August

Talenu yuma yalema yidi mwisamu didi hewulu: (1) Antu aloña amonaña kukala. (2) Yehova watupulwishaña mukukala kutwamonaña. Yehova watupulwishaña ñahi? Njila yimu mwatupulwishilañayi, hikutukwasha kumona yuma munjila yayiwahi hela chakwila yuma yinatami mukanu kaayi. Yehova watukana nindi tukwikalaña namuzañalu hampinji yitunakumukalakela, ilaña hatukana nindi tukwikalaña nachihandilu chakadi kumona kukalaku. (Isa. 66:14) Watulejaña nindi tusheña muchima hachihandilu chetu chakumbidi, mpinji yitwakekala nachihandilu chachiwahi chakeñañayi nindi twakadiluñisheña haya nyaaka. (2 Kor. 4:​16-18) Chayinu mpinji, watukwashaña kutwalekahu kumukalakela ifuku niifuku. (Mukeña 3:​22-24) Yumanyi yitunateli kudizila kudi akakudifukula aYehova ashinshika akunyima niamakonu? Neyi chitukumona, tunateli kumona kukala kwakadi kukuhwelela. Ilaña neyi tumushindamena Yehova, hakakañanya kutukwashaku.—Mas. 55:22. w23.04 14-15 ¶3-4

Tunateli kudizila kudi aYosefu naMariya, anyakeleña kwovwahila ana akweti wuswa wabadika nihampinji yakalileña kwila mwenimu. (Luka 2:​1-6.) Mariya hadiñayi nevumu datukweji 9, yena niYosefu amweni kweseka kwadi kuletesha abuli kwovwahila. Augustus, wayuulileña muWanta waRoma, walejeli antu ejima kuya nakudisonekesha. AYosefu naMariya ateleleli kwenda kuya kuBetelemi, lwendu lwamakilomita 150 (mamayilu 93) lwakuhita mutupidi. Ilu lwendu lwadi kuyikalila, sweje-e kudi Mariya. Awa adisumbula adi kwakamena neyi chakwila Mariya nimwana wadiña mwivumu adi kwikala hohu chiwahi. Indi neyi nyisoñu yakuvwala mwana yimuwanina munjila? Wadiña nevumu damwana wenjileña nakwikala Mesiya. Komana yumiyi yadi kuyiletesha abuli kwovwahila nfulumendi? AYosefu naMariya hiyetejeli yuma yayakamishileña kuyiletesha abuli kwovwahila nshimbiku. Yehova wayikiswilili muloña wakwovwahila kwawu. Mariya washikili chiwahi muBetelemi, wavweli mukeki wakola kumujimba nawa wakwashili kushikija wuprofwetu wamuBayibolu!—Mika 5:2. w23.10 8 ¶9; 9 ¶11-12

Indochi neyi mwatiyaña woma kwakulahu hakupompa? Kuloñesha chiwahi kunateli kuyikwasha. (Yish. 21:5) Neyi mutiyishisha nsañu yimukudiza, chikuyipelela kwakulahu hakupompa. Cheñi, ñakwilu yenu yikaleña yayihi. (Yish. 15:23; 17:27) Ñakwilu yayihi yikuyiletesha mubuli kutiya woma kwakulahu. Neyi mwakulaña ñakwilu yayihi mumazu enu, mukumwekesha nenu mwaloñesha chiwahi nawa mwatiyishisha nsañu yimunakudiza hakupompa. Indi neyi mweseka iji njila jejima ilaña muchidi kutiya woma wakwakulahu kakavulu? Ilukenu nenu Yehova wukusakilila neyi muzata kwesekeja nahakumina ñovu jenu kwakulahu. (Luka 21:​1-4) Kuzata nañovu hikunatalishi mwikala nawu mwatela kuzata kubadika muñovu jenuku. (Fwili. 4:5) Fuukulenu chuma chimunakukeña kwila, fwilenu kuchizata nawa lombenu ayinki muchima wakudiwunjika. Chatachi, hadaha chuma chimunakufwila kwila hikwakulahu hohu hela kamu muwihi. w23.04 21 ¶6-8

Kapostolu Pawulu watwesekejaña namashidika asoñama nawa anadimanyeki kulonda ayi kunjita. Mushidika wudi hamudimu amukuhwelela nawu watela kwikala wadiloñesha kuzuña njita mpinji yidi yejima. Ninetu dichitwatela kwikala. Twatwalekañahu kwikala adiloñesha nefuku daYehova kuhitila mukuvwala chuma chakujika hantulu chachikuhwelelu nikukeña, kushilahu niitepa dakuchiñeja. Chuma chakujika hantulu chakiñaña muchima wamushidika. Chikuhwelelu nikukeña jakiñaña muchima wetu wachifwikija. Jikutukwasha kutwalekahu kumukalakela Nzambi nikumulondela Yesu. Chikuhwelelu chatukwashaña kwiluka netu Yehova wakatukiswila chitwamukeñakeñaña namuchima wetu wejima. (Heb. 11:6) Chikatukwasha kutwalekahu kwikala ashinshika kudi Nlomboli yetu, Yesu, hela chakwila chakakeñekaña etu kuumika kukala kwakuvulu. Tunateli kwikala nachikuhwelelu chakola chikutukwasha kuumika kukala kutwamonaña muchihandilu kuhitila mukudiza hayakutalilahu yawantu amakonu atwalekelihu kuhemba kashinshi kawu hela chakwila ayikabishileña, indi kwiji kumona kukala kwamali. Nawa tunateli kutondolwela wubanji wekala mukusweja kukeña maheta kuhitila mukwimbujola antu apelesheliku chihandilu chawu kulonda atwamijeñaku Wanta. w23.06 10 ¶8-9

Kudiyuula hiwuswa wukwetiyi muntu wakuyuula chatiyañayi niyilwilu yindi. Ichi chilwilu chakeñekaña hakwila tushikiji yikonkwanyi yetu, sweje-e neyi owu mudimu wakola hela hitukweti muchima wakuwuzataku. Anukenu nenu, chilwilu chakudiyuula chidi hakachi kanyikaabu yaspiritu, dichi mulombenu Yehova ayinki spiritu yajila kulonda yiyikwashi mwiikali nanichi chilwilu chalema. (Luka 11:13; Ñal. 5:​22, 23) Bayi tuhembelela netu yuma chiña yakawahi chikupuku. Mukanu kaayi, yuma hiyakawahahu chikupuku. Neyi tuhembelelaña netu yuma yakawahi chikupu, hitwakashikija chikonkwanyi chetuku. Tunateli kutiya wuudi muloña chikonkwanyi chetu chinakumwekana neyi chakala nankashi kushikija. Neyi dikukala kumukweti, kwila mutachika kuzatila hanochu chikonkwanyi chenu chovu-chovu nehi? Neyi munakufwila kwikalahu nachilwilu chimu, kwila mutachika kuchimwekesha chovu-chovu nehi? Neyi munemiki chikonkwanyi chakutaña Bayibolu yejima, kwila mufuukulahu kutachika kutaña hadi kapinji kantesha hohu nehi? w23.05 29 ¶11-13

Munanu mafuku akukuminina, Yehova nakuzatisha kuloñesha kwindi kutwalekahu kutwinka yakuda yakuspiritu yatukwashaña wejima wetu kutwalekahu kwenda ‘muNjila yaKujila.’ (Isa. 35:8; 48:17; 60:17) Tunateli kuhosha netu mpinji yejima yinetejiyi muntu kudiza Bayibolu, nekali nakukooleka kwakwenda ‘muNjila yaKujila.’ Antu amu endañaku hohu chintampu chantesha, kuhiñahu afumaña munjila yeneni. Amakwawu afuukulahu kutwalekahu kwenda muniyi njila sampu anashiki kunakuyawu. Kudihi kweniku kunakuyawu? Kudi ana achiñejaña kuya mwiwulu, “Njila yaKujila” yayilombolaña “[kuparadisa] yaNzambi” mwiwulu. (Chim. 2:7) Kudi ana akweti kuchiñeja kwakushakama hamaseki, iyi njila yayilombolaña kukwikala awanina hakukuma kwayaaka 1,000. Neyi munakwenda muniyi njila yeneni makonu, bayi mutala kunyimaku. Nawa bayi mufumamuku sampu munashiki mukaayi kakaha! w23.05 17 ¶15; 19 ¶16-18

Munateli kufuukulahu kudihana enu aweni kudi Yehova neyi mutoñojokaña hayuma yinayililiyi. (Isamu 116:​12-14) Bayibolu yamutena Yehova nawu hiMukakuhana “chawaana chejima chachiwahi nichawaana chejima chabadika kuwaha.” (Yak. 1:17) Chawaana chasweja kulema haniyi yawaana himulambu waMwanindi, Yesu. Toñojokenu hachumichi! Ifutu danyiloña didinaleteshi mwiikali nawubwambu wawuwahi naYehova. Nawa nayinki kukooleka kwakushakama haya nyaaka. (1 Yow. 4:​9, 10) Kudihana enu aweni kudi Yehova hinjila yimukumwekeshelamu kusakilila hakukeña kwindi kwabadika kwayimwekeshelayi niyuma yikwawu yayiwahi yayililayi.—Kuhit. 16:17; 2 Kor. 5:15. w24.03 5 ¶8

Chitwamona yilwilu yatama yidi nawantu mukanu kaayi, twatiyaña neyi chatiyiliyi muntu waloña Loti. “Waneñeli chikupu muloña wayilwilu yawukapwa nsonyi yawantu akoñaña yatama,” muloña welukili nindi Tata yetu wamwiwulu wahela yilwilu yatama. (2 Pet. 2:​7, 8) Chineli Loti wamutiyileña Nzambi woma nawa wamukeñeli, chumichi chamuletesheli kuhela yilwilu yatama yawantu adiña mwiluña mwashakamineñayi. Ninetu twashakamaña nawantu abulaña kulemesha nshimbi jaYehova. Hela chochu, tunateli kwikala nayilwilu yayiwahi neyi tutwalekahu kumukeña Nzambi nikumutiya woma munjila yayiwahi. Chayinu mpinji, Yehova watukwashaña namazu akukolesha ekala mumukanda waYishimu. AkaKristu ejima, amayala niambanda, atwansi niakulumpi, kufumba kwakuwahi kwekala muniwu mukanda kunateli kuyikwasha neyi akuzatishaña. Neyi tumutiyaña Yehova woma, tukwikala asoñama nawa hitukudikundaña nawantu akweti yilwilu yatamaku. w23.06 20 ¶1-2; 21 ¶5

Hadaha mwamonaña ikañesha dafuminaña kudi antaña jenu, indi kwiji munadihani nakuleka kufwilahu yuma yimu yakumujimba kulonda mutwamijiku Wanta waNzambi. (Mat. 6:33) Neyi dichichidi, ilukenu nenu Yehova wamonaña nyidimu yejima yimwamukalakelaña nakashinshi. (Heb. 6:10) Hadaha munadimweni enu aweni nenu mazu ahosheliyi Yesu alala, akwila nawu: “Kwosi muntu wunashiyi itala hela amanakwindi hela ahelindi hela mama yindi hela tata yindi hela anyanindi hela maha kukoola ami ninsañu yayiwahi wakabula kutambwila mapampa 100 ayumiyi makonu, matala, amanakwindi, ahelindi, amama jindi, anyana nimaha namakabisha, nawa munshakaminu yinakwinza, wumi wahaya nyaakaku.” (Maku 10:​29, 30) Yuma yayiwahi yimunatambwili yabadika chikupu yuma yidi yejima yimwashiya.—Mas. 37:4. w24.03 9 ¶5

Hampinji yadiñawu akaKristu amuYudeya munzala yakapwelendendi, amanakwetu amuchipompelu chamuAntiyoki “afuukwilihu hamuntu-hamuntu, kuhana yuma yakutemesha kudi anakwawu ashakamineña muYudeya kwesekeja nahakuminini ñovu jawu.” (Yilw. 11:​27-30) Hela chakwila amanakwetu adiña munzala yakapwelendendi ashakamineña kwakulehi, akaKristu muAntiyoki afwilileña kuyikwasha. (1 Yow. 3:​17, 18) Ninetu makonu tunateli kumwekesha wushona neyi twiluka netu akwetu mutwadifukwilaña adi mukukala kweneni. Twanyakalaña kukwashana, hadaha kuhitila mukwihula akulumpi neyi chakwila tunateli kuzataku mudimu wumu, kuhanaku yawaana kumudimu wamukaayi kejima hela kuyilombelaku ana adi mukukala. Amanakwetu niahela anateli akakeñekaña cheñi kuyikwasha muyuma yakabulishañawu hakwila akatwalekihu kuhanda. Mwanta wetu, Kristu Yesu, chakenzayi nakusompesha akatuwani tunakumwekesha wushona kulonda akatutambiki ‘twakaswani Wanta.’—Mat. 25:​34-40. w23.07 4 ¶9-10; 6 ¶12

Yesu wamwimbujoleli Yehova mukwikala wamwovu. Amutemesheli heseki kulonda ashimwini kudi “anyikoku ajimbala amwitala daIsarela.” Ilaña wamwekesheli nindi wamwovu chetejeliyi iwu mudimu. Mpinji yimu, mumbanda wumu wabulili kwikala kaIsarela wamulembeleli nindi amuukili mwanindi wamumbanda wakabakeneña “nankashi nandemoni.” Muloña wawushona Yesu welili chuma chalombeliyi iwu mumbanda, wamuukilili mwanindi. (Mat. 15:​21-28) Talenu chuma chikwawu chamwekeni. Hatachikiliyi mudimu windi, Yesu wahosheli nindi: “Wejima wukunkaana . . . , ninami nakamukaana.” (Mat. 10:33) Hanu dinu komana wamukaanini Petulu, owu wamukaanini kapampa kasatu? Inehi. Yesu welukili nindi Petulu wabalumukili chikupu mumuchima nawa wadiña nachikuhwelelu. Chamusañwiliwu, Yesu wamwekeni kudi Petulu nawa chakadi nikujina, wamulejeli nindi wamwanakeneni nawa wamukeña. (Luka 24:​33, 34) Yehova Nzambi niYesu Kristu ekala amwovu. Indi etu? Yehova wakeñaña nindi twikaleña amwovu. w23.07 21 ¶6-7

Yumanyi yitwatela kulejaku antu kulonda akuhweleli nawu chikaninu chaNzambi chahosha haParadisa mwamweni chakashikijewa? Chatachi, Yehova yomweni diyi wakana. Mukanda waChimwekeshu wahosha nawu: “Owu washakamini hetanda wahosheli nindi: ‘Talaña! Inakubalumuna yuma yejima yiikali yayiha.’” Wukweti maana, ñovu nimuchima wakufwila kushikija chikaninu chindi. Chamuchiyedi, Yehova wamonaña kushikijewa kwanichi chikaninu chindi neyi kwiji chinashikijewi dehi. Dichaletesha ahoshi nindi: “Awa mazu atelela kuyikuhwelela nawa alala. . . . Anashikijewi dehi!” Chamuchisatu, neyi Yehova atachika chuma, wachizataña sampu nachimanishi, neyi chinamwekeshiwu namazu akwila nawu: “Yami Alefwa nawa Omega.” (Chim. 21:6) Yehova wakamwekesha hatooka nindi Satana hisakutwamba nawa nakañanyi. Dichi neyi muntu ahosha nindi, “Iyi nsañu yayiwahi ilaña nakuhweleli wanyi nami yakashikijewa,” mutañilenu nikumulumbulwila chahosha Chimwekeshu 21:​5, 6. Mulejenu yuma yamwekeshaña hatooka nawu chidi hohu neyi Yehova wafwachika dehi nindi wakashikija chikaninu chindi.—Isa. 65:16. w23.11 7 ¶18-19

Yehova wamukanini Abarahama ichi chikaninu hampinji yadiñayi nayaaka 75 chakadi mwana. Komana Abarahama wamweni chashikijeweli ichi chikaninu? Chejima wanyi. Chelili nachiñilili dehi yaaka 25 kufuma hazambukiliyi Kaloña Yufurati, Abarahama wamweni mwanindi Isaka chavwalikiliyi muchihayamisha, nawa chimwahitili yaaka 60, ejikulu indi aEsawu naYakoba niwena avwalikili. (Heb. 6:15) Ilaña Abarahama hamweni anyanindi chekaliliwu muza weneni nichaswaniniwu Ituña daChikaninuku. Hela chochu, ona iyala washinshika wadiña nawubwambu wakola naNleñi yindi. (Yak. 2:23) Nawa neyi Abarahama anamusañuli, wakatiya kuwaha nankashi hakwiluka nindi muloña wachikuhwelelu nikudiwunjika kwindi, nyuza yejima hamaseki ayikiswilili! (Kutach. 22:18) Chumanyi chitunakudizilaku? Hitunateli kushikena kumona kushikijewa kwayikaninu yaYehova yejimaku. Hela chochu, neyi tudiwunjika neyi Abarahama, tunateli kukuhwelela chikupu netu Yehova wukutukiswilaña chayinu mpinji nawa wakasweja kutukiswila mukaayi kindi kakaha kashiikayi.—Maku 10:​29, 30. w23.08 24 ¶14

Hadiñayi mukwenzi, Mwanta Uziya wadiña wadizoza. Wadizili “kumutiya Nzambi walala woma.” Nawa Yehova wamukiswilili hadi yaaka 68. (2 Kushi. 26:​1-4) Uziya wemikili mushindu nyuza yayivulu yawayilumbu jawu nawa wakolesheli mpwembu jaYerusalema. (2 Kushi. 26:​6-15) Uziya wazañaleli chikupu hayuma yejima yamukwashiliwu kudi Nzambi kwila. (Mukwa. 3:​12, 13) Mwanta Uziya wenjilili kuleja akwawu kulondela yuma yayilejeleñayi. Komana chumichi chaletesheli atoñojokeña nindi nateli kwila chuma chejima chakeñeleñayi kwila? Ifuku dimu Uziya wafuukwilihu kwiñila mutembeli yaYehova nawa wadivwimbili nakufwila kwocha insensi hakameña, chuma chayikaanishiliwu anyanta kwila. (2 Kushi. 26:​16-18) Kapristu Muneni Azariya wesekeli kumukaanisha, ilaña Uziya wahilili chikupu. Chawushona, Uziya walekeli kwikala washinshika nawa Yehova wamubabesheli nambumba. (2 Kushi. 26:​19-21) Chihandilu chindi chadi kwikala chachiwahi neyi watwalekelihu kwikala wadizoza! w23.09 10 ¶9-10

Nihanyima yakwikala mukaKristu wawayishewa, kapostolu Petulu watwalekelihu kulwisha nakuzeyazeya kwindi. Mu 36 C.E., Petulu wadiña hohu hampinji yamuwayishileñawu mukanyuza Konelisu naspiritu yajila, wunsahu wamwekesheleña nawu “Nzambi hakweti chaambuku” nawa nawu akanyuza niwena anateli kwikala muchipompelu chawakaKristu. (Yilw. 10:​34, 44, 45) Kufuma haniyi mpinji Petulu wakasunukili kudiila hamu nawakanyuza, chuma chabulileñayi kwila hakusambila. Hela chochu, akaKristu aYudeya amakwawu atoñojokeleña nawu aYudeya nawakanyuza hiyatela kudiila hamuku. Helili antu amakwawu adiña naniyi yitoñojoka enzi kuAntiyoki, Petulu walekeli kudiila hamu nawamanakwindi akanyuza, hadaha watiyili woma nindi wukuneñesha akaKristu aYudeya. Kapostolu Pawulu wamweni iwu wunfwikiji nawa wamuzuwilili Petulu hamesu awantu. (Ñal. 2:​13, 14) Hela chakwila wakoñeli ichi chiluwa, Petulu wazeyeli wanyi. w23.09 22 ¶8

Kudishinshika enu aweni chakufuma hamuchima kunateli kuyikwasha kwiluka nenu kudi kuzeyazeya kumukweti, ilaña bayi muzeyaku. “Mwanta wukweti luwi” nawa wukuyikwasha kuzatilahu. (1 Pet. 2:3) Kapostolu Petulu watukolesha nindi: “Nzambi . . . wakamanisha yomweni kuyidizisha. Wakayikolesha.” Mpinji yimu Petulu wadimweni nindi washikilamu wanyi kwikala hamu naMwana kaNzambi. (Luka 5:8) Ilaña nawukwashu wawuwahi waYehova niYesu, Petulu watwalekelihu kwikala mukakumulondela Kristu. Dichi Petulu amwitejeli “kwiñila muWanta wahaya nyaaka waMwanta wetu nawa Chamwinu chetu Yesu Kristu.” (2 Pet. 1:11) Idi dadiña isomu deneni chikupu! Neyi mutwalekahu chakadi kuzeya neyi cheliliyi Petulu nawa mwiteja kuyidizisha kudi Yehova, ninenu mwakatambwila isomu dawumi wahaya nyaaka. “[Mwakatambwila] yuma yimwakuhwelela, wamwinu wenu.”—1 Pet. 1:9. w23.09 31 ¶16-17

Tabanaka yakushankulu yadiña nalubanza lumu. Lwadiña neluña deneni kwanyeñumwishiliwu mbañu mwakalakeleleñawu atupristu nyidimu yawu. Mulubanza mwadiña kameña keneni kawuneñu kakulambwilahu nyilambu yakushita, kushilahu nibeseni yawuneñu yamenji yazatishileñawu atupristu hakuditookesha awenawu henohu kanda atachiki kuzata mudimu wawu wajila. (Kwid. 30:​17-20; 40:​6-8) Makonu, amana kwaYesu awayishewa achidi hamaseki akalakelaña nakashinshi mulubanza lwamukachi lwamutembeli yakuspiritu. Beseni yeneni yamenji yadiñamu yayanukishaña chuma chalema neyi chiyatwanukishaña ninetu akaKristu ejima, kutwalekahu kwikala nayilwilu yayiwahi nawa akadi majilu kuspiritu. Hanu dinu, kudihi kwadifukwilaña “izaza deneni”? Kapostolu Yowanu wayimweni “anemani kumbidi yetanda,” demenañaku lubanza lwahanji hanu heseki, “[munakumukalakelawu Nzambi] mudimu wajila mwaana niwufuku mutembeli yindi.” (Chim. 7:​9, 13-15) Twasakililaña chikupu hakutwinka kukooleka kudi Yehova kwakudifukwila mutembeli yindi yeneni yakuspiritu! w23.10 28 ¶15-16

Njila yimu mwatwinkelañayi Yehova ñovu hikuhitila mudi akulumpi. (Isa. 32:​1, 2) Dichi neyi kudi yuma yinakuyakamisha, yilejenumu akulumpi. Neyi ayikwasha, tambwilenu wukwashu wawu. Yehova nateli kuyinka ñovu kuhitila mudi wena. Yuma yitwachiñejaña yashimunawu muBayibolu yakushakama haya nyaaka, chili muParadisa hamaseki hela muWanta wamwiwulu, niyena yinateli kutukwasha kutwalekahu kwikala akola. (Rom. 4:​3, 18, 19) Kuchiñeja kwetu kwatwinkaña ñovu yakuumika kukala, kushimwina nsañu yayiwahi nikuzata nyidimu yashiyashana muchipompelu. (1 Tes. 1:3) Iku kuchiñeja kwokumu dikwamukolesheli nikapostolu Pawulu. ‘Amushintakesheli,’ ‘waluwankeni,’ ‘amukabishili,’ nawa ‘amudimbwishili hamaseki.’ Kafwampi, mpinji jikwawu wumi windi wadiña muwubanji. (2 Kor. 4:​8-10) Pawulu wekalili nañovu yakuumika kuhitila mukusha muchima hayuma yachiñejeleñayi. (2 Kor. 4:​16-18) Pawulu washili muchima hayuma yakumbidi. Pawulu watoñojokeleña chikupu haniku kuchiñeja, nawa chafuminimu, watiyileña nindi mujimba windi “anakuwubalumuna kwikala wawuha hefuku-hefuku.” w23.10 15-16 ¶14-17

Hampinji yimunakulomba, talenu neyi diyi mpinji yatela kwakwilamu Yehova kulomba kwenu. Hadaha tukukeña netu atwakuli hohenohu chuma chitunalombi. Ilaña, twatela kwanuka netu Yehova weluka mpinji yayiwahi yatela kutukwashayi. (Heb. 4:16) Neyi tubula kutambwila hohenohu chuma chitunalombi, hadaha tukutoñojoka netu Yehova ‘Nakaani.’ Hekwawu ñakwilu yindi yidi hohu nawu ‘Hembelelaku.’ Chakutalilahu, manakwetu wakansi walombeli nindi amuuki chikatu chadiñayi nachu. Ilaña chikatu chindi chamanini wanyi. Neyi Yehova wamuukili ona manakwetu muchihayamisha, Satana wadi kumutaadikisha Nzambi nindi ona manakwetu watwalekelihu kumukalakela Yehova muloña wamuukili. (Yoba 1:​9-11; 2:4) Kubombelahu, Yehova watoñola dehi mpinji yakufumishahu yikatu yejima. (Isa. 33:24; Chim. 21:​3, 4) Nawa sampu oyu mpinji yinashiki, chayinu mpinji hitwatela kukuhwelela netu anateli kutuuka muchihayamishaku. Dichi ona manakwetu wateleleli kumulomba Yehova kulonda amwinki ñovu nikuwunda kwamuyitoñojoka kwadi kumukwasha kuumika kukala kwadiñayi naku nakutwalekahu kumukalakela Nzambi nakashinshi. w23.11 24 ¶13

Samusoni waluwañesheli nankashi, ilaña halekeli kumukalakela Yehovaku. Wakeñeli njila yakuzatilamu mudimu wamwinkeliwu kudi Nzambi wakuzuña nawaFilisitinu. (Anso 16:​28-30) Samusoni wamulembeleli Yehova nindi: “Ñiiteji niditendi nawaFilisitinu.” Nzambi walala waakwili kulomba kwaSamusoni nawa wamufuntishilili ñovu yindi yakuhayamisha. Chafuminimu, Samusoni wayimikili mushindu chikupu aFilisitinu haniyi mpinji kubadika chayishindiliyi kunyima. Hela chakwila Samusoni wamweni kukala kwakuvulu muloña wanichi chiluwa chakoñeliyi, walekeli wanyi kuzata nañovu kulonda eleña nkeñelu yaYehova. Hela chakwila tunakoñi chiluwa nawa tunakukeñeka kutuzuwila hela kujimbesha kukooleka kutukweti, hitwatela kuleka kumukalakela Yehovaku. Anukenu nenu, Yehova wadiloñesha kutwanakena. (Mas. 103:​8, 9) Hichikweti muloña nayiluwa yetuku, Yehova nateli kutuzatisha neyi chamuzatishiliyi Samusoni. w23.09 6 ¶15-16

Neyi muumika Yehova wukuyitiya kuwaha. Ichi hichinatalishi mukwila nawu Yehova watiyaña kuwaha neyi ayimona munakukabakana hela munakuhita mukukalaku. Enu yenu atiyañawu kuwaha kudi Nzambi. Kuumika kwenu dikwaleteshaña ayitiyeña kuwaha. Yenowu nkisu yitukweti! (Mas. 5:12) Anukenu nenu Abarahama womikili kweseka nawa amutiyileña kuwaha kudi Nzambi. Yehova wamumweneña nindi hiibwambu Dindi nawa wamuteneni nindi waloña. (Kutach. 15:6; Rom. 4:​13, 22) Ninetu dichuma chinateli kutumwekena. Nzambi hatutiyaña kuwaha muloña wakuvula kwanyidimu yitwamukalakelaña mumudimu windi indi kwiji kukooleka kutukwetiku. Watutiyaña kuwaha neyi tutwalekahu kuumika nakashinshi. Nawa hichikweti muloña nayaaka yitukweti, chidi yuma muchihandilu chetu hela wuswa wutukwetiku, wejima wetu tunateli kuumika. Kudihu kukala kumunakuumika nakashinshi chayinu mpinji? Neyi kudi kwoku, ilukenu nenu Nzambi nakuyitiya kuwaha. Neyi twiluka netu Nzambi watutiyaña kuwaha, tukukuhwelela chikupu muyuma yitwachiñejaña. w23.12 11 ¶13-14

Iyala mukaKristu watela kwiluka chakuhosha chiwahi nawantu. Muntu weluka chakuhosha chiwahi nawantu, watiyililaña nikwiteja yitoñojoka yawakwawu nichinakutiyawu. (Yish. 20:5) Nateli kwiluka chinakutiyayi muntu kuhitila mukumukwatila kwizu, chinakumwekanayi hamesu nichinakuzatishayi yiidi yamujimba. Kwila mwiluka chakwila chumichi chakadi kwikala nampinji yakuyiluka chiwahi awa antu nehi. Neyi muzatishaña yozelu mpinji yejima hakuhanjeka nawantu, chidi neyi kuyitemeshela maimelu hela mameseji, chakayikalilaña kuhosha nawantu mesu namesu. Dichi, ikalenuñaku nampinji yakuhosha nawantu mesu namesu. (2 Yow. 12) Iyala mukaKristu wapama watela cheñi kwiluka chakudakamena yomweni nichisaka chindi kumujimba. (1 Tim. 5:8) Mwatela kwilukahu chakuzata mudimu wumu wakayikwasha kuwana mudimu wumwatela kuzata. (Yilw. 18:​2, 3; 20:34; Efwe. 4:28) Lekenu antu ayiluki nawu mudi iyala wadikita nawa wazataña sampu namanishi mudimu wunamwinkiwu. Neyi mwilaña mwenimu, chakadi nikujina mwakawana mudimu nawa mukatwalekahu kuwuzata. w23.12 27 ¶12-13

Neyi Bayibolu yinakuhosha ‘hefuku daYehova,’ yatenaña mpinji yasompeshañayi Yehova ayilumbu jindi nakuleta wamwinu kudi antu jindi. Kunyima, mpinji jikwawu Yehova wadiña nakusompesha antu. (Isa. 13:​1, 6; Ezek. 13:5; Zef. 1:8) Munanu mafuku etu, “ifuku daYehova” dakatachika mpinji yakamulukukawu Babiloni Muneni nakushika kunjita yaAmagedoni. Hakwila twakapuluki hanodu “ifuku,” twatela kudiloñeshela chadimu yoyinu mpinji. Yesu wahosheli nindi hitwatela hohu kudiloñesha ‘nalukadi lwaswejaku,’ ilaña cheñi twatela ‘kutwalekahu kwikala adiloñesha.’ (Mat. 24:21; Luka 12:40) Mumukanda windi watachi wonenewa wayisonekeleliyi aTesalonika, kapostolu Pawulu wazatishili yakutalilahu yayivulu kulonda akwashi akaKristu kutwalekahu kwikala adiloñesha nefuku daYehova deneni dawunsompeshi. Pawulu welukili nindi ifuku daYehova dikwinza hayoyina mpinji wanyi. (2 Tes. 2:​1-3) Hela chochu, wayikolesheli amanakwindi kudiloñeshela chadimu nanidi ifuku neyi kwiji dakenza kumadiki, ninetu tunateli kuzatisha kufumba kwindi. w23.06 8 ¶1-2

Mu 1978, muTokyo, kuJapan, atuñilimu kaposhi kakalehi chikupu. Antu adiña nakujinoka neyi chakwila kakahumuka wanyi, muloña muniwu musumba mwaswejeli nyitentanshi. Chumanyi chaletesha kabuli kuhumuka? Akakutuña akituñili kakola hampinji yoyimu kekala kakwovu chakwila kanateli kudinyinkesha kulonda kabuli kuhumuka namutentanshi. AkaKristu niwena ekala neyi aka kaposhi. Munjilanyi? MukaKristu watela kwikala wakola mbe-e hampinji yoyimu watela kwikala wamwovu. Watela kwikala wakola mbe-e kutalisha kukwovwahila nshimbi jaYehova niyuma yakeñañayi. ‘Wanyakalaña kwovwahila’ nawa hetejaña chakumukanjikijaku. Munjila yikwawu, watela kwikala ‘wamwovu muchima,’ kwesekeja nachidi yuma neyi chinatwesheki hela chinateleli kwila mwenomu. (Yak. 3:17) MukaKristu watoñojokaña muniyi njila hekalaña wasweja kukalisha hela wasweja kwovwahaku. w23.07 14 ¶1-2

Yesu wamukaanini Satana hampinji yamwesekeliyi nindi akoñi nshidi nihampinji yamulejeliyi nindi afumpi kashinshi kindi kudi Nzambi. (Mat. 4:​1-11) Satana wakeñeleña chikupu nindi Yesu akoñi nshidi kulonda akañanyi kufweta ifutu danyiloña. Hazatileñayi mudimu windi hanu hamaseki, Yesu womikili kweseka kukwawu. Amukabishileña nawa akeñeleña kumujaha. (Luka 4:​28, 29; 13:31) Wadiña nakuumika yiluwa yakoñeleñawu akakumulondela. (Maku 9:​33, 34) Hampinji yamuhitañesheleñawu nakumwihujola, amukabishileña nankashi nikumuseha. Kuhiñahu amujahili munjila yayeña nawa yakasawuntu. (Heb. 12:​1-3) Womikili nkawindi kweseka kwakukumishaku, chakadi kumukiña kudi Yehova. (Mat. 27:46) Mwamweni, Yesu wakabakeni nankashi hakwila ahani ifutu danyiloña. Komana hitwaswejelañaku kumukeña Yesu neyi tutoñojoka hachadihaniniyi yomweni chakufuma hamuchima kukoola etuku? w24.01 10-11 ¶7-9

Kudiwunjika kwatukwashaña kwikala nawubwambu wawuwahi nawakwetu. Kwatukwashaña kutiyilila nakanañachima neyi akwetu anakuhosha. (Yak. 1:19) Kudiwunjika kwatukwashaña cheñi kwikala mukuwunda. Kwatukiñaña kulonda tubuli kwila yuma lufuchi nakuhosha mazu atama neyi kudi yuma yinakutwakamisha. Nawa neyi twadiwunjika, tukuzuwa swayi wanyi neyi kudi muntu wunatuneñeshi. Chatela tufuntishi katama nakatama, tukutwalekahu “[kuditiyilila] wumu namukwawu nikudanakena wumu namukwawu chakufuma hamuchima.” (Kol. 3:​12, 13) Kudiwunjika kunateli cheñi kutukwasha kufuukula chiwahi. Chatela tunyakali kufuukula, twatela kwikala nampinji yakusandujola nikutoñojoka hayuma yitunakukeña kwila. Chakutalilahu, neyi tunakukeña mudimu, hadaha tunateli kwiteja mudimu wutunashikeni kuwana katachi. Ilaña neyi twadiwunjika, tukutoñojoka hayuma yikufumamu kutalisha hawubwambu wetu nachisaka niYehova neyi twiteja iwu mudimu. Neyi twikala adiwunjika, tukutondolwelaña kufuukula chatama. w23.08 22 ¶8-9

Neyi munakuneña muloña munakulwisha nakufwila kwatama, kutoñojokaña hachikaninu chimwamukanini Yehova hampinji yimwadihanini enu aweni kudiyena, mukwikalaña nañovu yakulwisha nakweseka kumunakumona. Munjilanyi? Neyi mudihana kudi Yehova mukudibonda enu aweni. Chumichi chinayi mukwila nawu munakaani yuma yimwafwilaña niyimwakeñaña kwila yinateli kumuneñesha Yehova. (Mat. 16:24) Dichi neyi mudi mukweseka, mukushintajala wanyi nakutachika kutoñojoka chuma chimwatela kwila. Muloña mwafuukwila dehi chadimu chuma chimwatela kwila, dikwila nawu kutwalekahu kwikala ashinshika kudi Yehova. Mwakafwilaña hohu kumutiyisha Yehova kuwaha. Chimwela mwenimu, mwakela neyi cheliliyi Yoba. Hela chakwila wamweni kukala kwakuvulu kweneni chikupu, wahosheli chakufuma hamuchima nindi: “Nukuhembaña kashinshi kami!”—Yoba 27:5. w24.03 9 ¶6-7

Yehova, “Nzambi wakukeña,” wudi nanetu! (2 Kor. 13:11) Watwakamenaña hamuntu-hamuntu. Tuneluki chikupu netu “[atunyeñumuka] nakukeña Kwindi kwakashinshi.” (Mas. 32:10) Neyi tutoñojokaña chikupu hakukeña kwatumwekeshelañayi, twamwilukaña chiwahi chekalayi nawa twaswinaña kwakwihi nayena. Tunateli kulomba kudi yena mukukasunuka nakumuleja netu tunakukeña atumwekesheli kukeña. Tunateli kumuleja yuma yejima yinakutwakamisha, nakukuhwelela netu neluki kukala kutunakuhitamu nawa nakufwila chikupu kutukwasha. (Mas. 145:19) Neyi chatukwashaña kesi kutiya iyena neyi kunatuuti, kukeña kwaYehova nikwena kunateli kutukundeja hampinji yitunakumona kweseka nikukala. Kukeña kwaYehova kukweti ñovu chikupu nawa kwovwaha. Dichi itejenu kukeña kwaYehova kunateli kuyikundeja nikuyikwasha kwikala nakuwunda. Nawa wejima wetu tumwekesheña netu twamukeña kuhitila mukuhosha netu: “Namukeña Yehova”!—Mas. 116:1. w24.01 31 ¶19-20

Yesu wakuminini hohu wanyi hakuleja antu nindi ijina daNzambi diyi Yehova. AYudeya adizishiliyi Yesu adiña eluka dehi ijina daNzambi. Ilaña Yesu ‘diyi wadiña watachi kumulumbulula chiwahi.’ (Yow. 1:​17, 18) Chakutalilahu, Nsona jachiHeberu jamwekesha nawu Yehova wukweti luwi niwushona. (Kwid. 34:​5-7) Yesu wakwashili antu kutiyishisha ichi chalala hampinji yahosheliyi hachakutalilahu chamwana wajimbeli nitata yawantu. Neyi tutaña nsañu yahosha hadi ona tata yawantu wamweni mwanindi weyala wabalumukili mumuchima “henohu wuchidi hahalehi,” chayiliyi nakumukinkilila, chamukumbatiliyi nichamwanakeneniyi chakufuma hamuchima, twelukaña chikupu netu Yehova wukweti luwi niwushona. (Luka 15:​11-32) Yesu wamumwekesheli Tata yindi neyi chochekalayi. w24.02 10 ¶8-9

Yehova niyena wawundishaña nikukundeja antu anakumona kukala. Tunateli kuyitiyila ñahi antu wushona nikuyikundeja neyi chelañayi Yehova? Njila yimu yitunateli kwilila mwenimu, hikwikala nayilwilu yikutukwasha kutiyila antu wushona nikuyikundeja. Yilwilwinyi yeniyi? Chumanyi chinateli kutukwasha kutwalekahu kudimwekeshela kukeña kulonda “[tutwalekihu] kudikundeja wumu namukwawu” mafuku ejima? (1 Tes. 4:18) Twatela kwikala nayilwilu yidi neyi kudakamena, kukeña anakwetu nikuditiyila luwi. (Kol. 3:12; 1 Pet. 3:8) Iyi yilwilu yinateli kutukwasha ñahi? Neyi tuyimwekeshelaña amanakwetu wushona nikuyakamena chakufuma hamuchima, tukufwilaña kuyikundeja hampinji yinakukabakanawu. Neyi chahosheliyi Yesu, “yuma yidi mumuchima diyahoshañayi muntu. Muntu wamuwahi wahoshaña yayiwahi.” (Mat. 12:​34, 35) Neyi tuyikundeja amanakwetu niahela hampinji yinakumonawu kukala, hinjila yimu yalema mutwamwekeshelaña netu twayikeña. w23.11 10 ¶10-11

Twatela kulomba wukwashu neyi tunakukeña kutiyishisha wuprofwetu wamuBayibolu. Talenu ichi chakutalilahu. Fwikijenu munakuya kwiluña dimwabula kwiluka, ilaña ibwambu denu imunakuya nindi weluka chiwahi chekala idi iluña. Neluki chiwahi himunashiki nawa neluki kwaya njila-hinjila. Chakadi nikujina, mukutiya kuwaha ibwambu denu chetejayi kuya nenu! Munjila yoyimu, Yehova weluka mpinji yitunakushakamamu nimbidi yetu. Dichi hakwila tutiyishishi wuprofwetu wamuBayibolu, twatela kudizoza nakulomba wukwashu kudi Yehova. (Dan. 2:28; 2 Pet. 1:​19, 20) Kufwana nvwali wamuwahi, Yehova wakeñaña nindi anyanindi akekali nambidi yayiwahi. (Yere. 29:11) Ilaña kwambukaku nawanvwali awuntu, Yehova nateli kushimuna yuma yakamwekana kumbidi, nawa mpinji yejima washimunaña mwalala. Wetejeli wuprofwetu kuwusoneka Mwizu dindi kulonda twiluki yuma yalema yakamwekana henohu kanda yimwekani.—Isa. 46:10. w23.08 8 ¶3-4