July

Muyuma yejima yahosheleñayi Yesu niyelileñayi, kushilahu niyihayamisha yakoñeliyi, yamwekesheli chikupu chatoñojokañayi Tata yindi nichatiyañayi. (Yow. 14:9) Yumanyi yitunateli kudizila kuyihayamisha yakoñeliyi Yesu? Yesu niTata yindi atukeña chikupu. Hadiñayi hamaseki, Yesu wamwekesheli chayikeñayi nankashi antu kuhitila mukuzatisha ñovu yindi yakuhayamisha kulonda akwashi antu akabakeneña. Mpinji yimu, amayala amputamesu ayedi amwaabilili nawu ayikwashi. (Mat. 20:​30-34) Ilukenu nenu Yesu “wayitiyilili wushona,” kuhiñahu wayuukili. Neyi chayizatishawu awa mazu aha, mazu achiGiriki abalumunawu nawu “wayitiyilili wushona” atalisha kuwushona wasweja watiyañayi muntu mukachi kamujimba windi. Iwu wushona wasweja, wamwekeshaña nawu muntu wukweti kukeña, diwu wamusañumwini niYesu kudiisha antu adiña nanzala nikuuka mukambumba. (Mat. 15:32; Maku 1:41) Twatela kukuhwelela netu Yehova, Nzambi waluwi, niMwanindi atukeña nankashi nawa chayikataña neyi tunakukabakana. (Luka 1:78; 1 Pet. 5:7) Anakufwila chikupu kufumishahu yihuñu yejima yinakukabisha antu. w23.04 3 ¶4-5

Twatela kuzata nañovu kulonda tutondolweli yuma yinateli kuletesha tutachiki kutoñojoka hayuma yatama yinasweji mukaayi kaSatana. Chuma chikutukwasha tutoñojokeña hayuma yayiwahi hikutaña nikudiza Bayibolu nkawetu. Chuma chikwawu chikutukwasha kuhemba chiwahi yitoñojoka yetu hikuya nakupompa nikushimwina. Yehova niyena watukana nindi hakwiteja atweseki kubadika muñovu jetuku. (1 Kor. 10:​12, 13) Wejima wetu twatela kulombaña chikupu hakwila tutwalekihu kwikala ashinshika kudi Yehova munanu mafuku akukuminina akala. Yehova wakeñaña nindi ‘tuhuñunwineña nyichima yetu kudi yena’ mukulomba. (Mas. 62:8) Mushimekenuña Yehova nikumusakilila hayuma yejima yelañayi. Mulombenu ayikwasheña kwikala ahamuka mumudimu wakushimwina. Mulembelelenu ayikwasheña kuumika kukala kudi kwejima nikukaana kweseka kwejima kumunakulwisha naku. Bayi mwiteja chuma chidi chejima hela muntu ayikañeshi kulomba kudi Yehova mpinji yejimaku. w23.05 7 ¶17-18

Muloñadi chitwayilaña nakupompa? Chatachi, nakumushimeka Yehova. (Mas. 26:12; 111:1) Twayaña cheñi nakupompa kulonda tudikolesheña wumu namukwawu muyinu mpinji yakala. (1 Tes. 5:11) Neyi twolola chikasa nakwakulahu, twelaña iyi yuma yiyedi yitunashimuni. Ilaña neyi tunakukeña kwakulahu, kudi yuma yinateli kutukañesha. Tunateli kutiya woma kwakulahu, indi kwiji tukukeñaña kwakulahu ilaña hiyanateli kutwinka kukooleka kwakwakulahu kakavulu neyi chitunakukeñaku. Tunateli kumanisha ñahi iku kukala? Kapostolu Pawulu wahosheli nindi twatela kusha muchima “[hakudikolesha] nankashi wumu namukwawu.” Neyi twanukaña netu tunateli kukolesha antu mwizaza hela namazu antesha hohu itukwakula akumwekesha chikuhwelelu chetu, tukufwilaña kwakulahu. Nawa neyi anakutwinka kukooleka wanyi kwakwakulahu kakavulu, tunateli kutiya kuwaha netu akwetu niwena muchipompelu akwikala nakukooleka kwakwakulahu.—1 Pet. 3:8. w23.04 20 ¶1-3

Mwanta wabidikili mbila! AYudeya, ana ashakamini muwunkoli muBabiloni hadi yaaka 70, mpinji yashikili yakufunta kumukala wawu, kuIsarela. (Ezera 1:​2-4) Yehova hohu diyi wateleleli kwila chumichi. Babiloni hadiña nakuumbaku ankoliku. (Isa. 14:​4, 17) Ilaña Babiloni amushindili, nawa nyuuli wamuha wayilejeli aYudeya nindi anateli kufumamu. KaYudeya wejima, sweje-e nyitu yayisaka, ateleleli kufuukulahu kufuma muBabiloni hela kushala. Chumichi chatela chayikalilili nankashi. Amavulu atela ashinakajili chakwila hiyadi kutwesha kwenda aluna lwendu lwalulehiku. Nawa chineli aYudeya amavulu asemukilili muBabiloni, iwu dimukala welukiliwu hohu. Wena elukili nawu Isarela dadiña ituña dawankakulula jawu hohu. Hadaha aYudeya amakwawu adiña namaheta amavulu muBabiloni, dichi chatela chayikalilili kushiya matala awu amawahi hela jibizinisi jawu nakuya nakushakama mwituña mwabulili kwilukawu. w23.05 14 ¶1-2

Izu daNzambi datukoleshaña kutwalekahu kwikala nachilwilu chakuumika, wushona nikukeña. Luka 21:19 yahoshaña nawu: “Neyi mwakomika, mwakapulwisha mawumi enu.” AKolosi 3:12 yahoshaña nawu: “Vwalenu muchima wawushona.” Nawa 1 ATesalonika 4:​9, 10 yahoshaña nawu: “Ayidizisha dehi kudi Nzambi chakudikeña wumu namukwawu. . . . Ilaña tunakuyilembelela enu anakwetu netu, mutwalekihu chikupu kwila mwenimu.” Awa mavasi ejima ayisonekeleli atumbanji adiña amwekeshahu dehi chilwilu chakuumika, wushona nikukeña. Hela chochu, ateleleli kutwalekahu kwikala naniyi yilwilu. Ninetu dichitwatela kwila. Hakwila mwili mwenimu, shinshikenu hadi akaKristu akusambila chamwekesheliwu iyi yilwilu yejima. Kuhiñahu mukumona chimunateli kuyimbujola ana atumbanji nichimunateli kumwekesha nenu munadiloñesheli chadimu nalukadi lwasweja. Dichi neyi lukadi lwasweja lunatachiki, mwakekala mweluka dehi chakuumika nawa mwakafwilaña kutwalekahu kuumika. w23.07 3 ¶4, 8

Hela chakwila tudi awayishewa indi kwiji “anyikoku amakwawu,” twatela kutwalekahu kwenda ‘muNjila yaKujila’ hampinji yiyinakutulombola muparadisa yakuspiritu makonu nikututwala kuyuma yayiwahi yakaleta Wanta kumbidi. (Yow. 10:16) Kufuma mu 1919 C.E., antu amavulu, amayala, ambanda nianyana anafumi muBabiloni Muneni, wanta wakudifukula kwakutwamba mukaayi, nawa anatachiki kwenda muniyi njila yachifwikija. Yehova wafumishili yuma yejima yakuhukesha yadiña munjila hakwila aYudeya ejima afumineña muBabiloni endi chiwahi. (Isa. 57:14) Indi kutalisha “haNjila yaKujila” yamakonu? Hadi yaaka yayivulu yakutwala kuchaaka cha 1919, Yehova wazatishili amayala amwakamineña Nzambi kulonda awahishi njila yakufuminamu antu amuBabiloni Muneni. (Esekejenu Isaya 40:3.) Azatili mudimu wakuloñesha wakeñekeleña, dikwila nawu, mudimu wakuloñesha mukwakwa wakuspiritu, kulonda mukuhita kwampinji antu akweti nyichima yashinshika chakayipeleli kufuma muBabiloni Muneni nakwiñila muparadisa yakuspiritu, omu mwafuntishawu kudifukula kwalala kwaYehova. w23.05 15-16 ¶8-9

Yehova wakeñaña nindi tumukalakeleña namuzañalu nawa chakufuma hamuchima. (2 Kor. 9:7) Komana twatela kutwalekahu kufwila kushikija chikonkwanyi chetu chakuspiritu hela chakwila hitunakukeña kuzatilahuku? Talenu chuma chamwekeni kudi kapostolu Pawulu. Wahosheli nindi: “[Nafumbaña] chikupu mujimba wami nakuwutwala muwuduñu.” (1 Kor. 9:​25-27, tth.) Pawulu wadikanjikijileña kwila yuma yaloña hela chakwila dichafwilileñayi wanyi. Komana Yehova watiyili kuwaha hamudimu wamukalakeleliwu kudi Pawulu? Eña! Nawa Yehova wamufweteli hachazatiliyi nañovu. (2 Tim. 4:​7, 8) Ninetu Yehova watutiyaña kuwaha neyi amona tunakufwila kushikija chikonkwanyi chetu hela chakwila hitukweti muchima wakufwila kwilamuku. Watiyaña kuwaha muloña weluka nindi hela chakwila mpinji yejima hitwatiyaña kuwaha namudimu wutunakuzataku, ilaña twawuzataña muloña wakumukeña. Yehova wakatukiswila hanyidimu yitwazataña neyi chamukiswililiyi Pawulu. (Mas. 126:5) Nawa hampinji yitunakumona Yehova chinakutukiswilayi, tunateli nikutachika kwikala namuchima wakwilamu. w23.05 29 ¶9-10

Kapostolu Pawulu wesekejeli antu akabula kupuluka hefuku daYehova nawantu anakaami tulu. Hiyelukaña yuma yinakumwekana hela chinakwenda mpinjiku. Dichi, hiyelukaña chuma chalema chinamwekani hela kwilahu chumaku. Antu amavulu makonu adi mutulu twakuspiritu. (Rom. 11:8) Hiyakuhwelela muwunsahu wunakumwekesha nawu tunakushakama “mumafuku akukuminina” nawa nawu lukadi lwasweja keña lwinziku. (2 Pet. 3:​3, 4) Hela chochu, tweluka netu kufumba kwonenewa kwakutwalekahu kwikala atona, kwalema kudi etu ifuku niifuku. (1 Tes. 5:6) Hela chochu, twatela kwikala awunda muchima nawa adiloñesha. Muloñadi? Kulonda tubuli kudiñija munsañu yamapolitiki hela yuma yikwawu yinakumwekana makonu. Ikakeja dakudiñija muniyi yuma dikuswejelañaku hampinji yinakuswina ifuku daYehova kwakwihi. Hela chochu, hitwatela kwakama nachitwakelaku. Spiritu yaNzambi yinateli kutukwasha kwikala namuchima wawunda, kwikala nayitoñojoka yayiwahi nikufuukula chachiwahi.—Luka 12:​11, 12. w23.06 10 ¶6-7

Chumanyi chenzaña muyitoñojoka yenu chimwatiya ijina daSamusoni? Chakadi nikujina, mwatoñojokaña hadi iyala wadiña nañovu chikupu. Diimu. Ilaña Samusoni wafuukwili chuma chaluwa chaletesheli akabakani chikupu. Hela chochu, Yehova washili muchima hayuma yejima yeliliyi Samusoni hakumukalakela, nawa wayishili muBayibolu kulonda tudizileñaku. Yehova wamuzatishili Samusoni kwila yuma yamaneni yakuhayamisha kulonda akwashi antu jindi atondewa aIsarela. Chimwahitili yaaka yayivulu kufuma hafwiliyi Samusoni, Yehova wamwoneneni kapostolu Pawulu kumusha Samusoni hakachi kawamayala adiña nachikuhwelelu chikupu. (Heb. 11:​32-34) Chuma cheliliyi Samusoni chinateli kutukolesha. Wamushindameneni Yehova nimumpinji yakala. Tunateli kudizila kudi Samusoni niyuma yeliliyi chiyinateli kutukolesha. w23.09 2 ¶1-2

Tunateli cheñi kwikala nachilwilu chakuumika chikupu neyi tumulejañamu Yehova mpinji yejima yuma yinakutwakamisha. (1 Tes. 5:17) Hadaha himunakumona kukala kwasweja chayinu mpinjiku. Hela chochu, komana mwamulombaña Yehova nenu ayikwashi mpinji yejima yimunahili, yimunaluwankani, indi kwiji yinabuli kwiluka chakwila? Neyi mukulombaña kudi Nzambi yetu nenu ayikwasheña nakukala kumwamonaña hefuku-hefuku chayinu mpinji, himwakashintajala kulomba wukwashu neyi mumona kukala kweneni kumbidiku. Kuhiñahu, mwakeluka chikupu nenu weluka mpinji yakuyikwasha nichatela kuyikwashayi. (Mas. 27:​1, 3) Twakatwesha kuumika lukadi lwasweja ludi kumbidi neyi tuumikaña kukala kutunakumona makonu. (Rom. 5:3) Tunahoshelidi mwenimu? Amanakwetu amavulu ahoshaña nawu chomikawu kukala kumu chayikwashaña kuumika kukala kukwawu neyi kumwekana. Neyi omika kukala nawukwashu waYehova, akuhwelelaña chikupu nawu Yehova wafwilaña kuyikwasha. Nawa chineli amukuhwelela, anateli kuumika kukala kukwawu kunateli kumonawu.—Yak 1:​2-4. w23.07 3 ¶7-8

Yehova wekala wamwovu muloña wakwila wadizoza nawa wukweti wushona. Chakutalilahu, Yehova wamwekesheli nindi wadizoza hampinji yadiñayi kwakwihi nakukisañana antu atama amuSodoma. Yehova wazatishili añelu jindi kumuleja muntu waloña Loti nindi atemukili kwiluña damapidi. Loti watiyileña woma kuya kunidi iluña. Dichi walembeli nindi yena nichisaka chindi ayiteji kuya nakushakama kuZowari, tawuni yanyanya yashimwiniyi Yehova nindi wukuyikisañana. Yehova wadi kumukanjikija Loti nindi chiña ovwahili mwamulejeliyi. Ilaña wetejeli mwalombeliyi Loti, hela chakwila chumichi chadi kuletesha abuli kukisañana Zowari. (Kutach. 19:​18-22) Chimwahitili yaaka yayivulu, Yehova wayimwekesheleli antu ashakamineña muNiniva wushona. Watemesheli kaprofwetu Yona kuya nakubidika nsañu yakujilumuka kwamusumba niantu atama adiñamu. Ilaña aNiniva chabalumukiliwu mumuchima, Yehova wayitiyilili luwi nawa musumba hawujilumwiniku.—Yona 3:​1, 10; 4:​10, 11. w23.07 21 ¶5

Yumanyi yitunateli kudizila kudi Yehowashi? Wadiña neyi mutondu wukweti nyiji yabula kushimata washindameneni hamuji wahakachi. Chelili Yehoyada wadiña neyi muji wahakachi afwi, nawa mpepela chiyakunkili, dikwila nawu chenjili akakusekesha, Yehowashi wadiña neyi mutondu, wachañukili. Ichi chakutalilahu chinakumwekesha nawu hitwatela kumutiya Nzambi woma muloña wayilwilu yayiwahi yawakwetu akaKristu niantu amuchisakaku. Hakwila tutwalekihu kwikala akola kuspiritu, twatela kusweja kumwakama Nzambi nikumutiya woma kuhitila mukudiza, kutoñojoka chikupu hansañu yitunakudiza nikulomba. (Yere. 17:​7, 8; Kol. 2:​6, 7) Yehova hakeñaña nindi twileña yuma yitunateli kukañanyaku. Chuma chakeñañayi nindi twileña achishimuna haMukwakutañisha 12:​13, yahosha nawu: “Mutiyeña Nzambi walala woma nawa hembaña nshimbi jindi, muloña ichi dichuma hohu chatela kwilayi muntu.” Neyi tumutiyaña Nzambi woma, twakashinda kweseka kutwakamona kumbidi nawa twakemana akola mbe-e. Kwosi chuma chakatwesha kuluwañesha wubwambu wetu naYehovaku. w23.06 19 ¶17-19

Chitiyañenu chaNzambi chatachika nanawa mazu akwila nawu: “Owu washakamini hetanda wahosheli nindi.” (Chim. 21:5a) Awa mazu ekala hakachi kanyikuku yamazu yisatu mumukanda waChimwekeshu amwekeshaña Yehova nakuhosha yomweni muchimwenu. Dichi ichi chikaninu hiyachikana kudi kañelu wañovu indi kwiji kudi Yesu asañwiliwuku, ilaña kudi Yehova yomweni! Iwu wunsahu wunakumwekesha hatooka nawu awa mazu analondelihu alala. Tunahoshelidi mwenimu? Muloña Yehova ‘watwambaña wanyi.’ (Tit. 1:2) Mazu itwatañaña haChimwekeshu 21:​5, 6 mwamweni akashikijewa. Tuhanjekenu hezu dakwila nawu “Talaña!” Izu dachiGiriki dabalumunawu nawu “talaña!” adizatisha kakavulu mumukanda waChimwekeshu. Kuhiñahu Nzambi wahosheli nindidi? Wahosheli nindi: “Inakubalumuna yuma yejima yiikali yayiha.” Mwamweni, Yehova nakuhosha hayuma yakabalumunayi kumbidi, ilaña muloña wakwila nakuhweleli chikupu nindi wakashikija ichi chikaninu, nakuhosha neyi kwiji watachika dehi kubalumuna iyi yuma.—Isa. 46:10. w23.11 3-4 ¶7-8

Kapostolu Petulu walwishileña nakuzeyazeya kwindi. Talenu iyi yuma yamwekeni. Yesu chalumbulwileñayi chakakabakanayi nikufwa hakwila wuprofwetu wamuBayibolu wukashikijewi, Petulu wamulejeli nindi chumichi hichakamumwekenaku. (Maku 8:​31-33) Petulu niakwawu apostolu atwalekelihu kuditaadikisha kulonda eluki wabadikili hakachi kawu. (Maku 9:​33, 34) Hawufuku wakukumishaku henohu Yesu kanda afwi, Petulu waketwili itu deyala wumu. (Yow. 18:10) Hawowuna wufuku, Petulu watiyili woma nawa wamukaanini ibwambu dindi Yesu kapampa kasatu. (Maku 14:​66-72) Petulu wadilili nankashi muloña wachumichi. Yesu hamushiyili iwu kapostolu kindi waneñeliku. Hanyima yakwila Yesu anamusañuli dehi, wamwinkeli Petulu kukooleka kwakumwekesha nindi wachidiña wamukeña. Yesu wamwinkeli Petulu mudimu wakubiña anyikoku indi nakudizoza. (Yow. 21:​15-17) Petulu wetejeli kuzata mudimu wamwinkeliwu. Wadiña muYerusalema hefuku daPentekosta nawa wadiña hakachi kawantu asambililiwu kuwayisha naspiritu yajila. w23.09 22 ¶6-7

Kapostolu Petulu walejeli akwawu akulumpi nindi, “Biñenuña mukanka wanyikoku yaNzambi.” (1 Pet. 5:​1-4) Neyi mudi mukulumpi, tuneluki netu mwakeña amanakwenu niahela nawa munakukeña kuyibiña. Hela chochu, mpinji jikwawu munateli kutiya nenu munakasiki hela munazeyi nankashi chakwila himukutwesha kuzata iwu mudimuku. Chumanyi chimwatela kwila? Mulejenumu Yehova chimunakutiya. Petulu wasonekeli nindi: “Neyi kudi muntu wukweti wuswa wakukalakela akwawu, akalakaleña kushindamena hañovu jahanañayi Nzambi.” (1 Pet. 4:11) Amanakwenu niahela hadaha anakuhita mukukala kunateli kubula kumanishawu mukanu kaayi katama. Ilaña anukenu nenu “kabiña muneni,” Yesu Kristu, nateli kuyikwasha kubadika chimunateli kuyikwasha. Nateli kwila mwenomu makonu nimukaayi kakaha. Nzambi wakeñaña hohu nindi akulumpi akeñeña amanakwawu, kuyibiña nikwikala “akutalilahu kudi mukanka wanyikoku.” w23.09 29-30 ¶13-14

Twatela kutondolwela kushindamena hayitoñojoka yawantu. Neyi tumonaña yuma neyi chayimonañawu antu, tunateli kuleka kumwovwahila Yehova ninshimbi jindi. (1 Kor. 3:19) “Maana amukanu kaayi” kakavulu akojejaña antu kwila yuma yafwilaña mujimba. AkaKristu antesha adiña muPerigamu nimuTiyatira atachikili kumona yilwilu yakudifukula kudi ankishi niyakwila wuvumbi neyi chayimweneñawu antu amuyina nyisumba. Yesu wayifumbili chikupu iyi yipompelu yiyedi muloña wakwiteja yilwilu yawuvumbi. (Chim. 2:​14, 20) Makonu antu itwashakamaña nawu atukanjikijaña kwikala nayitoñojoka neyi yawu. Antu amuchisaka niakwetu anateli kutachika kutukundeja nikutukolesha kulonda tufumpi nshimbi jaNzambi. Chakutalilahu, anateli kutuleja nawu chatama wanyi kwila yuma yatama yitunakufwila nawa nawu nshimbi jamuBayibolu jakaanisha kwila wuvumbi jaleka dehi kuzatika. Mpinji jikwawu tunateli kutachika kutoñojoka netu nshimbi jatwinkayi Yehova jatiyakanaña wanyi. Hadaha tunateli nikwikala mukweseka “[kwakubadika] hayuma yasonekawu.”—1 Kor. 4:6. w23.07 16 ¶10-11

Mariya, mama Yesu, wakeñekeleña kumukolesha. Amulejeli nawu wakemita hela chakwila hadiña wasumbukaku. Wadiña kanda eluki chakukulisha anyana, ilaña watambwilili mudimu wakukulisha mwana weyala wakekala Mesiya. Nawa chineli wadiña kanda akaameñahu dehi naweyala, hanu dinu Mariya wadi kumulumbulwila ñahi iyala wamwoteli, Yosefu, iyi nsañu yejima? (Luka 1:​26-33) Mariya wekalili ñahi nañovu? Walombeli wukwashu kudi akwawu. Chakutalilahu, wamulejeli Gabireli nindi amuleji nsañu yikwawu kutalisha haniwu mudimu. (Luka 1:34) Hashimbwili wanyi, wayili “kwituña damapidi” daYuda nakuhempula ntaña yindi Elizabeta. Elizabeta wamuhamekeli Mariya nawa amwoneneni kudi Yehova kuhosha hawuprofwetu wakukolesha wahosheleña hamwana kaMariya wachidiña kanda avwaliki. (Luka 1:​39-45) Mariya wahosheli nindi Yehova wakoñeli “yuma yañovu nachikasa chindi.” (Luka 1:​46-51) Yehova wamukolesheli Mariya kuhitila mudi Gabireli niElizabeta. w23.10 14-15 ¶10-12

Naambala yawatumbanji twaKristu antesha hohu ayiwayisha naspiritu yajila, nawa adiluñishaña wubwambu wadimena naYehova. Awa a 144,000 akakalakala hamu neyi atupristu mwiwulu naYesu. (Chim. 14:1) Mwajila mwamutabanaka mwemenañaku kutondewa kwawu kwakwikala anyana kaNzambi akuspiritu hachidiwu hamaseki. (Rom. 8:​15-17) Mwajila Chikupu mwamutabanaka mwemenañaku mwiwulu, mwashakamayi Yehova. “Ihina dakujika nachu” daambwili Mwajila naMwajila Chikupu demenañaku mujimba waYesu wawuntu wamukañesheleña kwiñila mwiwulu hamu neyi Kapristu Muneni wabadika wamutembeli yakuspiritu. Chelili ahani mujimba windi kwikala mulambu wakukuula nachu antu, Yesu wayenzunwinini njila akaKristu ejima awayishewa yakuya nakwikalilamu nawumi mwiwulu. Atela cheñi kushiya nyijimba yawu yawuntu hakwila atambwili wufwetu wawu wamwiwulu.—Heb. 10:​19, 20; 1 Kor. 15:50. w23.10 28 ¶13

Gidiyoni waakwili munjila yayiwahi hamuhosholeleñawu kudi aEfuremu. (Anso. 8:​1-3) Hakwili nakuzuwaku. Wamwekesheli nindi wadiña wadizoza kuhitila mukutiyila kuyuma yayakamishileña, nawa wamanishili iku kukala mukubabala. Akulumpi akweti maana amwimbujolaña Gidiyoni kuhitila mukutiyilila nakanañachima nikwakula munjila yayiwahi neyi anakuyihoshola. (Yak. 3:13) Neyi ela mwenimu, aletaña kuwunda muchipompelu. Gidiyoni chamuhamekeliwu hakushinda aMidiyani, wahanini kalemesha kejima kudi Yehova. (Anso. 8:​22, 23) Amayala atondewa anateli kumwimbujola ñahi Gidiyoni? Atela kumuhameka Yehova hayuma yejima yinazatiwu. (1 Kor. 4:​6, 7) Chakutalilahu, neyi mukulumpi anamuhameki nawu watañishaña chiwahi, watela kulemesha kwafumaña yuma yatañishañayi, dikwila nawu Izu daNzambi, hela yuma yamudizishañawu mukuloñesha kwaYehova. Mpinji jikwawu akulumpi atela kutoñojoka neyi chakwila yuma yatañishañawu yamulemeshaña Nzambi tahindi akeñaña hohu kutiyisha akwawu kuwaha. w23.06 4 ¶7-8

Neyi anatwakuli wanyi kwesekeja nachuma chitwalomba, tunateli kudihula netu, ‘Komana chuma chinnakulomba chinateleli?’ Kakavulu, twatoñojokaña netu tweluka yuma yatutelela. Hadaha yuma yitwalombaña mukuhita kwampinji hiyinateli kutukwashaku. Neyi tunakulomba hakukala kutukweti, kunateli kwikala njila yayiwahi yitunateli kumanishilamu oku kukala kubadika njila yitunakulomba. Nawa yuma yikwawu yitwalombaña hiyinateli kwesekana nankeñelu yaYehovaku. (1 Yow. 5:14) Chakutalilahu, talenu chakutalilahu chawanvwali amulombeli Yehova nawu ayikwashili mwanawu atwalekihu kwikala muchalala. Kulomba kwamuchidiwu kunateli kumwekana neyi kudi hohu chiwahi. Ilaña Yehova kwila atukanjikija nindi tumukalakeleña nehi. Wakeñaña wejima wetu, kushilahu nianyanetu, kutondahu etu aweni kudifukula kudi yena. (Kuhit. 10:​12, 13; 30:​19, 20) Dichi anvwali atela kumulomba Yehova ayikwashi kumushika mwanawu hamuchima kulonda ekali namuchima wakumukeña Yehova nikwikala ibwambu Dindi.—Yish. 22:6; Efwe. 6:4. w23.11 21 ¶5; 23 ¶12

Tukuhosheladi netu kukundeja akwetu hinjila yimu yalema mutwamwekeshelaña netu twayikeña? Kwesekeja namukanda wumu wahosha hansañu yamuBayibolu, izu dazatishili Pawulu dakwila nawu “kukundeja” datalisha “mukwimana kwakwihi namuntu nakumukolesha hampinji yinakuhitayi mukweseka kweneni.” Dichi, neyi tukundeja mukwetu mukakwitiya wunakuhita mukukala, dikwila nawu tunakumukwasha kwimana nakutwalekahu kwenda munjila yaya kuwumi. Mpinji yejima yitukukundeja manakwetu hela muhela wunakuhita mukukala, tukumwekesha netu twamukeña chikupu. (2 Kor. 7:​6, 7, 13) Kutiyila wushona nikukundeja jendelaña hamu chikupu. Tunahoshelidi mwenimu? Neyi muntu natiyili mukwawu wushona wunakukabakana, wafwilaña kumukundeja nikwilahu chuma kulonda amukwashi. Dichi twasambilaña kutiya wushona, kuhiñahu dinu hitukumukundeja muntu. Pawulu walumbulula nindi wushona wayitiyilañayi Yehova antu, wamuleteshaña ayikundejeña. Pawulu wamulumbulula Yehova nindi “Tata wasweja luwi nawa Nzambi wakukundeja kwejima.”—2 Kor. 1:3. w23.11 9-10 ¶8-10

Akakumulondela Kristu ejima atela kukuhwelela kumona lukadi. Talenu chuma chamumwekeneni kapostolu Pawulu. Wayilejeli aTesalonika nindi: “Mpinji yitwadiña nenu, twayilejeleleña chadimu netu etu tukamona lukadi, nawa chumichi dichinamwekani.” (1 Tes. 3:4) Nawa aKorinda wayisonekeleli nindi: “Etu hitunakukeña enu anakwetu mubuli kwiluka lukadi [lutwamweniku] . . . Twelukili wanyi neyi tukuhanda hela nehi.” (2 Kor. 1:8; 11:​23-27) AkaKristu makonu, niwena anateli kukuhwelela kumona lukadi lwamuchidiwu. (2 Tim. 3:12) Chimunamukuhweleli Yesu nikumulondela, hadaha amabwambu niantaña jenu anateli kuyikabisha. Komana muloña wakwikala washinshika muyuma yejima, kunaleteshi antu ayikabisheña enu kumudimu? (Heb. 13:18) Komana anakuyikañesha kudi nfulumendi muloña wakwila mwalejeliku antu yuma yimwachiñejaña? Hela chakwila tukumona lukadi lwamuchidinyi, Pawulu wahosheli nindi tuzañalaleña. w23.12 10-11 ¶9-10

Yakoba womikili kukala kwakuvulu kwashiyashana. Anyana kaYakoba ayedi, aSimiyoni naLevi, aleteli kasawuntu muchisaka nihejina daYehova. Kubombelahu, ñoda Yakoba akeñeliyi nankashi, Racheli, wafwili hampinji yapaapileñayi mwanawu wamuchiyedi. Nawa muloña wanzala yakapwelendendi, Yakoba wayili kwituña daEjipitu henohu wakula dehi. (Kutach 35:​16-19; 37:28; 45:​9-11, 28) Mukukala kwejimiku, Yakoba halekeli kumukuhwelela Yehova niyikaninu yindiku. Yehova niyena wamwekesheli kudi Yakoba nindi wamutiyileña kuwaha. Chakutalilahu, Yehova wamwinkeli Yakoba yuma yayivulu. Nawa toñojokenu Yakoba chamusakilililiyi Yehova hampinji yadimweniyi cheñi naYosefu, mwana atoñojokeleñayi hadi mpinji yayilehi nindi wafwa dehi! Muloña wakwila Yakoba wadiña nawubwambu wakola naYehova, chumichi chamukwashili kuumika kukala kwejima kwamweneñayi. (Kutach. 30:43; 32:​9, 10; 46:​28-30) Neyi tutwalekahu kwikala nawubwambu wakola naYehova, ninetu tunateli kuumika kukala kwejima kutunamoni kutwabula kukuhwelela. w23.04 15 ¶6-7

Mwisamu 23, Davidi wamwekesheli nindi Yehova wamukeñeli nawa wamwakameneneña. Walumbulwilimu wubwambu wadiña hakachi kayena naYehova, hamuteneniyi nindi kabiña kindi. Davidi watiyili nindi wakiñewa chamwitejeliyi Yehova amulomboleña, nawa wamushindameneni chikupu. Davidi welukili nindi Yehova wukumumwekeshelaña kukeña mumafuku akuhanda kwindi kwejima. Yumanyi yamuletesheli akuhweleli muniyi njila? Davidi wamweni nindi amwakameneneña chiwahi muloña Yehova wamwinkeleña yuma yejima yakeñeleñayi. Davidi cheñi wadiña nawubwambu wawuwahi naYehova nawa amutiyileña kuwaha. Dichaletesheli akuhweleli chikupu nindi hela chakwila yuma yikakala ñahi kumbidi, Yehova wakatwalekahu kumwinka yuma yejima yakakeñañayi. Muloña wakumukuhwelela Yehova, kumumwekeshela kukeña chikupu nikumwakamena, kwamukwashili chikupu Davidi kubula kwakama ilaña kwamuletesheli kwikala namuzañalu nikumona nindi yuma yadiñayi nayu yinashikili.—Mas. 16:11. w24.01 29 ¶12-13

Kufuma tuhu hampinji yaNjita Yakaayi Yamuchiyedi, antu jaYehova mumatuña amavulu anakushimwina mukuwunda nimukukasunuka. Mwamweni, iwu mudimu wunakutaanda chikupu. Makonu amamembala aMwizanvu Dalombolaña anatwalekihu kushindamena hawunlomboli waKristu. Akeñaña nshimbi jenkañawu amanakwawu mukaayi kejima jimwekesheña Yehova niYesu chamonañawu yuma. Kuhiñahu, ankoñi añinza niakulumpi ahanaña iji nshimbi kuyipompelu. Akulumpi awayishewa adi “muchikasa . . . chachidiilu” chaKristu. (Chim. 2:1) Hela chochu, awa akulumpi awanina wanyi nawa aluwañeshaña. AMosi naYoshuwa aluwañesheleña mpinji jikwawu, neyi chelileñawu apostolu. (Kuch. 20:12; Yosh. 9:14, 15; Rom. 3:23) Hela chochu, Kristu nakumulombola chiwahi nduñu washinshika niakulumpi atondewa, nawa wukutwalekahu kuyilombola. Dichi tukweti wunsahu wawuvulu wukutukwasha kukuhwelela muwunlomboli watwinkañayi kuhitila mudi amayala atondewa anakulombola. w24.02 23-24 ¶13-14

Makonu tunateli kumutiyisha Yehova kuwaha kuhitila mukuhosha hadi yena neyena, nakuhameka nikukeña. Neyi tunakushimwina, twanukaña netu chuma chitunakufwila hikuyikwasha antu kuswina kwakwihi naYehova nikumumona Tata yetu wukweti kukeña neyi chitwamumonaña. (Yak. 4:8) Twatiyaña kuwaha kulejaku antu chamulumbululawu Yehova muBayibolu, kumwekesha kukeña kwindi, wuñanji, maana, ñovu niyilwilu yindi yikwawu yayiwahi. Twamushimekaña cheñi Yehova nikumuzañalesha neyi tuzataña nañovu kulonda tumwimbujoleña. Chitwela mwenimu, twambukañaku nawantu amukanu kaayi katama. Antu anateli kumona nawu twambukaku nawa anateli kutwihula chaletesha twiikali ambukaku. (Mat. 5:​14-16) Chitukwikalaña hamu nawu nakuhanjeka ifuku niifuku, tunateli kuyilumbulwila chaletesha twiikali ambukaku. Chikufumamu, antu akweti nyichima yashinshika akuswina kwakwihi naNzambi yetu. Neyi tumushimekaña Yehova muniji njila, tukuzañaleshaña muchima windi.—1 Tim. 2:​3, 4. w24.02 10 ¶7

Hakwila mwiikali iyala mukaKristu wapama, mwatela kwiluka yuma yinateli kuyikwasha. Yumiyi yikayikwasha kuzata chiwahi nyidimu muchipompelu, kuwana mudimu nikutwalekahu kuwuzata kulonda wuyikwasheña kudakamena enu aweni hela chisaka chenu, nawa yikayikwasha kudikunda chiwahi nawakwenu. Chakutalilahu, ilukenu kutaña nikusoneka chiwahi. Bayibolu yahosha nawu muntu watañaña Izu daNzambi hefuku-hefuku nikutoñojokahu chikupu, wukweti muzañalu nawa yuma yamuwahilaña. (Mas. 1:​1-3) Neyi atañaña Bayibolu hefuku-hefuku, wukwiluka chatoñojokañayi Yehova nawa chumichi chikumukwashaña kutoñojoka chiwahi nikwiluka chakuzatisha nsona chiwahi. (Yish. 1:​3, 4) Amanakwetu niahela atambwilaña nshimbi jashindamena haBayibolu nikufumba kudi awa amayala ashikahu. Neyi mwatañaña nikusoneka chiwahi, mukutweshaña kuloñesha chiwahi jimpanji niñakwilu jikukwashaña akwenu nikukolesha chikuhwelelu chawu. Mukutweshaña cheñi kusoneka yikuma yikuyikwashaña kukolesha chikuhwelelu chenu nikukolesha akwenu. w23.12 26-27 ¶9-11

Neyi mutiya woma, toñojokenu chikupu hayuma yakelayi Yehova kumbidi neyi Satana anamukisañani dehi. Chimwenu chamwekesheliwu muprogiramu yakupompa kweluña kwamu 2014, chamwekesheli tata yawantu wunakuhanjeka nachisaka chindi hamazu ekala ha 2 Timotewu 3:​1-5 chiyadi kuyisoneka neyi chakwila awa mazu ahosheleña hayuma chiyakekala muParadisa. Wahosheli nindi: “Mwituña dadiha mwakekala muzañalu. Antu akekala akeña akwawu, akeña yuma yakuspiritu, adizoza, akakudifukula kudi Nzambi, ovwahilaña anvwali, asakililaña, ashinshika, akeña yisaka yawu, ovwaha muchima, abulaña kutuñula akwawu, adihemba, abula kuzuwa, akeña yayiwahi, abulaña kutwamba, atiyililaña, akeña Nzambi bayi kuditiyisha aweni kuwahaku, amwakama Nzambi chikupu nawa dikundi nawantu amuchidiwu.” Komana mwahanjekaña nachisaka chenu hela akwenu akakwitiya chakekala yuma mukaayi kakaha? w24.01 6 ¶13-14

Chatukoleshaña kwiluka netu Yehova watiyaña kuwaha antu jindi ejima! Bayibolu yahosha nawu: “Yehova wayitiyaña kuwaha antu jindi.” (Mas. 149:4) Hela chochu, mpinji jikwawu amakwawu aneñaña nakudihula nawu, ‘Komana Yehova wantiyaña kuwaha halwami?’ Akakudifukula aYehova ashinshika amavulu kunyima, mpinji jikwawu alwishileña nayitoñojoka yamuchidiwu. (1 Sam. 1:​6-10; Yoba 29:​2, 4; Mas. 51:11) Bayibolu yamwekeshaña hatooka nawu antu abula kuwanina anateli kuyitiya kuwaha kudi Yehova. Munjilanyi? Twatela kumukuhwelela Yesu Kristu nikupapatishewa. (Yow. 3:16) Chitwela mwenimu, twamwekeshaña kudi antu netu tunabalumuki mumuchima nakuleka nshidi jetu nawa tunamukani Nzambi netu tukwilaña nkeñelu yindi. (Yilw. 2:38; 3:19) Yehova watiyaña kuwaha neyi twila yumiyi kulonda twiikali nawubwambu nayena. Chakala hohu tutwalekahu kuzata hakumina ñovu jetu kuhemba chikaninu chetu chakudihana, Yehova watutiyaña kuwaha nawa watumonaña nindi tudi amabwambu jindi chikupu.—Mas. 25:14. w24.03 26 ¶1-2

Ninetu tunateli kwila neyi cheliliwu atumbanji kuhitila mukutwalekahu kushimwina hela chakwila akawuswa atuleja nawu tuleki. Twatela kukuhwelela netu Yehova wakatukwasha kuzata chiwahi mudimu wetu wakushimwina. Dichi lombenu nenu mwiikali ahamuka nikwikala namaana kushilahu niwukwashu waYehova kulonda muumiki kukala. Etu amavulu tunakuumika kukala kwakumujimba hela kwamuyitoñojoka, chidi neyi kufwisha antu itwakeña, kukala kwamuchisaka, ikabisha, indi kwiji kukala kukwawu. Nawa yuma yidi neyi yipupu nimajita yinakojeji antu chiyikalileña kuumika kukala kwakuvulu kudi neyi iku. Mulejenu Yehova mukulomba chimunakutiya. Mulejenu kukala kumukweti neyi chimunateli kuleja ibwambu denu imwadikunda nindi. Kuhwelelenu nenu Yehova ‘wukuyikwasha.’ (Mas. 37:​3, 5) Kulomba chakadi kuzeya kukutukwasha ‘kuumika hitunakumona lukadi.’ (Rom. 12:12) Yehova weluka kukala kunakumonawu akakudifukula indi, “watiyaña kudila kwawu kwakulomba wukwashu.”—Mas. 145:​18, 19. w23.05 5-6 ¶12-15

Neyi kudi yuma yalema yitunakukeña kufuukula kwila, twatela kwiluka “chidi nkeñelu yaYehova,” kuhiñahu dinu twila kwesekeja naniyi nkeñelu. (Efwe. 5:17) Neyi tuwanaña yishina yamuBayibolu yinakundami kuyuma yitunakukeña kwila, dikwila nawu tunakukeñakeña yitoñojoka yaNzambi yitulomboli muyuma yitunakukeña kwila. Dichi neyi tuzatisha yishina yindi, chikutukwasha kufuukula chachiwahi. ‘Watama,’ chilumbu chetu Satana, wukukeña nindi atuleteshi tushi muchima kukufwila yuma yamukaayi kulonda tubuli kwikala nampinji yeneni yakumukalakela Nzambi. (1 Yow. 5:19) MukaKristu wukutachika kusha maana hakwikala namaheta, kutaña shikola yakumujimba, indi kwiji kutwamijaku mudimu windi wakumujimba kubadika kumukalakela Yehova. Neyi chuma chamuchidiwu chimwekana, dikwila nawu iwu mukaKristu anamuluwañeshi kudi yitoñojoka yamukaayi. Hela chochu, iyi yuma yatama wanyi, ilaña bayi tuyitwamijaku muchihandilu chetuku. w24.03 24 ¶16-17