yitwakatweshaña kumutiyisha Nzambi yetu kuwaha muyuma yejima yitwakelaña! Njila yejima yakeñekaña kuyiwahisha mpinji yejima. Kutachika mu 1919, mudimu wakuwahisha “Njila yaKujila” wunatwalekihu kulonda chiyipeleli antu amavulu kufuma muBabiloni Muneni. w23.05 17 ¶15; 19 ¶16

Izanvu Dalombolaña dadizishaña dadeni ankwashi Ezanvu Dalombolaña mumakometi amboka-mboka. Awa ankwashi chayinu mpinji anakuzata nakashinshi nyidimu yayivulu yamukuloñesha. Anadiloñeshi chikupu kutwalekahu kuzata nyidimu yakwakamena nyikoku yaKristu. Neyi awayishewa akukumishaku anayitwali dehi mwiwulu kwakwihi nakukuma kwalukadi lwasweja, kudifukula kwalala kwakatwalekahu hanu hamaseki. Muloña wawunlomboli waYesu Kristu, akakudifukula aNzambi hiyakakaankilahu chuma hela chimuku. Mwamweni, hayina mpinji akatulukuka kudi Gogi wakuMagogi, kudibomba kwanyuza yazuwa. (Ezek. 38:​18-20) Ilaña iku kulukuka kwakapinji kantesha kwakakañanya kwimika mushindu, hikwakakañesha antu jaNzambi kudifukula kudi Yehovaku. Chakadi nikujina, wakayipulwisha! Kapostolu Yowanu, wamweni muchimwenu “izaza deneni” dawanyikoku amakwawu aKristu. Yowanu amulejeli nawu idi “izaza deneni” “[dinafumi] mulukadi lwasweja.” (Chim. 7:​9, 14) Mwamweni, akayikiña! w24.02 5-6 ¶13-14

Yumanyi yitwatela kwila hakwila tutambwili spiritu yajila? Tunateli kulomba iyi spiritu, kudiza Izu daNzambi donenewa nikudikunda nakuloñesha kwalombolewaña naspiritu. Kwila mwenimu kukutukwasha kwikala “[nanyikaabu] yaspiritu.” (Ñal. 5:​22, 23) Nzambi wenkaña hohu spiritu yindi kudi ana atwalekañahu kwikala nayitoñojoka niyilwilu yayiwahi. Neyi tutwalekahu kutoñojoka hayuma yawuzondu nikuyila, hakutwalekahu kutwinka spiritu yindiku. (1 Tes. 4:​7, 8) Hakwila tutwalekihu kutambwila spiritu yajila, hitwatela cheñi “[kudiwula] wuprofwetuku.” (1 Tes. 5:20) Muniyi vasi “wuprofwetu” wunatalishi kunsañu yahanañayi Yehova kuzatisha spiritu yindi yajila, kushilahu ninsañu yahosha hakwinza kwefuku daYehova nichinakehi mpinji yitudimu. Hitwatoñojokaña netu ifuku daYehova, hela Amagedoni hiyakenza mumpinji yitudimuku. Ilaña twatoñojokañahu chikupu kuhitila mukutwalekahu kukalakala “nyidimu yakumwakama Nzambi” ifuku niifuku nikwikala nayilwilu yayiwahi.—2 Pet. 3:​11, 12. w23.06 12 ¶13-14

Chumanyi chitwatela kwila hamu neyi akaKristu neyi mwevulu wanzekesi winza hachozelu chetu? Twatela kuwufumishahu swayi-swayi. Chikutupelela kwila mwenimu neyi twanukaña netu iheta dalema ditukweti hiwubwambu wutukweti naYehova. Kafwampi, ninyevulu yikwawu yabula kwikala yanzekesi yinateli kusañumuna wuvumbi. Muloñadi chitwatela kuyitondolwela? Muloña hitunakukeña kutoñojoka hachuma chidi chejima chinateli kutuletesha kwila wujila mumuchima wetuku. (Mat. 5:​28, 29) Mukulumpi wejina daDavid kuThailand wahosheli nindi: “Nadihulaña ami aweni nami: ‘Hela chakwila iyi nyevulu yanzekesi wanyi, komana Yehova wukutiya kuwaha neyi nitwalekahu kuyitala?’ Kutoñojoka muniyi njila kwankwashaña kufuukula chiwahi.” Kutiya woma wakwila chuma chinateli kumuneñesha Yehova dikwatukwashaña kufuukula chiwahi. Kumutiya Nzambi woma diyi “ntachikilu yamaana.” w23.06 23 ¶12-13

‘Tupeka twamukachi’ tunakwimenaku yipompelu. Mumpinji yalukadi lwasweja, Yehova wakatukiña neyi chatukanayi hampinji yitunakutwalekahu kwikala anuñañana nawakwetu akakwitiya. Twatela kuzata nañovu yoyinu mpinji kulonda tuyimwekesheleña amanakwetu niahela kukeña chikupu. Hadaha twakapuluka muloña waniku kukeña! “Ifuku deneni daYehova” dakayiletela antu yihuñu. (Zef. 1:​14, 15) Antu jaYehova niwena akakabakana. Ilaña neyi tudiloñeshela chadimu yoyinu mpinji, twakekala awunda nawa twakayikwashaña akwetu. Twakomika kukala kwejima kutwakamona. Neyi akwetu akakwitiya anakukabakana, twakazata kwesekeja nahanakumini ñovu jetu kuyikwasha kuhitila mukuyimwekeshela wushona nikuyinka yuma yakakaankilawu. Nawa twakasweja kudikunda nawamanakwetu niahela, itwatachika dehi kumwekeshela kukeña. Kuhiñahu Yehova wakatwinka wumi wahaya nyaaka mwituña mutwakabula kwanuka wubanji nimakabi adi ejima.—Isa. 65:17. w23.07 7 ¶16-17

Kakavulu Izu daNzambi dayilumbululaña antu ashinshika nawu akola. Ilaña niadiña akola nankashi hakachi kawu hiyatiyileña mpinji yejima nawu akolaku. Chakutalilahu, mpinji jikwawu Mwanta Davidi watiyili nindi wadiña “[wakola] neyi mpidi,” ilaña mpinji jikwawu “[wafwili] mutentu.” (Mas. 30:7) Hela chakwila Samusoni wadiña nañovu nankashi hamulombweleñawu kudi spiritu yaNzambi, welukili nindi chakadi ñovu yafumaña kudi Nzambi, “[wukuzeya] nakwikala neyi chekala antu ejima.” (Anso. 14:​5, 6; 16:17) Awa amayala ashinshika adiña akola muloña Yehova diyi wayinkeli ñovu. Kapostolu Pawulu welukili nindi niyena wakeñekeleña ñovu yafumaña kudi Yehova. (2 Kor. 12:​9, 10) Walwishileña nayikatu. (Ñal. 4:​13, 14) Mpinji jikwawu, chamukalilileña cheñi kwila chuma chachiwahi. (Rom. 7:​18, 19) Nawa mpinji jikwawu, wakamineña nawa welukileña wanyi chakwila. (2 Kor. 1:​8, 9) Hela chochu, Pawulu neyi nazeyi, wekalileña nañovu. Munjilanyi? Yehova wamwinkeli Pawulu ñovu yakeñekeleña. Wamukolesheli. w23.10 12 ¶1-2

Neyi mpinji jikwawu twalwishaña nayitoñojoka yakutiya netu tudi amukunkulwayi, twatela kwanuka netu Yehova yomweni diyi watukokeleli kudi yena. (Yow. 6:44) Wamonaña yuma yayiwahi mudi etu yitunateli kukañanya kumona etu aweni, nawa weluka muchima wetu. (2 Kushi. 6:30) Dichi twatela kumukuhwelela neyi ahosha nindi twalema. (1 Yow. 3:​19, 20) Henohu kanda tudizi chalala, etu amakwawu twelileña yuma hadaha yatuleteshaña tutwalekeñahu kudinkamu nyiloña. (1 Pet. 4:3) AkaKristu ashinshika niwena alwishaña nakuzeyazeya kwakufwila kwila yuma yatama. Komana muchima wenu wayifwishaña nanyiloña? Neyi dichichidi, kwiluka nenu ambuña aYehova ashinshika anakulwisha nakukala kwokumu, kukuyikundeja. Chakutalilahu, kapostolu Pawulu waditoñesheleña neyi anuka yiluwa yakoñeliyi kunyima. (Rom. 7:24) Hela chochu, Pawulu wabalumukili mumuchima nakuleka nshidi jindi nawa wapapatisheweli. Ilaña waditeneni nindi, diyi “[wakehelamu] hakachi kawapostolu” nawa nindi “mukanshidi chikupu.”—1 Kor. 15:9; 1 Tim. 1:15. w24.03 27 ¶5-6

Chuma chimu chitunateli kudizila kuchuma chatama chafuukwiliyi Mwanta Yehowashi chidi chakwila nawu twatela kutonda amabwambu anateli kutukwasha kwikala nayilwilu yayiwahi, amabwambu amukeña Yehova nawa akeñaña kumuzañalesha. Hitwatela hohu kudikunda nawantu itunesekani nawu yaakaku. Anukenu nenu, Yehowashi wadiña kansi chikupu hadi ibwambu dindi Yehoyada. Neyi mudi nawamabwambu, dihulenu nenu: ‘Komana ankwashaña kumukuhwelela chikupu Yehova? Ankoleshaña kwovwahila nshimbi jaYehova? Komana ahoshaña hadi Yehova niyuma yadizañawu muBayibolu? Alemesha nshimbi jaNzambi? Komana anfumbaña neyi naluwañeshi?’ (Yish. 27:​5, 6, 17) Kuhosha hohu chalala, neyi amabwambu jenu hiyamukeña Yehovaku, mwatela kuleka kudikunda nawu. Ilaña neyi mukweti amabwambu amukeña Yehova, yikakelenu muloña akuyikwashaña!—Yish. 13:20. w23.09 9-10 ¶6-7

Nsona yaalefwa diyi nsona yakutachikilaku mundonda yamazu achiGiriki, nawa nsona yaomega diyi nsona yakukumishaku muniyi ndonda. Kuhitila mukuzatisha mazu akwila nawu “Alefwa nawa Omega,” Yehova nakumwekesha nindi neyi atachika chuma, wachizataña sampu nachimanishi. Chelili Yehova naleñi dehi aAdama naEva, wayilejeli nindi: “Semununenuña kulonda muvuli, mwinzeshi iseki nawa mudiidimeña.” (Kutach. 1:28) Hayina mpinji, chidi hohu neyi Yehova wahosheli nindi, “Alefwa.” Washimwini hatooka nkeñelu yindi: Mpinji yakenza hakela anyana kaAdama naEva awanina nawa ovwahila, akenzeshi iseki nikudibalumuna kwikala paradisa. Hayina mpinji yakumbidi, chidi hohu neyi Yehova wakahosha nindi, “Omega.” Hanyima yakumanisha kuleña “mawulu niiseki niyuma yejima yekalamu,” Yehova wahosheli chuma chamwekesheli hatooka nawu mwamweni wakashikija chikaninu chindi. Wamwekesheli nindi nkeñelu yindi kutalisha hadi antu niiseki yakashikijewa yejima hakumana kwefuku damu 7.—Kutach. 2:​1-3. w23.11 5 ¶13-14

Lwendu lwakufuma muBabiloni nakuya kuIsarela lwadi kuyisendela kwakwihi natukweji tuwana, ilaña Yehova wayikanini nindi chuma chejima chamwekeneña neyi chikuyikañesha kufunta wakachifumishamu. AYudeya ashinshika elukili nawu yuma yayiwahi yakatambwilawu neyi afunta yakabadika yuma yejima yadi kushiyawu. Chuma chaswejeli kulema haniyi yuma hikudifukula kwawu. MuBabiloni himwadiñahu tembeli yaYehovaku. Himwadiñahu kameña kakulambwilahu aIsarela nyilambu neyi chayilejeliwu muNshimbi jaMosiku, nawa kwadiña atupristu akulambula ayina nyilambu wanyi. Kubombelahu, antu jaYehova ayibadikili nankashi kuvula kudi amayala niambanda adifukwileña kudi anzambi akutwamba, antu abulileña kumulemesha Yehova ninshimbi jindi. Dichi aYudeya amavulu nankashi amwakamineña Nzambi, atalilileña namuzañalu kufunta kwituña dawu kulonda akafuntishi kudifukula kwalala. w23.05 14-15 ¶3-4

Twakeñekaña wukwashu waspiritu yajila yaNzambi kulonda tutwalekeñahu kwikala “neyi anyana kachejeji.” Muloñadi? Muloña chakala nankashi kutwalekahu kwikala nayilwilu yayiwahi mukanu kaayi mudi yilwilu yawuzondu. (1 Tes. 4:​3-5, 7, 8) Spiritu yajila yinateli kutukwasha kukañesha yitoñojoka yamukaayi, kushilahu maana niyitoñojoka yawantu yaditaadikishaña nayitoñojoka yaNzambi. Spiritu yajila yinateli cheñi kutukwasha kwila yuma “yamwekeshaña kuwaha kwejima nikuloña.” (Efwe. 5:9) Njila yimu mutunateli kutambwila spiritu yajila hikulomba netu twiikali nayu. Yesu wahosheli nindi Yehova wakayinka “antu amulombaña spiritu yajila.” (Luka 11:13) Nawa hampinji yitwamushimekaña Yehova hamu hakupompa kwawakaKristu, twatambwilaña cheñi spiritu yajila. (Efwe. 5:​19, 20) Yilwilu yayiwahi yitunateli kwikala nayu muloña waspiritu yajila yaNzambi, yikutukwasha kwikala nachihandilu chamutiyishaña Nzambi kuwaha. w24.03 23-24 ¶13-15

Komana munakukeña kuswejelaku kwikala adiwunjika? Neyi dimu, lombelenuhu. Kudiwunjika kwekala hakachi kanyikaabu yaspiritu. (Ñal. 5: 22, 23) Dichi twatela kulomba spiritu yajila kudi Yehova kulonda yitukwashi kwikala naniwu mukaabu. Neyi tudi mukukala kukuletesha tubuli kwikala adiwunjika, ‘twalombaña’ spiritu yajila kulonda yitukwashi kwikala adiwunjika. (Luka 11:​9, 13) Tunateli cheñi kumulomba Yehova kulonda atukwashi kumona yuma neyi chayimonañayi. Kuhiñahu, hanyima yakulomba, twatela kuzata nañovu kulonda twikaleña adiwunjika ifuku niifuku. Neyi tulombaña mpinji yejima kwikala adiwunjika nawa tuzataña nañovu kudiwunjika, ichi chilwilu chikushimata mumuchima wetu nawa tukuchimwekeshaña mpinji yejima. Kwatukwashaña cheñi kutoñojoka chikupu hadi antu ashimunawu muBayibolu. MuBayibolu mwekala antu amavulu adiña adiwunjika. Neyi tutoñojokaña hadi awa antu, tunateli kudizilaku chakumwekesha chilwilu chakudiwunjika. w23.08 22 ¶10-11

Yesu wamulejeli kapostolu Petulu nindi Yehova wukumukwashaña. Yesu hamusañwiliwu, wamukoñeleli Petulu niakwawu apostolu chihayamisha chikwawu chakukwata inshi jajivulu. (Yow. 21:​4-6) Chakadi nikujina, ichi chihayamisha chamukolesheli Petulu kwiluka nindi Yehova nateli kushikena kumwinka yuma yakumujimba yakeñeleñayi. Hadaha iwu kapostolu wanukili mazu aYesu akwila nawu Yehova wukuyakamenaña antu “[asambilaña] kukeña Wanta.” (Mat. 6:33) Chumichi chamukwashili Petulu kutwamijaku mudimu wakushimwina, bayi mudimu windi wakujaha inshiku. Washimwinini chakadi woma hefuku daPentekosta 33 C.E., nakukwasha antu amavulu kwiteja nsañu yayiwahi. (Yilw. 2:​14, 37-41) Kufumahu wayikwashili aSamariya niakanyuza kumwiluka Yesu nikumulondela. (Yilw. 8:​14-17; 10:​44-48) Yehova wamuzatishili Petulu chikupu kulonda aleti antu ashiyashana muchipompelu. w23.09 20 ¶1; 23 ¶11

Chimwahitili yaaka kwakwihi nayiyedi hanyima yakwila aBabiloni anakisañani dehi Yerusalema, Mwanta Nebukaneza wakuBabiloni waloteli chilota chamwakamishili chankishi weneni. Wahosheli nindi wukujaha akakumuleja maana ejima, kushilahu niDanyeli, neyi akañanya kumuleja chilota chaloteliyi nikulumbulula muchatalishili. (Dan. 2:​3-5) Danyeli wateleleli kuzatilahu swayi; mukunkulwayi antu adi kuyijaha. “Weñilili mukachi nawa wamulombeli mwanta amwinki mpinji kulonda amulumbulwili mwanta chilota chindi.” (Dan. 2:16) Wamwekesheli kuhamuka nichikuhwelelu. Kwosi wunsahu wamwekeshaña nawu Danyeli wadiña walumbululahu dehi yilota kunyimaku. Wayilejeli akwawu adiñayi nawu “nindi alombi kudi Nzambi wamwiwulu ayitiyili luwi hanaka kajindilu.” (Dan. 2:18) Yehova waakwili akuna kulomba. Nawukwashu waNzambi, Danyeli walumbulwili chilota chaNebukaneza. Danyeli niakwawu adiñayi nawu ayijahili wanyi. w23.08 3 ¶4

Talenu yuma yayiwahi yafumaña mukudiwunjika. Neyi twadiwunjika, twekalaña namuzañalu nawa awunda. Dichi kudiwunjika kunateli kutukwasha kwikala nayitoñojoka yayiwahi nawa akola kumujimba. Neyi twikala adiwunjika nawakwetu, tukwikala nawubwambu wawuwahi nawena. Muchipompelu chetu mukwikala kunuñañana nankashi. Neyi muntu natuvuloki, kubula kuzuwa swayi kunateli kuletesha kukala kubula kuswejelaku. (Mas. 37:​8, tth.; Yish. 14:29) Ilaña chasweja kubadika, tukumwimbujolaña Tata yetu wamwiwulu nawa tukuswina chikupu kwakwihi nayena. Kudiwunjika hichilwilu chachiwahi nankashi nawa chatukwashaña! Hela chakwila hichikwikalaña chaswayi kwikala adiwunjika mpinji yejimaku, nawukwashu waYehova, tunateli kutwalekahu kwikala nanichi chilwilu. Nawa hampinji yitunakuchiñilila nakudiwunjika kwinza kwakaayi kakaha, tunateli kukuhwelela chikupu netu “disu daYehova datalaña antu ejima amutiyaña woma, antu achiñililaña kukeña kwindi kwakashinshi.” (Mas. 33:18) Dichi wejima wetu tufwileña kutwalekahu kuvwala muchima wakudiwunjika. w23.08 22 ¶7; 25 ¶16-17

Yakoba wahosheli nindi ona iyala watoñojokeleña nindi wudi nachikuhwelelu, hanu dinu yumanyi yeliliyi yamwekesheleña nawu wudi nachikuhwelelu? (Yak. 2:​1-5, 9) Yakoba wahosheli cheñi hadi muntu wamweni ‘manakwindi hela muhela wudi nawuvu hela wudana yakuda’ ilaña yena kumukwasha nehi. Hela chakwila ona muntu wahosheli nindi wadiña nachikuhwelelu hichadiña nanyidimuku, dichi chikuhwelelu chindi chadiña chamukunkulwayi. (Yak. 2:​14-16) Yakoba wahosheli hadi Rahaba muntu wamwekesheli chikupu nawu wukweti chikuhwelelu muloña wayuma yeliliyi. (Yak. 2:​25, 26) Watiyili yuma yeliliyi Yehova nawa welukili nindi wadiña nakuyikwasha aIsarela. (Yosh. 2:​9-11) Wamwekesheli chikuhwelelu muyuma yeliliyi, wakiñili ana aIsarela akakwendesha ituña ayedi hadiña mawumi awu muwubanji. Chafuminimu, iwu mumbanda wabula kuwanina nawa wabulili kwikala kaIsarela amuteneni nawu waloña, neyi chamuteneniwu Abarahama. Chuma cheliliyi chamwekeshaña hatooka kulema kwakwikala nachikuhwelelu chikweti nyidimu. w23.12 5-6 ¶12-13

Etu akaKristu, hitwakeñaña hohu kwiluka nsañu yakutachikilahu yamuBayiboluku. Nawukwashu waspiritu yajila yaNzambi, twafwilaña kwiluka “[niyuma] yakunama yaNzambi.” (1 Kor. 2:​9, 10) Kwila mushaku ntanjikilu yakutachika kudiza nkawenu kulonda musweji kuswina kwakwihi naYehova nehi? Chakutalilahu, munateli kusandujola kulonda mwiluki chayimwekesheleliyi ambuñindi akunyima kukeña nichamwekeshaña chumichi nawu ninenu wayikeña. Munateli cheñi kwiluka njila yakeñeleñayi Yehova nindi aIsarela adifukwileñamu kudi yena nakuyesekeja nanjila yakeñañayi nindi akaKristu adifukwileñamu makonu. Indi kwiji munateli kudiza hansañu yakunama yawuprofwetu washikijiliyi Yesu muchihandilu chindi chahanu hamaseki nimumudimu windi. Munateli kudiluñisha chikupu kudiza haniyi nyitu kuhitila mukuzatisha Chitwa chaKukwasha aYinsahu jaYehova haKusandujola Nsañu. Kudiza chikupu nsañu yamuBayibolu kunateli kukolesha chikupu chikuhwelelu chenu nawa kukuyikwasha ‘kumwiluka Nzambi.’—Yish. 2:​4, 5. w23.10 18-19 ¶3-5

Izu dazatishili kapostolu Petulu dakwila nawu “chikupu” muchiGiriki daya mukwila nawu “kutandumuka.” Mazu akukumishaku muniyi vasi anakumwekesha chuma chachiwahi chafumaña mukudikeña chikupu. Kwabutaña hanshidi jawamanakwetu. Tunateli kufwikija chumichi muniyi njila: Tunakwati kukeña namakasa etu ejima ayedi, neyi kwiji tunakwati ihina davuñuluka, nawa tunakukutandumuna namakasa ayedi sampu “[kunabuti] hanshidi jajivulu.” Kubuta hiizu dinakwimenaku kwanakena. Neyi ihina chidinateli kubuta hamajilu, kukeña nikwena kunateli kubuta hakuzeyazeya niyiluwa yawamanakwetu. Twatela kuyikeña chikupu akwetu akakwitiya nakuyanakena yiluwa yawu, hela chakwila mpinji jikwawu chumichi chinateli kutukalila. (Kol. 3:13) Neyi tuyanakenaña akwetu, twamwekeshaña netu twayikeña chikupu nawa netu tunakukeña kumuzañalesha Yehova. w23.11 11-12 ¶13-15

Mwanta Yosiya hadiñayi nayaaka 26, watachikili kutuñulula tembeli. Hazatileñawu iwu mudinu, awanini “mukanda waNshimbi jaYehova jahaniniyi kuhitila mudi Mosi.” Mwanta chatiyiliyi anakuwutaña, nsañu yadiñamu yamukojejeli kwovwahila chiyahosheleña. (2 Kushi. 34:​14, 19-21) Komana mukukeña kutaña Bayibolu mafuku ejima? Neyi mwatachika dehi, munakutiya kuwaha kuyitaña? Komana mwasonekañahu mavasi anateli kuyikwasha? Yosiya hadiñayi nayaaka 39, wakoñeli chiluwa chaletesheli ajimbeshi wumi windi. Wadikuhweleleli yomweni chatela alombi wunlomboli kudi Yehova. (2 Kushi. 35:​20-25) Kudi chuma chitwatela kudizilaku. Hela chakwila twakula dehi indi kwiji tunadizi Bayibolu hadi mpinji yayilehi, twatela kutwalekahu kumukeñakeña Yehova. Mukwila chumichi munabombeli kulomba wunlomboli windi mpinji yejima, kudiza Izu dindi nikuzatisha kufumba kutwatambwilaña kudi akaKristu apama. Chikufumamu, hitukukoñaña yiluwa yamaneniku, nawa tukwikalaña namuzañalu.—Yak. 1:25. w23.09 12 ¶15-16

Bayibolu yashimuna ambanda amavulu adiña nayilwilu yayiwahi amukeñeli Yehova nikumukalakela. Amwekesheleña iyi yilwilu,‘adiyuulileña muyilwilu’ nawa adiña “ashinshika muyuma yejima.” (1 Tim. 3:11) Kubombelahu, ahela anateli kuwana ambanda akaKristu apama muyipompelu yawu adi nayilwilu yayiwahi yatela kwimbujolawu. Enu ahela atwansi, toñojokenu hadi ahela imweluka imwatela kwimbujola akweti yilwilu yayiwahi. Talenu yilwilu yayiwahi yikwetiwu; kuhiñahu monenu chimunateli kuyimwekesha oyu yilwilu. Hakwila twiikali akaKristu apama, twatela kwikala nachilwilu chakudizoza. Neyi mumbanda wadizoza, wukwikala nawubwambu wawuwahi naYehova niakwawu. Chakutalilahu, mumbanda wamukeña Yehova wovwahilaña chikupu chishina chahosha hawumutu chashaku Tata yindi wamwiwulu. (1 Kor. 11:3) Ichi chishina chashimuna enkawu mudimu wakulombola chipompelu nimuntu watela kulombola chisaka. w23.12 18-19 ¶3-5

Yehova wakeñaña nindi iyala akeñi ñodindi nawa amwakameneña kumujimba, muyitoñojoka nikuspiritu. Kwikala nawuswa wakutoñojoka chiwahi, kulemesha ambanda nikwikala washindamenewa, yakayikwasha kwikala iyala wamuwahi. Neyi munasumbuli dehi, hadaha munateli kutondahu kuvwala anyana. Yumanyi yimunateli kudizila kudi Yehova kutalisha hakwikala tata yawantu wamuwahi? (Efwe. 6:4) Yehova wamulejeli Mwanindi Yesu hatooka nindi wamukeñeli nawa wamutiyileña kuwaha. (Mat. 3:17) Neyi mwikala nawanyana, yilejenuña mpinji yejima nenu mwayikeña. Yihamekenuña chakufuma hamuchima hayuma yejima yayiwahi yelañawu. Atata jawantu amwimbujolaña Yehova, akwashaña anyanawu kwikala amayala niambanda akaKristu apama. Munateli kudiloñeshela chadimu yoyinu mpinji kuzata iwu mudimu neyi muyakamenaña chiwahi antu amuchisaka chenu nimuchipompelu, nawa neyi muyimwekeshelaña kukeña nikuyisakilila.—Yow. 15:9. w23.12 28-29 ¶17-18

Hela chakwila tudi ambuña aYehova ashinshika, twamonaña kukala kwakuvulu nawa twakataña neyi chichekala kudi antu ejima. Tunateli cheñi kumona ikañesha hela ikabisha dinateli kufumina kudi antu ahela antu jaNzambi. Hela chakwila Yehova hakañeshaña kukala kwamuchidiwu kulonda kubuli kutumwekenaku, watushiika nindi wukutukwashaña. (Isa. 41:10) Nawukwashu windi, tunateli kutwalekahu kwikala namuzañalu, kufuukula chiwahi nikutwalekahu kwikala ashinshika kudi yena hela chakwila tukumona kukala kwamuchidinyi. Yehova watushiika kutwinka chuma chashimuna Bayibolu nawu “kuwunda kwaNzambi.” (Fwili. 4:​6, 7) Iku kuwunda kwatalisha mukuwunda kwamuyitoñojoka nimumuchima kutwatiyaña muloña wakwikala nawubwambu wawuwahi nayena. Iku kuwunda “kwabadika kwiluka kwejima”; kwatukwashaña nankashi. Mwalombahu dehi chikupu kudi Yehova chakwila hanyima yakulomba muchima wushikena dakuwunda? Oku kuwunda kumwatiyili “[hikuwunda] kwaNzambi.” w24.01 20 ¶2; 21 ¶4

Kumukeña Nzambi kwayileteshaña antu ashinshika kushimeka ijina dindi namuchima wejima. Mwanta Davidi welukili nindi neyi tushimekaña ijina daYehova, chochimu nakumushimeka Yehova. Neyi tutiya ijina daYehova twatoñojokaña hachekalayi, chumichi munabombeli yilwilu yindi yejima yayiwahi ninyidimu yakuhayamisha yelañayi. Davidi wakeñeleña kumwekesha nindi ijina daTata yindi dajila nawa wakeñeleña kudishimeka. Wakeñeleña kwila mwenimu ‘nayuma yejima yadiña mudi yena,’ dikwila nawu, namuchima wejima. Munjila yoyimu, aLevi adiña akutalilahu amawahi mukumushimeka Yehova. Ahosheli nakudizoza nawu mazu awu hiyashikililimu chikupu kushimeka ijina daYehova dajilaku. (Nehe. 9:5) Chakadi nikujina, iku kushimeka kwakudizoza kwakufuma hamuchima kwazañalesheli muchima waYehova. w24.02 9 ¶6

Yehova wukuyimona wanyi nindi munakañanyi muloña wakubula kushikija chikonkwanyi chayikalila. (2 Kor. 8:12) Dizilenuña kukukala kunakuyikañesha chikonkwanyi chenu. Anukenuña yuma yimwazatilahu dehi. Bayibolu yahosha nawu “Nzambi waloña nawa hakavulamena mudimu [wenuku].” (Heb. 6:10) Dichi ninenu himwatela kuvulamena yuma yimwelaku. Anukenuña yuma yimwazatilahu dehi, chidi neyi kwikala nawubwambu naYehova, kulejaku antu chekalayi, hela kupapatishewa. Neyi chochimunazati nañovu kupama nikushikija yikonkwanyi yakuspiritu yimwemikili kunyima, munateli kutwalekahu kuzata nañovu kushikija chikonkwanyi chimunemiki chayinu mpinji. Nawukwashu waYehova, munateli kushikija chikonkwanyi chenu. Hampinji yimunakutwalekahu kuzata nañovu kushikija chikonkwanyi chenu chakuspiritu, bayi muvulamena kumona Yehova chinakuyikwashayi nikuyikiswila himunakuzata nañovu kulonda mushikiji chikonkwanyi chenuku. (2 Kor. 4:7) Neyi mubula kuzeya, mwakatambwila nkisu jajivulu kumbidi.—Ñal. 6:9. w23.05 31 ¶16-18

Yehova wawanaña njila mwamwekeshelañayi kudi antu jindi nindi wayikeña nawa wayitiyaña kuwaha. Nsona jashimuna mpinji jiyedi jamboka Nzambi hamulejeliyi Yesu nindi hiMwanindi akeñayi, atiyañayi kuwaha. (Mat. 3:17; 17:5) Komana mukukeña kutiya Yehova chinakuyilejayi nindi wayitiyaña kuwaha? Yehova hahoshaña nanetu kanwa nakanwaku, ilaña wahoshaña nanetu kuhitila Mwizu dindi. Tunateli “kutiya” Izu daYehova nakutuleja nindi watutiyaña kuwaha neyi tutaña mazu aYesu ekala muNyikanda yaNsañu Yayiwahi. Yesu wamwekesheli chikupu yilwilu yekala naTata yindi. Neyi tutaña nsañu yahosha nawu Yesu wayitiyileña kuwaha akakumulondela indi ashinshika hela chakwila adiña abula kuwanina, tunateli kufwikija Yehova nakuleja etu awa mazu. (Yow. 15:​9, 15) Neyi tunakumona makabi hichinayi mukwila nawu Nzambi naleki kututiya kuwahaku. Ilaña, atukwashaña kumwekesha chitwamukeña Nzambi chikupu nikumukuhwelela.—Yak. 1:12. w24.03 28 ¶10-11