September

Nzambi wamwinka Yesu ñovu yakumanisha kukala kwejima kunakumonawu antu. Kuhitila muyihayamisha yakoñeliyi, Yesu wamwekesheli ñovu yikwetiyi yakumanisha kukala kwejima kutunateli kukañanya kumanisha etu aweni. Chakutalahu, wukweti ñovu yakutusubula kuyuma yaleteshaña antu amoneña kukala, dikwila nawu kutusubula kunshidi yitwaswana nikukukala kwafumañamu, kukata nikufwa. (Mat. 9:​1-6; Rom. 5:​12, 18, 19) Yihayamisha yakoñeliyi yamwekesheli nawu nateli kuuka yikatu “yeñi-nayeñi” kushilahu nikusañula afu. (Mat. 4:23; Yow. 11:​43, 44) Wukweti cheñi ñovu yakuwundisha mpepela yeneni nikushinda aspiritu atama. (Maku 4:​37-39; Luka 8:2) Twakoleshewaña chikupu hakwiluka netu Yehova wamwinka Mwanindi iyi ñovu! Twatela kukuhwelela chikupu netu yuma yayiwahi yatukanawu yakaleta Wanta waNzambi yakashikijewa. Yihayamisha yakoñeliyi Yesu hadiñayi hanu hamaseki neyi muntu yatukwashaña kwiluka yuma yayivulu yakakoñayi hamu neyi Mwanta wamwiwulu waWanta waNzambi. w23.04 3 ¶5-7

Neyi mudi muchipompelu cheneni nawa nenu kakavulu enu hiyayinkaña kukooleka kwakwakulahuku, munateli kwikala mukweseka kwakuleka kwakulahu. Ilaña bayi muzeya nakuleka kwakulahuku. Loñeshenuña ñakwilu jajivulu mukupompa-hikupompa. Chikufumamu, neyi anayinki wanyi kukooleka kwakwakulahu kumatachikilu akudi za, mukwikala nakukooleka kukwawu kwakwakulahu henohu kupompa kanda kumani. Neyi munakuloñesha Kaposhi Kakutalila Kakudizamu toñojokenu paragilafu niparagilafu chiyinakwatankani namutu hanashindameni chibaaba. Neyi mwila mwenimu, hadaha mukwikala nakukooleka kwakwakulahu munoyu nsañu yimunakudiza. Kubombelahu, munateli kudiloñesha kwakulahu mumaparagilafu mudi nsañu yakunama yamuBayibolu yakala kulumbulula. Muloñadi? Hadaha hakudiza haniyi nsañu kunateli kwikala hohu antu antesha akukeña kwakulahu. Indi neyi muwana nenu mpinji yejima yimwayaña nakupompa ayinkaña wanyi kukooleka kwakwakulahu? Hanjekenu nawukulombolaña henohu kupompa kanda lwihu lumukukeña kwakula. w23.04 21-22 ¶9-10

Yosefu wovwahilileña wunlomboli waYehova, nawa chumichi chamuletesheli ekali iyala wamuwahi. Hadaha hadi mpinji jisatu jashiyashana, watambwilili nshimbi kudi Nzambi jakundamini chisaka chindi. Haniji mpinji jejima, wanyakeleña kwovwahila, hela chakwila chadiña chakala kwila mwenimu. (Mat. 1:20; 2:​13-15, 19-21) Kuhitila mukulondela wunlomboli waNzambi, Yosefu wamukiñileña Mariya, kumukwasha nikumukeñela yuma yakumujimba. Toñojokenu hayuma yeliliyi Yosefu chiyaletesheli Mariya kusweja kumukeña nikumulemesha! Enu amayala, munateli kumwimbujola Yosefu kuhitila mukukeñakeña kufumba kwamuBayibolu hakwakamena yisaka yenu. Neyi mwovwahila iku kufumba, hela chakwila chikukala kwila mwenimu, mukumwekesha nenu mwamukeña ñodenu nawa mukukolesha wulu wenu. Muhela wakuVanuatu, wunashakami muwulu hadi yaaka kubadika 20, wahosheli nindi: “Neyi nfumwami akeñakeña wunlomboli waYehova nikuwuzatisha, namulemeshaña chikupu. Natiyaña kwikala wakiñewa, nawa nakuhwelelaña yuma yinafuukuliyi.” w23.05 21 ¶5

AYudeya afuntileña kufuma kuBabiloni ayileña nakwikala “antu ajila” kudi Nzambi yawu. (Kwid. 7:6) Hela chochu, ichi chatalishili wanyi mukwila nawu hiyateleleli kuhimpa yilwilu yawu hakwila amutiyisheña Yehova kuwahaku. AYudeya amavulu avwalikilili muBabiloni atoñojokeleña nikumona yuma neyi chayimweneñawu eni Babiloni. Chimwahitili yaaka yayivulu hanyima yakwila aYudeya akusambila anafunti dehi kuIsarela, Nguvulu Nehemiya wahayamini hakwiluka nindi anyana avwalikilili muIsarela hiyelukili niidimi dawaYudeyaku. (Kuhit. 6:​6, 7; Nehe. 13:​23, 24) Awa anyana adi kumukeña ñahi Yehova nikudifukula kudi yena neyi chakwila hiyatiyishishileña idimi dachiHeberuku, idimi dadeni mwasonekeleliwu Izu daNzambi? (Ezera 10:​3, 44) Dichi kudi yuma yayivulu yateleleli kuhimpawu ana aYudeya, ilaña chadi kuyipelela neyi ashakamineña muIsarela, mwafuntishileñawu kudifukula kwalala chovu-chovu.—Nehe. 8:​8, 9. w23.05 15 ¶6-7

Chawushona, hela chakwila tudi namuchima wakufwila kwilamu, indi kwiji tukweti chilwilu chakudiyuula, mpinji yikwawu tunateli kumona kukala kunateli kutukañesha. Chakutalilahu, “[yuma] yamwekanaña chakubula kukuhwelela” yinateli kuletesha tubuli kwikala nampinji yakuzatila hachikonkwanyi chetu. (Mukwa. 9:11) Hadaha tunateli kumona kukala kunateli kutuzeyesha nikutumanisha ñovu. (Yish. 24:10) Muloña wakubula kuwanina tunateli kwila yuma yikutukañesha kushikija chikonkwanyi chetu. (Rom. 7:23) Indi kwiji tunateli hohu kuzeya. (Mat. 26:43) Yumanyi yinateli kutukwasha kumanisha kukala kunakutukañesha? Anukenuña nenu neyi kudi chuma chinakuyikañesha hichinatalishi mukwila nawu munakañanyiku. Bayibolu yashimunaña nawu mpinji jikwawu tunateli kutwalekahu kumona kukala kwashiyashana. Hela chochu, yahoshaña cheñi hatooka nawu tunateli kunyamuka cheñi. Mwamweni, neyi mufwilaña kushikija chikonkwanyi chenu hela chakwila munakumona kukala, mukumwekesha kudi Yehova nenu munakukeña kumuzañalesha. Yehova wukuzañalala chikupu neyi ayimona munakutwalekahu kufwila kushikija chikonkwanyi chenu! w23.05 30 ¶14-15

Wupayiniya wamukwashaña kansi weyala kwiluka chakuzata chiwahi nankashi nawantu ashiyashana. Wamukwashaña cheñi kuzatisha chiwahi mali akwetiyi nakutondolwela kuyizatisha chatama. (Fwili. 4:​11-13) Kuzataku wupayiniya wakukwasha dichuma chatachi chalema chinateli kumusañumuna muntu kutachika mudimu wampinji yejima, chumichi chamukwashaña muntu kwikala wadiloñesha kutachika wupayiniya wampinji yejima. Wupayiniya wukuyenzunwina njila yakuzataku nyidimu yikwawu mumudimu wampinji yejima, munabombeli kuzata mudimu wakutuña hela kuzatila haBeteli. Amayala akaKristu atela kufwilaña kushikija yuma yejima yakeñekaña hakwila ashikihu kwikala akulumpi muchipompelu kulonda akalakeleña amanakwawu niahela. Bayibolu yahosha nawu amayala anakufwila kushikahu kwikala akulumpi, “[anakufwila] mudimu wawuwahi.” (1 Tim. 3:1) Chatachi, owu manakwetu watela ntahi kushikahu kwikala nkoñi wakuzatila. Ankoñi akuzatila akwashaña akulumpi munjila jashiyashana. Akulumpi niankoñi akuzatila akalakelaña amanakwawu niahela nakudizoza nawa adikitaña chikupu mumudimu wakushimwina. w23.12 28 ¶14-16

Mwanta Yosiya wadiña kansi hampinji yatachikiliyi kumukeñakeña Yehova. Wakeñeleña kumwiluka Yehova nikwila nkeñelu yindi. Hela chochu, yuma yamukalilili iwu mwanta wachidiña kansi. Wakeñekeleña kuhakwilaku kudifukula kwalala hampinji yadifukwileña antu amavulu kudi anzambi akutwamba. Nawa dicheliliyi! Henohu Yosiya kanda ashikiji yaaka 20, watachikili kufumisha kudifukula kwakutwamba mwituña. (2 Kushi. 34:​1, 2) Hela chakwila muchidi kansi chikupu, munateli kufuukulahu kumwimbujola Yosiya kuhitila mukumukeñakeña Yehova nikumusakilila hayilwilu yindi yayiwahi. Chumichi chikuyisañumuna kudihana kudi Yehova. Iku kudihana kukuyiletesha kwiladi hefuku-hefuku muchihandilu chenu? Luke, owu wapapatisheweli hadiñayi nayaaka 14, wahosheli nindi, “Kufuma ifuku dalelu, nukutwamijañaku kumukalakela Yehova muchihandilu chami nawa nukufwilaña kumuzañalesha.” (Maku 12:30) Oju nkisu kuwaha jimwakatambwila neyi ninenu mufwilaña kwila chuma chochimu! w23.09 11 ¶12-13

Hampinji yasonekeliyi kapostolu Pawulu iwu mukanda, chipompelu chamuTesalonika chadiña kanda chishikiji nichaaka chimu kufuma hichatachikili. Amayala atondewa adiñamu atela adiña kanda eluki nyidimu nawa atela aluwañesheleña. Hela chochu, ateleleli kuyilemesha. Hampinji yinakuswina lukadi lwasweja kwakwihi, twakakeñekaña kushindamena chikupu hadi akulumpi adi muchipompelu chetu kulonda akatwinkeña nshimbi kubadika nichitunakwila makonu. Hadaha hitunateli kutambwila nshimbi kudi amanakwetu akukasanji keneni kamukaayi kejima niahakasanji kamutayiku; dichi chalema kuyikeña akulumpi nikuyilemesha chayinu mpinji. Hichikweti muloña nayuma yikumwekanaku, tuhembeña yitoñojoka yetu kuhitila mukubula kusha maana hayiluwa yawu, ilaña tusheña maana hawunsahu wunakumwekesha nawu Yehova kuhitila mudi Kristu nakuyilombola awa amayala ashinshika. Neyi chakiñaña itepa mutu wamushidika, kuchiñeja kwetu kwawamwinu kwakiñaña yitoñojoka yetu. Tweluka netu yuma yidi mukanu kaayi yamukunkulwayi. (Fwili. 3:8) Kuchiñeja kwetu kwatukwashaña kwikala namuchima wawunda nikwikala adiloñesha. w23.06 11-12 ¶11-12

Ana anakutiya mutambi “[wamumbanda] wasupa” atela kufuukulahu: Komana akwiteja mutambi windi tahindi akuwukaana? Kudi yuma yayiwahi yikuletesha tutondolweleña yilwilu yawuvumbi. Iwu “mumbanda wasupa” amulumbulula nakuhosha nindi: “Menji akwiya atowala.” (Yish. 9:17) “Menji akwiya” atalisha mudihi? Bayibolu yesekeja kubulakana kweyala namumbanda adisumbula namenji amanishaña mpwila. (Yish. 5:​15-18) Eyala namumbanda adisumbula kwesekeja nanshimbi adiluñishaña kubulakana kwamuwulu. Hela chochu, chumichi chinambukiku ‘namenji akwiya.’ Chinatalishi kuyilwilu yawuvumbi yakaanishawu munshimbi. Kakavulu chumichi chazatikaña mukuswamujoka, neyi cheyañayi ikombi kakavulu mukuswamujoka. “Menji akwiya” anateli kutiyakana neyi amawahi kudi awa antu anakwila iyi yuma neyi anakutoñojoka nawu kwosi wuneluki nshidi jinakukoñawu. Adidimbaña hohu awenawu! Yehova wamonaña yuma yejima. Kujimbesha wubwambu wetu naYehova dichuma chatama nankashi chinateli kutumwekena nawa chumichi ‘hichatowala’ hela kuwahaku.—1 Kor. 6:​9, 10. w23.06 22 ¶7-9

Chumanyi chimwatela kwila neyi mumona nenu chayinu mpinji kulomba kwenu kunakufuma hamuchima wanyi, indi kwiji himunakudiluñisha mudimu wakushimwina neyi chimwelileña hakusambilaku? Bayi mukunkulula nenu spiritu yaYehova hiyidi nanenuku. Mwawanina wanyi, nawa mpinji jikwawu yitoñojoka yetu yinateli kuhimpika. Neyi iyena denu ditachika kukeha, toñojokenu hachuma chamumwekeneni kapostolu Pawulu. Hela chakwila wesekeli kumwimbujola Yesu, welukili nindi mpinji jikwawu hakwikalaña namuchima wakufwila kwila yuma yakeñeleñayi kwilaku. Pawulu wafwilileña kumanisha mudimu windi hichikweti muloña nachatiyileñayi hanoyu mpinjiku. Munjila yoyimu, bayi mufuukula kushindamena hohu hachimunakutiyaku. Dikasenu mumuchima wenu nenu mukufwilaña kwila yuma yaloña hichikweti muloña nachimunakutiyaku. Neyi mutwalekahu kwila yuma yaloña, mukuhita kwampinji munateli kuleka kutiya chimwatiyaña.—1 Kor. 9:16. w24.03 11-12 ¶12-13

Tunateli kuyimwekeshela amanakwetu niahela kukeña kuhitila mukuyilisha kwikala amabwambu jetu. (2 Kor. 6:​11-13) Muyipompelu yetu yayivulu mwekala amanakwetu niahela afuma kuyitachi yashiyashana nawa akweti yilwilu yashiyashana. Tunateli kuyimwekeshela chikupu kukeña kuhitila mukusha maana hayilwilu yawu yayiwahi. Neyi tutachika kumona akwetu neyi chayimonañayi Yehova, twamwekeshaña netu twayikeña. Chakakeñekaña kumwekesha kukeña mumpinji yalukadi lwasweja. Neyi ilu lukadi lunatachiki, Yehova wakatukiña ñahi? Talenu Yehova chayilejeliyi antu jindi kwila hampinji yamulukukiliwu Babiloni, nindi: “Yenu, enu antu jami, iñilenu mutupeka twenu twamukachi, nawa mudenzeleliku. Swamenu hakapinji kantesha sampu kuzuwa kunahiti dehi.” (Isa. 26:20) Chinamwekani neyi awa mazu anatukundami ninetu twakahita mulukadi lwasweja. w23.07 6-7 ¶14-16

Mwekeshenuña kudi antu nenu mudi amwovu. Dihulenu nenu: ‘Komana antu ammonaña nawu nekala muntu wamwovu nawa wadiwulaña yuma yikwawu? Tahindi ammonaña nawu nakalisha, nazuwa, indi kwiji nachinchika? Komana natiyililaña kudi akwetu nakulondela yitoñojoka yawu neyi chinatwesheki?’ Neyi twikala amwovu tukumwekeshaña netu tunakumwimbujola Yehova niYesu. Twatela kwikala amwovu neyi yuma yinahimpiki muchihandilu. Iku kuhimpika kunateli kutuletesha kumona kukala kutwabula kukuhwelela. Hadaha tunateli kushikena kukata yikatu yamaneni. Hadaha kuhimpika munsañu jamali indi kwiji mujamapolitiki, kunateli kuletesha yuma kukala chikupu muchihandilu chetu. (Mukwa. 9:11) Nikuhimpika kwamudimu wutukweti mukuloñesha kunateli kusha chikuhwelelu chetu mukweseka. Tukutwesha kuhimpa kwesekeja nachidi yuma muchihandilu neyi twila iyi yuma yiwaana: (1) itejenu chidi yuma hanoyu mpinji, (2) toñojokenuña hayuma yimukutwesha kwila chayinu mpinji, bayi yimwelileña kunyimaku, (3) shenuña muchima hayuma yayiwahi, nawa (4) ililenuña akwenu yuma yayiwahi. w23.07 21-22 ¶7-8

Kaprofwetu Danyeli wadiña mukwenzi hampinji yamwilishiliwu eni Babiloni kwikala kayili nakumufumisha kumukala wawu nakumutwala kwakulehi. Ilaña chakadi nikujina, Danyeli wayitiyishileña kuwaha antu amutwalili muwunkoli. Muloña amweni ‘chamwekeneñayi hanji yamujimba,’ nawu Danyeli wadiña ‘wakadi ihuji wamwekeneña chachiwahi’ nawa nawu wafumini kuchisaka chalema. (1 Sam. 16:7) Hamuloña wayumiyi, eni Babiloni amudizishili kulonda azatileña kuchipañu. (Dan. 1:​3, 4, 6) Yehova wamukeñeli Danyeli muloña wayilwilu yayiwahi yaniwu mukwenzi. Kafwampi, hadaha Danyeli wadiña muyaaka yakukumishaku yawukampululu indi kwiji yakutachika muma 20 hampinji Yehova yamuteneniyi chiwahi hamu naNowa niYoba, amayala amukalakeleli Nzambi nakashinshi hadi yaaka yayivulu. (Kutach. 5:32; 6:​9, 10; Yoba 42:​16, 17; Ezek. 14:14) Nawa Yehova watwalekelihu kumukeña Danyeli hadi yaaka yayivulu yejima yahandiliyi chiwahi.—Dan. 10:​11, 19. w23.08 2 ¶1-2

Neyi munakukeña kulanda itala, mukukeña enu aweni kumona yuma yejima yinakundami kunodu itala dimunakukeña kulanda. Dichitwatela kwila nihampinji yitunakutaña Bayibolu nikuyidiza. Neyi muyitañaña lufuchi-lufuchi, mukwiluka hohu yuma yantesha, dikwila nawu “yuma yakutachikilahu yansañu yajila yaNzambi.” (Heb. 5:12) Ilaña neyi chochimunateli kwiñila mwitala kulonda mudiluki chiwahi odu itala, dichimwatela ‘nikudiza Bayibolu’ nakanañachima kulonda mwiluki chiwahi yuma yekalamu. Njila yayiwahi yakudizilamu Bayibolu hikumona chibalu chimu chansañu chichinanuñañani nachibalu chikwawu. Fwilenuña kutiyishisha chalala chimwakuhwelela nimuloña waweni waleteshaña muchikuhweleli. Hakwila tutiyishishi chalala chaMwizu daNzambi, twatela kudiza chalala chamuBayibolu chakunama. Kapostolu Pawulu wakonkomweneni amanakwindi niahela akaKristu kudiza chikupu Izu daNzambi kulonda “[atiyishishi] chikupu mwatalisha wihi, kuleha, chiiminu nikukunama” kwachalala. Chikufumamu, ‘akushimata nikutuñewa’ muchikuhwelelu chawu. (Efwe. 3:​14-19) Ninetu dichitwatela kwila. w23.10 18 ¶1-3

MuBayibolu ashimunamu antu amakwawu adiña adiwunjika. Kwila mufuukulahu kusandujolelahu nsañu yayivulu hadi awa antu hakudiza kwankawenu nehi? Chakutalilahu, hela chakwila Davidi amuwayishili hachidiñayi kansi kulonda akekali mwanta waIsarela kumbidi, wachiñilili hadi yaaka yayivulu henohu kanda amuswanishi hawanta. ASimiyoni naAna adifukwileña kudi Yehova nakashinshi hadiña nakuchiñililawu kulonda amoni Mesiya akaniniwu. (Luka 2:​25, 36-38) Hampinji yimunakudiza haniyi nsañu, akulenu awa malwihu: Chumanyi chamukwashili iwu muntu kwikala wadiwunjika? Yumanyi yayiwahi yafumini mukudiwunjika kwindi? Nateli kumwimbujola ñahi? Munateli cheñi kwilukilahu yuma yikwawu neyi mudizaña hadi ana antu abulili kudiwunjika. (1 Sam. 13:​8-14) Munateli kudihula nenu: ‘Chumanyi chaletesheli abuli kwikala adiwunjika? Yumanyi yatama yafuminimu?’ w23.08 25 ¶15

Kapostolu Petulu wadiña washinshika; hetejeli chuma chidi chejima chimukañeshi kumulondela Yesuku. Wamwekesheli nindi wadiña washinshika hampinji yahosheliyi Yesu chuma chimu chabulili kutiyishishawu atumbanji twindi. (Yow. 6:68) Amavulu alekeli kumulondela Yesu chakadi kuhembelela ayileji chaletesheli ahoshi awa mazu. Ilaña Petulu dicheliliyi wanyi. Muloña welukili nindi Yesu hohu diyi wadiña namazu “awumi wahaya nyaaka.” Yesu welukili nindi Petulu niakwawu apostolu akumushiya. Hela chochu, Yesu wakuhweleleli chikupu nindi Petulu wukufunta nawa wukutwalekahu kwikala washinshika. (Luka 22:​31, 32) Yesu welukili nindi “spiritu yinakukeña, ilaña mujimba wunazeyi.” (Maku 14:38) Dichi, nihanyima yakumukaana kudi Petulu, Yesu hamushiyili iwu kapostolu windiku. Hanyima yakwila Yesu anamusañuli dehi, wamwekeni kudi Petulu, hadaha hampinji yadiñayi Petulu nkawindi. (Maku 16:7; Luka 24:34; 1 Kor. 15:5) Chumichi chatela chamukolesheli chikupu iwu kapostolu waneñeli! w23.09 22 ¶9-10

Nzambi wanakenaña hela kubuta hanshidi jawantu amukuhwelelaña. Wayanakenaña chikupu nawa hanukaña cheñi nshidi jawuku. (Mas. 32:1, 2) Wayimonaña awa antu nindi akadi muloña nawa aloña kushindamena hachikuhwelelu chawu. Hela chakwila ayiteneni nawu aloña, Abarahama, Davidi niakakudifukula aNzambi amakwawu ashinshika achidiña akanshidi abula kuwanina. Ilaña muloña wachikuhwelelu chawu, Nzambi wayimweneña nindi akadi muloña, sweje-e neyi ayesekeja nanana abulileña kudifukula kudi yena. (Efwe. 2:12) Neyi chamwekesheliyi hatooka kapostolu Pawulu mumukanda windi, chikuhwelelu dichuma chacheni hashindamena wubwambu wetu naNzambi. Dichichadiña nikudi Abarahama niDavidi, nawa dichichekala nikudi etu. w23.12 3 ¶6-7

Makonu akaKristu ejima akweti kukooleka kwakumulambula Yehova nyilambu kuhitila mukuzatisha mpinji yawu, ñovu niyuma yikwetiwu kulonda atwali nyidimu yaWanta waNzambi hambidi. Tunateli kumwekesha netu twalemesha kukooleka kutukweti kwakudifukula kudi Yehova neyi tumukalakelaña kwesekeja nahakumina ñovu jetu. Kapostolu Pawulu washimwini yuma yashiyashana yitwatela kwilaña mpinji yejima hampinji yitunakudifukula kudi Yehova. (Heb. 10:​22-25) Yumiyi munabombeli kulomba kudi Yehova, kushimuna kuchiñeja kwetu, kupompela hamu nawakwetu nikudikolesha wumu namukwawu, “chineli ifuku [daYehova] dinakuswina kwakwihi twileña nankashi yumiyi.” Kumakumishilu ansañu yamuchimwekeshu, kañelu kaYehova wafuntishilihu awa mazu kayedi nakukonkomwena nindi: “Difukuli kudi Nzambi!” (Chim. 19:10; 22:9) Bayi tuvulamena ichi chalala chakunama chakuspiritu chahosha hatembeli yeneni yakuspiritu yaYehova nikukooleka kweneni kutukweti kwakudifukula kudi Nzambi yetu wabadikaku! w23.10 29 ¶17-18

Wejima wetu twafwilaña “[kutwalekahu] kudikeña wumu namukwawu.” Hela chochu, twatela kwanukaña netu Yesu watusoñamishili nindi “kukeña kwawantu amavulu [kukukehaña].” (Mat. 24:12) Yesu watalishili wanyi mukwila nindi chumichi chikuyimwekenaña atumbanji twindi amavulu. Hela chochu, twatela kwikala asoñama kulonda abuli kutuluwañesha kudi antu amukaayi abulaña kumwekesha kukeña. Muloña wachumichi, tuhanjekenu hanilu lwihu lwalema: Chumanyi chinateli kutukwasha kwiluka neyi twayikeña amanakwetu chikupu? Njila yimu mutunateli kwilukila chidi kukeña kwetu, hikushinshika hachitwelaña nakukala kutwamonaña muchihandilu. (2 Kor. 8:8) Kukala kumu kunateli kumwekana akushimwini kudi kapostolu Petulu nindi: “Kubombela hayuma yejimiyi, dikeñenu chikupu wumu namukwawu, muloña kukeña kwabutaña hanshidi jajivulu.” (1 Pet. 4:8) Dichi, chuma chitwelaña neyi amanakwetu analuwañeshi hela anatuneñeshi, chinateli kutukwasha kwiluka neyi twayikeña chikupu hela nehi. w23.11 10-11 ¶12-13

Neyi tunakumwekeshela antu amakwawu kukeña muchipompelu ilaña amakwawu nehi, dikwila nawu hitunakwovwahila lushimbi lwaYesu lwahosha hakukeñaku. Hela chochu, tunateli kudikunda nankashi nawantu amu kubadika amakwawu, neyi cheliliyi Yesu. (Yow. 13:23; 20:2) Ilaña kapostolu Petulu watwanukishaña nindi twatela kuzata nañovu ‘tudikeñeña nawanakwetu,’ dikwila nawu kumwekeshela amanakwetu niahela ejima kukeña neyi kwekalaña muchisaka. (1 Pet. 2:17) Petulu watukonkomwena “[kudikeña] chikupu wumu namukwawu chakufuma hamuchima.” (1 Pet. 1:22) Muniwu mukuku wamazu, kudikeña “chikupu” munabombeli kumukeña muntu hela chakwila chinakutukalila kumumwekeshela kukeña. Chakutalilahu, indi neyi manakwetu natuneñeshi hela natutiyishi kutama? Kakavulu twafwilaña kufuntisha katama nakatama chatela tumumwekesheli kukeña. Ilaña Petulu wadizilili kudi Yesu nindi ichi chilwilu hichamutiyishaña Nzambi kuwahaku. (Yow. 18:​10, 11) Petulu wasonekeli nindi: “Bayi mufuntisha katama kudi muntu wunayili katamaku, hela kutuka muntu wunayitukiku. Ilaña yikiswilenuña.” (1 Pet. 3:9) Neyi mukeña akwenu chikupu mukwikala naluwi nawa mukuyitoñojokelañaku. w23.09 28-29 ¶9-11

Twahayamaña chashikenañayi mwana kukula nakwikala mukulumpi. Chinamwekani neyi anyana akulaña hohu neyi mazewu anakumena mukanwa. Hela chochu, hakwila muntu akuli nakwikala mukaKristu wapama watela kwilahu chuma. (1 Kor. 13:11; Heb. 6:1) Hakwila twiikali mukaKristu wapama, twatela kwikala nawubwambu wakola naYehova. Twatela cheñi kwikala naspiritu yindi yajila kulonda yitukwashi kwikala nayilwilu yamutiyishaña kuwaha, kwiluka yuma yinateli kutukwasha nikudiloñeshela chadimu kuzata nyidimu yitwakekala nayu kumbidi. (Yish. 1:5) Yehova waleñeli antu kwikala iyala hela mumbanda. (Kutach. 1:27) Kafwampi, amayala niambanda aambuka chayituñawu kumujimba, ilaña aambuka cheñi munjila jikwawu. Chakutalilahu, Yehova waleñeli amayala niambanda kulonda azateña nyidimu yashiyashana, dichi atela kwikala nayilwilu nikwiluka yuma yinateli kuyikwasha kuzata nyidimu yawu chiwahi.—Kutach. 2:18. w23.12 18 ¶1-2

Komana Yesu wakeñeleña nindi antu amakwawu azatisheña ijina daTata yindi? Eña. Akulumpi jakudifukula amakwawu adiñaku mumafuku aYesu, atela amweneña nawu ijina daNzambi dadiña dajila nankashi chakwila hiyateleli kuditenaku, ilaña Yesu hetejeli iyi nsañu yabula munsona yashindameneni hatushidikilu twawantu yimukañeshi kulemesha ijina daTata yindiku. Talenu ichi chuma chamwekeni hampinji yokiliyi iyala wumu wadiña nawandemoni mwituña dawaGerasa. Antu atiyili woma nawa amulembeleli Yesu nawu afumi munidi ituña, dichi Yesu wafuminimu. (Maku 5:​16, 17) Hela chochu, Yesu wakeñeleña nindi ijina daYehova adiluki munidi ituña. Dichi wamulejeli ona iyala okiliyi nindi aleji antu, bayi yuma yamwililiyi Yesuku, ilaña yamwilililiwu kudi Yehova. (Maku 5:19) Wakeñaña nindi ninetu twileña chuma chochimu makonu, dikwila nawu, kutiyakesha ijina daTata yindi mwahita kaayi kejima! (Mat. 24:14; 28:20) Neyi twila chumichi, twamutiyishaña kuwaha Mwanta wetu, Yesu. w24.02 10 ¶10

Tukweti kukooleka chikupu kwakwikala mukuloñesha kwaYehova munanu mafuku akukuminina akala. Yuma chiyinakutaminaku mukaayi, Yehova watwinkaña chisaka chakuspiritu chawamanakwetu niahela anuñañana. (Mas. 133:1) Watukwashaña kwikala nachisaka chanuñañana chikupu. (Efwe. 5:33–6:1) Nawa watwinkaña kashinshi nimaana atukwashaña kwikala nakuwunda kwakweni kwamumuchima. Hela chochu, twatela kwikala adikita kulonda tumukalakeleña Yehova nakashinshi. Muloñadi? Muloña mpinji jikwawu tunateli kuneña muloña wayiluwa yawakwetu. Tunateli cheñi kuneña neyi etu aweni tuluwañesha, sweje-e neyi tufuntisha-funtishañahu chiluwa chochimu. Twatela kutwalekahu kumukalakela Yehova (1) neyi akwetu akakwitiya atuneñesha, (2) neyi mwinikwetu atuneñesha, nawa (3) neyi tuneña muloña wayiluwa yitunakoñi. w24.03 14 ¶1-2

Kakavulu, mwakatiyaña yuma yayimwekenaña amanakwetu niahela afuukulañahu kudikita chikupu mumudimu waYehova. Hadaha, ayili kuShikola Yawakakushimwina aWanta indi kwiji ayili kudi kukaankila kwawakakushimwina. Neyi mukutwesha kwila mwenimu, ilenumu chakadi kuumba mpinji. Antu jaYehova akeñaña njila jashiyashana jakumukalakelelamu chikupu. (Yilw. 16:9) Indi neyi chayinu mpinji mukutwesha wanyi kwila mwenimu? Bayi mutoñojoka nenu anayibadiki kudi owu akutweshaku. Chuma chalema chimwatela kwila hikutwalekahu kuumika. (Mat. 10:22) Bayi mudiwula kulema kwekala mukumukalakela Yehova kwesekeja nahanakumini ñovu jenu nichidi yuma muchihandilu chenuku. Ichi dichuma chimu chalema chinateli kuyikwasha kutwalekahu kumulondela Yesu neyi munapapatis hewi dehi.—Mas. 26:1. w24.03 10 ¶11

Tata yetu wamwiwulu watushiika nindi wukutwanakena neyi tubalumuka mumuchima. (Mas. 86:5) Dichi neyi tunabalumuki chikupu mumuchima nakuleka nshidi jitunakoñi, tunateli kukuhwelela netu mwahoshayi Yehova mwalala, nawa natwanakeni. Anukenu nenu Yehova watoñojokelañaku. Hakeñaña nindi twili yuma yitunateli kukañanya kwilaku. Wasakililaña chuma chejima chitwamwililaña, chakala hohu tunakuchiila kwesekeja nahakumina ñovu jetu. Cheñi, toñojokenu hadi antu ashimunawu muBayibolu amukalakeleleli Yehova namuchima wawu wejima. Chakutalilahu, toñojokenu hadi kapostolu Pawulu. Wadikitili chikupu hadi yaaka yayivulu, wendeli maluña amalehi nawa watuñili yipompelu yayivulu. Hela chochu, chelili yuma yihimpiki muchihandilu chindi nakumukañesha kudikita mumudimu wakushimwina, komana Nzambi walekeli kumutiya kuwaha? Inehi. Watwalekelihu kuzata kwesekeja nahakumina ñovu jindi nawa Yehova wamukiswilileña. (Yilw. 28:​30, 31) Munjila yoyimu, nyidimu yitunateli kumukalakela Yehova mpinji jikwawu yinateli kwaambuka. Ilaña chuma chasweja kulema kudi yena hikwiluka muloña waweni wutwazatilaña owu mudimu. w24.03 27 ¶7, 9

Yesu wamwekesheli kudi atumbanji twindi chatela kulombawu kuhitila muchalombeleñayi yomweni kudi Yehova. Hampinji yakalakeleñayi mudimu windi, Yesu walombeleña kakavulu. Wafuukwilileña chadimu mpinji yakulomba chineli kakavulu wadiña nanyidimu yayivulu nawa antu amavulu enjileña kudi yena. (Maku 6:​31, 45, 46) Wahindukileña nantetemena nankashi kulonda ekali nampinji yakulomba nkawindi. Mpinji yimu, walombeli wufuku wejima henohu kanda afuukuli kwila chuma chalema. (Luka 6:​12, 13) Nawa Yesu walombeli kakavulu hawufuku wakutwala kukufwa kwindi hampinji yatoñojokeleñayi hakumanisha chikunku chakala mumudimu windi wahanu hamaseki. (Mat. 26:​39, 42, 44) Chakutalilahu chaYesu chinakutudizisha nawu hela chakwila tudi nanyidimu yayivulu chamuchidinyi, twatela kwikalañaku nampinji yakulomba. Neyi chelileñayi Yesu, twatela kwikalañaku nampinji yakulomba, hadaha kuhinduka nantetemena nankashi, indi kwiji kulabañaku kukaama namelela. Neyi twilaña mwenimu, tukumwekesha kudi Yehova netu twasakililaña hanichi chawaana chalema. w23.05 3 ¶4-5

Talenu izu dakwila nawu “anakuhuñunwini” munsona yidi hewulu. Mukanda wumu wahosha hansañu yamuBayibolu walumbulula idi izu nawu “kutuhuñunukila neyi kaloña.” Iwu mwevulu wunakumwekesha Yehova chayikeñayi chikupu awayishewa! Awayishewa eluka nawu “[ayikeña] kudi Nzambi.” (Yuda 1) Kapostolu Yowanu washimwini chatiyañawu nanochu chasonekeliyi nindi: “Talenu kukeña kwasweja kwatumwekeshelayi Tata, hakututena nindi anyana kaNzambi!” (1 Yow. 3:1) Komana Yehova wamwekeshelaña hohu kukeña awayishewa? Inehi, Yehova wamwekeshaña nindi watukeña wejima wetu. Wunsahwinyi wabadika wamwekeshaña nawu Yehova watukeña? Hiifutu danyiloña. Kuhitila muchumichi, Yehova wamwekesha kukeña kwabadika kukeña kwamwekeshahu dehi muntu wudi wejima!—Yow. 3:16; Rom. 5:8. w24.01 28 ¶9-10

Vasi yidi hewulu yinamwekeshi chuma chamukwashili Davidi kwimika mushindu woma. Hela chakwila wumi windi wadiña muwubanji, watoñojokeleña chikupu hachuma chakamwililawu kudi Yehova. Davidi welukili nindi Yehova wakamupulwisha mumpinji yatelela. Kafwampi, Yehova washimwini nindi Davidi diyi wakekala mwanta waIsarela wakasinsahu. (1 Sam. 16:​1, 13) Chuma chejima chakaniniyi Yehova, Davidi wachimweneña neyi kwiji chinashikijewi dehi. Chumanyi chayishikayi Yehova kuyilila? Hitwatela kukuhwelela netu wukutukiñaña kukukala kwejima kutukumonañaku. Hela chochu, kukala kudi kwejima kutunateli kumona muniyi nshakaminu yamakonu, Yehova wakakufumishahu kwejima mukaayi kakaha kanakwinza. (Isa. 25:​7-9) Nleñi yetu wudi nañovu chikupu yakusañula afu, kutuuka yikatu nikufumishahu ejima atudimbululaña.—1 Yow. 4:4. w24.01 6 ¶12-13

Toñojokenuña hachuma chayiletesheli mudihani nikupapatishewa. Mwelili yumiyi muloña mwakeñeleña kwikala kukabadi kaYehova. Anukenu yuma yayikwashili kwiluka chikupu nenu munawani chalala. Mwamwilukili Yehova nawa mwatachikili kumulemesha nikumukeña hamu neyi Tata yenu wamwiwulu. Mwekalili nachikuhwelelu nawa mwabalumukili mumuchima. Muchima wenu wayisañumwini kuleka kwila yuma yatama nakutachika kwila yuma kwesekeja nankeñelu yaNzambi. Mwatiyili kuwaha chimwelukili nenu Nzambi nayanakeni. (Mas. 32:2) Mwatachikili kupompa nikulejaku antu yuma yayiwahi yimwadizili. Chineli mudi mukaKristu wadihana nawa wapapatishewa, ichi munakwenda munjila yatwalaña kuwumi nawa himunakufwila kufumamuku. (Mat. 7:​13, 14) Ikalenu akola mbe-e, nakutwalekahu kumukeña Yehova nikwovwahila nshimbi jindi. w23.07 17 ¶14; 19 ¶19

Neyi mutoñojokaña hakulomba kwenu kwakudihana kudi Yehova, mukwikalaña nañovu yakukaana kweseka kudi kwejima. Chakutalilahu, komana munateli kutachika kusenseka namwinikwambala? Inehi! Muloña mwadikana dehi kubula kwila chuma chamuchidiwu. Dichi mwakadikiña kuyitoñojoka yatama yasefukaña hanyima yakwila yinataandi muyitoñojoka yamuntu. Himwakaya “munjila yawantu atamaku.” (Yish. 4:​14, 15) Neyi mwanuka Yesu chazatileñayi nañovu kulonda amutiyishi Tata yindi kuwaha, mukushikena kukaana chikupu chuma chidi chejima chimuneluki nenu chikumuneñesha Nzambi, kumwadihana. (Mat. 4:10; Yow. 8:29) Yuma yimwelaña neyi munakumona kukala hela mudi mukweseka kwakwila chuma chatama, yamwekeshaña hatooka nawu munakufwila kutwalekahu kumulondela Yesu. Neyi mwilaña mwenimu, kuhwelelenu nenu Yehova wukuyikwashaña. w24.03 9-10 ¶8-10